Apeqquteqarfik

◼ Kikkut ilagiit qinuneranni siulersuisinnaappat?

Ilagiinni qinuneq pallorfiginninnitta pingaarnersaasa ilagaat. Allallu sinnerlugit Jehovamut sassarneq pisinnaatitaaffiuvoq naleqangaartoq akisussaaffiullunilu angisooq. Tamanna eqqarsaatigalugu kikkut ataatsimiinnerni qinusuunissamut piukkunnaateqarnersut utoqqaanertat aalajangernerminni siuneqassuseq atussavaat. Qatanngutit kuisimasut ilagiinni qinnummik siulersuisut oqaluussisartuussapput inersimalluartut, maligassiuisutut ilisimaneqartut ilagiinnilu ataqqisaasut. Guutimut ajunngitsumik attaveqarnerat qinnutaanni ataqqinnipaluttuni tusaaneqarsinnaasariaqarpoq. Vagttårnet-imi 15. maj 1986-moortumi allaaserisami „Vis ydmyghed når du beder på andres vegne“-mi najoqqutassat pingaarutillit ingammik ilagiit sinnerlugit tamanut ammasumik qinusunut ersersinneqarput.

Qatanngut nalorninartumik pissuseqartutut ilisimaneqarpat utoqqaanertat qinunermi siulersuitissanngilaat. Aammattaaq isornartorsiuiniaannartoq imalluunniit qinnut aqqutigalugu nammineq isummaminik anitseqqajaasoq qinutissanngilaat. (1 Tim. 2:8) Qatanngut kuisimasoq inuusuttuaraappat, ilagiit sinnerlugit qinunissamut anersaakkut inersimalluartuunersoq utoqqaanertat nalilissavaat. — apustilit suliait 16:1, 2.

Katersuunnermi qatanngummik angummik piukkunnaatilimmik najuuttoqanngippat qatanngutip arnap kuisimasup qinunissaa pisariaqarsinnaavoq. Nasartaateqassaarli. Katersuunnermi aalajangersimasumi akulikitsumik qatanngummik angummik piukkunnaatilimmik najuuttoqarneq ajorpat, pisariaqaraangat utoqqaanertat arnamik piukkunnaatilimmik siulersuisussamik toqqaasinnaapput.

Tamanut ammasumik oqalugiaatip aallartinnginnerani aqutsisup qinnummik aallarniinissaa nalinginnaavoq. Ataatsimiinnerni allani piukkunnaatillit arlaliuppata, ataatsimiinnermut aallarniisussaanngitsumik imaluunniit naaggasiisussaanngitsumik toqqaasoqarsinnaavoq. Qatanngut qinnummik aallarniisussaq naggasiisussarluunniit siumut ilisimatinneqariissaaq oqaasissani eqqarsaatigereerniassammagit. Taamaalilluni ataqatigiissunik ilumoorussisumillu ataatsimiinnermut tulluartumik qinusinnaassaaq.

Qinnutit taamaattut takisoorsuusariaqanngillat. Ilagiit sinnerlugit qatanngut qinuguni nikorfalluni nipituumik ersarissumillu qinulluni oqaasii paasinarnerussapput. Taamatut qinnuguni katersuussimasut tamarmik tusaasinnaassavaat qamanngalu pisumik „amen“eeqataassapput. — 1 Isr. 16:36; 1 Kor. 14:16.