Nikallujuissuseq — oqaluussinitsinni ilisarnaat
1. Jehovap inuiaqatigiit nikallujuissusermik qanoq ersersitsivigisimavai?
1 Guutip inuiaqatigiinnik iliuuseqarfiginnittarneranut nikallujuissuseq ilisarnaatigaa. (2 Mos 34:6; Tuss 106:41-45; 2 Petr 3:9) Nikallujuissusia pingaartumik silarsuaq tamakkerlugu oqaluussinikkut takuneqarsinnaavoq. Naak ukiuni 2000-ini Jehovap inuiaqatigiit sulissutigereersimagaluarai, taamaattorli suli inuit eqqortuliorusuttut imminut kajungilersinniartarpai. (Joh 6:44) Qanoq ililluta oqaluussinitsinni Jehovap nikallujuissusia ilaarsinnaavarput?
2. Oqaluussiffigisartakkatsinni nikallujuinneq qanoq ersersittarparput?
2 Illumiit illumut oqaluussineq: Oqaluussiffigisartakkatsinni inunnut suli soqutiginninnermik ersersitsisimanngitsunut ‘soraarnata’ (NV) oqaluussiuarnitsigut Jehovap nikallujuissusia ilaarsinnaavarput. (ApS 5:42) Oqaluussinitsinni soqutigisaqannginneq, illaruaatigineqarneq akerlilersorneqarnerlu nikallujuilluta atortarpavut. (Mark 13:12, 13) Sallusuissutsip naatsiiassartaanik ilungersorluta imerterinitsinni nikallujuissuserput aamma ersersittarparput, allaat soqutiginnittut naapikkuminaakkaangata.
3. Sooq atuaqqissaaqateqarnermi pulaaqqiinermilu nikallujuinneq pisariaqarpa?
3 Biibilimik atuaqqissaaqateqarneq: Naasup naajartortinnissaanut nikallujuissuseq pisariaqarpoq. Paarisinnaavarput, naajartornerali sukkatsisarsinnaanngilarput. (Jak 5:7) Anersaakkut naajartorneq aamma taamaappoq, arriitsumik kittaartumillu. (Mark 4:28) Atuaqqissaaqatigisartakkatta upperisarsiornermi ajoqersuutit eqqunngitsut ileqqutoqqallu Biibilimut naapertuutinngitsut qimassallugit ajornakusoortissinnaavaat. Atuaqqissaaqatigisartakkavut allannguipallannissaannut tatiniarsarissanngilavut. Guutip anersaavata atuaqqissaartartup uummataa sunnerniarlugu piffissaq sivisooq atortariaqarmagu nikallujuinneq pisariaqarpoq. — 1 Kor 3:6, 7.
4. Ilaquttatsinnut allamik upperisalinnut sunniuteqarluartumik nalunaajaanissatsinnut nikallujuissuseq qanoq iluaqutigisinnaavarput?
4 Ilaquttat allamik upperisallit: Naak ilaquttavut allamik upperisallit sallusuissummik ilikkarnissaat kissaatigingaaraluaripput, oqaluttuunnissaannut piffissaq eqqortoq nikallujuilluta utaqqisariaqarparput paasissutissanik amerlavallaanik tuninissaat mianersuutiitigalugu. (Oqal 3:1, 7) Piffissanngornissaa utaqqitillugu pissusilersornerput nalunaajaatissavarput, upperisatta oqaluttuarinissaanut piareersimajuarluta saamasumik ataqqinnittumillu. (1 Petr 3:1, 15) Aap, oqaluussineq nikallujuissusermik ilisarnaatilik sunniuteqarnerussallunilu Ataatatsinnut qilammiusumut nuannaarutaanerussaaq.