Kiffartornermi naammattumik iliorpunga?
1. Kristumiu aalajaatsoq sunik isumakuluuteqalersinnaava?
1 Imminut taama aperinikuuit? Immaqa utoqqaliarsaarnerit, peqqiilliornerit ilaquttannulluunniit pisussaaffivit annertusisimaneri pissutigalugit kiffartornerit annikillisimavoq, tamannalu nikallussutigaat. Qatanngut arnaq pingasunik meeralik allappoq, ilaquttaminut piffissani nukinilu atortariaqartaramigit kiffartornermi tunniussinnaasani killeqarmata ilaatigut nikallortarluni. Pissutsinut oqimaaqatigiissumik isiginittaaseqarnissatsinnut suup ikiorsinnaavaatigut?
2. Jehovap sumik ilimasuffigaatigut?
2 Jehovap sumik ilimasuffigaatigut: Qularutissaanngilaq tamatta kiffartornerorusukkaluartugut. Iliuusererusutavulli iliuuserisinnaasavullu assigiinngissuteqartorujussuupput. Iliuuseqarnerorusunitta takutippaa imminut naammagisimaalersimanngitsugut. Eqqaamasariaqarparput Jehovap pisinnaasatta killeqarnera nalunngikkaa, pisinnaasavullu qaangerlugit piumaffiginngikkaatigut. (Tuss 103:13, 14) Sumik ilimasuffigaatigut? Kissaatigaa tarnikkut iluunngarluta kiffartorfigissagitsinni sapinngisatsinnik iliuuseqarluta. — Kol 3:23.
3. Kiffartornermi suliniarnerput qanoq nalilersinnaavarput?
3 Qanoq ililluta paasisinnaavarput uagut atukkatsinnut tunngatillugu suna piviusorsiortuusoq. Jehova qinnuigisinnaavarput atukkatta piviusorsiortumik isiginissaannut ikioqqulluta. (Tuss 26:2) Kristumiu anersaakkut inersimalluartoq tatiginartorlu, uagutsinnut ikinngutaasoq ilisarisimannilluartorlu, qanoq siuariarnissatsinnut pisariaqartitaqarnitsinnik oqassalluni tunuarsimaanngitsoq aamma iluaqutaalluarsinnaavoq. (Uss 27:9) Eqqaamajuttaaq pissutsit allanngortarmata atukkatta akuttunngitsumik eqqarsaatigeqqinnissaannut uagutsinnut iluaqutaassaaq. — Ef 5:10.
4. Kiiffartornermut tunngatillugu eqqaasitsissutit Biibilimeersut qanoq isigissavavut?
4 Eqqaasitsissutit qanoq isigissavavut: Arpannermi isiginnaartut kajumissaarillutik nilliakkajuttarput. Kajumissaarillutik nillianerannut arpattut anguniakkamut apuunnissaat siunertarineqartarpoq, isornartorsiornagit. Assingusumik Biibililersaarutini, ataatsimiinerni atuagassiaatitsinnilu kajumissaarneqartarpugut eqqaasinneqartarlutalu ‘oqaatsip oqaluussissutiginissaanut qanoq ilisukkulluunniit sassartaqqulluta’. Eqqaasitsissutit taakkua uagutsinnut iluaqutaanissaat siunertaavoq, naammaginartumik angusaqarsimannginnitsinnut isornartorsiutaanatik. (2 Tim 4:2) Sapinngitsannik iliortuartilluta qularutigissanngilarput Jehovap ‘suliavut asanninnerpullu takutissimasavut’ iluarinninnermik eqqaamajumaarai. — Hebr 6:10.