UUMISSUINEQ QANOQ UNITSINNEQARSINNAASOQ

2 | Akiniaaqinak

Biibilimi allassimavoq:

‘Ajortoq ajortumik akissanngilarsi. Sapinngisassinnik inuit tamaasa eqqisseqatiginiartarsigit. Akiniaassanngilasi, allassimavormi: “Akiniut pigaara, uanga pillaajumaarpunga,” taama Jehova oqarpoq.’ – ROMAMIUT 12:17-19.

Isumaa:

Eqqunngitsumik pineqarnermi kamattarnerput pissusissamisooraluartoq Guutip akiniaanerput iluarinavianngilaa. Eqqunngitsut tamaasa qanittukkut aaqqissagamigit utaqqeqqulluni kimigiiserfigaatigut. – Tussiaat 37:7, 10.

Qanoq iliorsinnaasutit:

Inuit naammalluinnanngitsut akiniaanerat uumissuinerulersitsiinnartarpoq. Taamaattumik ajuallatsinneqaruit ajoquserneqaruilluunniit akiniaassanngilatit. Eqqissillutit imminullu aqussinnaallutit qisuariarniarsarissaatit. Ilaannikkut pisut puiuinnarnissaat pitsaanerusarpoq. (Ussatit 19:11) Soorunami pisunik nalunaaruteqarnissaq pitsaanerusinnaasarpoq. Assersuutigalugu pinerluttuliorfigineqaruit politiinut oqartussaasunulluunniit allanut nalunaaruteqarsinnaavutit.

Akiniaaneq ajornerulersitsiinnartarpoq

Taavami ajornartorsiut eqqissisimasumik aaqqinneqarpasissinnaanngippat? Eqqissisimallutilluunniit aaqqikkumallugu sapinngisannik iliuuseqareersimaguit? Akiniaaqinak, tamannami ajornerulersitsiinnassagunarmat. Uumissuiunnaarlutit Guutip ajornartorsiutinik aaqqeeriaasiata tatiginissaa ilinniarsinnaavat. “Tatigiuk, taava akuliukkumaarpoq.” – Tussiaat 37:3-5.

Misigisalikkersaarut – ADRIÁN

Akiniaarusukkunnaartoq

Adrián inuusuttuaraalluni uumissuilluni akiniaarusunnermik aqqusinermi paannikkumatuunngorpoq. Ima oqaluttuarpoq: “Aallaasersortunut ilaaqqutikulasarpunga arlaleriarlungalu aqqusiniinnarmi aaginnaallunga toquinnartussatut qimaannarneqartarlunga.”

Adrián 16-inik ukioqarluni Biibilimik misissuisalerpoq. Ima nangippoq: “Biibilimik atuaqqissaartarninni siumukartillunga paasilerpara inuttut pissusinnik allannguisariaqarlunga.” Uumissuiunnaarlunilu nakuuserunnaartariaqarpoq. Pingaartumik Romamiut 12:17-19 akiniaannginnissaq pillugu allassimasut iluaqutigai. Ima oqarpoq: “Naapertuilluanngitsuliornerit Jehovap kissaatigisamisut piffissarititaminilu iliuuseqarfigiumaarai akueraara. Nakuuserumatussusera iperariartuaarpara.”

Unnuit ilaanni Adrián akerarisimasaminit saassutsippoq. Naalagaasoq suaarpoq: “Imminut illersorniarit!” Adrián nassuerpoq akiniaarusungaarluni. Taamaaliornanili Jehovamut qinupallappoq qimagullunilu.

Adrián nangippoq: “Aqaguani naalagaasoq naammattoorpara. Kamaammingaaraluarlunga imminut noqissinnaajumallunga nipaatsumik Jehova qinnuigeqqippara. Inuusuttoq taanna uannukarpoq tupaallaatigeqisannillu oqarluni: ‘Ippassaq pisimasoq pillugu isumakkeerfiginnga. Ilumoorlunga oqassaguma ilittut ikkusukkaluarpunga. Biibilimik atuaqqissaartalerusuppunga.’ Kamannera aqussinnaasimagakku nuannaarutigingaarpara! Tamatumalu kingunerisaanik Biibilimik atuaqqissaaqatigiittalerpugut.”