Allaaserisat oqaluussinitsinni iluaqutaasut
1. Allaaserisat “En samtale med en fra nabolaget” sunik marlunnik siunertaqarpat?
1 Ilaannikkut Vagttårnet-imi tamanoortumi allaaserisaqartarpoq qulequtalimmik “En samtale med en fra nabolaget”. Allaaserisat marlunnik siunertaqarput — Biibilimik ajoqersuutinik soqutiginnilersitsisumik saqqummeeriaatsit, aamma periaaserissumik tunngavilersuinissatsinnik ilinniartinniarluta. (1 Petr 3:15) Allaaserisat uku qanoq iluaqutigilluarsinnaavavut?
2. Oqaluussinermi allaaserisat pineqartut qanoq atortarsinnaavavut?
2 Oqaluussinermi atortakkit. Allaaserisat taakku Vagttårnet-imiikkaangata toqqortarsinnaavatit. Pulaagaq, soqutiginnittoq imaluunniit Biibilimik atuaqqissaaqatigisartagaq, qallunaatut paasisinnaappat, allaaserisat imaannut tunngasumik apeqquteqarpat imaluunniit akerliliippat allaaserisaq tunniussinnaavat sammeqatiginissaanullu neqeroorfigalugu. Allaaserisaq piginngikkukku jw.org-imiit aasinnaavat.
3. Allaaserisaq qanoq atuaqatigiissutigineqarsinnaava?
3 Allaaserisat qanoq atorneqarsinnaappat? Oqaluussisartut ilaasa allaaserisami inuttaasup aappaata oqaasii soqutiginnittumut atuaqqusarpai namminerlu Jehovamut nalunaajaasuusup oqaasii atuarlugit. Soqutiginnittoq toqqaannartumik oqaluffiginngikkaluarlugu akioriilluni atuaqatigiinnikkut upperisatsinnik ilikkagaqarluarsinnaavoq. — 5 Mos 32:2.
4. Sungiusarninni allaaserisat qanoq atorsinnaavigit?
4 Sungiusarit allallu ilinniartillugit. Allaaserisat atuartillugit allassimaffiit, assersuutit, tunngavilersuutillu maluginiartakkit. Misigissutsit allaaserisami ersersinneqartut maluginiartakkit. Periuseq taanna oqaluussiffigisartakkanni misiliguk. (Uss 1:5; 9:9) Qatanngut arnaq ima oqarpoq: “Allaaserisat atuarlugit soorlu tassa pionerimit oqaluussillaqqissumit, qanoq oqassanerlu nalornissutiginninneq ajortumit, ilinniartinneqarluni!”
5. Biibilimik atuaqqissaaqatigisartakkavut oqaluussisalernissaannut qanoq sungiusartissinnaavavut?
5 Aamma Biibilimik atuaqqissaaqatigisartakkatit oqaluussisalernissaannut sungiusartinniarlugit allaaserisat atorsinnaavatit. Allaaserisaq sammeqaqatigiissiuk atuaqatigisartakkat oqaluussisartuusaartillugu. Taamaaliornikkut Biibilimik atuaqqissaaqatigisartakkap periaaserissumik oqaluussinissaq ilinniarsinnaavaa. (Kol 4:6) Allaaserisat taakku oqaluussinitsinnik ‘naammassinninnissatsinnut’ Jehovap ikiuinerata ilaannaminiinnannguaraat. — 2 Tim 4:5