2015-imi Teokratiimik Ilinniarfik iluaqutigalugu ilinniartitsillaqqinnerulissaagut

¹ Tussiaasiortoq Daavi ima allappoq: “Qanerma oqaasii uummatimalu eqqarsaatai ilinni iluarinarilit, Naalagaq, qaarsora aniguisitsisigalu!” (Tuss 19:15) Uaguttaaq oqaatsivut Jehovamit iluarineqarusuttippavut sallusuissut pillugu ilagiinni oqaluussinermilu oqalussinnaatitaanerput pingaartikkatsigu. Ilaatigut Teokratiimik Ilinniarfimmi Jehovap oqaluussinermut sungiusartittarpaatigut. Taamatut ilinniartitsisoqartarpoq sapaatit-akunneri tamaasa nunarsuaq tamakkerlugu ilagiinni 111.000-nit amerlanerusuni. Silarsuarmi sumi tamaani qatanngutit qanorluunniit tunuliaqutallit nutaarsiassamik nuannersumik oqaluussillaqqissisimapput — ileqqorillutik, nakimaallutik qularunnaarnartumillu ilinniartitsisinnaalerlutik. — ApS 19:8; Kol 4:6.

² Teokratiimik Ilinniarfimmi 2015-imi pisassat ilaat ukunaneersuupput: Atuagassiaaraq Guutip oqaasianiittut ilinniarfigikkit, quppersakkat Ullumikkut kikkut Jehovap piumasaatut iliorpat? aamma Tusagassat nuannersut Guutimeersut! atuagarlu “Guutip asanninneraniittuinnaritsi”. Biibilimiit pingaarnersiuinermi pisassamilu nr. 1-imi piffissarititaasut aamma allanngorput. Allannguutit tamakku ilinniarfimmilu pisassat saqqummiunneqarnissaannut ilitsersuutit immikkoortuni tulliuttuni sammineqassapput.

³ Biibilimiit pingaarnersiuineq: Qatanngutip angutip tamatuminnga pisassinneqartup minutsit marluk atorlugit eqqarsaammut ataatsimut tunngasoq soqutiginarlunilu atoriaannaasoq sapaatip-akunneranut Biibilimik atuagassaneersoq eqqartussavaa. Piareersarluarsimagaanni piffissarititaasoq sinnernagu pingaarutilik ilagiinnut saqqummiunneqarsinnaavoq. Tamatuma kingorna minutsit arfinillit atorlugit sungiusimariikkatsitut najuuttut sapaatip-akunnerani Biibilimik atuagassani soqutiginartitaminnik sekundit 30-t sinnernagit oqaaseqartinneqassapput. Sekundini 30-ni siunertaqarluartumik oqaaseqassagaanni piareersarluarsimallunilu imminut naalakkersinnaasariaqarpoq. Taamaaliornerlu sungiusaatigilluarparput. Aamma allat namminneq atuaqqissaarnerminni ilikkakkatik pillugit oqaaseqarnissaannut piffissaqassaaq.

⁴ Pisassaq nr. 1: Biibilimik atuagassaq naannerullunilu atuffassinermut piffissarititaasoq sivikinneruvoq. Minutsini pingasuni sivikinnerusumilluunniit atuarneqassaaq. Atuffassisussat, atuagassamik isumaa paasiuminartooqqullugu, atuagassartik arlaleriarlutik nipituumik atuarlugu sungiusartariaqarput oqaatsit eqqortumik taasarnerlugit kipisaqattaanngitsumillu atuarnerlutik maluginiaqqissaarlugu. Jehovap kiffai tamarmik atuffarissuujumallutik ilungersortariaqarput, pallorfiginninnitsinnimi atuarneq pingaaruteqangaarpoq. Meerartatta ilarpassuisa atuffarissuunerat nuannaarutigaarput! Angajoqqaat asannillutik qitornatik atuaffarisseqqullugit ikiuisut nersualaarneqartariaqarput.

⁵ Pisassaq nr. 2: Minutsini tallimani sivisussuseqartumik qatanngummut arnamut pisassaritinneqassaaq. Qulequtaritinneqartoq sammineqassaaq, ilagiillu oqaluussiffigisartagaanni oqaluussinermi atoriaannaallunilu piviusorpalaartuussaaq. Allassimaffiit allat qulequttamut naapertuuttut ilanngunneqarsinnaapput. Peqataasussaq ilinniarfimmik nakkutilliisumit toqqarneqassaaq.

⁶ Pisassaq nr. 3: Minutsini tallimani sivisussuseqartumik qatanngummut angummut arnamulluunniit pisassaritinneqassaaq. Qatanngummut arnamut pisassaritinneqarpat pisassaq nr. 2-mi allaatigineqartutut suliarineqassaaq. Qatanngummut angummut pisassaritinneqarpat quppersagarlu Ullumikkut kikkut Jehovap piumasaatut iliorpat? atuagarluunniit “Guutip asanninneraniittuinnaritsi” tunngavigalugu qulequtaqarpat najuuttut eqqarsaatigalugit oqalugiaatitut suliarineqassaaq.

⁷ Pisassaq nr. 3 qatanngutip angutip pisassarippagu — saqqummiusseriaaseq nutaaq imaassaaq: Guutip oqaasianiittut ilinniarfigikkit imaluunniit Tusagassat nuannersut Guutimeersut! tunngavigineqassappat oqaluusseqateqartutut ilaquttaminilluunniit atuaqqissaaqateqartutut saqqummiunneqassaaq. Ilinniarfimmik nakkutilliisup kina peqataassanersoq qanorlu saqqummiunneqassanersoq amerlanertigut aalajangertassavaa. Peqataasussaq pisassallip ilaqutarissavaa, imaluunniit qatanngutaassaaq angut. Allassimaffiit allat Biibilimi najoqqutassianik ersersitsisut pisassamut naapertuuttut aamma ilanngunneqarsinnaapput. Ilaannikkut utoqqaanertamut pisassiissutigineqarsinnaavoq. Utoqqaanertap kina peqataassanersoq qanorlu saqqummiutissanerlugu nammineq aalajangersinnaavaa. Utoqqaanertat ilaquttaminnik qatanngumilluunniit angummik ilinniartitsinermik takutitsinerat ilagiinnut kajumissaataassaaq, ilaa?

⁸ Siunnersuineq: Saqqummiussisoqareeraangat ilinniarfimmik nakkutilliisup minutsit marluk atorlugit saqqummiussisoq nersualaassavaa ‘Skolehåndbogen’-ilu tunngavigalugu iluaqutigisinnaasaanillu siunnersorlugu. Ilinniarfimmik nakkutilliisup saqqummiussassaq oqaatigigaangamiuk pisassallip sulissutigisassaa najuuttunut oqaatigisassanngilaa. Saqqummiussisoqareeraangat nakkutilliisup ilinniartoq nersualaartassavaa, ilinniartup sulissutigisaa oqaatigisassavaa, aamma sooq sulissutigisani ajunngitsumik naammassineraa imaluunniit sooq tamanna sulissutigiinnaruniuk iluaqutigissagaa inussiarnersumik nassuiaatissavaa.

⁹ ‘Skolehåndbogen’-imi quppernerni 79-imiit 81-imut siunnersuinermik immersuiffissaqarpoq. Ilinniartoq saqqummeereeraangat taassuma ‘Skolehåndbogen’-iani ilinniarfimmik nakkutilliisoq immersuisassaaq, allanillu tusaasoqartinnagu suliassiissutigineqartumut tunngatillugu sungiusaatissaq sungiusarsimaneraa aperissavaa. Ataatsimiinnerup kingorna ilinniartoq nersualaarneqarsinnaallunilu iluaqutigisinnaasaminik siunnersorneqarsinnaavoq. Ilinniartup taamatut inuttut immikkut soqutigineqarnini anersaakkut siumukarnissaminut iluaqutissatut isigissavaa. — 1 Tim 4:15.

¹⁰ Ilinniartup piffissaritaasoq sinnerpagu ilinniarfimmik nakkutilliisoq ikiortaaluunniit malunnaarsaarluni kalerriissaaq, soorlu sianertitsilaarnikkut allatulluunniit nipiliulaarnikkut. Ilinniartoq oqaaseqatigiit aallarteriikkani naariarlugit issiavimminut ingikkiartussaaq. — Takuuk ‘Skolehåndbogen’ qupp. 282, imm. 4.

¹¹ Piumasaqaatinik eqqortitsisut tamarmik Teokratiimik Ilinniarfimmut ilanngunnissamut kajumissaarneqarput. (Takuuk ‘Skolehåndbogen’ qupp. 282, imm. 6) Ilinniarfimmi tamatumani ilinniartitaanikkut Jehovap innuttai Guutip naalagaaffia pillugu nutaarsiassaq nuannersoq pillugu qularunnaarnartumik, ataqqinnittumik asannittumillu oqaluussisinnaalertarput ilinniartitsisinnaalerlutillu. Qularnanngilluinnarpoq Jehovap teokratiimik ilinniartitaanermik iluaqutiginnittunit unnersiutigineqarnini nuannaarutigigaa! — Tuss 148:12, 13; Es 50:4.