Imminut killilersimaaqinak — ulapinninni
1. Sooq ilaat Biibilimik atuaqqissaaqateqarnissaminnut tunuarsimaartarpat?
1 Ilaat Biibilimik atuaqqissaaqateqarnissaminnut tunuarsimaartarput ulapippallaaqigamik. Biibilimik atuaqqissaaqateqarneq piffissartornartuuvoq. Atuaqqissaarnissamut piareersarneq, aqutsineq atuaqqissaaqatillu anersaakkut ikiorneqarnissaa piffissaqarfigineqartariaqarput. Apustili Paulusi oqarpoq Thessalonikamiut Jehovamik ilisarsinissaannut inuunini tunniussimallugu. (1 Th 2:7, 8) Naak ulapikkaluarluta sooq Biibilimik atuaqqissaaqateqarsinnaavugut?
2. Jehovamut asanninnerput piffissamik atuinitsinnik qanoq sunniuteqarpa?
2 Pallorfiginninneq piffissartornartuuvoq: Ilumoorpoq pallorfiginninneq piffissartornartuusoq. Assersuutigalugu aalajangersimasumik ataatsimiinnernut, oqaluusseqataanermut, Biibilimik atuaqqissaarnermut qinunermullu piffissamik atuisarpugut. Inuup aappallip ulapittup nuannaarluni aappani ilagiumallugu piffissaqarfigiumassavaa. Uagulli Jehova asagatsigu nuannaarluta pallorfiginninnitsinnut ‘piffissaqqissup atornissaanut’ pissutissaqarneruvugut. (Ef 5:15-17; 1 Joh 5:3) Jiisusi naapertorlugu ajoqersuganngortitsiortorneq pallorfiginninnitta ilagaat pingaarutilik. (Matt 28:19, 20) Tamakkuninnga eqqarsaatiginneqqissaarnitsigut Biibilimik atuaqqissaaqateqarnissamut tunuarsimaannginnissatsinnik ikiussavaatigut.
3. Naak atukkat pissutaallutik akornuserneqarsimagaluarluta atuaqqissaaqativut qanoq paarisinnaavavut?
3 Tamakkununngami piffissarput suliffitsinnik, iluarsineqarsinnaanngitsumik nappaatitsinnik imaluunniit teokratiimut tunngasunik suliatsinnik akornuserneqarpat? Oqaluussisartut, ilaatigut aallartariaqartartut, Biibilimik atuaqqissaaqatitik oqarasuaatikkut internettikkulluunniit atuaqqissaaqatigisarpaat. Iluarsineqarsinnaanngitsumik nappaateqartut atuaqqissaaqatitik imminnut aggeqqusarpaat. Ilaat pisinnaanngikkaangata, oqaluussisartoq tutsuiginartoq, Biibilimik atuaqqissaaqatiminut paarlatsigiumallugu isumaqatigisarpaat.
4. Biibilimik atuaqqissaaqateqarnermi pilluaqqussutissat suut misigineqarsinnaappat?
4 Paulusi allanik sallusuissummik ilinniartitsilluni piffissaminik nukimminillu atuinerminik nuannaarutissarsingaarsimavoq. (ApS 20:35) Ikiorsimasani Thessalonikamiittut eqqarsaatigigaangamigit Jehovamut qujaniartarpoq. (1 Th 1:2) Biibilimik atuaqqissaaqateqarnissamut ulapippallaarnitsinnit killilerneqanngikkutta kiffartornitsinni nuannaarnerput nalerisimaarnerpullu annertunerulersinnaavoq.