Oqaluussiniaruit ujaaseqqaartariaqassaatit
1. Sooq oqaatsinik assigiinngitsunik oqaluffiusuni ilagiit angalaarfigisartagaat oqaatsit atorneqartut tunngavigalugit agguarneqarsimappat?
1 Ukiumi 33-mi piinsip ulluani anersaamik illernartumik kuineqarnermik kingorna Jiisusip ajoqersugaasa, ‘allamiut oqaasii atorlugit’ nunanit allanit aggersut, oqaluutilerpaat. (ApS 2:4) Tamatuma kingunerisaanik inuit 3.000-it kuisipput. Soqutiginarpoq tikeraat amerlanerit oqaatsit ataatsimut atorneqartut, soorlu Hebræerisut imaluunniit Grækerisut, oqaatsit atorlugit oqalussinnaammata. Taamaattorli Jehova aalajangerpoq naalagaaffimmik tusarliussaq taakkua oqaasii atorlugit oqaluussissutigineqassasoq. Qularnanngitsumik tamatumunnga pissutaavoq nutaarsiassaq nuannersoq namminneq oqaatsiminnik tusaraangamikku sunniuteqarluarnerusarmat. Taamaattumik ullumikkut, sumiiffinni assigiinngitsuni oqaatsinik assigiinngitsunik oqaluffiusuni, oqaatsit atorneqartut tunngavigalugit ilagiinni angalaarfigisartakkat agguarneqarsimapput. (Organiseret til at gøre Jehovas vilje qupp. 107 § 2-3) Gruppit allamiutut oqaluttut angalaarfigisartagassaminnik tunineqarneq ajorput, ilagiilli ilaaffigisaasa eqqaamiuisaluunniit angalaarfigisartagaanni allamiutut oqaluttut oqaluussiffigisarpaat.
2. (a) Qaqugu ujaasisoqassava? (b) Oqaatsinik assigiinngitsuni oqaluffiusuni ilagiit qanoq suleqatigiissinnaappat? (c) Allamiutut oqaluttumik soqutiginnittumik naapitsigutta qanoq iliussaagut?
2 Oqaatsinik assigiimmik oqaluffiusumi najugaqaruit illumiit illumut oqaluussineq ingerlatiinnarsinnaavat. Sumiiffimmili oqaatsinik assigiinngitsunik oqaluffiusumi najugaqaruit allaanerusumik ingerlanneqassaaq. Ilagiit allamiutut oqaasillit angalaarfigisartakkami tassani aamma oqaluussisinnaapput. Imaassinnaavoq gruppi imaluunniit allamiutut oqaluttut ilagiinnit saaffigineqartut allamiutut oqaluttoq pulaarneqarusuttoq pulaaqqullugu, ilagiilli imaluunniit gruppit nammineerlutik akisussaaffigissavaat allamiutut oqaluttut ujassallugit. (Ungalusaq takuuk “Suleqatigiigitsi”). Taamaattumik allamiutut oqaluttunik ujaasinerminni ilungersortariaqassapput illoqarfimmiunut apeqqutigisarlugit. Ujaasineq qanoq ingerlanneqassava?
3. Ilagiinni oqaluussisartut gruppilluunniit ujaasinerminnut piffissaq qanoq atsigisoq atortassaneraat suna aalajangiisuua?
3 Ujaasineq qanoq aaqqissuunneqarsinnaasoq: Ujaasinermut piffissaq qanoq atsigisoq atussanerlugu sumiiffinni assigiinngitsuni pissutsit apeqqutaapput. Assersuutigalugu allamiutut oqaluttut qassiuppat? Oqaluussisartut qassiuppat? Ilagiinni oqaluussisartut angalaarfigisartakkaminni ujaasinerminnut piffissaq tamaat atortariaqanngilaat. Killeqarfiulli iluani ungasinngitsuanilu najugaqarfiusut ujaasiffigineqarsinnaapput.Ujaasinerulli aaqqissuulluagaannissaa pingaaruteqarpoq sapinngisamik amerlasuut Jehovap aqqanik torlorfiginninnissaminnut periarfissaqalerniassammata. — Rom 10:13, 14.
4. (a) Ujaasinermik suliniarneq qanoq aaqqissuunneqassava? (b) Gruppit ilagiillu allamiutut oqaluttunik qanoq ujarsissappat?
4 Ujaasilluni angalaarfiusumi qalleraattumik sulinissaq pinngitsoorniarlugu utoqqaanertaqatigiit, pingaartumik kiffartornermik nakkutilliisoq, immikkoortortaqarfimmit najoqqutassiaq naapertorlugu ujaasilluni suliniarnermut aaqqissuussisuussaaq nakkutilliisuullunilu. (1 Kor 9:26) Gruppini allamiutut oqaluttuni qatanngut piukkunnaatilik, ajornanngippat utoqqaanertaq imaluunniit kiffartortoq, ilagiinni ilaaffigisaminit utoqqaanertaqatigiinnit toqqarneqarsimasoq siulersuisuussaaq. Oqaluussisartut amerlasuut ujaasiniarlutik piareersarnerminni aalajangersimasumik periuseqartarput, ilaatigut aqqit oqaaserineqartuni nalinginnaasumik atorneqartut telefonbogi imaluunniit internetti atorlugit katersortarpaat. Oqaatsit taakku atorlugit oqaluttuunersut paasiniarlugit sianerfigineqarlutilluunniit pulaarneqartarput. — Ungalusaq takuuk “Oqaatsinnik oqaluttut qanoq ujarsinnaagitit”.
5. (a) Ujaasilluni suliniarnermut oqaluussisartunut qanoq siunnersuuteqarpa? (b) Ujaasinermi inunnut qanoq oqarsinnaavugut?
5 Ujaasinermi suliniarnermut peqataagaangatta tamatigut siunertaqartumik ujaasisassaagut. Aaqqissuussaq oqaluussinerup ilagimmagu pissarnitsitut tulluartunik atisalersortassaagut. Amerlasuut saqqummiussassartik oqaatsillu atugassatik ujaasinerminni sungiusartarpaat taamaalillutillu piareersimasarlutik. Piffissaq ujaasinermut kisiat naatsorsortassavarput piareersarneq ilanngunnagu. Ujaasineq pingaaruteqaraluartoq oqaluusseriaatsinut tamanut ilaasarnissatsinnut oqimaaqatigiissaarissassaagut. — Ungalusaq takuuk “Ujaasinermi qanoq oqartoqarsinnaasoq”.
6. Tusilartunik ujaasinermi qanoq unamminiarnartoqarpa?
6 Tusilartunik ujaasineq: Tusilartunik ujaasineq unamminiarnartuuvoq taamaattumillu nikallujuittuusariaqarluni. Inuk tusilartoq aqqatigut, isikkuatigut atisaasigulluunniit takuneqarsinnaanngilaq. Tamatumalu saniatigut ilaqutaasut ikinngutaasullu tusilartumut illersuiniartuussinnaapput oqaluussisartunullu paasissutissanik tunniussinissaminnik tunuarsimaarsinnaallutik. Tusilartunik ujaasinermi siunnersuutit tulliuttut allamiutut oqaluttunik ujaasinermi aamma atorluarneqarsinnaapput.
7. (a) Najugaqarfinni tusilartunik ujaasinermi qanoq aperisinnaavugut? (b) Pulaagaq qanoq eqqissisarsinnaavarput?
7 Ilagiit gruppillu ussersorlutik oqaluttut, najugaqarfinni iluatsilluartumik tusilartunik ujaasisarsimapput. Pulaagaq immaqa saniliminik, suleqatiminik atuaqatiminilluunniit ussersorluni oqaluttumik ilisarisimasaqarpoq. Immaqa tusilartumik ilaqutaqarpoq. Eqqaamallugu pulaarnerit mianersortumik qisuariarfigineqarsinnaammat. Pulaagarli inussiarnersumik, eqqortumik naatsumillu nassuiaanneqarneratigut eqqissisarneqarsinnaavoq. Ilaat Biibili, dvd-it allalluunniit takutinneratigut tusilartunik ilisarisimasaqarnersut apeqqutilliinerminni iluatitsilluarsimapput. Oqartarput neriuutit Biibilimiittut tusilartunut takutikkusukkaluarlugit. Pulaagaq paasissutissanik tunniussinissaminut nangaappat immaqa allagartamik illit atinnik najukkannillu allassimasumik imaluunniit ilagiinni ataatsimiinnermut qaaqqusissummik ilaquttaminut tusilartumut ikinngutiminulluunniit tusilartumut tunniuteqqitassaminik tigusisinnaassaaq.
8. Tusilartut sukisaarsaartarfiinni, katersuuffigisartagaanni aamma ikiorsiissutinik aallerfigisartagaanni ujaasinermi qanoq iliortoqarsinnaava?
8 Tusilartut sukisaarsaartarfiinni, katersuuffigisartagaanni, ikiorsiissutinik aallerfigisartagaanni aamma ujaasisoqarsinnaavoq. Oqaluussisartut avatangiisimut naleqquttunik atisalersorsimassapput. Saqqummiussassaq ataatsimoortunut saqqummiunnagu, pitsaanerussaaq inummut ataatsimut marlunnulluunniit saqqummiukkaanni. Oqaloqatigiinneq iluatsilluarpat immaqa attaveqatigeeqqinnissamut isumaqatigiinniartoqarsinnaavoq.
9. Oqaluussisartut niuerniartarfinni tusilartunik qanoq ujaasisinnaappat?
9 Aamma niuerniartarfiit sumi inissisimanerinik assiliortoqarsinnaavoq periarfissaqalerpallu pulaarneqarsinnaallutik. Aamma orsersortarfiit immikkut assiliorneqarsinnaapput. Taamatuttaaq errorsisarfiit, neriniartarfiit, akunnittarfiit niuerniartarfiilluunniit allat assiliorneqarsinnaapput. Assiliami niuerniartarfiit assigiippata oqaluussisartut saqqummeeriaaseq ataaseq atorsinnaavaat isumasioqatigiillutillu pitsanngorsaasinnaallutik. Assersuutigalugu akunnittarfiit tusilartunik illusimasoqarajuttarmata saaffiginnittarfimmi sulisoq suliatsinnik naatsumik nassuiaassinnaavarput poortukkamillu dvd-imik ilagiinnilu ataatsimiinnermut qaaqqusissummik illusimasuinut tusilartunut tunniussassaminik tunillugu. Niuerniartarfiit ilaanni apeqqutigineqarsinnaavoq ussersorluni oqaluttunik sulisoqarnersut imaluunniit pisiniartartoqarnersut. Tusilartunut atuarfeqarpat atuakkanik atorniartarfiannut dvd-inik Biibililersaarutinik tunisinnaavavut.
10. Sooq oqaluusseriaaseq taama ittoq pisariaqaleraluttuinnarpa?
10 Suliaq pingaarutilik: Allamiutut oqaluttunik ujaasineq qasunarsinnaavoq. Taamaakkaluartoq angalaarfigisartakkani amerliartuinnartuni oqaluusseriaaseq taama ittoq pisariaqaleraluttuinnarpoq. Jehova, oqaluussinermik suliassiisoq, nakerisarsiortuunngilaq. (ApS 10:34) “Taassumami piumasaraa inuit tamarmik annaanneqassasut sallusuissummillu ilisarsissallutik.” (1 Tim 2:3, 4) Tamanna pissutigalugu Jehova suleqatigalugu allallu suleqatigalugit, qanoq ittunilluunniit oqaaseqaraluarpata, ‘pitsaasumik ajunngitsumillu uummatillit’ ujarniartigit. — Luk 8:15.
[Qupp. 5-mi ungalusaq]
Suleqatigiigitsi
Inunnik soqutiginnittunik angalaarfigisartakkatsinni najugaqanngitsunik imaluunniit allamiutut oqaluttunik naapitsigutta immersugassaq Besøg venligst (S-43) atussavarput. Naak siornatigut inunnut allamiutut oqaluttunut soqutiginninngikkaluartunulluunniit atorneqartaraluartoq, maannakkut taamaallaat soqutiginninnermik ersersitsisunut atortalissavarput. Aamma tusilartumik naapitsigutta aatsaat pulaarneqaqqikkusuppat immersugassaq S-43 immersorneqassaaq.
Immersugassaq immersorneqareerpat qanoq iliussaagut? Ilagiinni allatsimut tunniutissavarput. Nalunngikkuniuk sumut nassiutissallugu, ilagiinnut pineqartumut utoqqaanertanut nassiutiinnassavaa soqutiginnittoq isumagineqarsinnaaqqullugu. Immersugassaq ilagiinnut sorlermut nassiutissallugu ilisimanngikkuniuk immikkoortortaqarfimmut nassiutiinnarsinnaavaa.
Soqutiginnittoq allamiutut oqaluppat angalaarfigisartakkannilu najugaqarluni soqutiginninnera ineriartortiinnarniarlugu oqaluussisartumit ilagiinnit allamiutut oqaluttunit aggertoqarnissaata tungaanut pulaaginnartarsinnaavat. — Takuuk Guutip Naalagaaffianut Kiffartorneq 5/11 qupp. 3 aamma 10/11 qupp. 8.
[Qupp. 6-mi ungalusaq]
Allamiutut oqaluttut qanoq ujarneqarsinnaasut
• Allat aperikkit — Biibilimik atuaqqissaaqatit, ilaquttat, suleqatit allalluunniit.
• Aqqit oqaatsini nalinginnaasut telefonbogini ujakkit. Ujaasinermut Internettikkut oqarasuaateqarfiilluunniit aqqutigalugit najugaqarfiit aallaavigalugit telefonbogit allattorsimasut atorneqarsinnaapput.
• Allaffinni inuit ornitagaanni, soorlu atuakkanik atorniartarfinni, kommunip allaffiani, ilinniarfeqarfinniluunniit periaaserissumik apersuisoqarsinnaavoq.
• Innuttaasut allamiutut oqaluttut aaqqissuussaanni sammisassaqartitsisoqarnersoq aviisit alapernaarsorneqarsinnaapput.
• Pisiniarfiit suliffeqarfiillu allamiutut oqaluttunut nioqquteqartut pulaarneqarsinnaapput.
• Niuerniartarfiit, ilinniarfeqarfiit angallatilluunniit unittarfiinni allamiutut oqaluttut ornigarfigilluartagaanni akuersissuteqarnikkut nerrivimmik Biibililersaarutinik ilisiffigineqarsimasumik inissiisoqarsinnaavoq.
[Qupp. 7-mi ungalusaq]
Ujaasinermi qanoq oqartoqarsinnaasoq
Inussiarnersumik, ammasumik eqqortumillu saaffiginninnikkut pulaagaq eqqissisarneqarsinnaavoq. Aallaqqaasiullugu Biibililersaarutinik taakkua oqaasiinik takutitsineq iluaqutaasarpoq.
Ilisaritereeruit ima oqarsinnaavutit: “______ oqaluttut ujarpavut Biibilimi neriuut pillugu oqaloqatigiumallugit. Oqaloqatigisinnaasatsinnik ilisarisimasaqarpit?”
Tusilartumik ujaasininni oqarsinnaavutit: “Haluu, takutitaqalaarsinnaavunga? [Dvd-maskina angallattagaq atorlugu Vil du vide hvad sandheden er?-imi immikkoortoq takutiguk]. Tusilartumik imaluunniit tutsarluttumik ussersorluni oqaluttumik ilisarisimasaqarpit?” Pulaagaq eqqaasaqarsinnaanngippat, ikiorsinnaavarput aperalugu soorlu suliffimmini, atuarfimmi eqqaamiuminiluunniit malugianiagaqarsimannginnersoq?