Ataatsimeersuarnermi „Guutip oqaasianik ilinniartitsivugut“- mi ilikkakkatit atorpigit?
1 Ukiumi matumani ataatsimeersuarnermi najuuttup kialuunniit qularutiginngilaa, Jehovap inuuttaasa Guutip oqaasianik ilinniartitsinissamik kajumissaarut maleruarusukkaat. (Matt. 28:19, 20) Siunnersuutit aalajangersimasut sorliit ulluinnarni oqaluussinermilu atussamaarpigit?
2 Allakkat Guutimit anersaarfigineqartut iluaqutaapput ajoqersuinermut: Ataatsimeersuarnerup ulluani siullermi qulequtaq 2 Timotheus 3:16-minngaanneepoq. Ataatsimeersuarnerup qulequtaa tunngavigalugu oqalugiaammi, „Guutip oqaasianik ilinniartitsinissaminnut inerilluartut“-mi ilikkarparput Guutip oqaasia pingaartingaartariaqarlugu, Biibili inuit isumaannit ileqqulersuutaannillu pingaarnerutittariaqarlugu atorluartarlugulu. Oqaluussinitsinni anersaamit illernartumit ikiorneqarnissarput ullut tamaasa qinnutigiitigalugu inerititaasa pingaarnersaat, asanninneq, ineriartortittariaqarparput. Ilagiit ataatsimiittarnerini Jehovap nunarsuarmi peqatigiissortaanit ilinniartitsisussatut piginnaanngorsarneqartariaqarpugut.
3 Ullormi siullermi oqalugiiaatini ataqatigiinni, „Immitsinnut ilinniartippugut allallu ilinniartillugit“-mi paasitinneqarpugut maligassaalluartariaqartugut (1) kristumiutut ileqqussatigut Guutip inatsisaata tamatigut maleruarneratigut, (2) atuaqqissaarnerup ineriartortinneratigut aamma (3) isummat isiginnittaatsillu Diaavulumit atornerlunneqarsinnaasut allanngortinneratigut. Ilikkakkatta tulleraat tiingasulersaarutit toqunartuinut ilaqutavut illersuisinnaagivut. Angajoqqaat meeqqamik internettikkut sammisartagaannik fjernsynikkullu isiginnaartagaannik alapernaasertaqqullugit tiingasulersaarutillu takullatsialaartannginnissaanulluunniit maligassaalluaqqullugit kajumissaarneqarput. Tallimanngornikkut saqqummiunneqartuni siunnersuutit sorliit atulereerpigit?
4 Ullormi tassani oqalugiaatip kingulliup qaamasumik Jehovameersumit pingaartitsinissatsinnik aalajangernitsinnut, Guutip tanitaanut aalajaatsunut qanimut attaveqarnissatsinnut, Jehovallu innuttaasa eqqisseqatigiinnerannik allisaaqataanissatsinnut nakussatsippaatigut. Atuagaq saqqummeqqamersoq, Esajas’ profeti — et lys for alle mennesker 2, atuareerpiuk?
5 Allat ilinniartissallugit piginnaasusilik: Ullup aappaani qulequtaq 2 Timotheusi 2:2-meersuuvoq. Ullup qeqqata-siornagut oqalugiaatini ataqatigiinni siunnersuutit malugaagit? Siunnersuutaapput qanoq ililluta (1) qinngaqqunnangitsut nanissinnaagivut, (2) ikkussuiffigineqarsimasut imertertarlugillu paarisinnaagivut, taavalu (3) Jiisusip peqqusai tamaasa maleruaqqullugit inuit ilinniartissagivut. Ilikkakkatit atorpigit pulaagaq minnerpaamik ataatsimik biibilimeersumik eqqarsaatissinniarllugu pulaaqqinnissaanullu piareersakannerniarlugu?
6 Ullup qeqqata-kingorna, Jiisusip, ajoqersuisorsuup ilaarnissaata pingaaruteqassusia sammineqarpoq. Sutigut Ilaarniarlugu ilungersorpit? Ullormi tassani oqalugiaatini ataqatigiinni, „Teokratiimik ilinniartitsineq pissarsiaqarfiginerusinnaavat“-mi ilikkakkavit qanoq ikiorsinnaavaatit? Atuaqqissaarninni ataatsimiinnernilu eqqarsaqqisaarsinnaasutsinnik pitsanngorsaaniarlutit siunnersuutit sorliit atorpigit?
7 Ilitsersuusiaq nutaaq, Den Teokratiske Skole — til gavn for kristne forkyndere, ataatsimeersuarnermi eqqaaneqartoq oqallorinnerulernissatsinnut Guutillu oqaasianik ilinniartitsillaqqinnerulernissatsinnut iluaqutaangaassaaq. Itsaq Guutip innuttaasa aalajaatsut oqallorissutsiminnik ilisarnaataat atuakkami pingaarnerutinneqarpoq. Atuakkami nutaami ungalusami ersarissumik takutinneqarpoq pisassap suliarinerani qanoq iliussasugut, sooq taamaaliortariaqartugut, qanorlu suliarissaneripput. Sungiusarnermi periaatsit atoriaannaasut aamma siunnersuutigineqarput. Siunnersuutit, qatanngutit arnat pisassaminnut atorsinnaasaat 29-iupput. Oqaatigineqareersutut Teokratiimik Atuarfimmi pilersaarut allanngortinneqarumaarpoq. Maannangaaq Teokratiimik atuarfik sapaatip akunneri tamaasa tamakkiisumik iluaqutissarsiffigiummallugu atuaqqissarneq piareersarnerllu ileqquliulluareerpigit?
8 Piffissaq qaangiutereersoq eqqarsaatigalugu ilinniartitsigit: Ullut pingajuanni qulequtarineqartoq Hebræerit 5:12-minngaanneersoq. Ullup qeqqata-siornagut oqalugiaatini ataqatigiinni, „Malakip siulittuutaanit Jehovap ullussaanut piareersarneqarpugut“-mi, Guutip ullussarsuani mianernangaartumi aniguissagutta pitsaanerpaat Guutimut tunniunissaannut, tunussinerullu qanoq ittulluunniit uumiginissaanut kajumissaarpaatigut. Isiginnaagassiap, „Jehovap oqartussaassusianut ataqqinnigit“, sunniuteqarluartumik takutippaa Korap pikititseqataasalu pingaarniassusiat, piumatussusiat, sinnganerat kukkusumillu ilumoorfiginninnerat Jehovamut pikititsinermik kinguneqartoq. Oqalugiaatip tulliani ersersinneqarpoq, ullumikkut ilaqutariinni ilagiinnilu Guutip oqartussaassusianut naalatsigitinnissap pingaaruteqassusia. Oqalugiiaammi tamanut ammasumi, „Inuiaat tamarmik sallusuissummik kikkunit ilinniartinneqarpat?“-mi, Jehovap nalunaajaasui, kristumiuunerartunut tamaaliorneraannartunut naleqqiullugit, sallusuissummik Biibilimeersumit ilinniartitsinerannik takussutissat ersarissut tikkuarneqarput.
9 Aap, Jehovap oqaatsiminik ilinniartitsinitsinni pikkorinnerulersinniarluta ilinniartippaatigut. Ilikkakkavut atorniartigit ‘imminut nakkutigaluta, aamma ajoqersuisutut suliaq nakkutigalugu tassami taamaaliorutta imminut annaakkumaaratta tusartivullu annaallugit’. — 1 Tim. 4:16.