Utertitsissut qanoq paasisaqarfigaarput?

1. Jiisusip toquneranik ukiumoortumik eqqaaniaanermi najuuttarnerput qanoq iluaqutigisarparput?

JEHOVAP ernituaminik pilliutaa tunissutaavoq nallernis­saqanngitsoq! (Kor 2. 9:15) Jiisusip inuunini pilliutigimmagu illit Jehova Guuti qanimut ikinngutigilersin­naalerpat. Aamma naassaan­ngitsumik inuunissamik neriuuteqalersin­naalerputit. Jehovap asagamisigut utertitsissut pilersimmagu taassumunnga qujamasun­nissamut pissutis­sarpassuaqarpugut! (Rom 5:8) Jehovap Jiisusillu uagut pilluta iliuusiat eqqaamajuaan­narnias­sagatsigu Jiisusi peqqusivoq toqunera pillugu ukiumoortumik eqqaaniaanissamut najuuttaq­qulluta. – Luk 22:19, 20.

2. Allaaserisami matumani suna sammineqassava?

² 2025-mi eqqaaniaanissaq arfinin­ngornermi apriilip 12-anni pissaaq. Qularnanngilaq najuunnissarput tamatta pilersaarutigigipput. Pisussaq sapaatip-akunneranik sioqqullugu aamma eqqaaniaareernerup kingorna Jehovap erneratalu uagut pilluta iliuuserisimasaannik eqqarsaatigin­neqqissaar­nissarput tamatsinnut iluaqutaassaaq. Allaaserisami matumani sammissavarput utertitsissut tunngavigalugu Jehova erneralu pillugit qanoq ilikkagaqarsin­naanersugut. Allaaserisami tulliuttumi sammissavarput utertitsissut qanoq iluaqutigisin­naaneripput qujamasuutigin­ninnerpullu qanoq ersersis­sinnaaneripput.

UTERTITSISSUT TUNNGAVIGALUGU JEHOVA PILLUGU QANOQ ILIKKAGAQARTUGUT

3. Qanoq ililluni inuup ataatsip toqunera inunnut millionilinnut akiliutaasin­naagami? (Aamma asseq takuuk).

³ Utertitsissut tunngavigalugu Jehovap naapertuil­luartuuneranik ilikkagaqarpugut. (Mos 5. 32:4) Tassa qanoq? Una eqqarsaatigiuk: Adamimit naalanngitsumit ajorti toqumik kinguneqar­titsisoq kingornupparput. (Rom 5:12) Jehovap ajortimit toqumillu aniguisin­niarluta Jiisusi utertitsis­sutissatut aallartippaa. Inuulli naammal­luinnartup ataatsip pilliutaa inunnut millionilinnut qanoq utertitsis­sutaasin­naagami? Apustili Paulusi ima nassuiaavoq: “Soorlu inuup ataatsip [Adamip] naalannginnera pissutigalugu inuppassuit ajortilin­ngortut, taamatuttaaq inuup ataatsip [Jiisusip] naalannera pissutigalugu inuppassuit naapertuil­luartun­ngussapput.” (Rom 5:19; Tim 1. 2:6) Allatut oqaatigalugu: Uagut ajortimut toqumullu inussiaataalerpugut inuup ataatsip naalanngin­neratigut. Taamaattumik inuup naammal­luinnartup ataatsip naalanneratigut aniguisitaasin­naavugut.

4. Sooq Adamip kinguaavi Jehovap imminut naalattut naassaan­ngitsumik inuutiin­nanngilai?

⁴ Uagut annaanniarluta Jiisusi ilumut toqusariaqarpa? Adamip kinguaavi Jehovap imminut naalattut naassaan­ngitsumik inuutiin­narsinnaan­nginnamigit? Immaqa eqqarsarpugut ajornar­torsiutip aaqqinnissaanut tamanna ajornan­nginnerussasoq. Tamannali Jehovap naapertuil­luartuuneranik ersersitsinngilaq. Naapertuil­luartuugami Adamip naalanngilluni iliuusia ersaril­luinnartoq Jehovap isiginngitsuusaagin­narnavianngilaa.

5. Sooq Jehovap eqqortulior­tuaannarnissaa tatigil­luinnarsin­naavarput?

⁵ Taavami Jehovap naapertuil­luartuunini sumigin­narlugu Adamip erneri paniilu naammal­luinnan­ngitsut inuutiin­narsimagaluarpagit qanoq pisoqarsimas­sagaluarpa? Inuit eqqarsalersin­naapput Guutip eqqortoq eqqunngitsorlu pillugit najoqqutassiani allatigut unioqquteq­qissanerai, assersuutigalugu siunissaq pillugu neriorsuutini eqqortin­ngitsuus­sanerai. Tamannali ernumalis­sutigisariaqan­ngilarput, Jehovammi iliuusererusutani iliuuseriuaannarpai. Allaat ernini asasani pilliutigimmagu qularun­naarsip­paatigut eqqortumik iliuuseqar­tuaannartuusoq.

6. Utertitsissut Jehovap asannin­neranik qanoq ersersitsiva? (Johannesimit 1. 4:9, 10)

⁶ Jehovap aamma uagutsinnik asanninnini kajumis­sissutigalugu ernini aallartippaa. (Joh 3:16; Johannesimit 1. 4:9, 10 atuakkit). Jehovap ernini uagut pilluta toqusus­sanngor­tillugu aallartippaa kissaatigigamiuk naassaan­ngitsumik inuuneqalis­sasugut aamma ilaqutariis­sortaminut ilanngutis­sasugut. Una eqqarsaatigiuk: Adami ajortuliorami Jehovap ilaqutariis­sortaanut ilaasin­naajunnaarpoq. Tamatuma kingunerisaanik aamma uagut Guutip ilaqutariis­sortaanut ilaanata inunngorpugut. Utertitsissulli akilerneqareermat Guutimut uppertut taassumunngalu naalattut tamarmik siunissami ilaqutariis­sortaanut ilanngus­sinnaalerput. Maanna allaat Jehovap ajortitsinnik isumakkeerfigisarpaatigut, taamaat­tumillu tassunga uppeqatitsinnullu qanimut attaveqarsin­naavugut. Ilumut Jehovap asangaarpaatigut! – Rom 5:10, 11.

7. Jiisusip pilliutaa tunngavigalugu qanoq paasivarput Jehovap asangaaraatigut?

⁷ Ernini anniartoq isigalugu Jehovamut ajorsimas­saqisoq eqqarsaatigigutsigu qanoq asatigigaatigut aatsaat paasilluarsin­naavarput. Saatani oqamisaar­nikuuvoq Guutimut kiffaasup kialuunniit inuunini annaajumanagu Guuti ilumoorfigerusun­navianngikkaa. Saatanip salluliuutaa uppernarsar­niarlugu Jiisusip toqunngin­nermini naalliunnissaa Jehovap akueraa. (Job 2:1-5; Pet 1. 2:21) Jehova isigitillugu Jiisusi upperisarsiortunit akeqqersimaartunit illaruaatigineqarpoq, sakkutuunit iperartor­neqarpoq naalliutitsiviliamullu kikiattuun­neqarluni. Jehovallu isiginnaarpaa ernini anniangaarluni toqujartortoq. (Mat 27:28-31, 39) Jehovap pissaaneqangaartup tamanna pinngitsoor­tissinnaagaluarpaa. Assersuutigalugu akerlilersortai ima oqarmata Jehova akulius­simasin­naagaluarpoq: “Guutip iluariguniuk annaatissavaa.” (Mat 27:42, 43) Taamaaliorsimagaluarpalli Jiisusip utertitsis­sutissaq akilersimanavian­ngikkaluarpaa, uagullu neriuuteqalersimanavian­ngikkaluarpugut. Taamaattumik Jehovap ernermi anerninger­nissaata tungaanut anniarnissaa akueraa.

8. Sooq nalunngilarput Jehovap ernini naalliuttoq isigalugu anniaatigisimassagaa? (Aamma asseq takuuk).

⁸ Eqqarsalis­sanngilagut Jehova pissaaneqangaarami misigis­suseqan­ngitsoq! Biibilimi allassimavoq uagut taanna assigalugu pinngor­titaasugut, taamaattumik Jehova uagutsitulli misigis­suseqarpoq. Jehova misigis­suseqarami ‘kamatsin­neqarsimasutut’ aamma ‘ajuallatsin­neqarsimasutut’ Biibilimi allaatigineqarpoq. (Tuss 78:40, 41) Aaperaamik Iisaamillu oqaluttuaq eqqarsaatigiuk. Immaqa Aaperaap ernituaminik Jehovap pilliiar­toqqusinera eqqaavat. (Mos 1. 22:9-12; Hebr 11:17-19) Aaperaap ernini Iisaaq pilliutiginiarlugu piareersar­nermini misigis­sutsimigut aalater­neqangaarluni qanoq aliasutsigisimassasoq takorloorsin­naavarput. Qanorli Jehova aliasutsigisimassava ernermi toqunissaa tikillugu inupalaanit sakkortuumik naalliutsitaasoq isigalugu! – Video Efterlign deres tro – Abraham, 2. del jw.org-imiittoq takuuk.

9. Romamiut 8:32, 38, 39-lu Jehovap asanningaarnera pillugu qanoq ilinniarfigaagit?

⁹ Utertitsissut tunngavigalugu ilikkarparput inuit allat – qaniginerpaasatta ikinngutiginerpaasat­taluunniit – Jehovatulli asatigin­ngikkaatigut. (Romamiut 8:32, 38, 39 atuakkit). Qularis­sanngilarput imminut asanitsinnit Jehovap asanerugaatigut. Naassaan­ngitsumik inoorusuppit? Jehovap tamanna kissaatiginerungaarpaa. Ajortinnik isumakkeerfigineqarusuppit? Jehovap tamanna kissaatiginerungaarpaa. Uagutsinnit piumasariinnarpaa tunissutaa nalitungaartoq akueris­sagipput uppernermik ersersitsinitsigut taassumalu peqqussutaanut naalannitsigut. Guutip asanningaar­neranut utertitsissut ersiutaal­luinnarpoq. Aamma paratiisissami Jehovap uagutsinnut asanninnersua pillugu ilikkagaqar­nerussaagut. – Oqal 3:11.

UTERTISSUT TUNNGAVIGALUGU JIISUSI PILLUGU QANOQ ILIKKAGAQARTUGUT

10. (a) Jiisusip toqutaanissani eqqarsaatigalugu ingammik suna isumakuluutigaa? (b) Jehovap aqqa Jiisusip qanoq illernarsisippaa? (Aamma ungalusaq “Jiisusip aalajaan­nermigut Jehovap aqqa illernarsisippaa” takuuk).

¹⁰ Jiisusip Ataatami ajunngitsumik eqqarsaatigineqarnissaa kissaatigaa. (Joh 14:31) Guutimik ataqqin­ninngitsutut pinerlut­tuliortutullu toqutas­sanngorami inuit Ataatani pillugu ajortumik eqqarsaler­nissaat isumakuluutigaa. Taamaattumik ima qinuvoq: “Ataata, ajornan­ngippat imerfik una uannit peeruk.” (Mat 26:39; q.a.i. takuuk). Toqussi tikillugu Jehovamut aalajaat­tuarami Ataatami aqqa illernarsisippaa.

11. Jiisusip inunnik asanningaarnini qanoq ersersippaa? (Johannesi 13:1)

¹¹ Utertitsissut tunngavigalugu aamma paasivarput Jiisusip inuit – pingaartumik malinnitsini – asangaarai. (Uss 8:31; Johannesi 13:1 atuaruk). Assersuutigalugu Jiisusip nalunngilaa nunarsuarmiitilluni iliuuserisassami ilaat oqitsuin­naanavian­ngitsut, pingaartumik anniarluni toqusariaqarnini. Jehovamilli suliassin­neqarnini pissutigiin­narnagu, aammali inunnut asanninnini pissutigalugu, tamakku tamaasa iliuuserai. Oqaluus­sinermigut, ilinniar­titsinermigut allatigullu ikiuinermigut Jiisusip inuit asannit­tuliorfigisarpai. Allaat unnukkut toqussi aqaguttoq toqusus­saalluni apustilimi isigaasa asannissaat piffissaqarfigai, apustilillu oqaatsiminik qiimmas­sarlugillu tuppallersarpai. (Joh 13:12-15) Aamma toqulerluni qisummik naalliutsitsiviliamiitilluni pinerluttoq saniminiittoq neriuuteqalersippaa, anaanamilu isumagineqarnissaa isumagalugu. (Luk 23:42, 43; Joh 19:26, 27) Jiisusip inunnut asanninnini aatsaat toquler­nermini ersersinngilaa, nunarsuarmili inuutilluni sutigut tamatigut ersersittarpaa.

12. Jiisusip ullumikkut qanoq ikiortarpaatigut?

¹² Kristusi uagut pilluta “ataasiaammik” toquvoq, sulili uagut pilluta iliuuseqangaartarpoq. (Rom 6:10) Tassa qanoq? Utertitsissut iluaqutigisin­naanias­sagatsigu suliuarpoq. Suliarpassui eqqarsaatigikkit. Kunngitut, palasiunertut ilagiinnullu niaquusutut kiffartor­tuarpoq. (Kor 1. 15:25; Ef 5:23; Hebr 2:17) Tanitanik inuppas­suarnillu katersuineq akisussaaffigaa, suliarlu tamanna annikil­liornar­tussarsuup qaangiutin­ngitsiarnerani naammas­sineqassaaq.a (Mat 25:32; Mak 13:27) Aamma ulluni kingullerni makkunani Jehovamut aalajaat­tuarsin­naaqqulluta inussiaq aalajaallunilu silatooq aqqutigalugu anersaakkut pisariaqar­titatsinnik isumagiuarpaatigut. (Mat 24:45) Siunissamilu ukiuni 1.000-ni naalakkersuinermini iluaqutigisas­satsinnik isumagiuas­savaatigut. Jehovap ilumut ernini uagut pilluta tunniuppaa!

ILINNIARUN­NAANNGISAANNARIT

13. Jehovap Jiisusillu asanninnerat pillugu qanoq ilikkagaqar­tuarsinnaavit?

¹³ Jehovap Jiisusillu uagut pilluta iliuusiinik eqqarsaatigin­neqqissaar­tarnikkut uagutsinnut asanninnerat pillugu ilikkagaqar­tuaannarsin­naavutit. Immaqa ukioq manna eqqaaniaanissap qanilliar­tornerani aamma kingorna iivangkiiliut ilaat ataaseq imaluunniit arlallit peqqissaarlutit atuarsin­naavatit. Kapitalit arlallit ataatsikkut atuapal­lanniarsareqinagit. Unikaal­lariarlutilli Jehovap Jiisusillu asanissaannut pissutaasut eqqarsaatigikkit. Aamma atuakkanni ilikkakkatit allanut oqaluttuarisakkit.

14. Tussiaat 119:97 naapertorlugu misissueq­qissaarneq ilikkagaqar­tuarnissamut qanoq iluaqutigisin­naavarput? (Aamma asseq takuuk).

¹⁴ Ukiorpassuarni Nalunaajaasuusimaguit immaqa eqqarsarputit sammisat ilisimal­luakkatit – soorlu Guutip naapertuil­luarnera, asanninnera utertitsissullu – pillugit suli nutaanik paasisaqarsin­naanerlutit. Sammisalli taakku allallu pillugit ilikkagaqar­tuarsin­naavugut. Qanoq iliorsinnaavit? Biibililersaarutaatigut atuaqqis­saarlugillu eqqarsaatigeq­qissaartakkit. Atuakkatit paasilluan­ngikkaangakkit misissoq­qissaartakkit. Ilikkakkatit aamma Jehova, ernera taakkualu asanninnerat pillugit misissorsimasatit ullup ingerlanerani eqqarsaatigeq­qissaartakkit. – Tussiaat 119:97 atuaruk.

15. Sooq Biibilimi erlinnar­tuutinik ujarler­tuassaagut?

¹⁵ Biibilimik atuarninni misissueq­qissaar­ninniluunniit nutaanik pissanganar­tunillu paasisaqan­ngikkaangavit nikallus­sutigeqinagu. Kuultisiortutut imminut takorloortarit. Kuultisiortoq nalunaaquttap-akunnerpassuini ullorpas­suarniluunniit ujaaseq­qaarluni aatsaat nassaartarpoq. Nassaanili tamarmik naleqarmata tunniutiinnarneq ajorpoq. Biibilimi ilumoortut kuultimin­ngarnit naleqar­nerungaarput! (Tuss 119:127; Uss 8:10) Taamaattumik Biibilimik atuarnissamut pilersaarusiat naammagit­tarlutit malittaruk. – Tuss 1:2.

16. Jehova Jiisusilu qanoq ilaarsin­naavagut?

¹⁶ Misissuininni ilikkakkannik qanoq timitaliisin­naanerlutit eqqarsaatigisaruk. Assersuutigalugu Jehovap naapertuil­luartuunera nakerisarsiun­nginnikkut ilaarsinnaavat. Ajornakusooraluaraangal­luunniit Jehovap aqqa pillugu kajumillutit iliuuseqar­tuarnikkut uppeqatinnullu ajunngisaar­tuartarnikkut Jiisusip Ataataminut allanullu asanninnera ilaarsinnaavat. Aamma Jehovap inunnut iliuuserisimasarpassui pillugit ilisimasaqalersin­naaqqullugit utertitsissullu upperiler­niassammassuk allanut oqaluus­siuartarnikkut Jiisusi ilaaruk.

17. Allaaserisap tulliani suna sammissavarput?

¹⁷ Utertitsissut pillugu paasinnik­kiartuaar­nitsinni pingaar­titsiar­tuaarnitsinnilu Jehova Jiisusilu asanerujar­tuinnas­savagut. Taakkualu asanerujar­tuinnas­savaatigut. (Joh 14:21; Jaak 4:8) Qanortoq Jehovap tunissutai tamaasa atorluarlugit utertitsissut pillugu ilinniar­tuarisa. Allaaserisap tulliani sammissavarput utertitsissut qanoq iluaqutigisin­naanerlutigu aamma Jehovap asanninnera qujamasuutigalugu qanoq ersersis­sinnaanerlutigu.