Guutip naalakkersuinerani pinngortitat tamarmik eqqisseqatigiissimapput
Sooq Guutip naalagaaffia pisariaqartipparput?
Inuit pinngortinneqarmata Pinngortitsiserput, Jehovamik atilik, kisimi naalakkersuisuuvoq. Asannittumillu aqutseriaaseqarpoq. Edenimi, naatsiivimmi alianaatsumi, inuit najugassippai naammattorsuarnillu inuussutissaqartillugit. Aamma siunertaqarluartumik suliassippai. (1 Mosesi 1:28, 29; 2:8, 15) Inuit Guutip asannilluni naalakkersuinera naalattuarsimasuugunikku eqqisseqatigiittuarsimassagaluarput.
Inuit siulliit Guuti naalakkersuisumittut ajattorpaat
Biibilimi ersersinneqarpoq inngili naalanngitsoq, kingusinnerusukkut Saatanimik Diaavulumik taaneqartoq, Guutip naalakkersuisussaatitaaneranik assortuilersoq. Oqarporlusooq inuit pilluarnerussasut Guutimit siulersorneqanngikkunik. Ajoraluartumik siuaasavut siulliit, Adami Evalu, Saatani ilaarlugu Guutimut pikitsitsipput. – 1 Mosesi 3:1-6; Saqqummersitat 12:9.
Guuti naalakkersuisumittut ajattoramikku Adamip Evallu angerlarsimaffitsik paratiisiusoq peqqilluinnarlutillu naassaanngitsumik inuunissaraluartik annaavaat. (1 Mosesi 3:17-19) Aalajangernerat kinguaassaannut aamma sunniuteqarpoq. Biibilimi allassimavoq Adami ajortuliormat “ajorti silarsuarmut tikiuttoq ajortikkullu toqu tikiulluni”. (Romamiut 5:12) Ajorti aamma allatut alianartumik kinguneqarpoq: “Inuit ilaat ataaseq inoqatiminut ajoqutaasumik pissaaneqarpallaartarpoq.” (Oqaluussisartup oqaasii 8:9) Tassa inuit Guutimit siulersorneqaratik nammineerniarsarigunik ajornartorsiortuassapput.
INUIT NAALAKKERSUISALERPUT
Nimrodi Jehovamut pikitsitsivoq
Inuk naalakkersuilersoq Biibilimi eqqaaneqartoq siulleq tassaavoq Nimrodi, taannalu Jehovap naalakkersuineranut pikitsitsivoq. Taamanimiilli inuit pissaanillit pissaanertik atornerluttarsimavaat. Ukiut 3.000-t missaasa matuma siorna kunngi Salomo ima allappoq: “Takuakka qunutitaasut qullii, tuppallersarneqanngillallu. Takuakka qunutitsisunit nakuuserfigineqarnerat.” – Oqaluussisartup oqaasii 4:1.
Ullumikkut tamanna suli ajornartorsiutaavoq. Naalagaaffiit Peqatigiit (FN-ip) 2009-mi atuagassiaataanni ima allassimavoq: “Erseqqilluinnarpoq silarsuarmi ajornartorsiuterpassuit aqutsinerlunnermit pissuteqartut.”
ILIUUSEQARFISSANNGORPOQ!
Nunarsuarmi naalakkersuilluarnerusut naalakkersueriaaserlu pitsaanerusoq pisariaqartippavut. Pinngortitsiserpullu neriorsuivoq pisariaqartitavut taakku isumaginiarlugit!
Allaat inuit naalakkersuillaqqinnerpaat nunami ajornartorsiutinik aaqqiisinnaasimanngillat
Guutip naalagaaffik inuit naalakkersuinerannik tamanik suujunnaarsitsisussaq pilersippaa, taannalu “soraajuitsumik atassaaq”. (Danieli 2:44) Taanna tassaavoq Guutip naalagaaffia inuit millionilikkuutaat qinnutigisarsimasaat. (Matthæusi 6:9, 10) Guuti naalagaaffimmi tamatumani nammineq naalakkersuissanngilaq, nunarsuarmili inuusimasoq naalakkersuisussatut toqqarsimavaa. Taanna kinaava?