Nalunngiliuk?

Fiilippimit orninneqarami Eunukkip Etiopiamiup qamutit qanoq ittut ilaaffigai?

ALLASSIMAQ­QAARFINNI oqaaseq Nunarsuup nutaanngor­nissaanik nutsikkami “qamutit”-mik nutserneqartoq qamutinut assigiin­ngitsunut atorneqartarpoq. (ApS 8:28, 29, 38) Etiopiamiulli qamutit ilaaffigisai sorsunnermi sukkanniuutiniluunniit atorneqar­tartunit anginerorpasipput. Sooq taama oqarsin­naavugut?

Eunukki Etiopiamiu atorfik­kaajuvoq ungasissumut angalasimasoq. ‘Eunukki Etiopiamiu Kandaakip, Etiopiami dronningip, erlinnar­tuutiminut tamanut akisussaasutut atorfilit­tarivaa.’ (ApS 8:27) Itsaq Etiopia maanna Egyptenip kujataata tungaanut Sudani tikillugu isorartutigivoq. Taama ungasitsigisumut angalanermini qamutit taakkuinnaat angallatigin­ngikkaluarpagil­luunniit pisariaqar­titaminik nassataqarsimassaaq. Kristumiut siulliit nalaanni qamutit inunnik angallas­sinermut atorneqartartut sisamanik assakaasoqartarput qulaatigullu assiaquteqar­tarlutik. Apustilit Suliaat pillugit atuakkiami ima allassimasoqarpoq: “Qamutit taama ittut amerlanerusunik nassataqar­nissamut inissaqar­titsipput, taakkulu atorlugit ingerlaarneq atorsaanerusarpoq. Taamaalillunilu ungasin­nerusumut angalasoqarsin­naagunarluni.” – Acts – An Exegetical Commentary.

Etiopiamiu Fiilippimit anguneqarami atuarpoq. Oqaluttuami ima allassimavoq: “Fiilippip angullugit saniani arpakkami [eunukki] pruffiitimit Iisaajamit allakkanik atuartoq tusaavaa.” (ApS 8:30) Qamutit taamaattut sukkasuumik angalanissamut sanaajun­ngillat. Arriitsumik ingerlaarmata eunukki atuarnis­saminut periarfis­saqarpoq, aamma Fiilippip qamutit angusin­naasimavai.

Etiopiamiup “Fiilippi ikeqqoriarlugu saniminut ingeqquaa”. (ApS 8:31) Qamutini sukkanniuutini atorneqar­tartuni aquttoq nikorfasarpoq. Qamutinili angallas­sisartuni eunukki Fiilippilu marluullutik issianis­saminnut inissaqarput.

Apustilit Suliat kapitali 8-mi allassimasut oqaluttuarisaanermilu uppernarsaatit allat naapertorlugit eunukkip Etiopiamiup qamutit angallatigisimasai qamutinit sorsuutinit sukkanniuutinillu anginerusimasut Biibililersaarutitsinni qanittumi titartagan­ngorlugit takutin­neqarput.