“Jahp ikualanera” ikumatit­tuarsiuk

1. Asanninneq ilumoortoq Biibilimi qanoq allaatigineqarpa?

ASANNINNERUP “naaralaarneri tassaapput innerup ikualaneri [Jahp ikualanera, NW], ikualanerujussuaq. Imersuit asanninneq qamitis­sinnaan­ngilaat, kuussuit suppussin­naanngilaat.”b (Erin 8:6, 7) Asanninnerup ilumoortup allaaserineqarnerata nuannissusia! Aappariinnut oqaatsit uku qiimmas­saataassapput: Soraanngisaan­nartumik asaqatigiit­toqarsinnaavoq.

2. Aappariit asaqatigiinnertik nillertun­ngussan­ngippat susariaqarpat?

² Aappariittut asaqatigiit­tuarneq aatsaat angusin­naavarsi ilissi nammineq sulissutigiuarussiuk. Assersuuteqariarta: Ikumatitaq ikumajuar­tissagaanni qisuttor­tuartariaqarpoq, ilaginnaraannili qamissaaq. Taamatulli nuliaasoq uiusorlu asaqatigiil­luartuarsin­naapput ikinngutigiinnertik paarilluarunikku. Ilaannikkulli aappariit asaqatigiinnerat nillertun­ngoriar­tulersinnaavoq aningaasaqarnikkut artorsaateqarunik, peqqiil­liuuteqar­toqarpat imaluunniit perorsaaniarnermik unamminiagaqarunik. Aappaqaruit “Jahp ikualanera” qanoq uummaaritsis­sinnaaviuk? Allaaserisami matumani sammissavarput pingasutigut aappariin­nissinni qanoq ataqatigiil­luarlusilu aappariinnersi nuannaarutigisin­naagissi.c

JEHOVAMUT ATTAVEQARLUARTUARIT

3. Aappariit Jehovamut attaveqarluarnertik asaqatigiit­tuarnis­saminnut qanoq iluaqutigaat? (Oqaluus­sisartup oqaasii 4:12) (Aamma assiliaq takuuk).

³ “Jahp ikualanera” uummaaritsis­sagaanni nuliaasoq uiusorlu Jehovamut attaveqarluar­tariaqarput. Jehovamut attaveqarluarneq aappariit qanoq iluaqutigissavaat? Aappariit Ataataminnik qilammiusumik ikinnguteqarnertik pingaar­tikkunikku siunnersuutai maleruarusun­nerussavaat. Taamaalior­tarunik asaqatigiin­nerminnik nillertun­ngortitsisin­naasunik ajornar­torsiutaalersinnaasut eqqumaf­figissavaat ajornar­torsiutiminnillu qaangiil­luarnerusin­naassallutik. (Oqaluus­sisartup oqaasii 4:12 atuaruk). Inuit anersaakkut ittunik pingaar­titsisut Jehova ilaarniar­tarpaat pissusiilu – soorlu inussiar­nersuuneq, naammagit­tartuuneq isumakkeerfigin­nittarnerlu – ineriar­tortittarlugit. (Ef 4:32–5:1) Aappariit taamaattunik pissusillit asannin­nerusarput. Qatanngut Lenamik atilik ukiuni 25-ni aappaqarsimasoq ima oqarpoq: “Inuk anersaakkut ittunik pingaar­titsisoq asajuminar­nerullunilu ataqqiuminar­nerusarpoq.”

4. Sooq Jehovap Juuserfi Mariialu Missiarsiusussamut angajoq­qaassatut toqqarpai?

⁴ Biibilimeersumik assersuuteqariarta. Jehova Missiarsiusussap angajoq­qaassaanik toqqaavoq. Daavip kinguaarpassuanit Juuserfi Mariialu Jehovap toqqarpai. Sooq? Jehovap nalunnginnamiuk marluullutik imminik asannittuusut taamatullu asanninnertik aappariin­nerminnut tunngaviutissagaat. Aappariiususi, Juuserfi Mariialu qanoq ilinniarfigisin­naavisigit?

5. Uiusut Juuserfi qanoq ilinniarfigisin­naavaat?

⁵ Jehovap ilitsersuutaanik Juuserfip maleruaarusut­tarnini uiulluar­nerulis­sutigaa. Ikinnerpaamik pingasoriarluni ilaquttaminut tunngasunik Guutimit ilitsersor­neqarpoq. Tamatigullu naalapal­lattarpoq, allaat allannguerujus­suartariaqaraangami. (Mat 1:20, 24; 2:13-15, 19-21) Guutip ilitsersuutai Juuserfip maleruaramigit Mariia illersorlugulu isumassorpaa. Takorloorsin­naavarput Juuserfip iliuusii Mariiap taassuminnga asannin­nerulis­sutigalugillu ataqqin­ninnerulis­sutigisimassagai. Uiususi, ilaquttassinnik isumassuinissinni Juuserfi ilaarsin­naavarsi siunnersuutinik Biibilimeersunik maleruaanikkut.d Uiusutit, taamaalioraangavit – aamma allannguisariaqaraangavit – aappariil­luarnerulis­sutigisassinnik ersersittarpat nuliat asallugu. Qatanngut arnaq Vanuatumiu ukiut 20-t sinnerlugit aappaqarsimasoq ima oqarpoq: “Uiga Jehovamut siunnersor­tissarsioraangat paasisanilu maleruaraangagit ataqqineruler­tarpara. Toqqissisimasarpunga ilitsersuutaalu tutsuigisarlugit.”

6. Nuliaasut Mariia qanoq ilinniarfigisin­naavaat?

⁶ Mariiap Jehovamut attaveqarnini nammineq nukittorsar­tuarpaa. Allakkat Illernartut ilisimal­luarpai.e Aamma atuakkaminik eqqarsaatigin­neqqissaartarpoq. (Luk 2:19, 51) Mariiap anersaakkut ittunik pingaar­titsinini nuliaal­luassutigaa. Nalitsinni nuliaasorpassuit Mariia ilaarniarlugu ilungersorput. Assersuutigalugu qatanngut arnaq Emikomik atilik ima oqarpoq: “Kisimiit­tuugallarama anersaakkut ittut nammineq isumagisarpakka. Aappartaaramali aappariin­nitsinni qinunermut guutisior­nermullu tunngasuni uiga siulersuisarmat paasilerpara uppernera nakussatsik­kumallugu nammineq iliuuseqar­tarunnaarlunga. Taamaattumik nammineq uppernerma paarinissaa eqqumaf­figisariaqarakku kisimiillunga nammineq atuaqqis­saarnissara, qinunissara eqqarsaatigin­neqqissaar­nissaralu piffissaqarfiginiar­talerpakka.” (Gal 6:5) Nuliaasutit, Jehovamut attaveqarnerit nakussas­sartuarukku uippit pingaar­tinnerulerlutillu asanerulis­savaatit. – Uss 31:30.

7. Aappariit guutisioqatigiinnermut tunngatillugu Juuserfi Mariialu sumik ilinniarfigisin­naavaat?

⁷ Juuserfi Mariialu Jehovamut attaveqarnertik nukittutik­kumallugu tapersersoqatigiit­tariaqarput. Nalunngilaat ilaqutariittut guutisiorneq pingaaruteqartoq. (Luk 2:22-24, 41; 4:16) Taamaalior­niarnerat immaqa sapernakusoorsinnaavoq, ingammik meeqqat amerliar­tortillugit. Juuserfi Mariialu nalitsinni aappariinnut maligas­siuilluarput. Meeraqaruit ataatsimiigiar­tarnissamut ilaqutariittullu misissueqatigiit­tarnissamut piffissaqar­niarneq ajornakusoor­narsinnaavoq. Ingammik aappariittut misissueqatigiin­nissamut qinoqatigiin­nissamul­luunniit piffissaaleqinarsinnaavoq. Eqqaamasiulli guutisioqatigiikkussi Jehovamut immissinnullu qaninnerulissasusi. Taamaattumik guutisiorneq pingaar­tissiuk!

8. Aappariil­liortut ilaqutariittut Biibilimik misissueqatigiinneq qanoq pissarsif­figilluar­nerusin­naavaat?

⁸ Aappariil­liorussi ilaqutariittut Biibilimik misissueqatigiinneq kajumin­narnavianngilaq. Aallaqqaammut marluullusi sammerusutassinnik naatsumik nuannersumillu eqqartueqatigiis­sinnaavusi. Taamaaliorneq iluaqutigis­savarsi aappariittullu anersaakkut ittunik sammisaqaqatigiin­nissamut kajumis­sissutigis­sallugu.

PIFFISSAQAQATIGIIT­TARITSI

9. Sooq aappariit imminnut piffissaqarfigisariaqarpat?

⁹ Aappariiususi, asanninnersi uummaaritsik­kumallugu piffissaqaqatigiit­tariaqarpusi. Taamaalior­tarussi eqqarsar­taatsikkut misigis­sutsikkullu immissinnut ungasil­liartus­sanngilasi. (Mos 1. 2:24) Lilia Ruslanilu ukiut 15-t matuma siorna aappariilersimasut kateqqam­merlutik paasisimasaat maluginiariartigu. Lilia ima oqaluttuarpoq: “Paasivarput kissaatigisatsitut piffissaqaqatigiitsiginata. Suliffipput, angerlarsimaffipput kingusin­nerusukkullu meeqqagut ulapputigisarpagut. Paasivarput aappariittut immitsinnut piffissalin­ngikkutta ungasil­liartulersin­naalluta.”

10. Aappariit Efesossimiut 5:15, 16-ilu qanoq maleruarsin­naavaat?

¹⁰ Aappariit piffissaqaqatigiin­nissartik qanoq qulakkeersin­naavaat? Qaqugukkut piffissaqaqatigiis­sanerlutik aalajanger­tariaqarpaat. (Efesossimiut 5:15, 16 atuakkit). Qatanngut angut Nigeriamiu Uzondumik atilik ima oqaluttuarpoq: “Sammisassakka pilersaarusioraangakkit nuliannut piffissaqar­nissara ilanngut­tarpara. Tamannalu pingaar­tippara.” (Flp 1:10) Anastasia, Moldovami ilagiinnik nakkutil­liisumik uilik, piffissaminik atorluaasarpoq. Ima oqaluttuarpoq: “Nammineq sammisassakka samminiar­tarpakka uima akisussaaf­fimminik isumagin­ninnerani. Taava kingusin­nerusukkut piffissaqaqatigiis­sinnaasarpugut.” Taavami ilissi piffissaqaqatigiin­nissassinnut akornuteqarpat?

11. Akviila Priskiilalu suut peqatigiis­sutigisarpaat?

¹¹ Aappariit kristumiunit siullernit asaneqartut, Akviila Priskiilalu, ilinniarfigisin­naavasi. (Rom 16:3, 4) Taakkua aappariinnerat Biibilimi eqqartor­neqarpal­laanngik­kaluarluni ersersin­neqarpoq peqatigiillutik sulillutillu oqaluus­sillutillu allanik ikiuisartut. (ApS 18:2, 3, 24-26) Akviila Priskiilalu Biibilimi eqqaaneqaraangamik tamatigut ataatsimut eqqaaneqartarput.

12. Uiusoq nuliaasorlu qanoq piffissaqaqatigiin­nerulersin­naappat? (Aamma assiliaq takuuk).

¹² Akviila Priskiilalu aappariinnut qanoq maligas­saaluarpat? Aappallu suliassarpas­suaqarpusi. Sammisassat taakkua arlaat aappariittut sammisin­naavisigit? Assersuutigalugu Akviila Priskiilalu oqaluus­seqatigiittarput. Ilissi oqaluus­seqatigiin­nissarsi pilersaarusior­tarpisiuk? Akviila Priskiilalu aamma suleqatigiittarput. Ilimananngilaq ilissi suliffeqaqatigiittusi, angerlarsimaf­fimmili suliassanut tunngasunik suleqatigiis­sinnaavisi? (Oqal 4:9) Suleqatigiik­kaangassi oqaloqatigiin­nissamut periarfis­saqartassaasi. Robert Lindalu ukiut 50-it sinnerlugit aappariis­simapput. Robert ima oqarpoq: “Katikkatta aliikkutaqarnermut piffissaqarpal­laanngilagut. Erruigaangamali nuliara allarterisarpoq. Naatsiivilerininni saninnut pigaangat pilluaam­mertaqaanga. Taamatut suleqatigiit­tarnerput qaninnerulis­sutigisarparput, asaqatigiin­nerujar­tortarlutalu.”

13. Ataasioqatigiit­tuassagunik nuliaasoq uiusorlu susariaqarpat?

¹³ Imaanngilaq aappariit angerlarsimaqatigiinnertik tamatigut imminnut qanillis­sutigissagaat. Nuliaasoq Brasiliamiu ima oqaluttuarpoq: “Ullumikkut allamut saasaatit amerlaqaat. Paasinikuuara kukkusumik eqqarsarlunga isumaqarsimallunga illoqatigiikkatta piffissaqaqatigiittugut. Paasinikuuara angerlarsimaqatigiinneq naamman­ngitsoq. Aapparisaq soqutigin­ninnermik ersersitsivigisariaqarpoq.” Bruno nulialu Tays imminnut soqutigin­ninnermik ersersitsinertik qanoq qulakkeertaraat maluginiariartigu. Bruno ima oqaluttuarpoq: “Piffissaqaqatigiin­niaraangatta mobiiligut qamittarpagut peqatigiin­nerpullu nuannaarutigisarlugu.”

14. Aappariittut sammisaqaqatigiik­kusunngitsut susinnaappat?

¹⁴ Taavami aappallu sammisaqaqatigiinneq nuannarin­ngikkussiuk? Immaqa soqutigisasi assigiingillat imaluunniit immissinnut paamitsan­narivusi. Taamaappat susinnaavisi? Ikumatitaq eqqartoriigarput eqqaaqqis­sinnaavarput. Ikikkaanni ingerlaannaq innerujus­suanngorneq ajorpoq. Innermut qisuginiakkagut annikitsuuteriarlugit annertusiar­tuaartikkukkit inneq ikummaaris­siartussaaq. Taamatulli ullut tamaasa sivikitsuk­kuutaariarlusi sammisaqaqatigiis­sinnaavusi. Nuannersuutis­sagussiuk akerleriis­sutaasinnaasut eqqartor­naveersaassavasi. (Jaak 3:18) Taamatut annikitsumik aallartikkussi asaqatigiin­nerulissaasi.

ATAQQEQATIGIIGITSI

15. Aappariit asaqatigiinnerat uummaarissappat sooq ataqqeqatigiin­nissaat pingaaruteqarpa?

¹⁵ Ataqqeqatigiinneq aappariinnut pingaaruteqarpoq. Iltimut assersuuneqarsinnaavoq. Ikumatitaq ilteqan­ngikkuni qamissaaq. Taamatuttaaq aappariit ataqqeqatigiin­ngikkunik asanninnerat nillertun­ngoriar­tupallassaaq. Aappariilli ataqqeqatigiin­niarlutik sulissutiginnittut asaqatigiinnertik uummaaritsit­tarpaat. Eqqaamasariaqarporli pingaar­nerunngitsoq illit ataqqin­nittuliorlutit misiginersutit, pingaar­neruvorli aappat ataqqineqartutut misiginersoq. Penny Aretilu ukiut 25-t sinnerlugit aappariis­simapput, nulialu ima oqarpoq: “Ataqqeqatigiinnitta angerlarsimaffipput nuannersuutittarpaa. Oqaaseqar­nissarput nangaagineq ajorparput nalunngin­natsigu aappatta isumarput pingaartikkaa.” Aappat ataqqineqartutut misigitik­kumallugu qanoq iliorsinnaavit? Aaperaat Saaralu assersuutigisin­naavagut.

16. Uiusutit, Aaperaat qanoq ilinniarfigisin­naaviuk? (Petrusimit 1. 3:7) (Aamma assiliaq takuuk).

¹⁶ Aaperaap Saara ataqqivaa. Tusarnaartarpaa misigis­susiilu soqutigisarlugit. Ilaanni Saara aliasuppoq, allaallu taamaan­nerminut Aaperaat pisuutillugu. Aaperaat kamalerpa inussiar­niillillunilu? Naamik. Nalunngilaa Saara imminut naalattuullunilu tapersersuisartuusoq. Nuliani tusarnaarpaa ajornar­torsiutaalu aaqqinniarlugu. (Mos 1. 16:5, 6) Qanoq ilinniarfigaarput? Uiusutit, aalajangigassat ilaqutariinnut tunngasut illit aalajangigas­saraatit. (Kor 1. 11:3) Aalajangiitinnak nuliappit isumaa, ingammik aalajangiinerit taassumunnga sunniuteqassappat, innimigigukku asannit­tuliussaatit. (Kor 1. 13:4, 5) Ilaannikkut nuliat uippakajaar­tarsinnaavoq misigis­sutsiminillu aniatitsisariaqarluni. Taamaak­kaangat tusarnaaq­qissaar­neratigut ataqqin­nittuliorfigisarpiuk? (Petrusimit 1. 3:7 atuaruk). Angela Dmitrijilu ukiuni 30-ngajanni aappariis­simapput. Angelap nassuiarpaa uimi qanoq ataqqineqartutut misigitit­taraani: “Isumakuluuteqaraangama oqalukkusuin­naraangamaluunniit Dmitrij tusarnaar­nissannut tamatigut piareersimasarpoq. Naammagit­tarfigiuarpaanga allaat misigis­sutsikka paatsiveqar­natillu aqussin­naanngik­kaangakkit.”

17. Nuliaasutit, Saara qanoq ilinniarfigisin­naaviuk? (Petrusimit 1. 3:5, 6)

¹⁷ Saarap uimi aalajangigai tapersersortarpai. (Mos 1. 12:5) Ilaanni Aaperaat tikeraar­toqariataarami inoroorsaarpoq. Saara oqarfigaa suliani unitsillugit naqittaariarluni naammat­torsuarnik iffiussasoq. (Mos 1. 18:6) Uimi aalajangigaa tapersersorlugu Saara iliuuseqapallappoq. Nuliaasutit, Saara ilaarlugu uippit aalajangigai tapersersor­tarpigit? (Petrusimit 1. 3:5, 6 atuakkit). Dmitrij, immikkoortup siuliani eqqaaneqartoq, nuliami qanoq ataqqin­nittuliorfigisaraani pillugu ima oqarpoq: “Angelap aalajangikkakka isumaqataaf­figinngik­kaluarlugit tapersersor­tarmagit qujamasuutigaara. Ilaannikkut kinguneqarluan­ngikkaangata isornar­torsiorneq ajorpaanga.” Ataqqin­nitsigut asajuminar­tittarpagut!

18. Aappariit asaqatigiit­tuarniarnertik qanoq iluaqutigisarpaat?

¹⁸ Nalitsinni aappariit asaqatigiinnerat Saatanip qaminniarsaraa. Nalunngilaa aappariit asaqatigiik­kunnaarunik Jehova ungasil­liartulersin­naagaat. Asanninnerli ilumoortoq qaminneqarsin­naanngilaq! Qanortoq aappariittut asaqatigiinnersi Erinarsugassiat Pingaar­nersaanni allaatigineqar­neratut ikkili. Inuuninni Jehova pingaar­nerpaatittaruk, piffissaqaqatigiit­taritsi, aamma misigis­sutsikkut pisariaqar­titassigullu ataqqeqatigiit­taritsi. Taamaalior­tarussi aappariinnersi asanninnerup ilumoortup pilerfianut Jehovamut ataqqinaataassaaq. Innertut ikummaarissutut asanninnersi ikumajuassaaq.