Atuartartut apeqqutaat

Uppernarsaalluni neriorsuineq pillugu Biibilimi qanoq allassimasoqarpa?

Upper­narsaal­luni neriorsuineq tas­saavoq “pimoorus­sil­luni pingaar­torsiorlunilu neriorsuum­mik eqqor­titsiniarluni neriorsuineq nalunaaruteqar­nerluun­niit, amerlasuutigut Guuti ilisiman­nitsigalugu”. Tamanna oqaatsitigut allak­katigul­luun­niit neriorsuinerusin­naavoq.

Inuit ilaat eqqarsar­tar­put upper­narsaal­lutik neriorsueq­qusaanatik Jiisusi ima oqarmat: “[Up­per­narsaal­lusi] neriorsuis­san­ngil­luin­nar­pusi … Iliuuseqar­niarlutit oqaruit iliuuseqarit, iliuuseqar­niar­nallu oqaruit iliuuseqaqinak. Neriorsuum­mimmi eqqor­titsin­ngin­neq Diaavulumeersuuvoq.” (Mat 5:33-37) Soorunami Jiisusip upper­narsaal­luni neriorsuisoqar­tar­nis­saa Moorsisip inatsisaani piumasarineqar­tar­toq Guutillu kif­faasa aalajaatsut upper­narsaal­lutik neriorsuisarsimanerat nalun­ngilaa. (Mos 1. 14:22, 23; Mos 2. 22:9, 10) Aamma nalun­ngilaa Jehova imminut upper­narsaasiul­luni neriorsuisimasoq. (Hebr 6:13-17) Taamaat­tumik Jiisusip pisimanavian­ngilaa upper­narsaal­luta neriorsueq­qusaan­ngil­luin­nar­tugut. Soqutaan­ngitsulli pil­lugit upper­narsaal­luni neriorsuisar­neq pil­lugu mianersoq­qusivoq. Neriorsuutigut eqqor­tit­tuaan­nar­tariaqar­pagut, taman­nami Jehovap piumasaraa.

Taavami upper­narsaal­lutit neriorsueq­quneqaruit? Siul­ler­tut, neriorsuutit eqqor­tis­sin­naanerlugu qulak­keeruk. Nalor­niguit pitsaanerus­saaq neriorsuin­ngik­kuit. Biibilimimi ima mianersoq­quneqar­pugut: ‘Eqqor­tis­sin­naan­ngik­kukku ajun­ngin­nerus­saaq neriorsuin­ngiin­naruit.’ (Oqal 5:4) Aap­paat­tut, neriorsuutigineqar­tus­saq pil­lugu Biibilimi najoq­qutas­siat eqqarsaatigik­kit, taavalu nalun­ngeqatigin­nis­sutit ilin­niar­tin­neqarsimasoq malil­lugu iliuuseqarit. Biibilimi najoq­qutas­siat taak­kua ilaat sam­meriar­tigit.

Uppernar­saalluni neriorsuinerit ilaat Guutip piumasaanut akerliun­ngillat. Assersuutigalugu Jehovap Nalunaajaasui katit­tut upper­narsaal­lutik neriorsueqatigiit­tar­put. Guutip najuut­tullu saavanni katit­tut neriorsuisar­put inuuner­tik tamaat asaqatigiin­niarlutik, isumas­soqatigiin­niarlutik ataq­qeqatigiin­niarlutillu. (Katit­tut ilaat aalajangersimasunik oqaaseqan­ngik­kaluarlutik Guutip saavani upper­narsaal­lutik neriorsuisar­put). Taava uiusutut nuliaasutullu nalunaarutigineqar­tar­put aap­pariin­nerallu inuunerup sin­nera atasus­satut isigineqar­tarluni. (Mos 1. 2:24; Kor 1. 7:39) Aaq­qis­suus­saq tamanna eqqorlunilu Guutip piumasaanut naaper­tuup­poq.

Uppernar­saalluni neriorsuinerit ilaat Guutip piumasaanut akerliupput. Assersuutigalugu kristumiu ilumoor­toq nunagisani sak­kulerluni illersor­niarlugu Guutimul­luun­niit upperun­naar­nini nalunaarutiginiarlugu neriorsuinavian­ngilaq. Taamaaliorunimi Guutip inas­sutai unioq­qutis­savai. Kristumiut ‘inun­nit allanit allaanerugamik’ nunat akerleriin­neranni sorsuun­neran­nilu akuunavian­ngil­lat. – Joh 15:19; Es 2:4; Jaak 1:27.

Uppernar­saalluni nerior­suutit ilaat nalun­ngeqatigin­nissut malillugu nam­mineq aalajangigas­saapput. Ilaan­nik­kut Jiisusip siun­nersuutaa una eqqarsaatigalugu upper­narsaal­luni neriorsuutit ilaat nalilersor­neqar­tariaqar­tar­put: “Kaasari kaasarip piinik Guutilu Guutip piinik tunisariaqar­parsi.” – Luk 20:25.

Assersuuteqariarta. Kristumiu innut­taanermut pas­sitaar­nis­samul­luun­niit qin­nuteqaruni imaas­sin­naavoq nunamut aalajaan­nis­samik upper­narsaal­luni neriorsueq­quneqar­toq. Tamatumani Guutip inatsisaanut akerliul­luin­nar­tumik iliuuseqar­nis­saq pil­lugu neriorsueq­quneqaruni nalun­ngeqatigin­nis­sutini Biibili tun­ngavigalugu ilin­niar­tin­neqarsimasoq malil­lugu taamaalior­navian­ngilaq. Imaas­sin­naavorli nalun­ngeqatigin­nis­sutiminut akerliun­ngitsumik neriorsuutip allan­ngulaarlugu oqaatiginis­saanut naalak­kersuisunit akuerineqar­toq.

Tamanna Romamiut 13:1-imi najoq­qutas­siamut uunga naaper­tuus­sin­naavoq: “Inuit tamarmik oqar­tus­saasunut kajumil­lutik naalas­sap­put.” Taamaat­tumik kristumiu isum­mersin­naavoq Guutip piumasareriigaatut ilior­nis­saq pil­lugu upper­narsaal­luni neriorsuineq ajor­tuun­ngitsoq.

Aamma tigus­saasoq atorlugu allatul­luun­niit takus­sutis­siil­luni neriorsueq­quneqar­nermi nalun­ngeqatigin­nis­sut malin­neqar­tariaqar­poq. Itsaq Romamiut skytillu neriorsuigaangamik panar­tik ator­tar­paat, tassa sorsun­nermut guutigititaq upper­narsaasiul­lugu neriorsuisar­put. Grækerit upper­narsaal­lutik neriorsuigaangamik assatik qilam­mut isaat­tar­paat. Taamaalil­lutik ersersit­tar­paat upperalugu oqaatigineqar­tunik iliuuserineqar­tunillu maluginiaasumik guuteqar­toq, inuillu guutimut tas­sunga akisus­saatitaas­sasut.

Soorunami Jehovap kif­faa inuiaqatigiit ilisar­naataat sunaluun­niillu guutipilus­sior­nermut attuumas­suteqar­toq atorlugu upper­narsaal­luni neriorsuinavian­ngilaq. Taavami eqqar­tuus­sivimmi Biibili attorlugu ilumoor­tumik nas­suiaanis­samut takus­sutis­satut upper­narsaal­lutit neriorsueq­quneqaruit? Biibilimi upper­tut aalajaatsut aalajangersimasumik iliuuseqarlutik upper­narsaal­lutik neriorsuisarsimam­mata taamaalior­niarlutit aalajangersin­naavutit. (Mos 1. 24:2, 3, 9; 47:29-31) Taamaalioruilli eqqaamas­savat Guutip saavani neriorsuigavit ilumoor­tumik oqalun­niarlutit. Tassa qanorluun­niit aperineqas­sagaluaruit ilumoor­tumik akinis­san­nut piareersimasariaqar­putit.

Jehovamut ikin­ngutaaner­put pingaar­tik­katsigu aamma nalun­ngeqatigin­nis­sutitsin­nut Biibilimilu najoq­qutas­sianut akerliusumik iliuuseqarusun­ngin­natta upper­narsaal­luni neriorsueq­qusineq sunaluun­niit pil­lugu qinoq­qaar­tariaqarlutalu eqqarsaatigin­neq­qis­saaq­qaar­tariaqar­pugut. Upper­narsaal­lutit neriorsuiniaruit neriorsuutivit eqqor­tin­nis­saa qulak­keer­tariaqar­pat. – Pet 1. 2:12.