Jehovap qinnutikka akissavai?

1-2. Sooq misigisin­naavugut Jehovap qinnutigut akinngikkai?

“NAALAGAQ qiimmat­taatigiuk, taassuma tunisarumaarmatit uummativit kissaatigisaanik.” (Tuss 37:4) Neriorsuut nuanningaarami! Jehovamulli qinugaangatta qinnutigisatsinnik tamanik ingerlaannaq tunissagaatigut naatsorsuutigis­savarput? Tamanna apeqqutaavoq pingaarutilik. Sooq? Uku takorluukkit: Qatanngutip arnap aappaqan­ngitsup Kristumiunut Oqaluus­sisartunut Ilinniarfimmut qaaqquneqar­nissani qinnutigisarpaa. Ukiulli arlallit qaangiuttut suli qaaqquneqanngilaq. Qatanngut angut inuusuttoq perulun­nartumik nappaatilik ilagiinni iliuuseqar­neruniassagami ajorunnaarsin­neqaqqulluni Jehovamut qinuvoq. Ajorunnaan­ngilarli. Angajoq­qaajusut qinupput qitornartik Jehovamut kiffartor­tuassasoq. Qitornaalli Jehovamut kiffartorun­naarpoq.

² Immaqa illittaaq Jehova aalajangersimasumik qinnuigisimavat akineqarnalli. Taamaattumik imaassinnaavoq eqqarsartutit Jehovap inuit ilaasa qinnutaat akisarai, illilli qinnutitit akineq ajorai. Immaqaluunniit eqqunngitsuliorsimanerlutit eqqarsaatigivat. Qatanngut arnaq Janicemikb atilik taama misigivoq. Uinilu Betelimi kiffartorusupput tamannalu pillugu Jehovamut qinusarlutik. Ima oqarpoq: “Upperil­luinnarpara Betelimut ingerlaannaq qaaqquneqas­salluta.” Ukiulli arlallit qaangiuttut suli Betelimut qaaqquneqan­ngillat. Janice oqarpoq: “Nikallorlungalu paatsiveeruppunga. Jehova pakatsisis­simanerlugu isumakuluutigaara. Betelimi kiffartor­nissarput qinnutigikulasaraluarpara, sooruna akinngikkaanga?”

3. Allaaserisami matumani suut sammissavagut?

³ Jehovap qinnutigut tusarnaar­tarnerai ilaannikkut qularilersin­naavarput. Allaat angutit aalajaatsut itsaq inuusut tamanna isumakuluutigisimavaat. (Job 30:20; Tuss 22:3; Hab 1:2) Sooq upperil­luinnarsin­naavarput Jehovap qinnutigut akisarai? (Tuss 65:3) Tamanna akissutis­sarsiumallugu apeqqutit uku sammissavagut: (1) Jehova qanoq iliorumaarpa? (2) Jehovap sumik piumaffigaatigut? (3) Sooq qinnutigut ilaannikkut allanngor­tittariaqarsin­naasarpagut?

JEHOVA QANOQ ILIORUMAARPA?

4. Jeremia 29:12 naapertorlugu Jehovap qanoq neriorsorpaatigut?

⁴ Jehova neriorsuivoq qinnutigut tusarnaar­tarumaarlugit. (Jeremia 29:12 atuaruk). Guutitta kiffani aalajaatsut asagamigit qinnutaat tamatigut soqutigisarpai. (Tuss 10:17; 37:28) Imaanngilarli qinnutigisatsinnik sunilluunniit tuniumaaraatigut. Imaassinnaavoq aatsaat paratiisissami qinnutitta ilaat tamakkiisumik akineqassasut.

5. Jehovap qinnutigut qanoq akissanerlugit aalajangeraangamiuk suna eqqarsaatigisarpaa? Nassuiaruk.

⁵ Jehovap qinnutigut qanoq akissanerlugit aalajangeraangamiuk siunertaminut naapertuunnersoq eqqarsaatigisarpaa. (Es 55:8, 9) Ilaatigut siunertarivaa inuit nunarsuarmi nuannaarlutik ataasioqatigiil­lutillu naalassagaanni. Saatanilli inuit isumaqar­tinniarpai aqutsisoqaratik nammineerunik iluatsitsinerussasut. (Mos 1. 3:1-5) Saatanip sallutuujunera uppernarsineqar­niassammat Jehovap inuit nammineer­nissaat akuerigallarpaa. Inuilli nammineernerat ajornar­torsiuterpas­suarnik kinguneqarpoq. (Oqal 8:9) Nalunngilarput Jehovap ajornar­torsiutit tamakku tamaasa massakkut aaqqinnavian­ngikkai. Taamaalioraluarpammi isumaqar­toqalersinnaavoq inuit nammineernerat iluatsittoq nammineerlutillu ajornar­torsiutiminnik aaqqiisinnaasut.

6. Sooq upperil­luinnar­tariaqarparput Jehova asannit­tuullunilu naapertuil­luartuusoq?

⁶ Jehovap qinnutit assigiit assigiin­ngitsumik akisinnaasarpai. Assersuutigalugu kunngi Hizkia perululluni Jehovamut ajorunnaarseq­qulluni qinuvoq. Jehovallu ajorunnaarsippaa. (Kng 2. 20:1-6) Apustilili Paulusi ‘anniaateqarluni’, immaqa timikkut ajoquteqarluni, Jehovamut ajorunnaarseq­qugaluarami ajorunnaarsin­neqanngilaq. (Kor 2. 12:7-9) Aamma apustilit Jaaku Petrusilu eqqarsaatigikkit. Marluullutik kunngimit Herodasimit toqunniar­neqarput. Ilagiit Petrusi qinnuppaat, ilimanarporlu aamma Jaaku qinnussimassagaat. Jaaku toqunneqarpoq Petrusili inngilimit annaanneqarluni. (ApS 12:1-11) Sooq Jehovap Jaaku annaannagu Petrusi annaappaa? Tamanna Biibilimi nassuiar­neqanngilaq.c Nalunngilarpulli Jehova ‘naapertuil­luartuusoq’. (Mos 5. 32:4) Aamma nalunngilarput Petrusi Jaakulu marluullutik Jehovamit asaneqartut. (Saqq 21:14) Imaassinnaavoq Jehovap qinnutigut neriuutigisatsitut akinngikkai. Nalunngin­natsiguli Jehova asannit­tuullunilu naapertuil­luartuusoq qinnutitsinnik qanoq akisisarnera naammagit­taalliuutigin­ngilarput. – Job 33:13.

7. Sunaveersaar­tarpugut, aamma sooq?

⁷ Pissutsit atukkagut allat atugaannut sanilliun­naveersaar­tarpagut. Assersuutigalugu immaqa Jehovamit aalajangersimasumik ikiorneqar­nissarput qinnutigigaluarlugu qinnutigisatsitut iliunngilaq. Taava immaqa paasivarput alla assingusumik qinnuteqarsimasoq Jehovamillu akineqarpasilluni. Qatanngut arnaq Annamik atilik taama misigivoq. Uimi Matthewip kræftertup ajorunnaarsin­neqarnissaa qinnutigaa. Tamatuma nalaani qatanngutit arnat utoqqaat marluk aamma kræfterput. Annap Matthew qatanngutillu arnat taakku marluk kimigiiserluni qinnuppai. Qatanngutit arnat ajorunnaarput, Matthewili toquvoq. Anna aallaqqaammut isumaqaraluarpoq qatanngutit arnat Jehovamit ikiorneqaramik ajorunnaartut. Taamaappalli sooq uimi ajorunnaarsin­neqarnissaanik qinnutaa akineqanngila? Soorunami qatanngutit arnat ajorunnaar­nerannut pissutaasoq naluarput. Nalunngilarpulli Jehovap naalliuutigut tamaasa atuukkun­naarsissagai ikinngutimilu toqusimasut makitin­nissaat qilanaaringaaraa. – Es 26:19.

8. (a) Esaja 43:2 naapertorlugu Jehovap qanoq ikiortarpaatigut? (b) Annikil­lioraangatta qinusarneq qanoq iluaqutigisarparput? (Video Qinuneq pinertusaar­nissamut iluaqutigaarput takuuk).

⁸ Jehovap ikiortuas­savaatigut. Ataatatta Jehovap asagamisigut naalliunnerput aliasuutigisarpaa. (Mos 2. 3:7; Es 63:9) Taamaak­kaluartoq ajornar­torsiutigut kuussuartut innertullu ittut tamaviisa peernavianngilai. (Esaja 43:2 atuaruk). ‘Ingerlaan­naqqullutali’ ikiussalluta anersaakkullu illersus­salluta neriorsorpaatigut. Aamma pinertusaarsin­naaqqulluta anersaaminik illernartumik tunissavaatigut. (Luk 11:13; Flp 4:13) Taamaammat upperil­luinnarsin­naavarput aalajaat­tuarnis­satsinnut pisariaqar­titarpiatsinnik tunissagaatigut.d

JEHOVAP SUMIK PIUMAFFIGAATIGUT?

9. Jaaku 1:6, 7-ilu naapertorlugit sooq Jehovamit ikiorneqas­salluta upperil­luinnas­savarput?

⁹ Jehovap kissaatigaa tatigis­sagitsinni. (Hebr 11:6) Ilaannikkut ajornar­torsiutigut qaqqarsuartut issinnaapput. Allaat qularutigilersin­naavarput Jehovamit ikiorneqas­sanerluta. Biibilimili allassimavoq Guutip pissaaneratigut ‘qarmaliat qulaallugit pississin­naasugut’. (Tuss 18:30) Taamaattumik qularnerput akiorlugu Jehovap qinnutigut akissagai upperil­luinnarlugu qamannga pisumik qinusarisa. – Jaaku 1:6, 7 atuakkit.

10. Qinnutigut naapertorlugit iliuuseqarsin­naanitsinnik assersuuteqarit.

¹⁰ Jehovap kissaatigaa qinnutigut naapertorlugit iliuuseqas­sasugut. Assersuutigalugu qatanngut ataatsimeersuarnermut peqataajumalluni sulinngif­feqarumanialeruni Jehovamut ikioqqusinnaavoq. Qinnutaa Jehovap qanoq akisinnaavaa? Sulisitsisuminut saaffigin­ninnissaanut Jehovap sapiissuseqalersis­sinnaavaa. Qatanngutilli uninngaan­narnani sulisitsisuni aperisariaqarpaa. Immaqalu arlaleriarluni aperisariaqarpaa, ullormiluunniit allami suliumasin­naalluni. Pisariaqas­sappallu akissarsiaqarnani sulinngif­feqarniarsinnaavoq.

11. Sooq isumakuluutigut pillugit qinukulasassaagut?

¹¹ Jehovap kissaatigaa isumakuluutigut pillugit qinukulasas­sasugut. (Tes 1. 5:17) Jiisusip oqaasiinit paasivarput qinnutigisatta ilaat ingerlaannaq pinavian­ngikkigut. (Luk 11:9) Tamannali nikallus­sutiginagu qamannga pisumik qinukulasarit. (Luk 18:1-7) Aalajangersimasoq pillugu qinukulasarutta ersersis­savarput qinnutigisarput pimoorukkipput. Aamma ersersis­savarput upperalugu Jehovap ikiorsin­naagaatigut.

SOOQ ILAANNIKKUT QINNUTIGUT ALLANNGOR­TITTARIAQARSIN­NAASARPAGUT?

12. (a) Qinnutigut pillugit apeqqut suna eqqarsaatigisas­savarput, aamma sooq? (b) Qinugaangatta Jehovamik ataqqin­ninnerput qanoq ersersis­sinnaavarput? (Ungalusaq “Qinugaangama Jehovamik ataqqin­ninnera qanoq ersersis­sinnaavara?” takuuk).

¹² Qinnutigisatsitut akineqan­ngikkutta apeqqutit pingasut eqqarsaatigisin­naavagut. Apeqqut siulleq imaappoq: ‘Eqqortoq pillugu qinuvunga?’ Eqqarsar­tarpugut nalunagu suna uagutsinnut pitsaanerpaanersoq. Amerlaner­tigulli nalusarparput siunissami suna uagutsinnut pitsaanerpaas­sanersoq. Ajornar­torsiut pillugu qinugutta imaassinnaavoq qinnutigisatsinnit pitsaanerusumik aaqqiis­sutissaqartoq. Imaassin­naavorlu qinnutigisarput Jehovap piumasaanut naapertuutin­ngitsoq. (Joh 1. 5:14) Assersuutigalugu eqqarsaatigikkit angajoqqaat siusinnerusukkut eqqaaneqartut. Qitornamik Jehovamut kiffartor­tuarnissaa qinnutigisarpaat. Qinnutaat ajunngik­kaluarpoq. Jehovalli kinaluunniit imminut kiffartor­tinniarlugu pinngitsaalinavianngilaa. Kissaatigaa kikkut tamarmik, aamma meerartatta, kiffartorusun­nerlutik namminneq aalajangissagaat. (Mos 5. 10:12, 13; 30:19, 20) Taamaattumik angajoqqaat taakku Jehova qinnuigisin­naavaat qitornamik Jehovap asanissaanut ikinngutigiler­nissaanullu kajumis­suseqaler­niassammat uummataa killissin­naaqqullugu. – Uss 22:6; Ef 6:4.

13. Hebræerit 4:16 naapertorlugu Jehovap qaqugukkut ikiortarpaatigut? Nassuiaruk.

¹³ Apeqqutit aappaat imaappoq: ‘Qinnutigisama akinissaanut Jehovap piffissaal­luarsorivaa?’ Immaqa misigisin­naavugut qinnutigisarput maannak­korpiaq pisariaqar­tillugu. Jehovalli qaqugukkut ikiorneqar­nissamik pisariaqar­titsinersugut nalunngilaa. (Hebræerit 4:16 atuaruk). Ingerlaannaq akineqan­ngikkutta eqqarsarsin­naavugut Jehovap qinnutigisarput naameeraa. Imaassin­naavorli oqartorlusooq: “Uatsilaaq.” Qatanngut angut inuusuttoq ajorunnaarsin­neqaqqulluni qinusoq assersuutigisin­naavarput. Jehovap tupinnar­tuliornikkut ajorunnaarsippagu Saatani oqarsin­naassagaluarpoq qatanngut angut taanna ajorunnaarsin­neqarami Jehovamut kiffartor­tuartoq. (Job 1:9-11; 2:4) Jehova napparsimasunik ajorunnaarsitsinis­saminut piffissaleereer­nikuuvoq. (Es 33:24; Saqq 21:3, 4) Taamaat­toqanngin­neranilu tupinnar­tuliornikkut ajorunnaarsin­neqarnissarput naatsorsuutigis­sanngilarput. Taamaattumik qatanngutip taassuma napparsimagaluarluni aalajaalluni kiffartor­tuarumalluni nakussatsin­neqarnis­saminik qamuunalu eqqissinis­saminik Jehova qinnuigisinnaavaa. – Tuss 29:11.

14. Janice qanoq ilinniarfigaajuk?

¹⁴ Janice, Betelimi kiffartorusunnini pillugu qinusimasoq, assersuutigisin­naavarput. Ukiut tallimat qaangiutereersut aatsaat paasivaa qinnutini Jehovap qanoq akisimagaa. Ima oqarpoq: “Jehovap ukiuni taakkunani ilinniar­tillungalu kristumiuul­luartun­ngornissannut ikiorpaanga. Jehovamik tatigin­ninneruler­tariaqarsimavunga. Biibilimik peqqissaar­nerusumik misissuisar­nissara ilikkar­tariaqarsimavara. Aamma paasisariaqarsimavara qanorluunniit atugaqaraluarlunga Jehovamut kiffartorninni pilluarsin­naallunga.” Kingusin­nerusukkut uia nakkutil­liisutut angalasartutut kiffartor­tunngor­tinneqarpoq. Pereersut eqqarsaatigalugit Janice ima oqarpoq: “Jehovap qinnutikka akivai, naak akissutai ilimagisannit allaanerugaluartut. Aatsaat kingusin­nerusukkut Jehovap akissutai nuannarilerpakka. Maannali qujamasuutigeqaara asanninnera ajunngisaarneralu misigisimagakkit.”

15. Sooq assigiin­ngitsut arlallit qinnutigisariaqarsin­naavagut? (Aamma assit takukkit).

¹⁵ Eqqarsaatigisariaqakkatta pingajuat unaavoq: ‘Aamma alla qinnutigissavara?’ Aalajangersimasoq pillugu qinusarneq pitsaasaraluartoq assigiin­ngitsut arlallit pillugit qinusarutta Jehovap uagutsinnut piumasaa paasinerusin­naavarput. Qatanngut arnaq aappaqan­ngitsoq Kristumiunut Oqaluus­sisartunut Ilinniarfimmut qaaqquneqarusunnini pillugu qinusarsimasoq assersuutigisin­naavarput. Pisariaqar­titsiffiunerusumi kiffartorusukkami ilinniarfimmi tamatumani ilinniarusuppoq. Taamaattumik tamanna pillugu qinusarnermi saniatigut aamma Jehova qinnuigisinnaavaa sutigut allatigut kiffartor­nerusin­naanerluni paasiteq­qulluni. (ApS 16:9, 10) Taava qinnutini naapertorlugit iliuuseqarsinnaavoq ilagiinnik nakkutilliisoq aperalugu ilagiinni qanittuniittuni pionerinik pisariaqar­titsisoqarnersoq. Imaluunniit immikkoor­tortaqarfimmut allassinnaavoq aperaluni oqaluus­sisartunik sumi pisariaqar­titsisoqarnersoq.e

16. Suna upperil­luinnarsin­naavarput?

¹⁶ Sammisatsitut Jehova asannit­tuullunilu naapertuil­luartuummat upperil­luinnarsin­naavarput qinnutigut akiumaarai. (Tuss 4:4; Es 30:18) Imaassinnaavoq ilaannikkut ilimagisatsinnit allaanerusumik akineqar­tartugut. Jehovalli qinnutigut soqutigingaarpai. Aamma asangaarlutalu qimannavian­ngilaatigut. (Tuss 9:11) Taamaattumik ‘tamatigut tatigisaruk’ uummammiugisatillu qinunikkut oqaluttuarisakkit. – Tuss 62:9.