Suleruloornermi pissarsiatit inuulluutigikkit
1. Sooq oqaluussinitsinni nikallorsinnaavugut?
1 Inuk pinngortinneqarsimavoq ‘suleruloornermi pissarsiani inuulluutigissallugit’. (Oqal 2:24) Oqaluussinitsinnili inernerit takusinnaanngikkutsigit ilungersuussinitsigut nikallorsinnaavugut nuannaarunnaarlutalu. Isumalluartumik isiginnittaaseqaannarnissatsinnut suna iluaqutigissavarput?
2. Sooq oqaluussinitta qisuariarfigineqarneranut piviusorsiortuussaagut?
2 Piviusorsiortuugit: Eqqaamajuk Jiisusi ikittuinnarnik tusarnaarneqaraluarluni oqaluussinermini iluatsitsilluarsimammat. (Joh 17:4) Naatsiiassanik siaruarterisumik assersuusiamini Jiisusip siulittuutigaa naalagaaffimmik tusarliussaq, naatsiiassatut assersuutaasoq, inunni amerlanerni ineriartornavianngitsoq. (Matt 13:3-8, 18-22) Taamaakkaluartorli eqiasuilluta suliniarnerput suli kinguneqarluartarpoq.
3. Naak oqaluussinerput ikittuinnarnik qisuariarfigineqaraluartoq qanoq ‘inerititaqarsinnaavugut’?
3 Qanoq inerititaqarluarsinnaasugut: Jiisusip assersuusiaa naapertorlugu tusarliussamik ilassinnissimasut ‘inerititaqarumaarput’. (Matt 13:23) Qajuusiassaq inerikkaangami naasuaqqanik inerititaqarneq ajorpoq, naatsiiassanilli nutaanik inerittussaqartarpoq. Tassa kristumiut inerititaat tassaasariaqanngillat nutaanik ajoqersuganngortitsiortorneq, tassaallunili naalagaaffik pillugu siaruarterisaqattaarneq. Qanorluunniit inuit qisuariaraluarpata ‘suleruloornermi’ angusavut nalerisimaarutigisinnaavavut. Jehovap aqqanik illernartitsinermi suleqataavugut. (Es 43:10-12; Matt 6:9) Guutip suleqataasut piginnaatitaaffik nuannaarutigaarput. (1 Kor 3:9) ‘Qarlut inerititaat’ taamaattut Jehovamut iluarinartuupput. — Hebr 13:15, 16.
4. Oqaluussinitsinni nalusatsinnik qanoq angusaqarsinnaavugut?
4 Suliniuteqarnerput takusinnaanngisatsinnik kinguneqarsinnaavoq. Jiisusip oqaluussineranik tusarnaarsimasut ilaat, aatsaat toqoreermat, ajoqersuganngorsimasinnaapput. Taamatuttaaq naalagaaffimmik naatsiiassaq siaruartigarput kingusinnerusukkut inuup uummataani naajartulersinnaavoq uagullu nalusatsinnik Jehovamut nalunaajaasunngorsimasinnaalluni. Aap, oqaluussinerput sunniuteqarluartarpoq. Taamaattumik Jiisusimut ajoqersugaanerput takutitsigu ‘inerititaqarluarnitsigut’. — Joh 15:8.