’Ajoqersorneqanngikkuma qanoq ilillunga paasissavakka?’
1 Iivangkiiliumik oqaluussisartup Filipip Etiopiap kunngiata kiffarsua Guutip oqaasianik atuartillugu atuakkani paasinerai aperimmagu, taanna ima akivoq: ’Ajoqersorneqanngikkuma qanoq ilillunga paasissavakka?’. Jesus pillugu nutaarsiassamik nuannersumik paasisaqarnissaanut Filipip ikiorasuarpaa, tamannalu angutip ingerlaannaq kuisinneranik kinguneqarpoq. (ap. sul. 8:26-38) ’Inuiaqatigiit tamaasa ajoqersuganngortillugit kuillugillu ajoqersornissaannik’ Kristusip peqqussutaa Filipip naalappaa. — Mat. 28:19, 20.
2 Ajoqersuganngortitsinissamik peqqussut Filippitut naalattariaqarparput. Nalinginnaasumik Biibili tunngavigalugu ajoqersukkavut, etiopiamiutulli siumukapallatigineq ajorput. Juutinut ilassiap taassuma Allakkat ilisimalluarsimavai killitsiasuullunilu. Taamaallaat Jesus Messiarsitut neriorsuutigisatut upperinissaa amigaatigisimavaa. Atuaqqissaaqatigisartakkavut Biibilimik ilisimasaqanngikkaangata, upperisarsiortunik eqqunngitsunik tammartitaasimagaangata imaluunniit namminneq inuttut ajornartorsiutiminnik erloqisinneqaraangata unamminiarnartuusinnaavoq. Taamaakkaluartoq atuaqatigisartakkavut Guutimut tunniunnissamut kuisinnissamullu qanoq pitsaanerusumik ikiorsinnaassavavut?
3 Atuaqatigineqartup pisariaqartitai pingaartikkit: Guutip Naalagaaffianut Kiffartorneq-mi aggusti 1998-moortumi qup. 1-mi allaaserineqartumi atuagassiaaqqamik Guutip sumik piumaffigaatigut?-mik atuakkamillu ’Ilisarsineq’-mik inuit qanoq sivisutigisumik atuaqqissaaqatigisariaqarnerivut apeqqut sammineqarpoq. Tulliuttut ilitsersuutigineqarput: „Pissutsit ilinniartup atugai poqissusialu naapertorlugit sukkassusissaq aalajangertariaqarpoq. . . . Sukkasuumik atuaqqissarneq ilinniartup sallusuissummik ersarissumik paasinninnissaanut ajoqutaatinneqassangilaq. Ilinniartoq Guutip oqaasianut uppilernerminut nukittuumik tunngavissaqartariaqarpoq.“ Taamaattumik atuakkap ’Ilisarsineq’-rup naammassiniapallaannarnissaa inassutigineqanngilaq, soorlu pinngitsoorani qaammatit arfinillit naasassatut. Qaammatit arfinillit sinnernissaat pisariaqarsinnaavoq, atuaqatigineqartoq kuisinnissamut pisariaqartumik siumukarnissaanut ikiorneqassappat. Sapaatip-akunneri tamaasa atuaqqissaaqateqaraanni atuaqatigineqartup Guutip oqaasianik paasinnillunilu akuersinissaanut ikiorniarlugu piffissaq pisariaqartitaq atorneqartariaqarpoq. Ilaatigut immaqa ’Ilisarsineq’-mi kapitali ataaseq naammassiniarlugu sapaatip-akunneri marluk pingasulluunniit atorneqartariaqassapput. Taamaalilluni allassimaffiit issuarneqarsimanngitsut atuarnissaannut nassuiarnissaannullu piffissaqalissaasi. — Rûm. 12:2
4 Taavami ’Ilisarsineq’ naallugu atuareerlugu atuaqatigisaq paasisaqarnerusariaqartutut imaluunniit sallusuissummik aalajangiussinissaminut Guutimullu tunniulluinnarnissaminut suli piareersimanngitsutut nalileraanni? (1 Kor. 14:20) Taanna aqqutikkut inuunartumut sammisukkut siulersorniarlugu qanoq ilioqqissinnaavit? — Mat. 7:14.
5 Biibilimik atuaqqissaaqatigineqartup anersaakkut pisariaqartitaa matussuseruk: Atuaqatigineqartup arriikkaluamik siuariarsimanera ersarippat, ilinniakkanilu pingartillugit, atuagassiaaraq Guutip sumik piumaffigaatigut? atuagarlu ’Ilisarsineq’ atuaqqissaaqatigiissutigineqareerneranni atuagaq alla atorlugu atuaqqissaarneq nanginneqarsinnaavoq. Tamatigut taamaattariaqanngilaq, pisariaqartinneqarpalli atuakkat erĸigsineĸ isumangnáissuserdlo piviussut ĸanoĸ pilersíneĸasápat? aamma Ataasiussuseqarlutik Guutimik ilumoortutuamik pallorfiginnittut atorlugit atuaqqissaarneq nanginneqarli. Atuagassiaaraq Guutip sumik piumaffigaatigut? atuagarlu ’Ilisarsineq’ tamatigut siulliullugit atuarneqaqqaartariaqarput. Biibilimik atuaqqissaarneq, pulaaqqiinerit atuaqqissaaqateqarnerullu ingerlateqqinneranut piffissaq atorneqartoq nalunaarutigineqarsinnaavoq, atuaqatigineqartoq atuakkap appaa suli naammassinagu kuisikkaluarpalluunniit.
6 Imatut paasisariaqarpa kuiserlaat, atuakkamik ataasiinnarmik atuaqqissaaqatigineqarsimasut, atuakkamik allamik atuaqqissaaqatigineqarnissaannut ikiorneqartariaqassasut? Pisariaqanngilaq. Ilaalli unittorsinnaapput sallusuissummiluunniit siuariartoratik, immaqalu sallusuissut malillugu inooriaaseqalernissaminnut ikiorneqarnerusariaqarlutik misigipput. Oqaluussisartoq kuisereersimasoq atuaqatigileqqinnginnerani kiffartornermik nakkutilliisoq tamatuminnga oqaloqatigineqaqqaartariaqarpoq. Nalunngisaqaruilli ’Ilisarsineq’-mik atuaqqissaaqatigineqareersimasumik, kuisinnissaminulli piariinngitsoorsimasumik, siulliullutit aperisinnaavat Biibilimik atuaqqissaartaleqqikkusunnersoq.
7 Kristumiutut asanninnermut ilisarnaataavoq atuaqatigisartakkat soqutiginninnivimmik takutitsivigigalugit. Anguniagaraarput sallusuissummik Guutip oqaasianiittumik ilisimasaqarnerulernissaannut ikiornissaat. Taava ilisimassuseqalissapput sallusuissummik aalajangiussinissaminnut pisinnaalersitsisumik, Jehovamut tunniulluinnarnertik imermut kuisinnikkut ersersillugu. — Tus. 40:9; Evf. 3:17-19.
8 Kunngip etiopiamiup kiffarsuata kuisinnerata kingorna qanoq pisoqartoq eqqaamaviuk? Jesus Kristusimut ajoqersuganngorlaatut ’ingerlavini tipaatsulluni ingerlavigaa’. (ap. sul. 8:39, 40) Neriuutigaarput aqqutikkut inuunartumut sammisukkut ingerlalersitatta Jehova Guutimut kiffartornertik nuannaarutigingaassagaat — maanna naassaanngitsumillu!