Eqqarsaatiginneqqissaarneq qinunerlu — Oqaluussisartunut ilungersuussisunut pisariaqartut
1. Jiisusip suliaminut pingaarnerpaamut akornuserneqannginnissaminut suna iluaqutigaa?
1 Jiisusi unnuk tamaat inunnik ajorunaarsitsisimavoq anersaapilunnillu anisitsisarluni. Aqaguani ajoqersugaasa nanigamikku oqarput: “Tamarmik ujarpaatsit.” Oqaatsinik taakkunannga kajumissaarpaat tupinnangaartuliani ingerlatiinnaqqullugit. Jiisusili suliaminut pingaarnerpaamut akornuserneqarumanngilaq, tassa nutaarsiassap nuannersup oqaluussissutiginissaanut. Akivoq: “Allanukarta, illoqarfeeqqanut matuma eqqaaniittunut, taakkunanissaaq oqaluussisinnaaniassagama; tamanna pillugu aallarpunga.” Suliaminik aallussiinnarnissaanik Jiisusip suna iluaqutigaa? Ullaaralaakkut makiaarsimavoq qinuniarluni eqqarsaqqissaarniarlunilu. (Mark 1:32-39) Qinunerup eqqarsaatiginneqqissaarnerullu qanoq ikiorsinnaavaatigut oqaluussisartuunissatsinnut ilungersuussisut?
2. Oqaluussinermi ilungersuusiuaannarnissatsinnut iluaqutissatut suut eqqarsaatigeqqissaarsinnaavavut?
2 Suna eqqarsaatigeqqissaassavarput? Jiisusip inuit maluginiarpai “paarinerlugaallutillu naakkinarsisimangaarmata savatut paarsisoqanngitsutut.” (Matt 9:36) Taamatuttaaq uagut eqqarsaatigisinnaavarput nutaarsiassaq nuannersoq inuit qanoq pisariaqartitsigigaat. Aamma piffissap ilungersunartuunera eqqarsaatigeqqissaarsinnaavarput. (1 Kor 7:29) Taamatuttaaq pingaartillugit eqqarsaatigisinnaavavut Jehovap suliai pissusiilu, Jehovamut Nalunaajaasuuniita pisinnaatitaaffiunera, aamma Guutip oqaasiani anersaakkut erlinnartuutit ilikkarsimasavut inuit angalaarfigisartakkatsinniittut suli paasisimanngisaat. — Tuss 77:12-14; Es 43:10-12; Matt 13:52.
3. Qaqugukkut eqqarsaatiginneqqissaarsinnaavugut?
3 Eqqarsaatiginneqqissaarneq qaqugukkut pisinnaava? Ilaat Jiisusitulli ullaaralaarsuaq nipaannerani makiaartarput. Allat unnukkut innannginnerminni eqqarsaatiginneqqissaarneq iluarinerusarpaat. (1 Mos 24:63) Allaat suliassarpassuaqaraluarluta eqqarsaatiginneqqissaarinissamut piffissarsisinnaavugut. Ilaat angallatini tamanut ammasuni periarfissarsisarput. Allat ullup qeqqasiornermi ilaa atortarpaat. Amerlasuut isumaqarput, oqaluussiartunngitsiarnerminni sivikitsunnguamilluunniit eqqarsaatiginneqqissaarneq, ilungersuussinerullutik nakimaassuseqarnerullutillu oqaluussinissaminnut iluaqutigisarlugu.
4. Sooq eqqarsaatiginneqqissaartariaqarpugut?
4 Eqqarsaatiginneqqissaarinerup qinunerullu Jehovamik kiffartuussinissatsinnik kissaateqarnerulersissavaatigut anersaakkullu tunngasunik sammisaqarnitsinnik aallussinerulersilluta oqaluussiinnarnissatsinnillu aalajangersimanitsinnut nakussatsilluta. Guutip kiffaata pingaarnerpaas, Jiisusip, eqqarsaatiginneqqissaarneq iluaqutigaa, uaguttaaq iluaqutigisinnaavarput.