Qatanngutit arnat ’Naalakkami sulisuusut’
1 Oqaatsit qulaani taaneqartut atorlugit Paulusip Romami ilagiinni qatanngutit arnat marluk, tassa Tryfæna Tryfosalu sulilluartutut allaaserai. Aammattaaq eqqaavaa qatanngut arnaq Persisimik atilik, taanna ’Naalakkami sulingaaqisoq’. Taamattaaq Føbe ’amerlasuunik ikiuisartoq’ nersorpaa. (Rûm. 16:2, 12) Biibilimi malunnartinneqarpoq Dorkas; ’taanna ajunngitsuliungaartarpoq piitsullu tunisingaartarlugit’. (apu. sul. 9:36) Ersarippoq qatanngutit arnat anersaakkut pingaartitsisut ilagiinni iluaqutaasorujussuusut.
2 Ilagiinni qatanngutit arnat sulilluartut pingaartippavut? Oqaluussinikkut suliaq annerpaaq suliaraat, Biibilimillu atuaqqissaaqateqarnerit amerlanersaat ingerlallugit nutaallu amerlasuut tapersersortarlugit. Aammattaaq meeqqat anersaakkut siuariartornissaannut ikiorlugit piffissaq annertooq atortarpaat. Sapinngisartik tamaat atorlugu asanninneq, nuannaarneq, eqqissineq ilungersornerlu ilagiit iluanni ineriartortinniartarpaat. Uitik ilaquttatillu allat Jehovamut kiffartornerulersikkumallugit assigiinngitsutigut tapersersorniartarpaat.
3 Qatanngutit arnat tamakkiisumik kiffartortut: Naalakkami sulilluartut ilaatigut taaneqarsinnaapput arnat ajoqersuiartortitat, ilaat nunami takornartani suliamik aallartitseqataasimasut. Nakkutilliisut ilagiinnut tikikkaangata nuliaat eqiasuillutik oqaluusseqataasarput qatanngutinullu arnarpassuarnut qiimmassaataasarlutik. Aammattaaq puigussanngilagut qatanngutit arnat Betelimi sulisut uummammik tamakkiisumik illernartumik kiffartorneq aallukkaat Jehovap peqatigiissortaanut iluaqutaasumik. Qatanngutivullu arnat pioneeriusut aalajaallutik ilungersorput Guuti unnersiutigalugu tusindilippassuillu sallusuissummik ilisarsinissaannik ikiorlugit.
4 Arnat taakku aalajaatsut Guutimillu mianerinnittut taamatut imminnut pilliutigeriaannaasumik inuunermi nalerisimaarneq misigaat. Nersorneqartariaqarput qiimmassarneqarnerlu tapersersorneqarnerlu tunniussinnaasarput tamaat pisariaqartillugit.
5 Kristumiut arnat aalajaallutik kiffartornermikkut tamaginnut pilluaqqussutaasarput Jehovallu peqatigiissortaani sulilluarnerat erlinangaarluni. Qatanngutit arnat taamaattut pingaartittuartartigik Jehovalu qinnuigalugu ’Naalakkami sulisuusut’ pilluaqqoqqullugit.