Jehovap kinaassusersiunnginnera malissiuk
1 Jehovap inuit tamaasa ilumoorluni soqutigai. Taassuma piumasaa malillugu iliortoq kinaluunniit kinaassusersiornagu ilassisarpaa. (ap. sul. 10:34, 35) Taamatuttaaq Jesus oqaluussigaangami kinaassusersiorneq ajorpoq. (Lúk. 20:21) Taakkua maligassiuinerat Paulusitut malittariaqarparput. Taanna ima allappoq: ’Ataaseq tamarmik naalagaraat torlorfigisiminut tamanut pisoorsuusoq.’ — Rûm. 10:12.
2 Naalagaaffik pillugu nutaarsiassaq nuannersoq kikkunnut tamanut naapitatsinnut oqaluussissutigigaangatsigu tamatuma Jehova Guuti ataqqinaatissisarpaa. Qanoq tunuliaqutaqarnerat, innuttaaqatiginni sumi inississimanerat, qanoq ilinniagaqarnerat imaluunniit aningaasatigut qanoq atugaqarnerat apeqqutaatinnagu allat tusarlerniartuartariaqarpavut. (Rûm. 10:11-13) Tusaajumasut — angutit arnallu, inuusuttut utoqqaallu — oqaluussiffigineqassapput. Pulaagassanik qaangiinata tamaasali sallusuissummik tusarnissaannut periarfississavavut.
3 Tamanut soqutiginnigit: Sapinngisamik amerlanerpaat anguniagaraavut. Oqaluussiffigisartakkassinni immikkut ilinniagalinnik soorlu nakorsanik, kigutit nakorsaannik, niviarsianik, utoqqaat illuini sulisunik, eqqartuussissuserisunik, illunik titartaasartunik, ilinniartitsisunik il.il., atuagassiaatitsinnik assersuutigalugu Iteritsi!-p normuanik aalajangersimasumik soqutiginnittoqarpat, kiffartuussinermut nakkutilliisup oqaluussisartut immikkut toqqakkat pulaarnissaat atuagassiamillu neqeroornissaat isumagissavaa. Oqaluussisartut taamatut suliakkerneqartut inunnik taama ittunik attaveqallaqqissuusariaqarput, tusarliussarlu qinngaqqunnanngitsumik saqqummiussinnaasariaqarlugu.
4 Ullut ilaanni qatanngut arnaq Danmarkimi illoqarfimmi atuagassiaq pinerluttaalisitsinermut tunngasumik imalik politimesterimut saqqummiuppaa. Jehovap Nalunaajaasui soqutiginagit oqarsimavoq, kisianni atuagassiaq atuarusussimavaa. Qatanngutip aperaa ilanngutassiaq taannarpiaq parnaarussanut takuneqarsinnaanngorlugu ilisisinnaanerlugu. Akuerineqarpoq, parnaarussivimmilu akisussaasoq oqaloqatigereerlugu isumaqatigiipput parnaarussiviup atuakkanik atorniartarfianut aalajangersimasumik atuagassianik ilisiartortarsinnaasoq. Taamaalilluni parnaarussat atuagaatitsinnik atuarsinnaanngorput.
5 Inuit uummammiui atuarsinnaanngilavut. Naapitavut tamaasa oqaloqatiginerisigut takutissavarput sulinitsinni Guutip siulersuinera upperigipput. Aammattaaq inuit tusarliussap qiimmaallannartup tusarnissaanut qisuariarfiginissanullu periarfissinneqarput. (1 Tim. 2:3, 4) Piffissarput silatusaartumik atortigu kinaassusersioratalu sapinngisamik amerlanerpaat nutaarsiassamik nuannersumik anguniarnerisigut Jehova ilaartigu. — Rûm. 2:11; Evf. 5:1, 2.