Aalajaatsut upper­luarnerat takusimavara

Illar­punga eqqarsarama ikin­ngutiga upperisarsior­nermik soqutigisaqan­ngitsoq. Aperaara: “Biibili pil­lugu ilisimasaqaravit?” Akinis­saminut nangaavoq. Taava oqarfigaanga anaanani Jehovap Nalunaajaasuisa ilagigaat, anaanamilu ilin­niar­tilaarsimagaani. Paasisaqarusuk­kama kimigiiserfigaara oqalut­tuuteq­qul­lunga.

Unnuaq naangajal­lugu oqaloqatigiip­pugut. Ikin­ngutima oqalut­tuup­paanga Biibilimi allaatigineqar­toq Saatani inuit pis­saaneqarfigalugit naalagaasoq. (Joh 14:30) Immaqa illit tamanna inuunerit tamaat ilisimavat, uan­nulli isuma tamanna nutaajul­lunilu soqutiginar­poq. Tusar­tuaan­nar­nikuuara Guuti asan­nit­toq naaper­tuil­luar­torlu sunik tamanik aqutsisuusoq. Taman­nali takusar­tak­kan­nut naaper­tuup­pasin­ngilaq. 26-in­nar­nik ukioqaraluarlunga inuuninni eqqis­siun­naarutigisan­nik takusaqangaatsiar­nikuuvunga.

Ataataga United States Air Forcemi tim­misar­tor­tar­tuunikuum­mat meeraal­lungali nalun­ngilara atombombit atorlugit sorsut­toqariaan­naasoq. Califor­niami col­legemi ilin­niar­tuutil­lunga Vietnamimi sorsut­toqar­poq. Ilin­niar­tunut akerlius­sutsimik takutitsisar­tunut peqataatil­lunga politiinit anaatalisar­tunit malersor­neqar­pugut, gas­silu qul­lilior­nar­toq pis­sutigalugu anersaar­tor­piarsin­naanatalu isigisaqar­piarsin­naanata arpal­luta qimaavugut. Tamatuma nalaa pikitsitsif­fiuvoq. Politik­kerit nuimasut terlinganeer­neqarlutik toqun­neqar­tar­put, inuit perul­lulior­tarlutillu akerlius­sutsimik takutitsisar­put. Isum­mat assigiin­ngitsor­pas­suum­mata suna tamarmi paatsiveerun­nar­poq.

1970-imi Alaskap avan­naata sineriaani sulif­fit­taar­punga aningaasarsiorluar­nar­tumik. Taava Londonimukar­punga, tas­sanilu motorcykelinik piseriarlunga tikitas­samik aalajangersimasumik tikitas­saqar­nanga kujam­mut motorcykeler­punga. Qaam­matit arlal­lit qaangium­mata Afrikamut apuup­punga. Aqqutaani inuit kif­faan­ngis­suseqarlutik uat­tulli ajor­nar­torsiutimin­nit qimaarusut­tut naapit­tar­pakka.

Taamaat­tumik anersaap ajor­tup nunarsuarmi pis­sutsinik aqutsineranik Biibilimi ilin­niar­titsis­sutigineqar­toq takusakka tusarsimasak­kalu pis­sutigalugit uan­nut paasinar­poq. Guutili sunik tamanik aqutsin­ngik­kuni sulerinersoq paaserusuler­para.

Qaam­matini tul­liut­tuni tamanna akis­sutis­sarsivara. Pif­fis­sallu ingerlanerani angutit arnallu qanorluun­niit atugaqaraluarunik Guutimut ilumoor­tutuamut aalajaatsor­pas­suit ilisarisimalerlugillu asaler­pakka.

IRLANDI AVANNARLEQ – “NUNA QAARTARTUNIK AQERLUNILLU ULIKKAARTOQ”

Londonimut uterama ikin­ngutima anaanaa attaveqarfigaara, taas­sumalu Biibilimik tunivaanga. Kingusin­nerusuk­kut Hol­landimut Amsterdamimukarama Nalunaajaasup angutip aqquser­nit qul­liata saniani atuar­tunga takugaminga ilin­niar­nerunis­san­nik ikior­paanga. Taava Irlandimut Dublinimukar­punga Jehovallu Nalunaajaasuisa immik­koor­tor­taqarfiat nanil­lugu. Matuk­kut silarlik­kut kasut­tor­punga qatan­ngullu silatooq misilit­tagaqarluar­torlu, Arthur Mat­thews, naapil­lugu. Biibilimik misis­sueqateqar­nis­sara kis­saatigigakku akuersivoq.

Atuak­kat atuagas­siallu Nalunaajaasut saq­qum­mersitaat atuarsuataar­pakka. Soorunami aamma Biibili atuar­para. Misis­suineq nuan­nareqaara! Ilagiit ataatsimiin­nerini apeq­qutit ilisimatuut ukior­pas­suarni eqqarsaatigisimasaat allaat meeq­qat akisin­naagaat takuara. Apeq­qutit soorlu ukuup­put: ‘Sooq ajor­toqarpa? Guuti kinaava? Toqusut sumiip­pat?’ Nunami tas­sani allanik ilisarisimasaqan­ngin­nama Nalunaajaasut kisiisa ikin­ngutigaakka. Jehovap asanis­saanik piumasaatullu iliorusuler­nis­san­nik ilin­niar­tip­paan­nga.

1972-mi imermut morsutsitaavunga. Ukioq ataaseq qaangium­mat pionerin­ngor­punga Irlandimi Avan­narlermi Newrymi ilagiin­nguanut ilaalerlunga. Avin­ngarusimasumi illu qaq­qamiit­toq ujaq­qanik sanaaq attar­tor­para. Illup ungasin­ngisaani narsaammi nersus­suaqar­poq, taak­kualu saavanni oqalugiaatis­sakka sungiusar­tar­pakka. Nersutit tamugar­tor­til­lutik tusar­naar­pasit­tar­put. Siun­nersorsin­naan­ngilaan­nga, tusar­naar­tulli isaasigut toq­qarlugit isigisar­nis­saan­nut ‘ikior­paan­nga’. 1974-mi specialpionerin­ngor­tin­neqar­punga, ikin­ngutigil­lualik­kamalu Nigel Pit­tip kif­far­toqatigiler­paanga.

Taamani Irlandimi Avan­narlermi perul­lulior­toqangaatsiar­tarmat ilaasa taasar­paat ‘nuna qaar­tar­tunik aqerlunillu ulik­kaar­toq’. Aqqusinerni paan­nin­nerit, terlinganeeraluni inun­nut aal­laasersor­nerit biilinillu qaar­titsinerit nalingin­naap­put. Ajor­nar­torsiutit politik­kimut upperisarsior­nermullu atal­luin­nar­put. Naaggaar­tut katuul­lillu Nalunaajaasut politik­kimut tun­ngatil­lugu arlaan­naan­nul­luun­niit illersuisan­ngin­nerat nalun­ngilaat, taamaat­tumik eqqis­sil­luta oqaluus­sisar­pugut. Amerlaner­tigut pulaak­katta ilisimasar­paat sumi qaqugulu perul­lulior­toqas­sanersoq taamaalil­lutik ulorianar­torsiun­ngin­nias­sagatta mianersoq­qusar­paatigut.

Taamaat­torli ulorianar­torsior­tar­pugut. Taamaal­luta illoqarfimmi ungasin­ngitsumi ataasiaan­narluta oqaluus­sif­figisimasatsinni Denis Carrigan pioneriusoq oqaluus­seqatigaara. Illoqarfimmi tas­sani Nalunaajaasoqarfiun­ngitsumi Irlandimior­palut­tumik oqalun­neq ajoratta arnaq pasil­liil­luni oqar­poq Tuluit sak­kutoorigaatigut. Pasineqaratta annilaangaqaagut. Sak­kutuunut inus­siar­nersuugaluarut­taluun­niit toqun­neqariaan­naavugut seeq­quk­kul­luun­niit aal­laatil­luta. Qiul­luta kisimiil­lutalu bus­sit utaq­qitil­lugit biili sutor­niar­tarfiup silataanut unit­tut takuagut. Sutor­niar­tarfim­miit aneriarluni arnap angutit biiliniit­tut marluk oqaloqatigigamigit tik­kuar­paatigut. Angutit arriitsun­nguamik biilerlutik tungitsin­nukar­put, bus­sillu angal­las­sisar­neri pil­lugit aperivaatigut. Bussi tak­kum­mat aqut­toq oqaloqatigaat, qanorli oqaloqatigiin­nersut tusaasin­naan­ngilagut. Allanik ilaasoqan­ngim­mat qularin­ngilar­put illoqarfiup silataan­nukaateriarluta ajor­tumik pis­sagaatigut. Ajor­tumilli pineqan­ngilagut. Bus­siniit niulerluta aqut­toq aperaara: “Angutit taakku uagut pil­luta apersuip­pat?” Akivoq: “Kik­kuususi nalun­ngin­nakku oqarfigaakka. Annilaangas­san­ngilasi, aarleris­sutis­saqan­ngilasi.”

1976-mi Dublinimi ataatsimeersuar­nermi Pauline Lomax, specialpioneriusoq Tuluit Nunaan­nit tikeraar­toq, naapip­para. Qatan­ngutaavoq arnaq aalajaatsoq, maniguut­toq asanar­torlu. Aqqalunilu, Ray, inuuner­tik tamaat sal­lusuis­sut ilisimavaat. Ukioq ataaseq qaangium­mat Paulinelu katip­pugut Irlandimilu Avan­narlermi Bal­lymenami specialpioneritut kif­far­tor­ner­put nangil­lugu.

Belfastimi, Londonderrymi sumiif­fin­nilu navianar­torsiorfinni allani ilageeqatigiinni angalasar­tutut kif­far­tor­pugut. Jehovamut kif­far­torumal­lutik uppeqatitta upperisarsior­nik­kut ilin­niar­titsis­sutigineqar­tut pigiliul­luin­narsimasatik, isum­miutereersimasatik uumis­suiner­tillu soraarus­simavaat. Upper­nerat kil­litsis­sutigingaar­par­put. Jehovallu pil­luaq­qul­lugillu ser­nigisimavai!

Ukiuni qulini Irlandimi najugaqareerlunga 1981-mi Ilin­niarfimmi Gileadimi klas­sit 72-is­saan­nut nuliaralu qaaq­quneqar­pugut. Ilin­niar­ner­put naam­mas­sigatsigu Sierra Leonemut Afrikap kitaaniit­tumut aal­lar­tus­san­ngor­pugut.

SIERRA LEONEMI PIITSUUGALUARLUTIK UPPERLUARTUT

Inuit nuan­nersut aqqanil­lit ajoqersuiar­tor­titat angerlarsimaf­fianni najugaqatigaagut. Tas­sani ataatsimik iggaveqar­poq, pingasunik perusuersar­tarfeqar­poq, marlun­nik uffarfeqar­poq, oqarasuaat ataaseq, errorsivik ataaseq panersiivillu ataaseq. Saf­faaruteriataar­tar­pugulli. Qaliatsinni teriarsuaqar­tar­poq pulateriaarsuillu toqunar­tul­lit kiileritsin­nut pisarlutik.

Inuunermi atuk­kagut imaan­naan­ngik­kaluar­tut oqaluus­sineq nuan­naarutigisar­par­put. Inuit Biibili upperivaat tusar­naaq­qis­saar­tarlutillu. Amerlasuut Biibilimik misis­suip­put Nalunaajaasun­ngorlutillu. Sumiif­fitsinni “mister Rober­t”-imik taaneqar­tar­punga Paulinelu “mis­sus Robert”. Immik­koor­tor­taqarfim­mili sulineruler­til­lunga oqaluus­sisar­nera annikil­lim­mat inuit Pauline taasaler­paat “mis­sus Pauline”. Uanga “mister Pauline”-n­ngor­punga. Paulinep tamanna nuan­naraa.

Qatan­ngutigut amerlasuut piitsuup­put, Jehovalli tamatigut, ilaan­nik­kut immik­kuul­laris­sumik, pisariaqar­titaan­nik isumagiuaan­nar­pai. (Mat 6:33) Eqqaamavara qatan­ngut arnaq meeq­qaminullu ullormut taamaal­laat nerisas­sarsiutis­saminik aningaasaatituani qatan­ngum­mut malariar­tumut nakorsaatinik pisinias­sam­mat tun­niuk­kai. Ullup ingerlanerani arnaq alla nujaleritin­niarluni saaf­figin­neriasaarmat qatan­ngut arnaq akiler­neqar­poq. Pisut tamatumun­nga assingusut amerlap­put.

NIGERIA – KULTURI ALLA SUNGIUNNIARPARPUT

Ukiut qulingiluat Sierra Leonemi najugaqareerluta Betelimut Nigeriamiit­tumut nuutsin­neqar­pugut. Tas­sani immik­koor­tor­taqarfimmi angisuumi Sierra Leonemi allaf­fimmi suliarisimasama assingi suliaraakka. Paulinelli allan­ngorujus­suar­neq saper­nar­teqaa. Sior­natigut qaam­matit tamaasa oqaluus­sinermut akun­nerit 130-t ator­tar­pai Biibilimillu siumukarluar­tunik misis­sueqateqar­tarluni. Maan­nak­kut mersor­tarfimmi kif­far­tuler­poq ullullu tamaasa atisat alin­nikut mersor­tarlugit. Sungiun­niaasaar­paa, paasivaali suliani qatan­ngutinit qujamasuutigineqar­toq, sapin­ngisaminillu Betelimi kif­far­toqatini qiim­mas­sar­tar­pai.

Nigeriamiut kulturiat uagutsin­nut nutaajum­mat ilin­niagas­saqaqaagut. Taamaal­luni Betelimi angutip qatan­ngut arnaq Betelimiilerlaaq ilisaritin­niarlugu allaf­fin­nut iseqatigaa. Kutaar­niarlugu assaga isaak­kakku isik­kama saan­nut seeq­qum­merluni sikip­poq. Tupaal­laatigeqaara, ingerlaan­narlu allas­simaf­fiit marluk eqqaalerlugit: Apustilit Suliaat 10:25, 26 aamma Saq­qum­mersitat 19:10. Eqqarsar­punga taamaalioq­qunagu oqarfigis­sanerlugu. Aam­mali paasivara Betelimi kif­far­tor­tun­ngor­tus­satut akuerineqarsimagami Biibilimi ilin­niar­titsis­sutigineqar­tut ilisimagai.

Oqaloqatigiin­neranni puul­laaqeqaanga, kingor­nali misis­suivunga. Sunaaffa qatan­ngutip arnap Nigeriap immik­koor­tuisa ilaanni suli ileq­qorineqaan­nar­toq maliin­naraa. Angutit aamma taama ileq­qoqar­tar­put. Pal­lorfigin­nin­nerunani ataq­qin­nit­tulior­neruvoq. Biibilimilu pisumut assingusumik allas­simasoqar­poq. (Sam 1. 24:9) Nuan­naarutigaara qatan­ngutima arnap peq­qusiileqilis­sutigisaanik ilisimasaqan­ngitsutut oqarsiman­ngin­nama.

Qatan­ngutit Nigeriamiut ukior­pas­suarni aalajaas­simasut naapin­nikuuagut. Taak­kua ilagaat Isaiah Adagbona.a Inuusut­tuul­luni sal­lusuis­sut paasivaa, kingor­nali pupin­nermik nap­paateqaler­poq. Nap­parsim­maviup pupis­sunut immik­koor­tuani inis­sin­neqar­poq, tas­sanilu Nalunaajaasutuaal­luni. Akerlilersor­neqaraluarluni pupis­sut 30-t sin­nerlugit Nalunaajaasun­ngor­nis­saan­nik ikior­pai ilagiillu pilersil­lugit.

KENYA – QATANNGUTIT NAAMMAGIT­TARFIGAANNGA

1996-imi Nigeria qimal­lugu immik­koor­tor­taqarfimmi Kenyamiit­tumi kif­far­tor­tus­san­ngor­tin­neqar­pugut. Aal­laq­qaataani oqalut­tuar­nit­tut tikeraaramali aatsaat Kenyamukaq­qip­punga. Betelimi najugaqar­pugut, eqqaaniip­pullu aapakaajarar­pas­suit, qatan­ngutillu arnat naatitanik tigum­miar­tut arsaar­tar­paat. Taamaal­luni qatan­ngutip arnap Betelimi igalaaq matun­ngitsoorsimagamiuk angerlarami aapakaajaq­qat arlal­lit inimini nerrit­tut siumor­pai. Nil­lial­luni anipal­lap­poq. Aapakaajaq­qallu nil­liitigalutik igalaak­kut pis­sil­lutik anipal­lap­put.

Paulinelu ilagiin­nut swahilisut oqaasilin­nut ilaaler­pugut. Sivitsun­ngitsoq ilagiit atuak­kamik atuaq­qis­saaqatigiin­neranni (maanna ilagiit Biibilimik misis­sueqatigiin­neran­nik taaneqar­poq) aqutsisun­ngor­tus­satut sulias­sin­neqar­punga. Meeraaq­qatulli suli kutat­tar­punga. Apeq­qutit atuar­nias­sagak­kit piareersarluar­tar­punga. Akisar­tulli allas­simasunit allaanerulaagin­nar­tunik oqaaseqaraangata paasineq ajor­pakka. Pik­korlun­naqaaq! Qatan­ngutit nal­ligeqaakka. Naam­magit­tarlutilli maniguul­lutik aqutsisuunera akuerim­mas­suk ajasoorutigeqaara.

USA – PIGISSAAR­FIUSUMI UPPER­LUARTUT

Ukioq ataasiun­ngitsorluun­niit Kenyamiip­pugut. Taava 1997-imi Betelimut Brooklynimi New Yorkimiit­tumut qaaq­quneqar­pugut. Maanna nunami pigis­saarfiusumiiler­pugut, taman­nalu immini ajor­nar­torsiutinik nas­sataqarsin­naavoq. (Uss 30:8, 9) Qatan­ngutilli pigis­saaraluarlutik takutit­tar­paat upperluarlutik. Pisuun­ngor­nis­sar­tik aal­lun­nagu pif­fis­sar­tik pigisatillu Jehovap peqatigiis­sor­taasa suliaan­nik tapersersuinis­samut ator­tar­paat.

Ukiut ingerlan­neranni Nalunaajaasoqatitta upper­nerat atuk­kani assigiin­ngitsuni takusimavar­put. Qatan­ngutitta sumiik­kaluarlutil­luun­niit – Irlandimi perul­lulior­toqaraluar­toq, Afrikami piitsuugaluarlutik avin­ngarusimasumiik­kaluarlutil­luun­niit USA-milu nunami pigis­saarfiusumi – upperluar­ner­tik ersersit­tar­paat. Inuit qanorluun­niit atugaqaraluarlutik asan­nit­tuliorfigim­manni Jehovap nuan­naarutigingaarsimas­savaa!

Ukiut “annoraas­salior­tup ikaar­titerutaanit suk­kalisaar­nerul­lutik” qaangiutipal­las­simap­put. (Job 7:6) Maanna qul­lersaqarfimmi Warwickimi New Yorkimiit­tumi kif­far­tor­pugut. Qatan­ngutillu ilumoorlutik asaqatigiit­tut kif­far­toqatigiuar­nis­saat nuan­naarutigeqaar­put. Pil­luarluta nalerisimaarlutalu kun­nger­put, Kristusi Jiisusi, qanit­tuk­kut aalajaatsor­taminik kisis­saan­ngitsunik akis­sarsisitsiumaar­toq sapin­ngisar­put tamaat tapersersor­par­put. – Mat 25:34.