Aqqusinermi oqaluussineq sunniuteqarluartoq
1. Jiisusi sutigut ilaarsinnaavarput?
1 Nunarsuarmi kiffartornermini Jiisusi inunnut aqqusinermi imaluunniit inoqarfiusuni sumiluunniit naapitaminut oqaloqatiginnissalluni nangaaneq ajorpoq. (Luk 9:57-61; Joh 4:7) Oqariartuutini pingaaruteqaqisoq inunnut sapinngisamik amerlasuunut tusartikkusuppaa. Ullumikkut, Guutip ilisimassusia inunnut paasitissallugu aqqusinermi oqaluussineq pitsaalluinnartuuvoq. (Uss 1:20) Naliliisinnaassuseqarluta inunnut saaffiginnissinnaagutta angusaqarluarnerussaagut.
2. Aqqusinermi oqaluussinermi inunnut qanoq saaffiginnissaagut?
2 Saaffiginnigit: Inunnik saaffigineqarnissat utaqqiinnarnagu pitsaanerussaaq illit siulliullutit saaffiginnikkuit. Qungujulagit, isaasigut isigiuk, eqqissisimagit inussiarnerlutillu. Oqaluussisartunik arlalinnik ingiaqateqaruit pitsaanerussaaq kisimiillutit inunnut saaffiginnittaruit. Aamma soqutiginninnerup ineriartorteqqinnissaanut iliuuseqartariaqarputit. Tulluarpat, oqaloqatigeereerussi aperisinnaavat qanoq ilillugu naapeqqissinnaanerlugu. Oqaluussisartut ilaat aalajangersimasumik uninngaarfeqartarput inuillu taakkoqqissaat oqaloqatigeqqittarlugit soqutiginninnerallu ineriartortillugu.
3. Aqqusinermi oqaluussigaangatta qanoq naliliisinnaassuseqartariaqarpugut?
3 Naliliisinnaassuseqarit: Aqqusinermi sumi inissisimanissat kinalu oqaloqatigissanerlugu eqqarsaatigikkit. Saneqquttut tamakkerlugit oqaloqatiginiartariaqanngilatit. Malussarissuugit. Assersuutigalugu, inuk ulapippasippat immaqa ajunnginnerussaaq saaffiginngikkaanni. Pisiniarfiit saavanni nalunaajaaguit, pisortamut ernumalersitsisumik pissuseqarnaveersaarit. Pitsaanerussagunarpoq inuit pisiniarfimmiit anigaangata saaffigisaraanni, isilernermiunngitsoq. Inuit tupatsinnagit saaffigisakkit. Biibililersaarutinik tunisinialeraangavit naliliisinnaassuseqarit. Immannguaannaq soqutiginnittoq atuagassianik tuninagu naqitaaqqamik neqeroorfigisinnaavat.
4. Sooq aqqusinermi oqaluussineq iluaqutaallunilu nuannersuua?
4 Aqqusinermi oqaluussinermi sallusuissutsip naatsiiassartaanik piffissami sivikitsumi siaruarteripallassinnaavugut. (Oqal 11:6) Naapitatta ilaat taakkuusinnaapput illumiit illumut angalaaraangatta naapittanngisavut. Soormi aqqusinermi oqaluussinermut nuannersumut sunniuteqarluartumullu peqataaniarlutit pilersaarusioruit?