Eqqaamajuk Jehova Guutiummat uumassusilik

1. Ajornar­torsior­taraluarluta Jehovap kiffartorfigiuar­nissaanut suna iluaqutigisarparput?

BIIBILIMI allassimavoq ullut inuuffigisagut ‘anigoruminaal­lutillu erloqinartuusut’. (Tim 2. 3:1) Inuit tamarmik ajornar­torsiutigisar­tagaasa saniatigut Jehovamut kiffartortut akerlilersor­neqarlutillu malersor­neqartarput. Jehovamut kiffartor­tuarnis­satsinnut suna iluaqutigisarparput? Iluaqutigisatta pingaarutillit ilagaat Jehovamit ikiorneqar­tarnerput paasisimagatsigu Jehova Guutiusoq uumassuseqartoq. – Jer 10:10; Tim 2. 1:12.

2. Jehova pillugu nakussatsis­sutigisin­naasatsinnik sumik ilisimasaqarpugut?

² Jehova kinaassusiliuvoq piviusoq. Misilin­neqarnigut tamaasa ilisimavai ikiorusut­tarlutalu. (Nal 2. 16:9; Tuss 23:4) Jehova uagutsinnik isumassuisartoq ikiuinis­saminut piareeq­qajuaannartoq eqqaamagutsigu qanorluunniit ajornar­torsiulis­sagaluarutta pinertusaar­nissatsinnut iluaqutigisin­naavarput. Kunngip Daavip tamanna misigaa.

3. Daavi oqarami ‘Jehova uumasoq’ qanoq isumaqarpa?

³ Daavip Jehova ilisarisimavaa tatigalugulu. Daavi kunngimit Saulimit allanillu toqunniar­neqarami Jehovamut ikioqquvoq. (Tuss 18:7) Qinnutini akillugu Jehovap annaammani Daavi ima nillerpoq: “Naalagaq uumavoq!” (Tuss 18:47) Daavi qanoq isumaqarpa? Qinerlerfissiaq naapertorlugu Daavip Jehovamik tatigin­ninnini oqaatigaa nalunnginnamiuk taanna “Guutiusoq ilumoortutuaq kiffaminik ikiuiuaannartoq”. Daavip nammineq misigisimasaminit paasivaa Jehova ikiuinis­saminut piareersimajuaannartoq. Tamannalu Jehovap kiffartorfigiuar­nissaanut unnersiutigiuar­nissaanullu kajumis­sissutigaa. – Tuss 18:29, 30, 50.

4. Jehova Guutiusoq uumassuseqartoq eqqaamagutsigu tamanna qanoq iluaqutigis­savarput?

⁴ Jehova Guutiusoq uumassuseqartoq qularin­ngilluin­narutsigu aallussil­luarluta kiffartorfiginissaanut iluaqutigis­savarput. Misilin­neqarnermi pinertusaar­nissamut nakussatsis­sutigis­savarput kiffartor­nitsinnilu tamaviaarusus­suseqas­salluta. Aamma Jehovap qanimut attaveqarfigiuarnissaa aalajangiusimas­savarput.

GUUTIP UUMASSUSEQARTUP PISSATSIS­SAVAATIT

5. Misilin­neqaraluarluta sooq isumalluarsin­naavugut? (Filippimiut 4:13)

⁵ Jehova Guutiusoq uumassuseqartoq uagutsinnik ikiuiumatuujusoq eqqaamagutsigu misilin­neqaatit annikik­kaluarpata annertugaluarpataluunniit pinertusaarsin­naassaagut. Ajornar­torsiut qanorluunniit annertutigigaluarpat ajornar­torsiuteqanngilaq Jehovap aaqqissin­naanngisaanik. Jehovap Killeqan­ngitsumik Pissaanillip pinertusaar­niassagatta pissatsis­sinnaavaatigut. (Filippimiut 4:13 atuaruk). Taamaattumik misilin­neqaraluarluta isumalluarsin­naavugut. Misilin­neqarnitsinni annikitsuni Jehovap ikiuinera misigisaratsigu qularis­sanngilarput aamma misilin­neqarnerni annertuuni ikiorumaaraatigut.

6. Daavi inuusut­tuulluni Jehovamik tatigin­ninnerulis­sutigisaminik qanoq misigisaqarpa?

⁶ Daavi Jehovamik tatigin­ninnerulis­sutigisaminik misigisaqarpoq. Inuusut­tuulluni ataatami savaataanik paarsitillugu løveq savamik aallarussivoq, pisumilu allami aamma nanoq taamaaliorpoq. Daavip sapiilluni uumasoq malersortarpaa savamillu arsaarlugu. Isumaqan­ngilarli nammineerluni taamaaliorsin­naalluni, nalunngilaami Jehovap ikioraani. (Sam 1. 17:34-37) Daavip misigisani taakku puiunngisaannarpai. Jehovap qanoq ikiorsimagaani eqqarsaatigeq­qissaaramiuk upperinerulerpaa aamma siunissami nakussatsik­kumaaraani.

7. Goliati akiorsin­naajumallugu Daavip eqqortumik isiginnit­taaseqarnini qanoq iluaqutigaa?

⁷ Kingusin­nerusukkut Daavi suli inuusut­tuaraagunarluni Israalikkut sakkutuuisa tammaarfian­nukarpoq. Inorujussuup filisterip Goliatimik atillip ‘Israelip sakkutuui kanngunarsar­niarlugit’ suaartarmatik annilaangasorujus­suupput. (Sam 1. 17:10, 11) Ajoraluartumik Goliatip angissusersuanut oqaasiinullu ersinermik susinnaajun­naarput. (Sam 1. 17:24, 25) Daavili allamik isiginnit­taaseqarpoq. Israalikkut sakkutuuinut sassussiin­narnertut isiginagu ‘Guutilli uumasup sakkutuuinik’ inukkutigin­nilluni unammil­lernertut isigaa. (Sam 1. 17:26) Daavip pingaarnertut Jehova eqqarsaatigaa. Savanik paarsisuulluni ikiorsimammani Daavip Jehova tatigil­luinnarpaa pisumi aamma tassani ikiorumaaraani. Jehova ikiortigalugu Daavi Goliatimut saassussivoq – ajugaallunilu! – Sam 1. 17:45-51.

8. Jehovap misilin­neqarnitsinni ikiuiumaarnera qanoq tatiginerulersin­naavarput? (Aamma asseq takuuk).

⁸ Guutip uumassuseqartup tamatigut ikiuerusunnera eqqaamagutsigu uaguttaaq ajornar­torsiutigut anigorluarsin­naavagut. (Tuss 118:6) Itsaq iliuusiisa eqqarsaatigeq­qissaar­nerisigut Jehovamik tatigin­ninnerput nakussatsis­sinnaavarput. Assersuutigalugu Jehovap kiffaminik qanoq aniguisitsisimaneranik oqaluttuat Biibilimiittut atuarsin­naavatit. (Es 37:17, 33-37) Aamma nalitsinni uppeqatigut qanoq ikiorsimanerai jw.org-imi atuarlutillu videunik isiginnaarsin­naavutit. Tamatumalu saniatigut Jehovap illit qanoq ikiorsimaneraatit eqqarsaatigiuk. Immaqa misigin­ngilatit Jehovap tupinnaan­nartumik, soorlu nannumik løvimil­luunniit paanninnermi, ikiorsimagaatit. Jehovalli inuuninni sorpassuartigut ikiorsimavaatit! Taassumunnga ikinngutaanias­sagavit qanillisis­simavaatit. (Joh 6:44) Ikiuineratiguinnaq suli Jehovamut kiffartorputit. Qinnutitit qanoq akisarsimanerai, piffissaq eqqorlugu ikiuisimaneri aamma artornar­torsiungaarninni qanoq annertoq­qusersorsimagaatit eqqaamaq­qullugit Jehovamut ikioqqusin­naavutit. Misigisimasatit eqqarsaatigigukkit Jehovap ikiortuas­sagaatit upperinerulissavat.

9. Misilin­neqarnitsinni suna eqqaamas­savarput? (Ussatit 27:11)

⁹ Misilin­neqarnitsinni suna pingaar­nerpaajunersoq eqqaamas­savarput. Diaavulu oqarpoq ajornar­torsiulerutta Jehova sumigin­nassagipput. Misilin­neqaraangatta qanoq qisuariar­tarnerput Jehovap misigis­susiinut sunniuteqartarpoq. (Job 1:10, 11; Ussatit 27:11 atuaruk). Ajornar­torsioraluarluta Jehova ilumoorfigiuaraangatsigu takutit­tarparput taanna asallugu uppernarsar­tarlugulu Saatani sallutuujusoq. Illit arlaatigut misilin­neqarpit? Assersuutigalugu Jehovamut kiffartornerit pissutigalugu pisortanit akerlilersor­neqarpit, aningaasatigut ajornar­torsiorpit imaluunniit oqaluus­sinermi nuanniitsumik qisuariar­toqartarpa? Taamaappat eqqaamassavat pissutsit atukkatit Jehovap uummataanik nuannaar­titsinissamut periarfissaasut. Aamma eqqaamajuk qanorluunniit misilin­neqassagaluaruit pinertusaarsin­naaqqullutit ikiussagaatit. (Kor 1. 10:13) Pissatsis­savaatit!

GUUTIP UUMASSUSILLIP AKISSARSISIS­SAVAATIT

10. Guutip uumassusillip kiffani qanoq pissavai?

¹⁰ Jehovap tamatigut kiffani akissarsisittarpai. (Hebr 11:6) Maanna qamuuna eqqissisimanermik nuannaar­nermillu tunisarpaatigut, siunissamilu naassaan­ngitsumik inuulersik­kumaarpaatigut. Upperil­luinnarsin­naavarput Jehovap akissarsisik­kusukkaatigut taamaalior­nissaminullu pissaaneqartoq. Taamaattumik kiffartor­nitsinni sapinngisatsinnik iliortuarusuppugut, soorlu itsaq kiffartortut taamaalior­tarsimasut. Taakkua ilagaat Timuutiusi. – Hebr 6:10-12.

11. Sooq Timuutiusi ilagiinni tamaviaarluni suliva? (Timuutiusimut 1. 4:10)

¹¹ Timuutiusimut 1. 4:10 atuaruk. Timuutiusip qularinngilaa iliuutsini tamaasa Jehovap pingaartikkai, tamannalu tamaviaarluni assoroorlunilu sulinissamut kajumis­sissutigaa. Timuutiusip suut iliuuserai? Nalunngilarput ilagiinni oqaluus­sinermilu ilinniar­titsillaq­qinneruler­nissaanik Paulusip kajumissaaraa. Timuutiusi aamma uppeqatiminut, inuusuttunut utoqqarnullu, maligas­siuisussaavoq. Tamatuma saniatigut ajornakusoortunik suliassin­neqarpoq. Assersuutigalugu naammagit­tarluni pisariaqar­titsisut toqqaan­nartumik asannit­tumilli ilitsersor­tussaavai. (Tim 1. 4:11-16; Tim 2. 4:1-5) Timuutiusip sulisarnini ilaannikkut allanit maluginiar­neqaranilu pingaar­tinneqan­ngikkaluaraangal­luunniit Jehovamit akissarsisin­neqarumaarluni qularinngilaa. – Rom 2:6, 7.

12. Sooq utoqqaanertat ilagiinni tamaviaarlutik suliuarpat? (Aamma asseq takuuk).

¹² Nalitsinni utoqqaanertat qularis­sanngilaat iliuutsitik tamaasa Jehovap maluginiarlugillu pingaartikkai. Paarsisutut, ilinniar­titsisutut oqaluus­sisartutullu suliassaqarnermik saniatigut utoqqaanertat ilaat aamma sanaartornermi ajunaar­nersuaqar­tillugulu ikiuiniarnermi suliaqartarput. Allat napparsim­mavinni uninngasunut pulaartar­tussanut imaluunniit Napparsim­mavinnut Attaveqar­titanut ilaapput. Utoqqaanertat suliaqarumasut nalunngilaat Jehovap ilagiit pilersitarigai. Taamaat­tumillu tarneq tamakkerlugu suliassartik suliarisarpaat qularutiginagu Guutip akissarsisis­sagaatik. – Kol 3:23, 24.

13. Kiffartor­nitsinni iliuutsigut Jehovap qanoq isumaqarfigai?

¹³ Soorunami ilaannaat utoqqaaner­taasinnaapput. Tamattali Jehovamut tunnius­saqarsin­naavugut. Sapinngisatsinnik kiffartornerput Jehovap iluaringaarpaa. Nunarsuaq tamakkerlugu suliniarnermut aningaasanik tunissuteqar­tarnerput qujamasuutigaa, aamma annertuunik tunissuteqarsin­naanngik­kaluarut­taluunniit. Ittuutugaluarluta imminut ajugaaf­figaluta ataatsimiinnerni akerusulluta nappaagaangatta aamma uagutsinnut ajuallatsitsisimasumik isumakkeerfigin­nikkaangatta nuannaarutigisarpaa. Allaat misigiguit iliuusererusutattut iliuuseqarsinnaanak qularis­sanngilat Jehovap iliuuserisar­tagannguatit tamaasa maluginiartarai pingaar­tillugillu. Ilungersornerit pillugu asavaatit akissarsisis­sallutillu. – Luk 21:1-4.

GUUTIMUT UUMASSUSEQARTUMUT QANIMUT ATTAVEQARTUARIT

14. Jehovamut qanimut attaveqar­tuarneq aalajaan­nissamut qanoq iluaqutigis­savarput? (Aamma asseq takuuk).

¹⁴ Jehovap iliuutsigut pingaartikkai paasigutsigu taassumunnga aalajaan­nissarput ajornan­nginnerutis­savarput. Tamatumunnga tunngatillugu Juuserfi maligas­saalluarpoq. Jehova piviusutut isigigamiuk misigis­sutsikkullu annersik­kusunnginnamiuk atoqatigiinnikkut eqqunngitsuliorusun­ngilluinnarpoq. (Mos 1. 39:9) Uagut Jehova piviusutut isigissagutsigu qinusar­nissamut Biibilimillu misissueq­qissaar­tarnissamut piffissamik immikkoor­titsisariaqarpugut. Taamaalilluta Jehovamut ikinngutaanerput nakussatsis­savarput. Juuserfilu assigalugu Jehova qanimut ikinngutigigutsigu taassuma iluarin­ngisaanik sunilluunniit iliorusun­navianngilagut. – Jaak 4:8.

15. Israalikkut maligas­siuinerlunnerat qanoq ilinniutigisin­naavarput? (Hebræerit 3:12)

¹⁵ Jehovamik tatigin­nikkunnaartut taassumannga ajornan­ngitsuararsuarmik ungasil­liartoriaan­naapput. Israalikkut inoqajuitsumiin­neranni qanoq pisoqartoq eqqarsaatigiuk. Soorunami taakkua nalunngilaat Jehova piusoq, qularilerpaalli pisariaqar­titaminnik isumagis­saneraatik. Allaat Jehova pillugu ima aperipput: “Akornatsin­niinnerpa akornatsin­niinngin­nerpaluunniit?” (Mos 2. 17:2, 7) Jehova Guutiusoq uumassuseqartoq puioramikku naggataatigut taassumunnga pikitsitsilerput. Taakkua maligas­siuinerlunnerat ilaarusun­ngilluin­narparput. – Hebræerit 3:12 atuaruk.

16. Suna uppernikkut misilin­neqaatigisin­naavarput?

¹⁶ Jehovamut kiffartun­ngitsunik avatangiiseqaratta Jehovamut qanimut attaveqar­tuarnissarput imaannaan­ngissinnaavoq. Inuppassuit Guuteqarnera upperin­ngilaat. Guutillu qanoq isumaqar­neranik soqutigisaqan­ngitsut ingerlal­luarpasis­sinnaapput. Tamanna uppernikkut misilin­neqaatigisin­naavarput. Soorunami qularin­ngilarput Jehova piusoq, qularilersoorsin­naavarpulli ikiorusun­neraatigut. Tussiaat 73-imik allattup tamanna isumaliutigaa. Inoqatimi amerlasuut Guutip inatsisaanik soqutigin­ninngik­kaluarlutik ajorpasin­natillu inuulluataarpasittut maluginiaramiuk Jehovamut kiffartorneq imminut akilersin­naanersoq qularilerpaa. – Tuss 73:11-13.

17. Jehovamut qanittuar­nissamut suna iluaqutigis­savarput?

¹⁷ Tussiaasiortup eqqortumik isiginnit­taaseqaler­nissaminut suna iluaqutigaa? Jehovamik soqutigisaqan­ngitsut naggataatigut qanoq pineqar­nissaat eqqarsaatigeq­qissaarpaa. (Tuss 73:18, 19, 27) Aamma Jehovamut kiffartornerup iluaqutissartai nuannequtaalu eqqarsaatigai. (Tuss 73:24) Uaguttaaq taamaaliorsin­naavugut. Jehovap assigiin­ngitsorpas­suartigut qanoq pilluaq­qusaraatigut taassumunngalu kiffartulersiman­ngitsuugutta inuunitta allaanerusimas­sagaluarnera eqqarsaatigisin­naavarput. Tamanna aalajaan­nissamut iluaqutigis­savarput. Aamma tussiaasiortutut ima oqarusussaagut: “Guuti qanillugu inuuneq tassa pilluar­nartora.” – Tuss 73:28.

18. Sooq siunissaq eqqarsaatigalugu isumalluarsin­naavugut?

¹⁸ “Guutimut uumassuseqartumut ilumoor­tumullu” kiffartoratta ulluni kingullerni makkunani qanorluunniit misilin­neqassagaluarutta pinertusaarsin­naavugut. (Tes 1. 1:9) Guutitta isumassorlutalu tamatigut ikiorumaarpaatigut. Itsaq kiffani najorpai, uagullu ikiorluta najorpaatigut Qanittukkut inuit oqaluttuarisaaneranni asseqan­ngitsumik annikil­liornar­tussarsuaqassaaq. Kisimiin­navianngilagulli. (Es 41:10) “Isumalluarluta oqarsin­naavugut: ‘Jehova ikiortigigakku annilaangas­sanngilanga.’” – Hebr 13:5, 6.