Upperisat malillugu aalajangiisarit

1. Sooq Paulusip kingumut qiviarluni inuunini nalerisimaarutigisinnaavaa?

PAULUSIP nalunngilaa toqutaasus­saalluni, taamaattorli kingumut qiviarluni inuunermi nalerisimaarutiginissaanut pissutis­saqarluarpoq. Ima oqarpoq: “Arpaliunneq naammassivara, uppertuarsimavunga.” (Tim 2. 4:6-8) Paulusi aalajangiil­luartarsimavoq, qularin­ngilluin­narpaalu Jehovamit iluarineqarluni. Uaguttaaq inuunitsinni Jehovap akuerisin­naasaanik aalajangeerusut­tarpugut. Qanoq taamaaliorsin­naavugut?

2. Upperisaq malillugu inuuneq qanoq paasisariaqarpa?

² Paulusi imminut pilluni kristumioqatinilu aalajaatsut pillugit ima allappoq: ‘Takusagut malinnagit upperisarput malillugu inuuvugut.’ (Kor 2. 5:7) Qanoq isumaqarami? Inuk ‘upperisani malillugu inuusoq’ Jehovamit siulersortippoq. Jehovamik tatigin­ninnini malillugu aalajangiisarpoq. Iliuutsimigut ersersittarpaa qularinagu Jehovap akissarsisis­sagaani Jehovallu siunnersuutai Biibilimiittut maleruaraanni pitsaanerpaajuaannartoq. (Tuss 119:66; Hebr 11:6) Akerlianilli takusani malillugit inuusup takusani, tusakkani misigis­sutsinilu kisiisa naapertorlugit, tassa nammineq isiginnit­taatsini kisiat tunngavigalugu, aalajangiisarpoq.

3. Upperisarput malillugu inuugutta qanoq iluaqutigis­savarput? (Korintimiunut 2. 4:18)

³ Soorunami tamatta ilaanneeriarluta misigis­sutsigut malugisin­naasagullu malillugit aalajangiisarpugut. Pingaarutilinnilli aalajangigas­saqartilluta taakkuinnaat malikkutsigit ajornar­torsiulersin­naavugut. Sooq taamaappa? Takusin­naasagut tusakkagullu tatiginar­tuaannan­ngimmata. Tatiginarpasik­kaluarpataluunniit takusin­naasagut kisiisa malillugit inuugutta Jehovap iluarin­ngisaanik iliuuseqar­toorsin­naavugut. (Oqal 11:9; Mat 24:37-39) Upperisarpulli malillugu inuugutta Jehovap iluarisaanik aalajangiisin­naassaagut. (Ef 5:10) Jehovap siunnersuutai maleruaraangatsigit qamuuna eqqissineq misigisarparput pillualivillutalu. (Tuss 16:8, 9; Es 48:17, 18) Taamaalior­tuaruttalu naassaan­ngitsumik inuuneqalersin­naavugut. – Korintimiunut 2. 4:18 atuaruk.

4. Qanoq paasisin­naavarput takusagut malillugit upperisarpul­luunniit malillugu inuunerluta?

⁴ Qanoq paasisin­naavarput takusagut malillugit upperisarpul­luunniit malillugu inuunerluta? Apeqqutit uku eqqarsaatigisariaqarpagut: Aalajangiigaangama suna malittarpara? Takusin­naasakka kisiisa malillugit aalajangiisarpunga? Jehovamil­luunniit tatigin­nillunga maleruaqqusai maleruar­tarpakka? Pingaarutilinnut pingasunut ukununnga tunngatillugu upperisarput malillugu qanoq inuusin­naanersugut misissoriartigu: Suliffimmik aappassamil­luunniit toqqaas­sagaanni Guutillu peqatigiis­sortaanit ilitsersuuteqaraangat. Taakkua pingasut sammineranni aalajangiil­luarumalluta eqqarsaatigisassat eqqartus­savagut.

SULIFFISSAMIK TOQQAANEQ

5. Suliffissamik toqqaaniaraanni suna eqqarsaatigineqar­tariaqarpa?

⁵ Soorunami tamatta immitsinnut ilaquttatsinnillu pilersuil­luarusuppugut. (Oqal 7:12, Testamentitoqaq 1990-imi naqitigaq; Tim 1. 5:8) Suliffiit ilaat akissarsiaris­saarfiupput. Aningaarsar­tuutinut matussusiil­luarsin­naapput sipaarutis­saqarnerulersitsil­lutillu. Suliffiit allat aningaasarsiorluarfiuval­laanngillat aningaasarsiallu pisariaqavis­sunuinnaq matussusiisin­naallutik. Pissusis­samisoorluinnarpoq suliffis­sarsiornermi aningaasarsiornerup qanoq annertutiginissaa eqqarsaatigis­sallugu. Tamannaannarli malillugu aalajangiigaanni isigisat kisiisa malillugit inuunermut ersiutaavoq.

6. Suliffimmik toqqaas­sagaangatta qanoq upperisarput malillugu inuusin­naavugut? (Hebræerit 13:5)

⁶ Upperisarput malillugu inuugutta eqqarsaatigis­savarputtaaq suliffik Jehovamik ikinnguteqar­nitsinnut qanoq sunniuteqarsin­naanersoq. Uku eqqarsaatigisin­naavagut: ‘Suliffik taanna toqqarukku Jehovap iluarin­ngisaanik suliaqar­nissannik piumaffigineqassaanga?’ (Uss 6:16-19) ‘Oqaluus­sisarnissamut namminerlu atuaqqis­saarnissamut piffissakin­nerulissaanga? Ataatsimiigiar­tarnissannut akornutaassava? Piffissami sivisuumi ilaquttakka qimaqqasariaqar­tassavakka?’ (Flp 1:10) Apeqqutit taakkua arlaat angissagukku pitsaanerussaaq taanna suliffit­taarinngikkukku, allamik suliffit­taarnissaq ajornaraluarpal­luunniit. Upperisarput malillugu inuugaangatta aalajangiinitsigut ersersit­tarparput upperil­luinnarlugu Jehova pisariaqar­titatsinnik isumagin­nikkumaartoq. – Mat 6:33; Hebræerit 13:5 atuaruk.

7-8. Javier qanoq upperisani malillugu aalajangiussiva? (Aamma asseq takuuk).

⁷ Javier,a Amerika Kujallermioq, upperisani malillugu aalajangiinermigut maligas­saalluarpoq. Ima oqaluttuarpoq: “Suliffeqarfinni annertunerusumik akissusaaf­feqarusulerama atorfimmik akissarsiarisar­takkannik marloriaammik annertunerulersitsisumik qinnuteqarpunga.” Javierilli pionerin­ngornissani kissaatigeqaa aamma. Nangilluni ima oqarpoq: “Suliffeqarfimmut qaaqquneqarsimavunga naalagaanersat ilaannit oqaloqatigineqarumallunga. Oqaloqateqan­nginninni Jehovamut ikioqqullunga qinuvunga, taassumami nalunngin­nerpaammagu uannut suna pitsaanerpaajussasoq. Akissarsiaris­saarnartumik qaffasis­sumillu suliffit­taarusus­simavunga, anersaakkulli anguniakkannut akornutaappat suliffit­taarerusun­ngilara.”

⁸ Javier nangippoq: “Oqaloqatigiin­nitsinni paasivara qaangiut­tooqattaar­tassallunga. Inussiar­nersumik nassuiaappara taamaaliorsin­naananga upperisannut piffissangaatsiaq atortarakku.” Javierillu suliffik itigartippaa. Sapaatit-akunneri marluk qaangiummata pioneritut kiffartulerpoq. Ukiorlu taanna ullup affaanik suliffit­taarpoq. Ima oqarpoq: “Jehovap qinnutikka tusarpai pioneritullu kiffartor­nissannut tulluarluin­nartumik suliffit­taartillunga. Nuannaarutigeqaara Jehovamut kiffartorninnut qatanngutinnillu ikiuussin­naanissannut piffissaqarluar­titsisumik suliffeqarama.”

9. Trésorip misigisaa qanoq ilinniarfigaajuk?

⁹ Taavami paasigutsigu suliffipput Jehovamut qanittuar­nissatsinnut akornutaasoq? Trésorip Congomeersup tamanna misigaa. Ima oqarpoq: “Suliffittaara periarfis­sagissaaqaaq taamalu ittumik nassaariaan­naanani. Pingasoriaammik aningaasarsiakka qaffapput qummullu isigineqalerlunga.” Trésorili suliffimmini qaangiut­tuukulagami ataatsimiigian­ngitsoortarpoq. Aamma suliffeqarfimmi peqquserlut­tuliornerit paasineqan­nginnias­sammata sallulior­tinniarsarineqartarpoq. Suliunnaarusuk­kaluarpoq suliffeerun­nissanili annilaan­ngatigalugu. Suna iluaqutigaa? Oqarpoq: “Habakkuki 3:17-19 allassimasunit paasivara isertitaaruk­kaluarumaluunniit Jehovap arlaatigut isumagiumaaraanga. Uannullu soraarsippunga.” Nangipporlu: “Sulisitsisorpassuit isumaqartarput inuit akissarsiak­kaajunertik pingaar­nerutillugu sumilluunniit – allaat ilaquttaminnut Guutimullu attaveqar­nerminnik – pilliuteqariaannaasut. Nuannaarutigeqaara Jehovamut ilaquttannullu attaveqarnikka salliutikkakkit. Ukiorlu ataaseq qaangiummat Jehovap ikiorpaanga suliffit­taartillunga, taamaalil­lungalu imminut pilersorsin­naalerlungalu Jehovamut kiffartor­nissamut piffissaqar­nerulerpunga. Jehova salliutik­kaangatsigu imaassinnaavoq aningaasakil­liorsin­naasartugut, isumassus­saaqqaarpaatigulli.” Aap, Jehovap siunnersuutai neriorsuutaalu tatigigutsigit upperisarput malillugu aalajangiissaagut, pilluaq­qussavaatigullu.

KINA KATIKKUSUS­SANERLUGU AALAJANGIIS­SAGAANNI

10. Aappassamik toqqaaniarnermi takuneqarsinnaasut malillugit qanoq aalajangiisoor­toqarsinnaava?

¹⁰ Aappariinneq Jehovamit tunissutaavoq, katikkusunnerlu pissusis­samisoorluinnarpoq. Katikkusulluni eqqarsaasersortup immaqa maluginiartarpai uppeqatimi katikkusutami kinaassusia, isikkua, tusaamaneqaataa, aningaasatigut inissisimanera, ilaqutariinni akisussaaffii qanorlu misigis­suseqalersit­tarneraani. Taakku tamarmik pingaaruteqarput. Taakkuinnaalli eqqarsaasersorfigigunigit isigisani malillugu aalajangiisoorsinnaavoq.

11. Aappassarsiornermi qanoq upperisaq malillugu aalajangiisoqarsinnaava? (Korintimiunut 1. 7:39)

¹¹ Katikkusukkaanni qanoq upperisaq malillugu aalajangiisoqarsinnaava? Assersuutigalugu peerariileraanni inuusup­paallaan­nginnissaq pillugu siunnersuutip maleruar­neratigut. (Kor 1. 7:36) Uiulluartup nuliaal­luartullu qanoq ittuusariaqar­nissaannik Jehovap maleruaqqusai pingaar­titaalu tunngavigalugit aapparerusutap nalilersor­neqarnissaa pingaaruteqarpoq. (Uss 31:10-13, 26-28; Ef 5:33; Tim 1. 5:8) Jehovamut kiffaan­ngitsoq qaninniakujulerpat ‘taamaallaat Naalakkamut kiffartortumut katinnissaq’ pillugu peqqussut eqqaamaneqar­tariaqarpoq. (Korintimiunut 1. 7:39 atuaruk). Jehovap nalunngin­nerpaavaa uagutsinnut suna pitsaanerpaasoq, misigis­sutsikkullu pisariaqar­titatsinnik isumassuisin­naanera tatigisin­naavarput. (Tuss 55:23) Qatanngutitta aalajaallutik tamatumunnga tunngatillugu Biibilimi peqqussutit malikkaangatigit Jehovap tulluusimaarutigisarsimassaqai nuannaarutigingaarlugillu!

12. Rosa qanoq ilinniarfigisin­naavarput?

¹² Rosa Colombiami pioneriusoq ilinniarfigil­luarsin­naavarput. Suliffimmini angummit qaninniarfigineqarpoq, Rosallu angut taanna nuannarisorujussuuaa. Oqarpoq: “Pitsaarpasingaarami. Nammineq kajumis­sutsiminik illoqarfimmini iliuuseqartarpoq ileqqupalaaqaranilu peqqinnartumik inooriaaseqarluni. Ajunngitsumik piuaannarpaanga. Tassa taanna ujagara, kisiannili Jehovamik Nalunaajaasuunngilaq.” Ima nangippoq: “Itigartinnissaa artornar­teqaara, ilami taanna kajungilerfigigaluarakku. Tamatuma nalaani kiserliorlunga misigisimavunga. Katikkusuk­kaluaqaangalu Jehovamulli kiffartortumik nassaarsin­naananga.” Rosalli isigisani kisiisa malinngilai. Eqqarsaatigeq­qissaarpaa aalajangikkani Jehovamik ikinnguteqar­nerminut qanoq sunniuteqarsin­naanersoq. Angut taanna attaveqarfigiun­naarpaa Jehovamullu kiffartornini aallunnerulerlugu. Kingusin­nerulaartukkut Kristumiunut Oqaluus­sisartunut Ilinniarfimmut qaaqquneqarpoq maannalu specialpioneriulluni. Rosa oqarpoq: “Jehovap qamannga nuannaangaarnermik tunivaanga.” Immaqa upperisarput malillugu inuunerput oqitsuinnaaneq ajorpoq, ingammik misigissutsit sakkortuut pineqaraangata. Uagutsinnulli pitsaanerpaajuaannarpoq.

PEQATIGIIS­SORTANIT ILITSERSUUTEQARAANGAT

13. Takusagut malillugit inuugutta ilitsersor­neqaraangatta qanoq qisuariar­toortarsin­naavugut?

¹³ Peqatigiis­sortatsinniit ilitsersor­neqakulasarpugut – utoqqaanertanit, nakkutil­liisunit angalasartunit, immikkoor­tortaqarfimmiit Siulersuisoqatigiinnillu. Taavami ilaannikkut sooq siunnersor­neqarnerluta paasiuminaatsit­tarutigu? Immaqa qularilersin­naavarput siunnersuutit uagutsinnut ajunnginnersut. Allaat immaqa qatanngutit ilitsersuisut naammal­luinnan­ngissutaat kisiisa isiginiar­nerulersoorsin­naavagut.

14. Peqatigiis­sortanit ilitsersuuteqaraangat upperisarput malillugu inuunis­satsinnut suna iluaqutigis­savarput? (Hebræerit 13:17)

¹⁴ Upperisarput malillugu inuugutta upperil­luinnarparput Jehova peqatigiis­sortaminik aqutsisuusoq pissutsillu tamaasa ilisimagai. Taamaattumik ilitsersuutit maleruapal­lattarpagut ajunngitsumik isiginnit­taaseqarluta. (Hebræerit 13:17 atuaruk). Nalunngilarput naalannerput ilagiinni ataasioqatigiin­nerulersitsartoq. (Ef 4:2, 3) Soorunami qatanngutit angutit siulersuisut naammal­luinnan­ngitsuupput, tatigaarpulli Jehovap pilluaq­qujumaaraatigut naalakkutta. (Sam 1. 15:22) Ilitsersuutillu ilumut aaqqinneqar­tariaqarpata qularin­ngilarput Jehovap piffissaq eqqorlugu isumagiumaaraa. – Mika 7:7.

15-16. Qatanngutip angutip ilitsersuut qularigaluarlugu maleruar­nissaanut suna iluaqutigaa? (Aamma asseq takuuk).

¹⁵ Misigisap uuma takutippaa qanoq pitsaatigisoq upperluni ilitsersuummik malinnikkaanni. Perumiut amerlanerit Spaniamiutut oqaluttarput, nunalli inoqqaavisut aamma oqaluttoqartarpoq, soorlu quechuatut. Ukiuni arlalinni uppeqatitta quechuatut oqaasillit oqaluus­siffiginiarlugit ujartarpaat. Oqartus­saasulli inatsisiliaat nutaat maleruarumallugit ujarleriaatsimik allannguisimapput. (Rom 13:1) Tamatumalu kingunerisaanik qatanngutitta ilaasa isumakuluutigilerpaat quechuatut oqaasillit nassaariuminaal­lissasut. Ilitsersuut maleruaramikku Jehovamit pilluaq­quneqarput quechuatullu oqaasillit amerlasuut nassaaralugit.

¹⁶ Ilitsersuummik nutaamik isumakuluuteqartut ilagaat Kevin, ilagiinni quechuatut oqaasilinni utoqqaanertaasoq. Ima oqaluttuarpoq: “Ilitsersuut tusarakku eqqarsarpunga: ‘Qanormi ililluta quechuatut oqaasillit nassaarilersin­naassagatsigit?’” Kevinip suna iluaqutigaa? Ima nangippoq: “Ussatit 3:5-imi allassimasut eqqarsaatigaakka. Moorsisilu eqqaavara. Taanna Jehovamit peqquneqarpoq Israalikkut Egyptenimiit aniguisis­sallugit Immamullu Aappalaartumut siulersus­sallugit. Tassanilu qimaariarfis­saaruppasillutik Egyptenimiunit saassun­neqarian­naarpasipput. Tupinnaan­nartumillu Moorsisip naalannera Jehovamit pilluaq­quneqarpoq.” (Mos 2. 14:1, 2, 9-11, 21, 22) Kevinip ilitsersuut nutaaq kajumilluni maleruarpaa. Qanoq kinguneqartoq ima oqaluttuaraa: “Jehovap pilluaq­qusinera tupinnaqaaq. Siornatigut sivisuumik oqaluus­sinermi pisuttariaqar­tarpugut quechuatut oqaasillit ataasiinnaq marlulluunniit nassaarisarlutigit. Maannali sumiiffinni quechuatut oqaasillit amerlasuut najugaqarfiini oqaluus­sinerusalerpugut. Tamatumalu kingunerisaanik oqaloqatigisar­takkagut, pulaaqqit­takkagut Biibilimillu misissueqatigisar­takkagut amerlipput. Ataatsimiin­nitsinnullu takkuttartut amerleriarput.” Aap, upperisarput malillugu inuugutta Jehovap pilluaq­qujuassavaatigut.

17. Allaaserisaq qanoq ilinniarfigaajuk?

¹⁷ Pingaarutilitsigut pingasutigut upperisarput malillugu qanoq inuusin­naanersugut sammereerparput. Inuunitsinnili sutigut tamatigut upperisarput malillugu inuussaagut, soorlu ukununnga tunngatillugu aalajangigas­saqartilluta: Aliikkutassat, sunngiffimmi sukisaarsarnerit, ilinniagaqarneq meeqqamillu perorsaaneq. Qanorluunniit aalajangiis­sagaluarutta takusagut kisiisa pinnagit Jehovamut attaveqarnerput, taassuma siunnersuutai isumagiumallutalu neriorsuutaa tunngavigis­savagut. Taamaalior­tarutta Jehovap ‘Guutitta aqqani naassaan­ngilluin­nartumik inuujuarsin­naassaagut’. – Mika 4:5.