“Guutip asanninneraniittuinnaritsi”
1. Suna siunertaralugu atuagaq “Guutip asanninneraniittuinnaritsi” saqqummersinneqarsimava?
1 Atuakkap nutaap “Guutip asanninneraniittuinnaritsi” ilagiinni atuaqqissaaqatigiissutiginissaanut qilanaarpugut. Sapaatip-akunnerani oktobarip 13-ianni aallartittumi atuaqqissaaqatigiissutigilissavarput. Siulersuisoqatigiit Jehovamut asannittunut tamanut allagaat ima naggaserneqarpoq: “Qamannga pisumik neriuutigaarput atuagaq manna sallusuissut naapertorlugu inuujuarnissannut iluaqutigissagit. Taamaaliornikkummi naassaanngitsumik inuulernissat utaqqitillugu ‘Guutip asanninneraniittuinnarsinnaavutit’. — Jud 21.”
2. Atuagaq nutaaq inuunitsinni sutigut iluaqutigissavarput?
2 Suut sammineqassasut: Biibilimi najoqqutassiat qanoq iluaqutigisinnaavavut aliikkutassianut, ileqqulersuutinut, aappariinnermut, oqaloriaatsinut iliuutsinullu, oqartussaassusilinnik ataqqinninnissamut aamma ikinngutissarsiornermut? Nalunngeqatiginnissuserput atuaqqissaaqatigiinnerup ingerlanerani najoqqutassianit naapertuilluartunit Biibilimeersunit ilusilersoriartuaarneqassaaq. (Tuss 19:8, 9) Jehovap eqqarsartaasia paasinerujartortillugu nuannaartikkusunnerulerlugulu inuunitsinni sutigut tamatigut naalakkusunnerulissavarput. — Uss 27:11; 1 Joh 5:3.
3. Sooq sapaatip-akunnerani sammisatsinnut sapinngisamik akiniartassaagut?
3 Peqataasarnissat aalajangiusimajuk: Ilagiinniittut peqatigalugit atuagaq nutaaq atuaqqissaartussaavat. Piareersaraangavit ilagiinni ‘Guutip qujaniutinik pilliivigiuarnissaa’ anguniagarisaruk. (Hebr 13:15) Sammisassat naatsunnguummata tamatta piareersarluarsimanissatsinnut periarfissaqarluassaagut taamaalillutalu atuaqqissaarsimasatta oqaaseqarfiginissaanut sapiissuseqarnerussalluta. Akissutivut ersarissut piareersarluakkallu najuuttunut asaqatigiinnermut ajunngitsuliornermullu kajumilersitsisinnaapput sammisatsinnullu uummaarissumik isumaqarluartumillu taperseeqataassallutik. (Hebr 10:24) Aamma upperisatsinnik oqaasertaliineq uagut nammineerluta nuannaarutissarsiffigissavarput.
4. Sooq Jehovap inatsisaanut naalannissarput taama pingaaruteqartigaa?
4 Jiisusip nunarsuarmi inuunermini unnummi kingullermi oqaatigaa Guutip asanninneraniittuarneq Jehovallu inatsisaanut naalanneq ataqatigiilluinnartuusut. (Joh 15:10) Atuaqqissaaqatigiissutissaq nutaaq iluaqutigalugu najoqqutassiat Biibilimeersut ulluinnarni maleruarnissaat aatsaat taama aalajangiusimatigissavarput taamaalillutalu ‘Guutip asanninneraniittuarsinnaalluta’. — Jud 21.