Sapinngissannik Jehovamit ajoqersorneqartippit?
1. Ajoqersorneqarneq Jehovap qanoq isumaqarfigaa?
1 ‘Ajoqersuisorsuatta’ Jehovap kissaatigaa ajoqersorneqarsimassasugut. (Es 30:20, NV) Ernini angajulliliani pinngortikkamiuk ajoqersuilluni aallartippoq. (Joh 8:28) Adamip pikitsitsinerata kingorna Jehovap ajoqersuinini unitsiinnanngilaa asannillunili inuit naammalluinnanngitsut ajoqersorneqartilerpai. — Es 48:17, 18; 2 Tim 3:14, 15.
2. Ajoqersorneqarneq suna ingerlava?
2 Ullumikkut Jehovap ajoqersorneqarneq oqaluttuarisaanermi annerpaaq aquppaa. Esajap siulittuutigisaatut nunarsuarmi tamarmi millionillit assersuutaasumik ‘Jehovap illuata qaqqaanut’ majuarput. (Es 2:2, NV) Sooq tassunga majuarpat? Jehovap aqqutigeqqusaanik ilinniariartorlutik, aap Jehovamit ajoqersorneqarumallutik. (Es 2:3) Ukiumi kiffartorfiusumi 2010-mi, Jehovap Nalunaajaasuisa Biibilip sallusuissutaanik oqaluussinermut ajoqersuinermullu akunnerit 1,6 milliardilinnit amerlanerusut atorsimavaat. Tamatumalu saniatigut sapaatip akunneri tamaasa nunarsuaq tamakkerlugu ilagiinni 105.000-inik sinneqartuni anersaakkut ajoqersuisoqartarpoq, tamatumunngalu inussiaq aalajaallunilu silatooq oqaatsit 500-inik amerlanerusut atorlugit biibililersaarutinik ajoqersuinermut atorneqartartunik isumaginnittuuvoq.
3. Jehovap ilinniartitsinera illit inuttut qanoq iluaqutigaajuk?
3 Iluaqutigilluaruk: Jehovamit ilinniartitaanerput iluaqutigingaarparput! Ilikkarparput Guuti ateqartoq isumassoraatigullu. (Tuss 83:19; 1 Petr 5:6, 7) Inuunermi apeqqutit pingaarnerpaat akissutissarsinikuuavut — Sooq inuit naalliullutillu toqusarpat? Qanoq piviusumik pillualersinnaavunga? Inuuneq qanoq siunertaqarpa? Jehovap aamma ‘iluatsitsilluarnissatsinnut’ ileqqorissaarnissamik siunnersorsimavaatigut. — Jos 1:8.
4. Guutip kiffaanut ilinniartitaanerit suut periarfissaappat, aamma sooq sapinngisatsinnik Jehovamit ajoqersorneqartittariaqarpugut?
4 Tamatuma saniatigut, Jehovap kiffaminut immikkut ittumik ilinniartitaaneq pisinnaatilersimavaa imminut annertunerusumik kiffartorsinnaalernissaannut ikiorniarlugit. Qupperneq 4-6-imi suut periarfissaanersut nalunaarsorneqarsimapput. Pissutsit atukkavut pissutaallutik allaaserineqartut periar-fissaqarfiginngikkaluarutsigilluunniit Jehovamit ilinniartitaaneq uagutsinnut periarfissaasoq peqataaffigisinnaavarput? Inuusuttut silarsuarmi ilinniartitsisuminnit allanilluunniit qaffasissumik ilinniagaqarnissaannik kajumissaarneqartartut anersaakkut anguniaqarnissaannik — tassa Jehovamit ajoqersorneqarnissamut — silarsuup neqeroorutaanit pitsaanerungaartumut kajumissaartarpavut? Jehovamit sapinngisatsinnik ajoqersorneqartikkutta pilluarluta inuuneq maannakkut siunissamilu naassaanngitsumik nuannaarutigisinnaavarput. — Tuss 119:105; Joh 17:3.
Jehovap peqatigiiffiani ilinniartitaanermut periarfissat
Atuffarissarfik
Siunertaq: Biibilimik atuarsinnaanissaq sallusuissummillu allanik ilinniartitsinissaq siunertaralugit allannermik atuarnermillu ilinniarneq.
Sivisussuseq: Pisariaqartitsineq naapertorlugu.
Sumiiffik: Naalagaaffilersaarfimmi najukkamiittumi.
Peqataasinnaasut: Oqaluussisartut tamarmik soqutiginnittullu.
Qanoq qinnuteqartoqarsinnaasoq: Ilagiit pisariaqartitaat naapertorlugu utoqqaanertat pilersaarusiussapput, tamatuminngalu iluaqutissarsisinnaasut tamarmik peqataanissaannut kajumissaarneqarput.
Teokratiimik Ilinniarfik
Siunertaq: Oqaluussisartut oqaluussillaqqissunngornissaannik nutaarsiassamillu nuannersumik ajoqersuillaqqissunngornissaannik ilinniartitsineq.
Sivisussuseq: Ingerlaannartuuvoq.
Sumiiffik: Naalagaaffilersaarfimmi najukkamiittumi.
Peqataasinnaasut: Oqaluussisartut tamarmik. Aamma ilagiit sammisassaqartitsineranut peqataasartut Biibilillu ajoqersuutaannik tapersersuisut kristumiutullu najoqqutassianut naapertuuttumik inooriaaseqartut.
Qanoq qinnuteqartoqarsinnaasoq: Teokratiimik Ilinniarfimmik nakkutilliisoq oqaloqatigineqassaaq.
Allamiut Oqaasiinik Pikkorissarfiit
Siunertaq: Allamiutut oqaatsit atorlugit oqaluussisartut nutaarsiassamik nuannersumik oqaluussisinnaanissaannik ilinniartitsineq.
Sivisussuseq: Qaammatit sisamat tallimalluunniit. Nalinnginnaasumik arfininngornikkut ullaakkut tiimi ataaseq marlulluunniit atorlugit pisarpoq.
Sumiiffik: Nalinginnaasumik naalagaaffilersaarfimmi qanittumiittumi.
Peqataasinnaasut: Oqaluussisartut tusaamaneqarluartut allamiut oqaasii atorlugit oqaluusserusuttut.
Qanoq qinnuteqartoqarsinnaasoq: Pisariaqartitsineq naapertorlugu pikkorissartitsinerit immikkoortortaqarfimmit pilersaarusiorneqartarput.
Naalagaaffilersaarfiliorneq
Siunertaq: Naalagaaffilersaarfiliorneq aserfallatsaanerlu. Taanna ilinniarfiunngilaq, kajumissutsiminilli suleqataasut, sanaartornermi ikuisinnaaniassagamik, piginnaasanut assigiinngitsunut ilinniartinneqartarput.
Sivisussuseq: Kajumissutsimik suleqataasup atugai naapertorlugit.
Sumiiffik: Sumiluunniit Nunap Immikkoortuani Sanaartortitsinermik Ataatsimiititaliap sanaartorfissaani. Kajumittut ajunaarnersuarnut najukkaminnut ungasissumiittumut ikiuiniaqatigiinnut ikiuiartoqquneqarsinnaapput.
Piukkussat: Qatanngutit arnat angutillu kuisimasuussapput utoqqaanertaqatigiillu akuersisimassallutik. Ilinniagaqarsimasariaqanngillat.
Qanoq qinnuteqartoqarsinnaasoq: Spørgeskema til frivillige medarbejdere ved bygning af rigssale (S-82) ilagiinni utoqqaanertanit pissarsiarineqarsinnaavoq immersoruk.
Pionerinut Ilinniarfik
Siunertaq: ‘Kiffartuutip naammasillugu’ suliarinninissaanut pionerinik ikiuineq. — 2 Tim 4:5.
Sivisussuseq: Sapaatip akunneri marluk.
Sumiiffik: Immikkoortortaqarfimmit aalajangerneqartarpoq; nalinginnaasumik naalagaaffilersaarfimmi qanittumiittumi.
Piukkussat: Minnerpaamik ukioq ataatseq pioneriusimasut.
Qanoq qinnuteqartoqarsinnaasoq: Pionerit qaaqquneqartarput nakkutilliisuminnillu angalasartumit nalunaarfigineqartarlutik.
Betelimiilerlaanut Ilinniarfik
Siunertaq: Ilinniarfik taanna, betelimiilerlaat iluatsilluartumik sulilernissaannut ikiorniarlugit pilersinneqarsimavoq.
Sivisussuseq: Sapaatip akunnerini 16-ini akunneq ataaseq.
Sumiiffik: Betelimi.
Piukkussat: Betelimi najugallit imaluunniit kajumissutsiminnik ikiuisartut (ukioq ataaseq sivisunerusumilluunniit).
Qanoq qinnuteqartoqarsinnaasoq: Betelimiittut piukkunnaatillit qaaqquneqartarput.
Naalagaaffimmut Kiffartornermik Ilinniarfik
Siunertaq: Utoqqaanertat ilagiinnilu kiffartortut akisussaaffimminnik aaqqissuussaanermullu nakkutilliillualernissaannik ilinniartinneqarnissaat. (ApS 20:28) Taanna ukiut arlaqanngitsut qaangiukkaangata, Siulersuisoqatigiit aalajangiineratigut pisarpoq.
Sivisussuseq: Ukiuni kingullerni utoqqaanertanut ulloq ataaseq affarlu atorneqartarpoq ilagiinnilu kiffartortunut ulloq ataaseq atorneqartarluni.
Sumiiffik: Nalinginnaasumik naalagaaffilersaarfimmi qanittumiittumi imaluunniit ataatsimeersuartarfimmi.
Piukkussat: Utoqqaanertaassapput imaluunniit ilagiinni kiffartortuussapput.
Qanoq qinnuteqartoqarsinnaasoq: Utoqqaanertat ilagiinnilu kiffartortut nakkutilliisumit angalasartumit qaaqquneqartarput.
Ilagiinni Utoqqaanertanut Ilinniarfika
Siunertaq: Utoqqaanertat ilagiinni akisussaaffimminnik aallussilluarlernissaat.
Sivisussuseq: Ullut tallimat.
Sumiiffik: Immikkoortortaqarfimmit aalajangerneqartarpoq; nalinginnaasumik naalagaaffilersaarfimmi qanittumiittumi imaluunniit ataatsimeersuartarfimmi.
Piukkussat: Utoqqaanertaassapput.
Qanoq qinnuteqartoqarsinnaasoq: Utoqqaanertat immikkoortortaqarfimmit qaaqquneqartarput.
Nakkutilliisunut Angalasartunut Nuliaannullu Ilinniarfikb
Siunertaq: Nakkutilliisut angalasartut nunallu immikkoortuani nakkutilliisut ilagiinnik kiffartuussilluarnerulernissaat ‘qasusuillutillu nalunaajaasartut ajoqersuisartullu” savaatinik paarsilluarnerulernissaat’. — 1 Tim 5:17; 1 Petr 5:2, 3.
Sivisussuseq: Qaammatit marluk.
Sumiiffik: Immikkoortortaqarfimmit aalajangerneqartarpoq.
Piukkussat: Nakkutilliisuussapput angalasartut imaluunniit nunap immikkoortuani nakkutilliisuussapput.
Qanoq qinnuteqartoqarsinnaasoq: Nakkutilliisut angalasartut nuliilu immikkoortortaqarfimmit qaaqquneqartarput.
Qatanngutinut Angutinut Aappaqanngitsunut Biibilimik Ilinniarfikc
Siunertaq: Utoqqaanertat ilagiinnilu kiffartortut aappaqanngitsut akisussaaffimmik suli annerusumik tigusinissaannik piareersarneq. Ilinniarsimasut amerlanerit nunagisaminnut pisariaqartitsiffiusumut utertinneqartarput. Ikittuinnaat kajumittut nunami allami suliassinneqartarput.
Sivisussuseq: Qaammatit marluk.
Sumiiffik: Immikkoortortaqarfimmit aalajangerneqartarpoq; nalinginnaasumik ataatsimeersuartarfimmi imaluunniit naalagaaffilersaarfimmi.
Piukkussat: Qatanngutit angutit aappaqanngitsut 23-t 62-illu akornanni ukiullit peqqissullu pisariaqartitsiffiusumi sumiluunniit qatanngutinik naalagaaffiullu soqutigisaannik kiffartuusserusuttut. (Mark 10:29, 30) Minnerpaamik ukiuni marlunni ataannartumik kiffartortuusimassapput.
Qanoq qinnuteqartoqarsinnaasoq: Immikkoortortaqarfimmi najukkannut qanittumiittumi taama ittumik ilinniarfeqarpat qinnuteqarnissaminut soqutiginnittunut ataatsimeersuaararnermi ataatsimiititsisoqassaaq. Ataatsimiinnermi tamatumani amerlanerusunik paasisitsiniaasoqassaaq.
Aappariinnut Kristumiunut Biibilimik Ilinniarfikd
Siunertaq: Jehovamut peqatigiiffianullu kiffartornerulernissamut aappariinnut katissimasunut immikkut ittumik ilinniartitsineq. Atuarnerminnik naammassinnissimasut amerlanerit nunagisaminnut pisariaqartitsiffiusumut utertinneqartarput. Ikittuinnaat kajumittut nunami allami suliassinneqartarput.
Sivisussuseq: Qaammatit marluk.
Sumiiffik: Atuarfiit siulliit USA-mi Patterson-imi New York-miittumi Watchtower Educational Center-imi pisarput. Kingorna immikkoortortaqarfimmit aalajangerneqassaaq ilinniarnissaq sumi pissanersoq, nalinginnaasumik naalagaaffilersaarfimmi ataatsimeersuartarfimmiluunniit pisarput.
Piukkussat: Aappariit katissimasut 25-it 50-illu akornanni ukiullit peqqissullu sumiluunniit pisariaqartitsiffiusumi kiffartornissamut periarfissaqartut oqariaannaasullu: “Piareersimavunga, aallartinnga!” (Es 6:8) Tamatuma saniatigut minnerpaamik ukiunik marlunnik katissimasuussapput minnerpaamillu ukiuni marlunni ataannartumik kiffartorsimassallutik.
Qanoq qinnuteqartoqarsinnaasoq: Immikkoortortaqarfimmi taama ittumik ilinniarfeqarpat qinnuteqarnissaminut soqutiginnittunut immikkut ittumik ataatsimeersuaararnermi ataatsimiititsisoqassaaq. Ataatsimiinnermi tamatumani amerlanerusunik paasisitsiniaasoqassaaq.
Napasuliap Alapernaarsuiffiup Biibilimik Ilinniarfia Gileadi
Siunertaq: Pionerinut allanullu piffissaq tamaat atorlugu kiffartortunut ilinniartitsineq.
Sivisussuseq: Qaammatit tallimat.
Sumiiffik: Watchtower Educational Center, Patterson, New York, USA.
Piukkussat: Aappariit katissimasut ukiut pingasut sioqqullugit kuisereersimasut 21-t 38-llu akornanni ukioqarlutik siullerpaamik qinnuteqarsimasut. Tuluttut oqalussinnaasuussapput. Minnerpaamik ukiuni marlunni katissimasuussaput minnerpaamillu ukiuni marlunni ataannartumik piffissaq tamaat kiffartortuusimassallutik. Qinnuteqartut peqqissuussapput. Pionerit nunami allami kiffartortut (aamma ajoqersuiartortitatut taaneqarsinnaasut); nakkutilliisut angalasartut; Betelimi najugaqartut; Kiffartortut Toqqakkat Ilinniarfianni, Qatanngutit Angutit Aappaqanngitsut Biibilimik Ilinniarfianni aamma Aappariit kristumiut Biibilimik Ilinniarfianni atuareersimasut piumasaqaataasut maleruarpatigik qinnuteqarsinnaapput.
Qanoq qinnuteqartoqarsinnaasoq: Ilinniarfinnut taakkununnga soqutiginnittunut immikkoortortaqarfinni toqqakkani ataatsimeersuarnermi ataatsimiititsisoqassaaq. Ataatsimiinnermi tamatumani amerlanerusunik paasisitsiniaasoqassaaq. Illit najukkanni ataatsimeersuarnermi ataatsimiititsisoqanngippat immersuerusullutillu taava immikkoortortaqarfimmut illit najukkannut paasisaqarneruniarlutit allassinnaavutit.
Immikkoortortaqarfiit Ataatsimiititaliaanni Ilaasortanut taakkualu Nuliaannut Ilinniarfik
Siunertaq: Ataatsimiititaliap ilaasortaat Betelinik aamma oqaluussinermik ilagiinnut tunngassuteqartunut nakkutiginninnerulernissaat aamma ilageeqatigiinnik nunallu immikkoortuinik, nutserinermik, naqiterinermik, biibililersaarutinik nassiussinermik immikkoortortanillu assigiinngitsunik nakkutiginninnerulernissaat. — Luk 12:48b.
Sivisussuseq: Qaammatit marluk.
Sumiiffik: Watchtower Educational Center, Patterson, New York, USA.
Piukkussat: Immikkoortoortaqarfimmi ataatsimiitsitaliamut imaluunniit nunap immikkoortuani ataatsimiititaliamut ilaasortat, imaluunniit qatanngutit taakkuninnga suliaqartussat.
Qanoq qinnuteqartoqarsinnaasoq: Qatanngutit angutit piukkunnaatillit nuliaallu Siulersuisoqatigiinnit qaaqquneqartarput.
a Ilinniarfik taanna nunat ilaannaanni atuuppoq.
b Ilinniarfik taanna nunat ilaannaanni atuuppoq.
c Ilinniarfik taanna nunat ilaannaanni atuuppoq.
d Ilinniarfik taanna nunat ilaannaanni atuuppoq.