’Ersissanngilatit’
1. Unamminiagassat Jeremiap nalaatai suut inuttut nalaassinnaavavut?
1 Jeremia pruffiitinngoqquneqarami imminut annikigivoq. Jehovali oqarpoq: “Ersigissanngilatit,” sulianilu naammassisinnaaniassammagu asannittumik nakussatillugu. (Jer 1:6-10) Ullumikkut ittoornerup imminullu tatiginnginnerup oqaluusseqataanissatsinnik akornusersinnaavaatigut. Ilaannikkut inuit qanoq qisuariarnissaat imaluunniit qanoq isigineqarnissaq siooragalugit oqaluussinissamit tunuarsimaarsinnaasarpugut. Qanoq ililluta siooraneq taamaattoq qaangersinnaavarput, aamma taamaaliorutta suut inuttut pilluaqqussutigisinnaavavut?
2. Oqaluussinermut tunngatillugu siooraneq qaangerniarutsigu piareersarneq qanoq iluaqutigisinnaavarput?
2 Piareersarluarit: Piareersarluarsimanerup siooraneq annikillisingaatsiarsinnaavaa. Assersuutigalugu akerliliisarnerit tusakulasakkavut uteqattaarlugit piareersareersimagutsigit akinissaannut piareersimassaagut. (Uss 15:28) Soormi unnuk ilaqutariittut anersaakkut ittunik sammisaqarfik atorluarlugu atuarfimmi oqaluussinermiluunniit unamminiarnartut nalaanneqarsinnaasut assigiinngitsut anigorniarnissaannut sungiusarussigit? — 1 Petr 3:15.
3. Jehovamut tatiginninnerup annilaanganermik qaangiiniarnitsinni qanoq ikiorsinnaavaatigut?
3 Jehova tatigiuk: Jehovamut tatiginninneq annilaangajunnaarnissamut iluaqutaalluarsinnaavoq. Jehovap ikiorniarluta neriorsornikuuaatigut. (Es 41:10-13) Pitsaanerusumik ikiortissaqarnerpugut? Aammattaaq Jiisusip neriorsoqqissaarnikuuaatigut — allaat naatsorsuutiginngisamik pisoqariataassagaluarpat — anersaap illernartup nalunaajaalluarnisatsinnut ikiorsinnaassagaatigut. (Mark 13:11) Taamaattumik aalajangersimasumik Jehovap anersaava illernartoq qinnutigiuartigu. — Luk 11:13.
4. Naak unamminiarnartunik nalaataqartaraluarluta kiffartornermi aalajaaginnarutta qanoq pilluaqquneqaatigissavarput?
4 Pilluaqqussutissat: Naak unamminiarnartunik nalaataqartaraluarluta kiffartornitsinni aalajaaginnarutta siunissami misilinneqarnerit ajunngitsumik anigorniarnissaannut nukisaqassaagut. Sapiissuseq siooranngissuserlu ineriartortissavavut — ‘anersaamik illernartumik ilumioqangaarnermut’ ilisarnaataasut. (ApS 4:31) Jehova ikiortigalugu annilaanganerup qaangeriartuaarnerani, uppernerput annaassisinnaaneranillu pissaaneranut tatiginninnerput nakussatsissavavut. (Es 33:2) Aammattaaq nuannaarneq nalerisimaarnerlu misigissavavut, ilisimagatsigu Ataatatsinnut qilammiusumut iluarinartuulluta. (1 Petr 4:13, 14) Taamaattumik siooranata Naalagaaffimmik oqariartuut oqaluussissutigisigu tatigalugu Jehovap ikiorumaaraatigut!