Qularutiginngilluinnarlugu nutaarsiassaq nuannersoq oqaluussissutiguuk

¹ Ukiuni hundredelinni siullerni Jesusip ajoqersukkani nutaarsiassamik nuannersumik oqaluusseqquai ’inuiaqatigiillu tamaasa ajoqersuganngorteqqullugit’. (Mat. 24:14; 28:19, 20) Jehovap nalunaajaasuisa peqqussut tamanna ilumoorussimavaat, ukiullu 1900-kkut naalerneranni kristumiutut qatanngutigiissuit nunani 234-ni 5,9 millionit sinnerlugit amerlassuseqalersimapput. Tamanna isumaqarpoq Ataatarput qilammiusoq unnersiutigineqangaartoq!

² Maanna ukiut 2000-kkut anguagut. Assortortitta pillaqqeqaluni suliarput pingaaqisoq, tassa oqaluussinerput ajoqersuganngortitsiniarnerpullu, akornuserniarsarai. Silarsuup matuma aaqqissuussaaneranit tatineqarneq sakkugalugu allamut saasarniarsaraatsigut, isumakuluutinik soqutigisanullu pingaannginnerusunut piffissaajarumallutalu nukissaajarumavaatigut. Aaqqissuussaaneq tamanna suut inuunitsinni pingaarnerunersut aalajangiisuutinngilarput, Guutip oqaasia aalajangiisuutipparput suna salliutinneqartariaqarnersoq, tassa Guutip piumasaatut iliornissaq. (Rûm. 12:2) Tamatuma nassatarai Biibilip oqaaqqissaarutaa naalallugu ’oqaatsip oqaluussissutiginissaa, iluarisaasukkut iluarisaanngitsukkulluunniit suliuarnissarput, kiffartuutigisarpullu naammassillugu kiffartuutiginissaa’. — 2 Tim. 4:2, 5.

³ Qulanngilluinnarnissaq ineriartortiguk: Kristumiut ’Guutip peqqusaa tamaat eqqorlugu qularatik aalajaallutik iluarluinnartariaqarput’. (Kul. 4:12) Oqaaseq ’qulannginneq’ Ordbog over det Danske Sprog-imi nassuiarneqarpoq „qularutiginagu, nalorninartinnagu ilisimasaqarneq; eqqarsaatigeqqissaareerlugu, isumaliutigereerlugu, misilittagaqarfigereerlugu assigisaaniluunniit isuma upperisarluunniit aalajaatsoq qularnaatsorlu.“ Kristumiut qularutiginngittariaqarpaat Guutip oqaasia siulittuutaasoq pinngitsoorani eqquukkumaartoq, maannakkut ullut kingullersaanni inuusugut. Paulusitut upperluartariaqarpugut. Nutaarsiassaq nuannersoq pillugu ima oqarpoq: ’Guutimit pissaataavoq uppertut tamarmik annassutissaat.’ — Rûm. 1:16.

⁴ Diaavulup angutit ajortut salloqittaapiluttullu tammartitaasimasut atortarpai allat sunnerniarlugit tammartinniarlugillu. (2 Tim. 3:13) Tamatuminnga mianersoqquneqareeratta sallusuisut uagut pigalutigu ilisimasarput nukittorsarsinnaavarput. Ilungersuussinerput inuunerup isumakuluutaanik millisinnagu Naalagaaffik salliuttuarparput. (Mat. 6:33, 34) Ullullu makku pingaassusiat puigornaveertigu kukkusumik isumaqarluta aaqqissuussaanerup matuma naggatissaa suli siunissami ungasissumiittoq. Ulloq qanilliartortuarpoq. (1 Pît. 4:7) Nalunaajaatigineqareersoq eqqarsaatigigaanni nutaarsiassamik nuannersumik oqaluussineq nunat ilaanni immaqa annikitsuinnarmik sunniuteqarpoq, taamaakkaluartoq mianersoqqussummik tusarliussaq suli oqaluussissutigineqarallassaaq. — Hes. 33:7-9.

⁵ Piffissamut taamaalereersumut tunngatillugu apeqqutit pingaarnerit ukuupput: ’Jesusip ajoqersuganngortitsiartoqqullunga peqqussutaa ilumooruppara? Nutaarsiassamik nuannersumik oqaluussinikkut ersippa Guutip naalagaaffiata piviusuunera qularinngilluinnariga? Inuunermik annaassiniarnermik sapinngisamik peqataanissara aalajangiussimavara?’ Ullut naggatissaata kingullersaani inuusugut misserratiginagu imminut oqaluussisartut ajoqersuisutullu suliarput eqqumaffigisariaqarpavut. Taamaaliorutta immitsinnut annatsikkumaarpugut tusartivullu annatsikkumaarlugit. (1 Tim. 4:16) Tamatta immikkut qulanngivilluta qanoq oqaluussisinnaavugut?

⁶ Thessalonikamiut assigikkit: Qatanngutit Thessalonikamiut suliaat annertooq pillugu apustili Paulus ima oqarpoq: ’Iivangkiiliu pigisarput ilissinnut oqaasiinnaalluni pinngilaq, pissaallunili anersaakkullu illernartukkut pisarluni nakimajunnaarsitsillunilu; ilisimavusimi qanoq ililluta ilissi pissutigalugusi akornassinniittugut. Uatsinnillu Naalakkamillu malinnittunngorpusi, oqaaseq anersaakkut illernartukkut tipaatsullusi ilassigassiuk, naak annikilliungaaraluartusi.’ (1 Tás. 1:5, 6) Thessalonikami ilagiinni ilaasut Paulusip nersorpai amerlasuunik naalliunnartunik atugaqaraluarlutik ilungersorlutik qulanngivillutillu oqaluussisarmata. Suumuna taamaaliorsinnaatissimagai? Annerusumik ilungersorneq nakimassuteqannginneq imaluunniit qulanngivinneq apustilimi Paulusimi suleqataanilu takusatik, pissutsit ajunngitsumik sunniuteqarsimasut. Qanoq paasisariaqarpa?

⁷ Paulusip angalaqataasalu inuuneraat tamaat nalunaajaataavoq Guutip anersaavanit najorneqarlutik, oqaluussissutigisatillu uummammik iluunngarmik upperigaat. Paulus Silasilu Thessalonikamut tikinnginnerminni Filippimi peqqarniitsuliorfigineqarsimapput. Killisioqqaarnagit iperartorneqarsimapput, parnaarunneqarlutik isigaalu kiggitsivimmut kiggissimallugit. Taamaattoq misilinneqarnerup taama ittup nutaarsiassamik nuannersumik ilungersuussinerat millisinngilaa. Guutip akuliunneratigut parnaarussivimmiit aniguipput, tamatumalu kinguneraa parnaarussat paarsisaat, taasumalu inoqutaasa uppertunngornerannut. Maannakkut qatanngutit taakku kiffartornitik ingerlateqqissinnaanngorpaat. — apu. suli. 16:19-34.

⁸ Guutip anersaavata Paulus Thessalonikamut ingerlaqqinnissaanut pissatsippaa. Tassanilu pisariaqartitani matussuserniarlugit sulisimavoq, piffisallu sinnera Thessalonikamiut sallusuissummik ajoqersorlugit. Paulusip periarfissat tamaasa atorlugit allat nutaarsiassamik nuannersumik oqaluttuuttarpai. (1 Tás. 2:9) Paulus oqaluussitilluni qulanngilluinnarnera Thessalonikamiunit iluarineqarngaarmat allaat ilaasa siornatigut guutipilussiorfigisatik qimallugit Guutimut ilumoortumut kiffartulerput. — 1 Tás. 1:8-10.

⁹ Malersorneqarneq uppertunngorlaanut nutaarsiassamik nuannersumik oqaluussinissaq akornutaasimanngilaq. Upperisartaartik naassaanngitsumillu pilluaqqussaanisaq qularutiginagu Thessalonikamiut misigaat sallusuissut namminneq nuannaarutigalugu ilassilluarsimasatik oqaaluussissutigissallugu kajumillutik. Ilagiit suliaqangaarmata uppernerat ilungersornerallu pillugu nutaarsiassaq Makedoniap ilaanut siaruaassimavoq, allaat Achaia tikillugu. Taamaattumik Paulusip Thessalonikamiunut allakkani siulliit allammagit ilungersuussillutik suliaat ilisimalluarneqalereersimavoq. (1 Tás. 1:7) Maluginiarnartumik maligassiuisimapput.

¹⁰ Guutimut tullermullu asanninnermik killinneqarneq: Qanoq ililluta Thessalonikamiut assigalugit ullumikkut nutaarsiassamik nuannersumik oqaluussinikkut inuttut aalajangiussimasaq tamatta immikkut atatiinnarsinnaavarput? Thessalonikamiut pillugit Paulus allappoq: ’Kipisuitsumillu eqqaamasarparput uppernissigut qanoq sulisartusi asanninnissigullu qanoq assorortarsusi.’ (1 Tás. 1:3). Tassannga erserpoq Thessalonikamiut Jehova Guutimut oqaluussiffigisartakkaminnullu qamannga pisumik asannissuseqartut. Asanninneq taama ittoq Paulusip angalaqataasalu killissutigalugu Thessalonikamiut ’Guutip iivangkiiliuinnaanik pinnatik, inuunerminnilli allaat aviffigiumavaat.’ — 1 Tás. 2:8.

¹¹ Tamatumunnga assingusumik Jehovamut tullitsinnullu asanninnitta Jehovap uagutsinnut naammasseqqusaanik oqaluusseqataanissatsinnut kajumilersittarpaatigut. Asanninnerup taamaattup paasinnilersittarpaatigut nutaarsiassamik nuannersumik oqaluussinissamut tamatta immikkut Guutip pisussaaffileraatigut. Jehovap ’inuunermut piviusumut’ aqqutissiuisimanera pingaartillugu eqqarsaatigilluartarutsigu sallusuissut nuanningaartoq uummammik tamakkiisumik upperisarput allanut oqaluussissutigissavarput. — 1 Tim. 6:19.

¹² Oqaluussineq ulapputigitillugu Jehovamut inoqatitsinnullu asanninnerput alliartortariaqarpoq. Taamaappat illumiit-illumut oqaluussinerulernissatsinnut periarfissallu tamaasa nalunaajaanissatsinnut kajumilersissavaatigut. Ilaquttanut, sanilinnut, ikinngutinut ilisarisimasanullu torrutiinnarlugu oqaluussinissamut periarfissarilikkavut atorluarumassavavut. Taamaaliorutta ilukkut nuannaarneq misigissavarput, naak immaqa amerlanerit itigartitsisaraluartut, naallu ilaasa Naalagaaffik pillugu oqaluussinerput unitseqqugaluaraat. Suna pillugu? Nalunnginnatsigu sapinngisarput tamaat Naalagaaffik pillugu oqaluussilluta allallu annannissaat anguniaqqullugu ikiorsimallugit. Jehovallu pilluaqqujumaarpaa iluartunik nassaarniarluta ilungersornerput. Naak tatineqarneq nanertuutigigaluarlugu nuannaarutigisatsinnilu Satanip arsaarniaraluaraatigut oqaluussitilluta qulanngivinnerput nikallujuissuserpullu atatiinnarsinnaavarput. Tamatta suliassarput suliarigutsigu ilagiit Thessalonikamiittutut nukittuunngussapput aallussillualerlutillu.

¹³ Misilinneqartillutit nakkaannanngisaannarit: Aammattaaq assigiinngitsunik misilinneqaraangatta qulanngivinnissarput pisariaqartinneqartarpoq. (1 Pît. 1:6, 7) Jesusip ajoqersukkani paasitippai ’inuiaqatigiit tamarmik uumissorumaaraat’. (Mat. 24:9) Paulusip Silasillu Filippimiitillutik Jesusip oqaasii misigisimavaat. apustilit suliáinik agdlagkat kapitali 16-imi oqaluttuarineqarpoq Paulus Silasilu parnaarussivimmut ilorlermut pisinneqartut isigaalu kiggitsivimmut kiggisinneqarlutik. Taamani parnaarussiviit kaajaluisatut sananeqartarsimapput ineeqqat avallinngorlutik ullup qaamanerinneranut silaannarissumullu sammiveqarlutik. Parnaarussiviulli qinngorpiaani qaamanertaqanngilaq annikitsunnguamillu silaannaqarluni. Paulusip Silasillu inimi pitsaanngeqisumi taaq, kiarujuk tiperujullu naammagisariaqarsimavaat. Tunumikkullu iperartorneqaramik ameertitserneri aanaartitertut nalunaaqquttap akunnerpassuit kiggitsivimmi kiggisinneqarlutik anniarnerat illit takorloorsinnaaviuk?

¹⁴ Taamaakkaluartoq misilinneqaraluarlutik Paulus Silasilu aalajaattuarput. Takutippaat qamannga pisumik qulanngissuseqartut Jehova kiffartuutissallugu nukissanitsitsisumik qanorluunniit sakkortutigisumik misilinneqaraluarunik. Kapitali 16-imi versi 25-mi qulanngivinnerat ersersinneqarpoq oqaluttuarineqarmat Paulus Silasilu ’qinusut erinalersorlutillu Guuti unnersiutigalugu’. Naak parnaarussiviup qinngorpiaanut pisinneqaraluarlutik qularinngilluinnarsimavaat Guutimit iluarisaallutik, allaat parnaarussaaqatiminnit tusaaneqarsinnaasumik erinarsorlutik. Uagut ullumikkut misilinneqaraangatta assinganik qulanngivissuseqartariaqarpugut.

¹⁵ Satanip pilersitaanik misilinneqartarnivut amerlaqaat. Ilaatigut ilaquttanit assortorneqarnikkut. Qatannguterpassuatta inatsisitigut unamminiarnartut misigisarpaat. Tunussisunit akerlilerneqarsinnaavugut. Aningaasatigut ajornartorsiortoqartarpoq suullu tamarmik iluatsisinnaanersut isumakuluutigineqartarpoq. Inuusuttut atuarfimmi sakkortuumik ilagisartakkaminnit tatineqartarput. Misilitsinnerit tamakku qanoq ililluta anigorsinnaavavut? Qulanngivinnerput takutissagutsigu qanoq iliortariaqarpugut?

¹⁶ Siullermik tamatta immikkut Jehovamut qanimut attaveqarluartariaqarpugut. Paulus Silasilu inimi qinngorlermi parnaarunneqarsimatillutik pissutsit atukkatik naammagittaalliutiginngilaat imminnullu naakkiginatik. Ingerlaannaq Jehovamut qinupput erinarsorfigalugulu, tassami Ataataminnut qilammiusumut qanimut attaveqarluarsimapput. Nalunngilaat naapertuilluarneq pillugu atugarliortitaallutik, annaasinerlu Jehovap assaaniittoq. — Tus. 3:8.

¹⁷ Ullumikkut uagut misilinneqaraangatta taamatuttaaq Jehovamut ikiortissarsiortariaqarpugut. Paulusip kajumissaarpaatigut kristumiutut ’nungulluta kissaatigisarput Guutimut nalunaassagipput torlulalluta qinullutalu qujallutalu; eqqissinerullu Guutip piata sianinernit tamanit annerungaartup uummativut eqqarsaativullu sernigissavai Kristus Jesusimi’. (Fil. 4:6, 7) Tuppallernaqaaq Jehovap misilinneqarnitsinni kisimiitsittannginnamisigut. (Jes. 41:10) Qulanngivilluta kiffartortuaannarutsigu qimannavianngilaatigut. — Tus. 46:8.

¹⁸ Periarfissaq alla qularutiginngilluinnakkatta takutissinnaanissaanut ikiuutaasinnaasoq tassaavoq Jehovamut kiffartorluta ulapputeqartuarutta. (1 Kor. 15:58) Paulus Silasilu parnaarunneqarput nutaarsiassamik nuannersumik oqaluussitillutik ulapputeqartuarsimanerat pissutaalluni. Misilinneqaramik oqaluussinertik unitsippaat? Naamik, allaat parnaarussivimmi oqaluussisarput. Iperarneqareerlutik Thessalonikamut aallarput, tassanilu naalaffinni juutit ’oqaloqatigai allakkat najoqqutaralugit’. (ap. sul. 17:1-3) Jehovamut uppernitsigut qulanngivikkutta nalornissiginagu sallusuissullu pigalugu sulluunniit ’Guutip asannissusianit Kristus Jesusimi Naalakkatsinni avissaartinnaviassanngilaatigut’. — Rûm. 8:35-39.

¹⁹ Ullutsinni qulanngivissimasut: Nalitsinni maluginiarnartunik assersuutissarpassuaqarpoq Paulusitut Silasitullu qulanngivissunik takutitsisunik. Qatanngut arnaq Auschwitzimi tigusanut inissiarsuaniissimasoq qatanngutit angutit arnallu tassaniittut uppernerat qulanngivinnerallu pillugu oqaluttuarpoq: „Killisiorneqartillunga sakkutuut naalagaaraat assani peqillugit tunginnut aggerpoq. ’Qanoq iliussavassi?’ angut suaarpoq. ’Tigusarigussi soqutiginngilarsi. Parnaarukkussi soqutiginngilarsi. Tiguakkat inissiarsuanut aallarukkussi, aamma soqutiginngilarsi. Toqumut pillagassanngoraangassi qanoq iliallannerluunniit ajorpusi. Taava qanoq iliortariaavisi?’ Uagutsinnit uppernikkut nakussatsinnaqaaq qatanngutit angutit sakkortuumik atugarliortitaallutik uppernerat takullugu. Jehovamut naammagittarnissamut ikioqqujuarsimapput.

²⁰ Ukiuni kingullerni naggueqatigiit uumissuinersuat siumoraangamikku qatannguterpassuatta qulanngivillutik ersersitsinerat eqqaamalluarunarparput. Naak ulorianartorsioraluarlutik qatanngutit akisussaassusillit qatanngutitik angutit arnallu anersaakkut inuussutissaqartikkumallugit isumagiuarsimavaat. Tamarmik qularutiginngivillugu ’sakkut [imminnut] sakkuaatissatut saffiukkat atorsinnaassuseqassanngitsut’ aalajaattuarsimapput. — Jes. 54:17.

²¹ Qatanngutivut angutit arnallu ilarpassui uppinngitsunik aappallit nukittuumik uppernermik nikallujuissutsimillu pigisaqarput. Guadeloupemi qatanngut angut nuliaminit uppinngitsumit assortorneqangaarsimavoq. Nikallortinniarlugu ataatsimiigiaqqunagulu nerisassiuuttarsimanngilaa atisaalu errussanagit, manissartarnagit mersorumanagilluunniit. Sivisoorujussuarmik nuliata oqaluffigineq ajorpaa. Qulanngivillunili Jehova kiffartuullugu qinunikkullu ikioqqulluni saaffigisarlugu qatanngut nikallujuissimavoq. Qanoq sivisutigisumik? Ukiut 20-t missaat. Tamatuma kingorna nuliata arriitsunnguamik uummatini allanngortikkiartuaarpaa. Naggataatigut nuannaarutissinneqangaarpoq nuliami Guutip naalagaaffia pillugu nutaarsiassaq nuannersoq ilassimmagu.

²² Aammattaaq puigussanngilavut inuusuttortavut suli atuartut ullullu tamaasa ilagisartakkaminnit allanillu unamminiarnartunik tatineqartuartartut qulanngivissutsimikkut ilisarnaatillit. Niviarsiaq Jehovamut nalunaajaasuusoq oqaluttuarpoq allanit qanoq tatineqartarsimalluni taakkunatut pissuseqaqqulluni: „Atuarfimmi tamarmik pikitsitsinissamut killeqanngitsumik kajumissaariuarsimapput. Killissani tikillugu sapiisertoq ataqqineqartarpoq.“ Inuusuttut ilissi assut tatineqartarpusi. Ussernartut akiorsinnaajumallugit isummakkut uummatikkullu aalajangersimasariaqarpusi.

²³ Inuusuttortatta amerlanersaat misilinneqarnermikkut akiuunniarnerminni assuarnaatsuujuaannarsimapput. Frankrigimi qatanngut arnaq inuusuttoq tamatumani maligassiuilluarpoq. Ullut ilaanni ulloq-qeqqasiortillutik nukappissat pinngitsaalillugu kuninniarpaat, qinuvorli sakkortuumillu akiuulluni, nukappissallu qimaannarpaat. Kingorna nukappissat ilaata ataatsip uterfigaa oqarfigalugulu sapiinneranik nersualaarlugu. Naalagaaffik pillugu nalunaajaaffigaa oqaluttuullugulu Guutip naalagaaffiani inoorusuttut tamarmik Jehovap ileqqoreqqusai qutsissut malittariaqaraat. Ukiullu atuarfiusup ingerlanerani klassimi atuaqatini upperisaminik oqaluttuussinnaasimavai.

²⁴ Uatsinnut pisinnaatitaaffissuuvoq Jehovap iluarisaasa akornanniissinnaagatta qulanngilluinnassuseqartumillu piumasaa pillugu allat oqaluttuussinnaagatsigik. (Kul. 4:12) Saniatigut akerartortitsinnit Satan Diaavulumit, ’liivertut uiannisaartutut angalalluni iisassarsiortumik’ saassunneqaraangatta assuarnaassutsitta uppernarsisinnissaa periarfissittarparput. (1 Pît. 5:8, 9) Puigunngisaannaruk Jehovap Naalagaaffik pillugu tusarliussaq atormagu, uagutsinnut tamanna pillugu oqaluussisuusunut tamatumunngalu tusartunut aniguinissamut. Aalajangiiffigisartakkatsigut ulluinnarnilu inuunitsigut takutissinnaavarput Naalagaaffik salliullugu. Qulanngivilluta nutaarsiassaq nuannersoq oqaluussissutigiuartigu.