Qularis­sanngilat Jehovap tuppallersarsin­naagaatit

1. Juutit Babylonnimut aallarus­saaqqasut atugaat qanoq ippat?

JUUTIT Babylonnimut aallarussat qanoq misigisimas­sanersut takorlooriaruk. Nunagisartik piuneerun­neqartoq takusimavaat. Ajortuliatik siuaasamillu ajortuliaat pissutigalugit tigusaallutik nunamut allamut aallarus­saasimapput. (Nal 2. 36:15, 16, 20, 21) Babylonnimi allatulli inuusin­naapput. (Jer 29:4-7) Taamaak­kaluartorli inuunerat imaannaan­ngitsuusimassaaq, namminnerlu aalajangersin­naasimasuugunikku Babylon­nimiissimanavian­ngikkaluarput. Qanoq misigippat? Taakkua ilaat qanoq allattoq maluginiaruk: “Babylonip kuussuisa killingini issiasimavugut qialluta Zioni eqqarsaatigigaangatsigu.” (Tuss 137:1) Juutit tuppallersar­neqartariaqartut kimit tuppallersar­neqassappat?

2-3. (a) Jehovap juutit Babylon­nimiittut qanoq ikiorpai? (b) Allaaserisami matumani suut sammissavagut?

² Jehova Guutiuvoq “sutigut tamatigut tuppallersaasoq”. (Kor 2. 1:3) Jehovap kiffani asagamigit tuppallersarusuppai. Nalunngilaa juutit Babylonnimut aallarussat ilaasa ajortuliatik peqqissimis­sutigissagaat uterfigis­sagaannilu. (Es 59:20) Aallarus­saanissaat ukiunik 100-nit amerlanerusunik sioqqullugu Jehovap pruffiiti Esaja isumassarsisillugu oqariar­tuummik allatsippaa. Juutit Esajap allagai qanoq iluaqutigissavaat? Pruffiiti ima allappoq: “Tuppallersarsigit innuttakka, tuppallersarsigit! oqarpoq Guutersi.” (Es 40:1) Aap, pruffiitimi allagai aqqutigalugit Jehovap innuttani pisariaqar­tilluin­nagaannik tuppallersarlugillu nakussatsippai.

³ Juutit aallarussat assigalugit ilaannikkut tuppallersar­neqarnis­satsinnik pisariaqar­titsisarsin­naavugut. Allaaserisami matumani eqqartus­savarput Jehovap juutit pingasutigut tuppallersarai: (1) Peqqissimisut isumakkeerfigiumallugit neriorsorpai, (2) innuttani neriuutissippai, aamma (3) annilaanganeranni eqqissisarpai. Taakku sammitillugit Jehovap nalitsinni taamatorpiaq tuppallersar­taraatigut maluginiaruk.

JEHOVAP NALLITTUILLUNI ISUMAKKEERFIGISARPAATIGUT

4. Jehovap qanoq ersersippaa Guutiulluni nallittuisoq? (Esaja 55:7)

⁴ Jehova ‘Ataataavoq qamannga pisumik nallittuisoq’. (Kor 2. 1:3) Tamanna ersersippaa Esaja aqqutigalugu juutit imminut utertut neriorsoramigit isumakkeerfiginiarlugit. (Esaja 55:7 atuaruk). Ima oqarpoq: “Soraajuitsumik asannis­suseqarlunga nallittorpakkit.” (Es 54:8, Testamentitoqaq 1990-imi naqitigaq) Qanoq nallittorumaarpai? Juutit inuiattut iliuutsimik kinguneri naammagalugit atortariaqarpaat, Jehovalli neriorsorpai naassaan­ngitsumik Babylon­nimiigin­narnavian­ngitsut. (Es 40:2) Jehovamut kiffartorusuttut tamanna eqqissial­laatigalugu tuppallersaatigisimassavaat!

5. Sooq Jehovap isumakkeerfigin­ninnerata tatiginissaanut juutinit pissutis­saqarluar­neruvugut?

⁵ Suna ilikkarparput? Jehovap kiffani isumakkeerfigil­luinnarusuppai. Uagut tamatuma tatiginissaanut juutinit Babylon­nimiittunit pissutis­saqarluar­neruvugut. Sooq? Ajortuliatsinnik isumakkeerfigisin­naajumalluta Jehova qanoq iliorsimasoq nalunngin­natsigu. Esajap siulittuinerata kingorna ukiut 700-t missaat qaangiuttut Jehovap ernini asasani nunarsuarmut aallartippaa. Jiisusi uagut pilluta toqummat Jehovap ajortuliagut piiarlugit isumakkeerfigil­luinnarsin­naavaatigut. (ApS 3:19; Es 1:18; Ef 1:7) Guuti kiffartorfigisarput nallittuingaarami!

6. Sooq Jehovap isumakkeerfigin­ninnerata eqqarsaatiginera tuppallernarpa? (Aamma asseq takuuk).

⁶ Siornatigut ajortuliarisimasagut peqqissimis­sutigereeraluarlugit ilerasuutigiuarutsigit Esaja 55:7-mi Jehovap oqariartuutaa tuppallersaatigisin­naavarput. Immaqa iliuutsitta kinguneri naammagalugit atoratsigit suli pisuusutut misiginermik artorsaateqarpugut. Ajortuliagulli nassuerutigereerutsigit eqqunngitsulior­tarunnaarlutalu qularis­sanngilarput Jehovamit isumakkeerfigineqarluta. Jehovalu isumakkerfigin­nikkaangami aalajangertarpoq ajortuliagut eqqaaqqin­niarnagit. (Aamma takuuk Jeremia 31:34). Jehovap kukkussutigut puiormagit uaguttaaq puiorniarsaris­savagut. Kukkussutigisimasagut pinnagit Jehovap maanna iliuutsigut pingaartippai. (Ez 33:14-16) Ungasin­ngitsukkullu Ataatatta qamannga pisumik nallittuisuusup kukkunitta kingunerisa anniaatigineri peerluin­nassavai.

7. Ingasattumik ajortuliorsimagutta utoqqaanertat oqaloqatiginis­saannut suna kajumis­sissutigisin­naavarput?

⁷ Ingasattumik ajortuliarisimasarput allanut isertugarput ilerasuutigigutsigu qanoq iliussaagut? Biibilimi kajumis­saarneqarpugut utoqqaanertanut ikioqqus­sasugut. (Jaak 5:14, 15) Immaqa iliuutsitta nassuerutiginissaa sapernar­tissinnaavarput. Eqqaamas­savarpulli Jehovap angutillu uagutsinnik ikiuisussatut toqqagaasa asannillutik nallittorusuk­kaatigut. Tamanna eqqaamagutsigu ajortuliagullu peqqissimis­sutigigutsigit utoqqaanertat oqaloqatigerusus­savagut. Qatanngutip angutip Arthurimik atillipa pisuusutut misiginermik artorsaateqartup Jehovap nallittuinera qanoq tuppallersaatigigaa eqqarsaatigiuk. Ima oqaluttuarpoq: “Ukiup ataatsip missaani pornografiimik isiginnaar­tarpunga. Kisianni nalunngeqatiginnissut pillugu oqalugiaat tusarnaareerlugu ajortuliara nuliannut utoqqaaner­tanullu nassuerutigaara. Taamaaliorama kiisami oqilial­lappunga, sulili imminut pakatsiseq­qavunga. Utoqqaanertat eqqaasip­paannga Jehovap suli ikinngutigerusukkaanga. Asagamisigut perorsaatis­sittarpaatigut. Utoqqaanertat asannittut oqaasii tuppallersaatigaakka nuanniitsunillu eqqarsaateqarun­naarlunga.” Arthur maanna pioneriullunilu ilagiinni kiffartortuuvoq. Ajortuliagut peqqissimis­sutigigutsigit Jehovap nallittorumaaraatigut nalunagu tuppallernaqaaq!

JEHOVAP NERIUUTIS­SIPPAATIGUT

8. (a) Jehovap juutit aallarus­saaqqasut sumik neriuutissippai? (b) Esaja 40:29-31 naapertorlugit juutit peqqissimisut neriuutis­sinneqaramik qanoq misigisimassappat?

⁸ Pissutsinut juutit atugaannut tunngatillugu neriunar­toqarpasinngilaq. Babylon­nimiummi tigusaminnik iperaan­ngisaan­nartarmata juutit nunaminnut uternissaat ajornarpasis­sinnaavoq. (Es 14:17) Jehovalli innuttani neriuutissippai. Neriorsorpai iperagaajumaartut nunaminnullu uterumaartut. Jehovallu sunaluunniit unissutigineq ajorpaa. (Es 44:26; 55:12) Jehovap isaani Babylonni pujoralaan­nannguatut ippoq. (Es 40:15) Pujoralak supigaanni teqqalasarpoq. Neriuut tamanna juutinut qanoq sunniuteqarsinnaava? Tuppallersaatigiin­narnagu aamma allatut iluaqutigissavaat. Esaja allappoq ‘Jehovamik neriuffiginnittut nutaanik nukinissasut’. (Esaja 40:29-31 atuakkit). Aap, neriuut nakussatsis­sutigalugu ‘nattoralittut sulunissapput’.

9. Jehovap neriorsuutaasa upperinis­saannut juutit sumik pissutis­saqarpat?

⁹ Jehovap juutit neriorsuumminik upperin­ninnissaannut pissutis­saqartippai. Siulittuutit eqquutereersimasut eqqarsaatigikkit. Nalunngilaat Assyriamiut naalagaaffik avannarleq Israali ajugaaf­figalugu innuttai aallarun­nikuugaat. (Es 8:4) Babylonnimiut Jerusalemmi piuneerukkaat takusimavaat innuttaasullu Babylonnimut aallarun­neqartut. (Es 39:5-7) Nalunngilaat kunngi Sidkija isaarneqarsimasoq Babylon­nimullu aallarus­saasimasoq. (Jer 39:7; Ez 12:12, 13) Jehovap siulittuutigisimasai tamarmik eqquussimapput. (Es 42:9; 46:10) Tamanna iperagaanissaq pillugu Jehovap neriorsuutaata eqquukkumaar­neranik upperin­ninnerminnut nakussatsis­sutigisimassavaat!

10. Ulluni kingullerni makkunani qanoq iliorutta neriuuterput nakussatsis­sinnaavarput?

¹⁰ Suna ilikkarparput? Nikallungagaangatta siunissamut neriuuterput tuppallersaatigalugulu nakussatsis­sutigisarsin­naavarput. Pissutsini anigoruminaatsuni inuuvugut, Guutimullu akeraasut pissaanillit akerlilersor­tarpaatigut. Taamaattorli nikalluis­sanngilagut. Jehovap Paratiisissami toqqissisimaf­fiusumi naassaan­ngitsumik inuunissamik neriuuteqar­tippaatigut. Neriuutip tamatuma eqqarsaatigisarnissaa uummammiugiuar­nissaalu pingaaruteqarpoq. Taamaaliun­ngikkutta neriuuterput tassaalersin­naavorlusooq isikkivik alianaatsoq igalaakkut ipertuukkut itsuartugarput. “Igalaaq qanoq qillaris­sarsinnaavarput”, tassa neriuuterput qanoq ersaris­sisinnaavarput? Paratiisissami inuuneq qanoq nuanner­tigissanersoq takorloor­tassavarput. Allaaserisat, videut erinarsuutillu neriuutitsinnut tunngasut iluaqutigisarsin­naavagut. Aamma Jehova qinunikkut oqaluttuut­tarsinnaavarput suut qilanaarinerlugit.

11. Qatanngut arnaq anigorsin­naanngisaminik nappaatilik qanoq pissatsippa?

¹¹ Qatanngutip arnap Joyimik atillip anigorsin­naanngisaminik nappaatillip neriuut tuppallersaatigalugulu nakussatsis­sutigaa. Maluginiaruk qanoq oqaluttuartoq: “Qanoq iliuusis­saaruttutut misigigaangama misigis­sutsikka tamaasa Jehovamut oqaluttuarisarpakka, nalunngilaralu paasisaraanga. Jehovallu ‘pissaanermik nalingin­naanngitsumik’ tunisarpaanga.” (Kor 2. 4:7) Joyip aamma paratiisimi inuulluni takorloortarpaa, tassanimi ‘kinaluunniit oqarnavianngilaq “Napparsimavunga!”’ (Es 33:24) Aamma uagut uummammiugisagut tamaasa Jehovamut qinunikkut oqaatigisarutsigit neriuuterpullu eqqarsaatiginerugutsigu pissatsis­sinnaavugut.

12. Jehovap neriorsuutaasa upperinis­saannut sunik pissutis­saqarpugut? (Aamma asseq takuuk).

¹² Juutit aallarus­saaqqasut assigalugit Jehovap neriorsuutaanik upperin­ninnissamut pissutis­saqarluarpugut. Siulittuutit eqquuttut takusar­takkagut eqqarsaatigikkit. Assersuutigalugu nunarsuarmi naalagaaf­fissuaq pissaaneqangaartoq ‘ilaatigut qajannaatsuusoq ilaatigullu qajannar­tuulluni’ takuarput. (Dan 2:42, 43) Aamma ‘sumiiffinni assigiin­ngitsuni nuna sajuttarpoq’, ‘inuiaqatigiinnullu tamanut’ oqaluus­sisarpugut. (Mat 24:7, 14) Siulittuutit taakku allarpassuillu eqquussormata upperil­luinnarparput aamma Jehovap siunissamut neriorsuutai eqquukkumaartut.

JEHOVAP ANNILAANGANITSINNI EQQISSISAR­TARPAATIGUT

13. (a) Juutit aniguisitaangajalernermik nalaani qanoq imaannaan­ngitsorsiussappat? (b) Jehovap juutit qanoq tuppallersarpai? (Esaja 41:10-13)

¹³ Jehovap juutit Babylon­nimiittut aniguisitaanis­saannik neriuutissippai. Aniguisitaanis­samilli nalliutingajalernerata nalaani imaannaan­ngitsorsiussasut nalunngilaa. Siulittuutigaa kunngip pissaanilissuup inuiaat eqqaamiuusut saassutissagai tiguarlugillu taavalu Babylonni saassutissagaa. (Es 41:2-5) Juutit ernumas­sutissaqarpat? Ukiorpassuit tamatuma siornatigut innuttami eqqissis­sutigisaannik Jehova ima oqarsimavoq: “Siooraqinak ilagigakkit, erseqinak, uangaagama illit Guutit.” (Esaja 41:10-13 atuakkit). Qanoq isumaqarpa oqarami “uangaagama illit Guutit”? Imaanngilaq eqqaasinniarai guutisiorfigis­sagaanni, tamannami nalunngereerpaat. Eqqaasippaali suli najorlugit. – Tuss 118:6.

14. Jehovap juutit aamma qanoq eqqissisarpai?

¹⁴ Jehovap juutit aamma eqqissisarpai eqqaasillugit killeqan­ngitsumik pissaaneqarluni aamma suut tamaasa ilisimallugit. Qilammut qiviaqquai. Eqqaasippai ullorissat tamaasa pinngor­tissimallugit allaallu tamaasa immikkut atiisigut taasarlugit. (Es 40:25-28) Taavami kiffami atii tamaasa ilisimal­luarsimassavai! Jehovalu ullorissanik pinngor­titsinissamut pissaaneqarami aamma kiffaminik ikiuisinnaavoq. Aap, juutit aallarus­saaqqasut siooranissamut pissutis­saqanngillat.

15. Pisussanut tunngatillugu Guutip juutit qanoq piareersarpai?

¹⁵ Jehovap aamma innuttani pisussanut piareersarpai. Esajap allagaani Guutip innuttani ima paasitippai: “Ininnguassinnut toqqoritsi matuilu matullugit; toqqorsimalaar­niarallaritsi Naalakkap kamannera qaangiutserlugu.” (Es 26:20) Babylonni kunngimit Kyrosimit saassun­neqarmat oqaatsit taakku eqquuteq­qaarunarput. Grækerit oqaluttuarisaanerannik ilisimatusartoq oqarpoq Kyrosip Babylonni tiguaramiuk sakkutuuni peqqusimagai kinaluunniit silamiittoq toqussagaat. Babylonnimiut qanoq annilaangatigisimas­sanersut takorlooruk! Juutilli Jehovap ilitsersuus­sutaanut naalakkamik asattuun­neqarsimagunarput.

16. Sooq annikil­liornar­tussarsuup nalaani pisussat annilaan­ngatigis­sanngilagut? (Aamma asseq takuuk).

¹⁶ Suna ilikkarparput? Annikil­liornar­tussarsuaq nalliutingajalerpoq. Inuit oqaluttuarisaaneranni annikil­liornartuni annerpaaq aallartippat inuit paatsiveerutissapput annilaangal­lutillu. Jehovalli kiffai taamaan­navianngillat. Nalunngilarpummi Jehova Guutigalugu. ‘Aniguisitaangajaleratta’ isumalluarluta sapiissuseqassaagut. (Luk 21:28) Aamma naalagaaffinnit iligiinnit saassun­neqarutta aalajaassaagut. Jehovap inngilit atorlugit illersus­savaatigut annassutigisas­satsinnillu ilitsersorluta. Qanoq ilitsersuutinik tunineqassaagut? Suli naluarput. Ilimanarluin­narporli ilagiit aqqutigalugit ilitsersor­neqassasugut. Ilagiit tassaalersin­naappullusooq ‘ininnguagut’ qimarnguffigut. Pisussanut qanoq piareersarsin­naavugut? Uppeqatitsinnut qanimut attaveqar­tariaqarpugut, kajumilluta Jehovap peqatigiis­sortaanit ilitsersuutit maleruas­savagut upperil­luinnarlugulu Jehovap peqatigiiffipput siulersoraa. – Hebr 10:24, 25; 13:17.

17. Jehovamit qanoq tuppallersar­neqarlutillu nakussatsin­neqarsinnaavit?

¹⁷ Pissutsit juutit Babylon­nimiittut atugaat imaannaan­ngitsuupput, Jehovalli pisariaqar­titaannik tuppallersarpai. Uagullu aamma tuppallersar­tarpaatigut. Taamaammat inuuninni qanorluunniit pisoqas­sagaluarpat tuppallersar­neqarumallutit Jehova annertoq­qusersortigiuk. Aap, kiffaminik aalajaatsunik nallittuingaarnera qularis­sanngilat. Neriuutit upperil­luinnaruk. Eqqaamajullu siooragisas­saqanngitsutit Jehova Guutigigakku.