Biibilimik atuaqqissaaqatissamik nassaarniarnermi periutsit tallimat
1. Angalaarfigisartakkatsinni Biibilimik atuaqqissaaqatissamik nassaarniarneq unamminiarnartuutikkutsigu qanoq iliorsinnaavugut, aamma sooq?
1 Biibilimik atuaqqissaaqatissamik nassaarniarneq unamminiarnartuutippiuk? Misiliiuarit. Jehova piumasaminik iliorniarlutik tunniutiinnanngitsunut pilluaqqusisarpoq. (Gal 6:9) Siunnersuutit ataaniittut iluaqutigisinnaavatit.
2. Biibilimik atuaqqissaaqateqarnissamik toqqaannartumik qaqugukkut neqeroorsinnaavugut?
2 Toqqaannartumik neqeroorit: Inuppassuit nalunngilaat atuagassiat Napasuliaq Alapernaarsuiffik aamma Vågn op! neqeroorutigisarivut, immaqali ilisimanngilaat Biibilimik atuaqqissaaqatiginninnissamik aamma neqerooruteqartartugut. Soormi illumiit illumut angalaarninni toqqaannartumik neqeroorfiginnikkuit? Immaqa aamma pulaartakkatit aperisinnaavatit Biibilimik atuaqqissaarusunnersut. Atuaqqissaarusunngippata Biibililersaarutinik pajuttaannarsinnaavatit soqutiginninnerallu ineriartortillugu. Qatanngutip angutip aappariit ukiorpaalunni atuagassianik pajuttagarisimavai. Atuagassianik tuneriarlugit ingerlaqqissalluni eqqarsaallariarami aperai: “Biibilimik atuaqqissaartarusuppisi?” Tupaallaatigeqisaminik angerput. Maanna kuisimasuupput.
3. Ataatsimiinnermi najuuttut tamakkerlutik atuaqqissaaqatigineqartarnerat ilimagissavarput? Nassuiaruk.
3 Ataatsimiinnermi najuuttut: Soqutiginnittut ataatsimiinnermi najuuttut tamakkerlutik Biibilimik atuaqqissaaqatigineqartarnerat ilimagissanngilat. Qatanngut angut oqaluttuarpoq: “Atuaqqissaaqatigisartagarilikkama affai sinnerlugit soqutiginnillutik ataatsimiigiarsimasut oqaloqatigineratigut atuaqqissaaqatigisalerpakka.” Qatanngutip arnap arnaq ittoortoq, ilagiinni kuisimasunik panilik, aperiniarlugu aalajangerpoq. Arnaq ukiuni 15-ini ataatsimiigiartarsimasoq ataatsimiinnerup aallartinngilaattaani naalagaaffilersaarfimmut isertarsimavoq naaniariartorlu anisarsimalluni. Arnaq atuaqqissaarnissaminut akuersivoq piffissallu ingerlanerani Jehovamut nalunaajaasunngorluni. Qatanngut arnaq allappoq: “Atuaqqissaarusunnersoq aperinissaanut ukiuni 15-ini tunuarsimaarsimagama ajuusaarutigaara!”
4. Innersuussinikkut qanoq atuaqqissaaqatissarsisinnaavugut?
4 Innersuutigineqarsimasut: Qatanngutip arnap allat atuaqqissaaqatigisartagaannut ilaginiartarpai. Atuaqqissaaqatiginnittup akuersineratigut naggasiinnginnermi atuaqqissaaqatigineqartoq aperisarpaa atuaqqissaaqatigineqarusuttunik ilisarisimasaqarnersoq. Pulaakkannut Biibilimi ajoqersuutigineqartut neqeroorutigigukku aperisinnaavutit: “Atuakkamik imaattumik perusuttumik nalunngisaqarpit?” Ilaannikkut oqaluussisartut pionerillu pissutsit atukkatik pissutigalugit angalaarfigisartakkaminni naapitatik atuaqqissaaqatigisinnaaneq ajorpaat. Taamaatttumik, Biibilimik atuaqqissaaqatiginnissinnaaninnik allat ilisimatittakkit.
5. Sooq ilagiinnut ilaasut aappaat uppeqatiginngisavut atuaqqissaaqatigineqarusunnersut aperisinnaavavut?
5 Aappaasut uppeqatiginngisat: Ilagiinni ilaaffigisanni uppeqatiginngisaminik aappaqartoqarpa? Aapparisat uppeqatiginngisat ilaasa aappatik kristumiuusut Biibili pillugu oqaloqatigiumaneq ajorpaat ilaqutarinngisaminnilli atuaqqissaaqatigiumaneqarunik immaqa akuersisinnaallutik. Qanoq saaffiginnissanerluni aappaasup kristumiup oqaloqatigeqqaarnissaa ajunnginnerusarpoq.
6. Atuaqqissaaqatissamik nassaarniarnermi qinuneq qanoq pingaaruteqartigaa?
6 Qinuneq: Qinnutip sunniuteqarsinnaanera suusupageqinagu. (Jaak 5:16) Jehovap piumasaa naapertorlugu qinnutsitsinnut tusarnaarumalluni neriorsuisimavoq. (1 Joh 5:14) Qatanngut angut ulapittorujussuaq atuaqqissaaqateqalerumalluni qinusalersimavoq. Nuliata eqqarsaatigaa atuaqqissaaqateqaleruni, ingammik ajornartorsiuterpassuaqartumik, paarisinnaaneraa. Uini atuaqqissaaqatissaanik qinnukkaangamiuk ernumassutini ilanngullugit Jehovamut eqqaasarpai. Sapaatip akunneri marluk qaangiuttut qinnutaat akineqarput, ilagiinni pioneriusup angut atuaqqissaarusuttoq naapippaa qatanngummullu atuaqqissaaqatigilersillugu. Nulia allappoq: “Biibilimik atuaqqissaaqateqarnissamut nangaasunut oqarsinnaavunga: Qinunissinnik pimoorussigitsi qinujuaannarlusilu. Takorluukkanniit pilluaqquneqarnerungaarpugut.” Qasusuinnikkut Biibilimik atuaqqissaaqatissannik nassaarsinnaavutit ‘inuussummullu aqqutikkut’ sammisukkut ikiuineq nuannaarutigalugu. — Matt 7:13, 14.