Jehovap Jiisusillu eqqarsar­taasiattut eqqarsar­taaseqarit

1-2. Jehova qanoq asatigis­savarput, Jiisusillu isumani tamakkerlugu Jehova asagaa qanoq erserpa?

‘JEHOVA Guutit uummatit tamakkerlugu, tarnit tamakkerlugu, isumat tamakkerlugu nukitillu tamakkerlugit asassavat.’ (Mak 12:30) Jiisusip erseqqissarpaa Moorsisip inatsisaani inatsit sorleq pingaar­nerpaanersoq. Maluginiaruk Jehova uummaterput tamakkerlugu, tassa kissaatigisagut misigis­sutsigullu tamaasa ilanngullugit, asassagipput. Aamma nukigut tarnerpullu, tassa inuunerput, tamakkerlugit asassavarput. Kiisalu isumarput, tassa eqqarsar­taaserput, tamakkerlugu Jehova asassavarput. Jehovap eqqarsartaasia tamakkiisumik paasisin­naanngik­kaluarlugu isumaa paasilluar­nerusin­naavarput Kristusi qanoq eqqarsarnersoq misissorutsigu, taassumami Ataatami eqqarsartaasia assigeq­qissaarmagu. – Kor 1. 2:16.

² Jiisusip isumani tamakkerlugu Jehova asavaa. Nalunngilaa imminut Guutip piumasaa. Naak tamanna naalliun­nissaminik kinguneqas­sagaluartoq naalakkusuppoq. Ataatami piumasaatut iliornissani pingaar­nerpaatikkamiuk allamut saasarneqar­tinngilaq.

3. Apustili Petrusi Jiisusimit qanoq ilikkagaqarpa, Petrusillu kristumiut soqqullugit kaammattorpai? (Petrusimit 1. 4:1)

³ Petrusi apustilillu allat Jiisusi ilagisaramikku Jiisusip eqqarsar­taasianik ilikkagaqar­nissaminnut periarfis­saqarluarput. Petrusip isumassarsisitaalluni allakkamini siullerni kristumiut Kristusitut eqqarsar­taaseqaq­qullugit kaammattorpai.a (Petrusimit 1. 4:1 atuaruk). Nutsiin­navillugu allassimavoq “isiginnit­taasianik sakkulersussaasi”. Soorlu sakkutooq sorsukkiartoq sakkulersortoq, kristumiut Jiisusip eqqarsar­taasiatut eqqarsar­taaseqaler­nermikkut ‘sakkulerunik’ ajortulioq­qajaanerminnut Saatanillu silarsuaanut akiuulluarsin­naapput. – Kor 2. 10:3-5; Ef 6:12.

4. Allaaserisaq manna Petrusip siunnersuutaanik maleruaanis­satsinnut qanoq iluaqutigisin­naavarput?

⁴ Jiisusi qanoq eqqarsarnersoq uagullu qanoq taassumatut eqqarsar­taaseqalersin­naasugut sammissavarput. Paasissavarput (1) Jehovap eqqarsar­taasiatut qanoq eqqarsar­taaseqalersin­naasugut, taamaalior­nikkullu qanoq isumakkut ataasioqatigiis­sinnaasugut, (2) qanoq maniguut­tuusinnaasugut aamma (3) Jehovamut qinukulasar­nitsigut qanoq isumakkut peqqissuusin­naasugut.

JEHOVAP EQQARSAR­TAASIATUT EQQARSAR­TAASEQARIT

5. Petrusi Jehovap eqqarsar­taasiatut ilaanni eqqarsar­taaseqan­ngitsoq qanoq erserpa?

⁵ Petrusi Jehovap eqqarsar­taasiatut ilaanni qanoq eqqarsar­taaseqan­ngitsoq misissoriartigu. Jiisusip apustilini oqaluttuuppai Jerusalem­mimukar­tariaqarluni, tassanilu upperisarsiornikkut siuttunit tigusaasus­saalluni, naalliutsitaasus­saalluni kiisalu toqutaasus­saalluni. (Mat 16:21) Petrusilli nalunngilaa Jiisusi tassaasoq Missiarsi – Guutip innuttaanik aniguisitsisussaq. Taamaattumik isumaqarunarpoq Jiisusip toqunissaa Jehovap akuerinavian­ngikkaa. (Mat 16:16) Taava Petrusip avinngaruppaa imalu oqarfigalugu: “Naalagaq, taamatut oqaloqinak. Taamatut pineqar­navianngilatit.” (Mat 16:22) Petrusili Jehovap eqqarsar­taasiatut eqqarsar­taaseqan­nginnami Jiisusi isumaqatiginngilaa.

6. Jiisusi Jehovap eqqarsar­taasiatut eqqarsar­taaseqartoq qanoq erserpa?

⁶ Jiisusip eqqarsartaasia Jehovallu eqqarsartaasia assigiil­luinnarput. Jiisusip Petrusi ima oqarfigaa: “Tununnut pigit, Saatani! Guutitut eqqarsarnak inuttut eqqarsaravit uannut akornutaavutit.” (Mat 16:23) Petrusi ajunngitsumik siunertaqaraluarluni siunnersuivoq, siunnersuutaali tamanna Jiisusip itigartippaa. Nalunngilaami naalliutsitaanissani toqutaanissanilu Jehovap siunertaanut ilaasoq. Petrusip paasivaa Guutip eqqarsartaasia ilikkar­tariaqarlugu. Tamanna uagutsinnut ilinniutissaavoq pingaarutilik: Uaguttaaq Jehovap eqqarsartaasia ilikkar­tariaqarparput.

7. Kingusin­nerusukkut qanoq erserpa Petrusi Jehovap eqqarsar­taasiatut eqqarsar­taaseqarusuttoq? (Asseq takuuk).

⁷ Kingusin­nerusukkut erserpoq Petrusi Jehovap eqqarsar­taasiatut eqqarsar­taaseqarusuttoq. Jehovap juutiun­ngitsut kipineqarsiman­ngitsut innuttaminut ilanngun­neqarnis­saannut piffissarititaa nalliuppoq. Petrusi Korniiliusimut, juutiun­ngitsut kipineqarsiman­ngitsut kristumiun­ngortussat siulliit ilaannut, oqaluus­siartor­tinneqarpoq. Juutilli amerlanerit juutiun­ngitsunut kipineqarsiman­ngitsunut atassuteqarusunneq ajorput, taamaattumik Petrusi eqqarsar­taatsimigut allanngor­tariaqarpoq. Jehovalli juutiun­ngitsunut kipineqan­ngitsunut isiginnittaasia paasigamiuk allamik isiginnit­taaseqalerpoq. Tamatuma kingunerisaanik Petrusi Korniiliusimit aggersar­neqarami ‘nangaanani aggerpoq’. (ApS 10:28, 29) Korniiliusi inoqutaalu oqaluus­siffigai imermullu morsutsillugit. – ApS 10:21-23, 34, 35, 44-48.

8. Jehovap eqqarsar­taasiatut eqqarsar­taaseqarluta qanoq ersersis­sinnaavarput? (Petrusimit 1. 3:8)

⁸ Ukiut arlallit tamatuma kingorna Petrusip kristumioqatini ‘isumakkut ataasioqatigeeq­qullugit’ kajumis­saarpai. (Petrusimit 1. 3:8). Jehovap eqqarsartaasia Biibilip misissor­neratigut paasilluarutsigu uaguttaaq isumakkut ataasioqatigiis­sinnaavugut. Assersuutigalugu Jiisusip malinnitsini oqarfigai Guutip kunngeqarfia inuunerminni salliut­tuassagaat. (Mat 6:33) Tamanna kajumis­sissutigalugu ilagiinni oqaluus­sisartoq piffissaq tamaat kiffartor­tunngor­niarluni aalajangerpat qanoq isumaqarfigis­savarput? Taanna ilorrisimaar­narnerusumik inooriaaseqaq­qullugu siunnersornagu aalajangernera pillugu nersualaar­tariaqarparput tapersersorlugulu.

MANIGUUTTUUGIT

9-10. Jiisusip maniguunnera immikkorluinnaq ittoq qanoq erserpa?

⁹ Jiisusip toqussi aqaguttoq Petrusi apustilinilu allat maniguunneq pillugu pingaarutilimmik ilinniartippai. Siusinnerusukkut Jiisusip toqunngin­nermini naggammik nereqatigiin­nissaminnik Petrusi Johannesilu piareersartippai. Nereqatigiin­nissamut qaaqqusat isigaat asanneqar­niassammata piareersaatit ilagisimassavaat asaffik allarutillu. Kisianni kiap allat isigaat maniguulluni asattussavai?

¹⁰ Jiisusi maniguul­luinnarami suliassamut tamatumunnga nangaanngilaq. Apustilit tupigusuutigisimassavaat Jiisusi inussiap suliarisar­tagaanik suliaqartoq. Qallersaatini peeriarlugit Jiisusi allarummik qitequtserpoq, asaffik imermik immerpaa, kiisalu najuuttut isigaat asattulerlugit. (Joh 13:4, 5) Apustilit aqqaneq-marluk, aamma Juudarsi kingusin­nerusukkut Jiisusimik killuutigin­nuttussaq, najuupput. Taakkua tamaasa isigaasa asattor­nissaat sivisusimassaaq. Taamaattorli Jiisusi maniguulluni taamaaliorpoq. Kingorna Jiisusip ima aperai: “Ilissinnut iliuuserisara paasivisiuk? Ilinniar­titsisuugama Naalagaal­lungalu taama taasarpassinga, tamannalu eqqorpoq. Taamaattumik Naalagaagaluarlunga Ilinniar­titsisuugaluarlungalu isikkassinnik asattuigama aamma ilissi isikkassinnik asattueqatigiissaasi.” – Joh 13:12-14.

11. Petrusip maniguunnermik kingusin­nerusukkut ilikkarsimanera qanoq erserpa? (Petrusimit 1. 5:5 aamma quppernerup ataani ilanngussaq) (Aamma asseq takuuk).

¹¹ Jiisusip maniguunnera Petrusip ilinniarfigaa. Jiisusi qilaliareermat Petrusip angut inunnguutsiminit nukillaarsimasoq tupinnar­tuliornikkut ajorunnaarsippaa. (ApS 1:8, 9; 3:2, 6-8) Soorunami inuppassuit tupinnartuliaq tamanna pissutigalugu Petrusi avatangerpaat. (ApS 3:11) Petrusilli tamanna pingaakujuutiginngilaa. Nuimasumik inissisimaf­feqaler­nissamik pingaar­titsiffiusumi inuugaluarluni maniguuppoq. Jehova Jiisusilu ataqqinaatissippai ima oqarluni: “[Jiisusip] aqqa uagullu aqqanut uppernerput iluaqutigalugit angut una takusarsi ilisarisimasarsilu nukeqalerpoq.” (ApS 3:12-16) Petrusip allakkamini kristumiut ‘maniguunnermik atiseqqullugit’ kajumis­saarinera Jiisusip apustilit isigaannik asaanermini allarummik qitequtser­neranut eqqaanarpoq. – Petrusimit 1. 5:5 aamma quppernerup ataani ilanngussaq atuakkit.

12. Petrusi ilaarlugu maniguunnermik qanoq ineriar­tortitsiuarsin­naavugut?

¹² Maniguunnermik ineriar­tortitsinitsigut Petrusi ilaarsin­naavarput. Eqqaamas­savarpulli maniguunneq oqalunnik­kuinnaq ersersin­neqarneq ajortoq. Oqaaseq Petrusip atugaa ‘maniguunnermik’ nutserneqartoq aamma ‘isumakkut maniguunnermik’ isumaqarsinnaavoq – tassa eqqarsar­taaserput pineqarpoq. Allanit nersorneqar­nissarput kajumis­sissutiginagu Jehova inoqatigullu asagatsigit allanik ikiuisarpugut. Allanit malugineqan­ngikkaluarluta sapinngisatsinnik Jehova qatanngutigullu kiffartuuk­kutsigit ersersit­tarparput maniguulluta. – Mat 6:1-4.

‘ISUMAKKUT PEQQISSUUGIT’

13. ‘Isumakkut peqqissuuneq’ qanoq paasisariaqarpa?

¹³ ‘Isumakkut peqqissuuneq’ qanoq paasisariaqarpa? (Pet 1. 4:7) Kristumiu isumakkut peqqissuuguni Jehovap isumaa aalajanger­nermini eqqumaf­figiuassavaa. Nalunngilaa Jehovamut ikinngutaanini inuunermi pingaar­nerpaasoq. Akueraa nammineq suut tamaasa nalunngis­sinnaanagit. Aamma maniguulluni qinukulasar­nermigut ersersippaa Jehova tatigil­luinnarlugu.

14. Petrusip Jehova qanoq tatigin­ngitsoorpaa?

¹⁴ Jiisusip toqussi aqaguttoq ilinniartitani ima mianersoqquai: “Tamassi unnuaru qimassavassinga.” Petrusili imminut tatigival­laarluni akipallappoq: “Allat tamarmik qimakkaluarpatsit uanga qimanngisaan­nassavakkit!” Unnuaq taanna Jiisusip ilinniartitami ilaat aamma kajumis­saarpai: “Eqqumajuarlusilu qinujuaritsi.” (Mat 26:31, 33, 41) Jiisusip siunnersuutaa tamanna Petrusip siusinnerusukkut maleruanngilaa. Taamaaliorsimagaluaruni Jiisusimit ilinniar­titaaneraanis­saminut sapiissuseqarsimas­sagaluarpoq. Petrusilli Jiisusi nalunerarpaa kingornalu tamanna peqqissimis­sutigil­luinnarlugu. – Mat 26:69-75.

15. Jiisusi unnummi kingullermi nunarsuarmiin­nermini qanoq isumakkut peqqissuujuarpa?

¹⁵ Jiisusip Jehova tatigil­luinnarpaa. Naammal­luinnar­tuugaluarluni qinujuartarpoq. Taamaattumik Jehovap piumasaanut naapertuuttumik iliuuseqar­nissaminut sapiissuseqarsinnaavoq. (Mat 26:39, 42, 44; Joh 18:4, 5) Jiisusip unnummi kingullermi nunarsuarmiin­nermini qinusaqat­taarnera Petrusip qularnan­ngitsumik puiunngisaannarpaa.

16. Petrusip isumakkut peqqissuunermik ineriar­tortitsisimanera qanoq erserpa? (Petrusimit 1. 4:7)

¹⁶ Petrusip Jehovamut qinusarnerup pingaaruteqassusia ilikkarpaa. Petrusi apustilillu allat nutaarsiassanik nuannersunik oqaluus­sisinnaanias­sammata Jiisusip makititaanermi kingorna neriorsorpai anersaamik illernartumik tuniumallugit. Aammali peqquai tamatuma pinissaata tungaanut Jerusalem­mimiigin­nassasut. (Luk 24:49; ApS 1:4, 5) Utaqqitilluni Petrusi sua? Kristumioqatinilu “qinujuarput”. (ApS 1:13, 14) Kingusin­nerusukkut Petrusip allakkamini siullermi kristumioqatini kaammattorpai isumakkut peqqissooq­qullugit qinusar­nissartillu eqqumaf­figiuaq­qullugu. (Petrusimit 1. 4:7 atuaruk). Petrusip Jehovamik tatiginninneq ilikkarpaa ilagiinnilu sukatut isigineqalerluni. – Gal 2:9.

17. Qanorluunniit piginnaaneqaraluarutta qanoq iliortuar­tariaqarpugut? (Aamma asseq takuuk).

¹⁷ Isumakkut peqqissuujumalluta Jehovamut qinukulasariaqarpugut. Qanorluunniit piginnaaneqaraluarutta Jehovamut ikioqqusarnissaq pisariaqar­tilluin­narparput. Ingammik pingaarutilimmik aalajangigas­saqaraangatta Jehovamut siulersoq­qulluta qinusarpugut upperalugu taassuma nalunngikkaa suna uagutsinnut pitsaanerpaajunersoq.

18. Sunissat aalajangiusimaviuk?

¹⁸ Jehovap pissusiinik ilaarsisin­naatilluta pinngor­titaagatta qujamasoqaagut. (Mos 1. 1:26) Soorunami Jehova ilaarluin­narsinnaan­ngilarput. (Es 55:9) Taamaattorli Petrusip pisimaneratut Guutip eqqarsartaasia ilikkarsin­naavarput, maniguut­tuusinnaavugut isumakkullu peqqissuusin­naalluta. Qanortoq taamaalior­nitsigut Jehovap eqqarsar­taasiatut eqqarsar­taaseqarisa.