2 | ‘Allakkanit Illernartunit tuppallersarneqarneq’

BIIBILIMI ALLASSIMAVOQ: “Siornatigummi allanneqarsimasut ilinniarfiginiassagatsigit allanneqarsimapput. Allakkat Illernartut iluaqutigalugit pinertusaarlutalu tuppallersarneqartaratta neriuuteqarpugut.” – ROMAMIUT 15:4.

Qanoq paasisariaqartoq

Nuanninngitsunik eqqarsaateqartilluta Biibilimi nuannersunik eqqarsaatissinneqarlutalu nakussatsinneqarsinnaavugut. Aamma Biibilimi neriuutissinneqarpugut ungasinngitsumi misigissutsikkut anniaatit atuukkunnaassasut.

Qanoq iluaqutaasinnaasoq

Tamatta ilaannikkut misigissutsikkut nanertisimasarpugut, isumatsaqqarujussuarnermilli annilaanganermillu nappaatillit misigissutsikkut nanertisimajuartuupput. Biibili qanoq iluaqutaasinnaava?

Biibilimi atuartarnikkut eqqarsaatit nuanniitsut nuannersunik taarserneqarsinnaapput. (Filippimiut 4:8) Biibilimeersumik tuppallersarneqarneq eqqissisinneqarnerlu iluaqutigalugit misigissutsigut aqussinnaanerulissavagut. – Tussiaat 94:18, 19.
Naleqanngitsutut misiginnginnissatsinnut Biibili iluaqutigisinnaavarput. – Lukkarsi 12:6, 7.
Biibilimi oqaluttuat arlallit ersersippaat kisimiinngitsugut aamma Guutip pinngortitsisitta misigissutsigut paasilluinnarai. – Tussiaat 34:19; Johannesimit 1. 3:19, 20.
Biibilimi neriorsorneqarpugut Guutip eqqaamasagut nuanniitsut eqqaamaneerutitikkumaarai. (Esaja 65:17; Saqqummersitat 21:4) Misigissutsikkut eqqarsartaatsikkullu nanertisimagutta neriorsuutit tamakkua pinertusaarnissatsinnut nakussatsissutigisinnaavagut.

Biibili qanoq iluaqutigigaa – Jessica

Isumatsaqqarujussuarneq qanoq uannut sunniuteqartoq

“25-nik ukioqarlunga sianiutikkut qasusoorlungalu isumatsaqqarujussuarnermik nappaateqarlunga paasitinneqarpunga. Inuuninnik kingumut utersaarlunga misigisimasakka nuanniitsut aqussinnaanngisannik eqqarsaatinniiginnalerput. Nakorsap ilisimatippaanga inuuninni pisimasut nuanninngitsut eqqarsartariaatsinnut sunniuteqarneri pissutigalugit isumatsaqqarujussuartunga. Nakorsaatitornerma saniatigut nuanninngitsunik eqqarsaateqarnaveersaarnissannut iluaqutissannik immikkut ilisimasalimmik oqaloqateqartalerpunga.”

Biibili qanoq iluaqutigigiga

“Ajornerpaaffinni annilaangarujussuarlungalu nanertisimarujussuarlungalu sinissaarutivittarpunga. Unnuakkut eqqarsaatinit niaqqunni kaavittunit eqqissiunnaarutigisannit nanertisimasarpunga. Tussiaat 94:19-imi allassimasutut eqqarsaatitta eqqissiviilliortileraangatigut Guutip tuppallersarlutalu eqqissisissinnaavaatigut. Taamaattumik Biibili allassimaffiillu allattukkakka qiimmassaatigisinnaasakka siniffimma eqqaaniitittuaannartarpakka. Sininneq ajuleraangama Biibilimi versinik atuartarpunga, taava eqqarsaatikkut Guutip eqqissisittarpaanga.

Biibilimi kajumissaarneqarpugut eqqarsaatit Guuti pillugu ilisimasatsinnut naapertuutinngitsut akiortaqqullugit. Taamani naleqanngitsutut, asaneqarsinnaanngitsutut atorsinnaanngitsutullu misigisarpunga. Ilikkarparali eqqarsaatit taamaattut Biibilimi ilinniartitsissutigineqartunut naapertuutinngilluinnartuusut. Tassanimi ersersinneqarmat Guuti Ataataasoq misiginneqataangaartoq tamatsinnullu asanningaartoq. Eqqarsaatinnit aqunneqarnanga uanga eqqarsaatikka aquttalerpakka. Guutip uannut isiginninneratut imminut isigisalerama imminut nikanarsannginnissannut iluaqutigaara.

Eqqaamasat annernartut eqqarsaatillu nuanniitsut qaangernissaat qilanaareqaara. Nalunnginnakku siunissami eqqarsartaatsikkut napparsimasoqarunnaassasoq pinertusaarnissannut iluaqutigaara siunissamilu nappaateqarunnaarnissara qilanaaralugu.”