“Ilisimassuseq eqqortuutitaavoq suliamigut”
1. Suliniuterput inuit ilaannit qanoq isigineqartarpa?
1 Ilaatigut naapitassaasarput inuit oqaluussiffigisartakkatsinni nuanningitsumik qisuariartartut Jehovamut Nalunaajaasut pillugit paatsuugaqarsimagamik imaluunniit kukkusumik paasitinneqarsimagamik. Immaqa tusagassiuutinit kinaassusersiortunit isiginnittaasiat sunnerneqarsimapput. Allaat sumiiffiit ilaanni “immikkoorniaqatigiittut navianartutut” oqaatigineqartarluta. Isornartorsiutinik taamaattunik nalaataqaraangatta qanoq qisuariartassaagut?
2. Isornartorsiorneqarnitsinni nikallornissaraluarput qanoq ililluta pinngitsoortissinnaavarput?
2 Isiginnittaaseq isumalluartoq attatiinnaruk: Ukiuni hundredelinni siullerni Jiisusi Jehovallu kiffai allat paatsoorneqakkajullutillu oqaatissuaatigineqartarput. (ApS 28:22) Isornartorsiorneqarnerminnili kiffartornertik kanngusuutigilerneq ajorpaat. Jiisusi ima oqarpoq: “Ilisimassuseq eqqortuutitaavoq suliamigut”. (Matt 11:18, 19) Ataatami piumasaanik ilungersuussilluni maleruaajuaannarpoq tatigalugulu sallusuissummik ujaarlivissut takusinnaassagaat nutaarsiassaq nuannersoq qanoq naleqartigisoq. Nikallornissaraluarput pinngitsoortissinnaavarput Guutip ernera assingusumik pineqarsimasoq eqqaamasarutsigu.
3. Sooq nalunaarutit nuanninngitsut akerlilersorneqartarnerillu tupaallaatigissanngilagut?
3 Jiisusip erseqqissarpaa silarsuarmit uumissorneqarnermisut ajoqersugai aamma uumissorneqarumaartut. (Joh 15:18-20) Taamaattumik tupaallaatigisariaqanngilarput aamma ullumikkut nalunaarutinik nuanninngitsunik tusagiasaarneqartaratta akerlilersorneqarlutalu. Ilumoortumilli ullut kingulliit naggatissaat qalliartortillugu Saatanilu kamannerujartortillugu tamakkua suli akulikinnerusumik pisalernissaat ilimagiinnarsinnaavarput. (Saqq 12:12) Tamannali ilutigalugu nuannaarutigisinnaavarput Saatanip silarsuaata aserungajalerneranut tamakkua uppernarsaataammata.
4. Nutaarsiassamut nuannersumut nuanninngitsunik qisuariartoqarpat qanoq pissuseqassaagut?
4 Inussiarnersumik akigit: Nuanninngitsunik qisuariartunik naapitaqaraangatta, tamatigut saamasumik inussiarnersumillu akisariaqarpavut. (Uss 15:1; Kol 4:5, 6) Ajornanngippat pulaagarlu ilumoortumik paasisaqarusuppat nassuiaasinnaavarput, Jehovap Nalunaajaasui pillugit paatsuuisoqartaqimmat, imaluunniit aperisinnaavarput sooq uagut pilluta taamatut isumaqarnersoq. Inussiarnersumik akinitta Jehovap Nalunaajaasui pillugit tusakkaminik pulaagaq eqqarsalerseqqissinnaassavaa tullianilu Nalunaajaasunik pulaarneqaqqikkuni immaqa tusarnaarusulersimassalluni. Pulaagarli kamattorujussuuppat pitsaanerussaaq inussiarnersumik qimaguteqqiinnarutta. Allanit qanorluunniit isigineqaraluarutta qularutigissanngilarput Jehovap kiffartornerput pingaartikkaa. — Es 52:7.