Pruffiitit maligassariniarsigit — Sefania
1. Sefaniap pruffiitiunerata nalaani pissutsit qanoq ittuuppat, ullumikkullu uagutsinnut taanna qanoq maligassaalluarpa?
1 Ukiuni 700-kkunni Kr.in.si. Ba’alisiorneq Judami nalinginnaavoq. Kunngi ajortoq, Amoni, toqutaaqqammerpoq kunngilu inuusuttoq, Josija, naalakkersuilerluni. (2 Nal 33:21–34:1) Tamatuma nalaani Jehovap Sefania eqqartuussutissaminik oqariartortitassamisut toqqarpaa. Sefania Judakkut kunngikkormiortaannut kinguaajugunaraluarluni, Jehovap Judakkut aqutsinerannik assuarinninnera sakkukillisinnagu taakkununnga anngupaa. (Sef 1:1; 3:1-4) Taamatuttaaq uagut Sefania sapiissusiagut assiginiarsinnaavarput Jehovamik pallorfiginninnerput ilaqutariittut qilerutitsinnik akornuserneqatsaalillugu. (Matt 10:34-37) Sunaana Sefaniap oqariartuutigigaa, tamannalu qanoq kinguneqarpa?
2. Jehovap ullormi kamaffissaani qimarnguiffissarsiniarutta qanoq iliussaagut?
2 Jehova ujaruk. Jehova ullormi kamaffissamini inunnik annaassisinnaasutuaavoq. Taamaattumik Sefaniap inuiaqatigiit Judakkut kajumissaarpai piffissaqarallartillugu Jehova ujaqqullugu aamma iluarsuseq maniguunnerlu noqqaassutigeqqullugit. (Sef 2:2, 3) Ullumikkut aamma taamaappoq. Sefaniatulli Jehova ujaqqullugu inuit kajumissaartarpavut. Aammattaaq iliuuseqartuartariaqarpugut ‘Jehovamillu tunussinnginnissatsinnik’ aalajangersimalluinnartariaqarluta. (Sef 1:6) Jehova ujartarparput oqaasiinik atuaqqissaartarnitsigut siulersoqqullutalu qinusarnitsigut. Ileqqussatigut minguitsumik inooriaaseqarnitsigut iluarsusia noqqaassutigaarput. Naalannikkut maniguunneq noqqaassutigaarput Jehovallu peqatigiissortaanit piumaffigineqarnerput malillugu iliuuseqapallattarnigut.
3. Sooq oqaluussilluta siaruarterinitsinni isumalluartuaannassaagut?
3 Kinguneqarluartoq. Sefaniap eqqartuussummik oqariartuutaa Judamiittut ilaannaasa ajunngitsumik qisuariarfigaat, taakkualu ilagaat Josija inuusuttoq nukappiaraallunili Jehovamik ujartuilersimasoq. Josijap kingusinnerusukkut nunamini guutipiluit guutipilussiornermullu atortut tamaasa sequtserpai. (2 Nal 34:2-5) Ullumikkut naalagaaffiup naatsiiassartaanik aqqusinermut, qaarsortalimmut imaluunniit naasupiluit kapinartullit akornannut tuttoqartaraluartoq aamma ilaat issorissumut tuttarput inerititaqarlutillu. (Matt 13:18-23) Tatigilluinnarparput naalagaaffiup naatsiiassartaanik siaruarterinermi ulapputeqartuartilluta Jehovap ilungersornivut pilluaqqujuarumaarai. — Tuss 126:6.
4. Sooq Jehova utaqqiuassavarput?
4 Judamiittut ilaat misigisimapput Jehova iliuuseqarniaaluusaartoq. Jehovalli uppernarsaavigai ullussarsuani qanittuararsuusoq. (Sef 1:12, 14) Jehovamut toqqorfissarsisut kisimik annassapput. (Sef 3:12, 17) Guuterput angingaartoq ‘Jehova utaqqitillugu’ uppeqativut peqatigalugit nuannaarluta kiffartoqatigiittuarta! — Sef 3:8, 9.