Biibilimik ilinniar­titatit Jehovamut kiffartor­tunngor­nissaannut ikiukkit

1-2. (a) Sooq Biibilimik ilinniartitat ilaat Jehovamut kiffartuler­nissamut nangaasarpat? (b) Allaaserisami suna sammissavarput?

ILLIT Jehovamik Nalunaajaasun­ngunngik­kallaravit nangaas­suteqar­nikuuit? Immaqa suleqativit, ikinngutivit ilaquttavil­luunniit kamaler­nissaat ernummatigivat. Immaqaluunniit misigivutit Guutip najoqqutassiai malillugit inuusin­naanngisaan­nassallutit. Taamaappat Biibilimik ilinniar­tinneqartut Jehovap Nalunaajaasuinut ilanngun­nissaminnut nangaas­suteqartut misigin­neqatigisin­naavatit.

² Jiisusip nalunngilaa taamatut ernumas­suteqarneq anersaakkut ineriar­tornermi ajoqutaasinnaasoq. (Mat 13:20-22) Imminulli malinnit­tunngor­niarlutik nangaas­suteqartut imminiigin­nanngilai. Ilinniartitani taama nangaas­suteqartunik qanoq sisamatigut ikiuisin­naanerinik ilinniartippai: (1) Siumukar­nerannut akornutaasut paasinis­saannut, (2) Jehovamut asannin­neruler­nissaannut, (3) pingaar­nersiuil­luarnis­saannut (4) unamminiak­kaminnik qaangiinis­saannut. Biibilimik ilinniartitap Jehovamut kiffartuler­nissaanut ikiornerani atuagaq Naassaan­ngitsumut inuusin­naavutit! atorlugu Jiisusip periaasia qanoq ilaarsin­naavarput?

ILINNIARTITAT SIUMUKAR­NERMINI AKORNUTAASUT PAASINIS­SAANNUT IKIORUK

3. Nikodiimusip Jiisusimut malinnit­tunngor­nissaminut suna akornutigisimagunarpaa?

³ Nikodiimusi, juutit siuttuisa nuimasut ilaat, Jiisusimut ilinniar­titanngor­nissaminut akornuteqarpoq. Jiisusip kiffartornerata aallartin­neranit qaammatit arfinillit qaangiutiinnartut Jiisusi Guutimit aallartitaasoq Nikodiimusip paasivaa. (Joh 3:1, 2) Nikodiimusilli ‘juutit qunugigamigit’ Jiisusi isertorluni naapinniarpaa. (Joh 7:13; 12:42) Immaqa eqqarsarpoq Jiisusimut ilinniar­titanngussaguni nuimasuunini immaqalu pisuussutini annaassallugit.a

4. Jiisusip Nikodiimusi Guutip piumasaqaataanik paasinnin­nissaanut qanoq ikiorpaa?

⁴ Nikodiimusi Moorsisip inatsisai pillugit ilisimasaqarluarpoq, Jehovalli imminut piumasaqaataasa paasinis­saannut ikiorneqar­tariaqarpoq. Jiisusip qanoq ikiorpaa? Jiisusip piffissaqarfigil­luarpaa, allaat Nikodiimusi unnuakkut naapillugu. Aamma Nikodiimusip ilinniar­titanngor­nissaminut iliuuserisariaqagai Jiisusip erseqqissumik oqaatigai: ajortuliani peqqissimis­sutigissavai, imermut morsutsitaassaaq Guutillu erneranut uppertuusariaqarluni. – Joh 3:5, 14-21.

5. Siumukar­nissamut akornutaasut paasinis­saannut qanoq Biibilimik ilinniar­titarput ikiorsin­naavarput?

⁵ Biibilimik ilinniartitap allassimaffiit paasilluaraluarlugit siumukar­nissaminut akornutaasut paasinis­saannut ikiorneqar­tariaqarsinnaavoq. Suliffini ilaquttaminil­luunniit akerlilersor­neqarneq anersaakkut anguniak­kaminut allamut saasaatigisinnaavai. Taamaammat piffissaqarfigisaruk. Kaffisoqatigaluguluunniit pisuttuaqatiserisinnaavat. Taamatut qeratanarpal­laanngitsumik peqatigigukku unamminiak­kaminut tunngatillugu ammarnissaanut ikiorsinnaavat. Illit nuannaar­tinnissat pinnagu Jehovamulli asannin­nerminik ersersitsiniarluni pisariaqartunik allannguinissaanut kajumissaaruk.

6. Jehovamut kiffartuler­nissamut sapiissuseqaler­nissaanut ilinniartitat qanoq ikiorsin­naaviuk? (Korintimiunut 1. 16:13)

⁶ Ilinniartitaq Biibilip najoqqutassiai malillugit inuunissamut Jehovamit ikiorneqar­nissani qularin­ngikkuniuk ilikkakkami maleruar­nissaanut sapiissuseqassaaq. (Korintimiunut 1. 16:13 atuaruk). Illit suliassat atuarfimmi ilinniar­titsisumut assersuun­neqarsinnaavoq. Atuartuugal­laravit ilinniar­titsisoq sorleq nuannarinerpaaviuk? Ilimanarpoq ilinniar­titsisoq illit pisinnaasannut tunngatillugu imminut tatiginissannut ikiuisoq. Taamatuttaaq Biibilimik ilinniar­titsillaqqissoq Guutip piumasaqaatai pillugit ilinniar­titsiinnarani ilinniartitap inuunermini Jehovap ikiuineratigut allannguisin­naaneranik kajumis­saarisarpoq. Qanoq taamaaliorsinnaavit?

ILINNIARTITAT JEHOVAMUT ASANNIN­NERULER­NISSAANUT IKIORUK

7. Jiisusip tusarnaartini Jehovamut asannin­neruler­nissaannut qanoq ikiorpai?

⁷ Jiisusip nalunngilaa ilinniartitami ilikkak­kaminnik maleruaanissamut Guutimut asanninnertik kajumis­sissutigissagaat. Ataataminnut qilammiusumut asannin­nerulis­sutigisin­naasaat ilinniar­titsissutigik­kajuppai. Assersuutigalugu Jehova angummut qitornaminik ajunngitsunik tunissuteqar­tartumut assersuuppaa. (Mat 7:9-11) Jiisusip tusaarnaartuisa ilaat immaqa taama asannitsigisumik ataataqarsiman­ngillat. Takorlooruk ernermik tammaraluartumik utertumik ataataasup misigin­neqataalluni tikilluaq­qusinera Jiisusip assersuusiarimmagu qanoq misigisimas­sanersut. Jehovap nunarsuarmi qitornaminut misigin­neqatigin­ninnera takorloorsin­naalerpaat. – Luk 15:20-24.

8. Biibilimik ilinniartitaq Jehovamut asannin­neruler­nissaanut qanoq ikiorsin­naaviuk?

⁸ Aamma illit ilinniar­titsininni Guutip pissusiinik erseqqis­saasarnikkut Biibilimik ilinniartitaq Jehovamik asannin­neruler­nissaanut ikiorsinnaavat. Misissueqatigiinnerit tamaasa ilikkak­kaminik Jehovap asannin­neranut atassusiinissaanut ikiortaruk. Utertitsis­sutitut akiliut eqqartoraangassiuk tamatuma ilinniar­titannut tunnganera erseqqis­sartaruk. (Rom 5:8; Joh 1. 4:10) Ilinniartitap Jehovamit nammineq asaneqarnini eqqarsaatigisaruniuk Jehovamut asannin­nerulernissaa ilimanar­neruvoq. – Gal 2:20.

9. Michaelip inuunermik allannguinis­saminut suna kajumis­sissutigaa?

⁹ Indonesiamioq Michaelimik atilik peroriar­tornermini ilaquttaminit Jehovamik Nalunaajaasuusunit Biibilimik ilinniar­tinneqarpoq imermulli morsutsin­neqarsimanani. 18-inik ukioqarluni lastbilinut aquttutut suliartorluni nunamut allamut nuuppoq. Kingusin­nerusukkut Indonesiami katippoq sulili nunami allami sulisarluni. Kisianni nulia panialu Biibilimik ilinniar­tinneqar­talerput anersaakkullu siumukarlutik. Anaanani toqummat Michael aalajangerpoq ataatani isumaginiarlugu angerlamut nuunniarluni, taavalu Biibilimik ilinniar­tinneqar­talerpoq. Atuakkami Naassaan­ngitsumik pilluarsin­naavutit!-mi ilinniagassaq 27-mi “Itisiliineq”-mi sammisat killitsis­sutigingaarpai. Jehovap ernermi naalliuuteqangaarnera takullugu qanoq misigisimagaa eqqarsaatigigamiuk killitsingaarluni qullilivoq. Jehovamit Jiisusimillu qanoq asaneqar­tigaluni paasigamiuk inuunerminik allannguillunilu imermut morsutsin­neqarnis­saminut killitsis­sutigaa.

ILINNIARTITAT JEHOVAMIK SALLIUTITSISAR­NISSAANUT IKIORUK

10. Jiisusip ilinniar­tunngorlaat pingaar­nersiuineranni qanoq ikiorpai? (Lukkarsi 5:5-11) (Aamma asseq takuuk).

¹⁰ Ilinniar­tunngorlaat Jiisusip Missiarsiunera paasipal­lappaat, oqaluus­sinerli salliutis­sagunikku ikiorneqar­tariaqarput. Petrusi Andariarsilu Jiisusimit piffissaq tamaat kiffartor­nissamut qaaqquneqar­nerminniit piffissaq sivisulaartoq ilinniar­titaasimapput. (Mat 4:18, 19) Pisaqamallutik aalisartutut suliffeqarput, aamma Jaaku Johannesilu suleqatigisarpasippaat. (Mak 1:16-20) Petrusip Andariarsillu ‘qassutitik qimakkamikkit’ Jiisusimik ilinniar­titaanermik saniatigut ilaquttaminnik pilersuinis­saminnut pilersaaruteqarsimassapput. Pingaar­nersiuinis­saminnut suna iluaqutigaat? Lukkarsip allagaani allassimavoq Jehovap pilersuinis­saannik uppernikkut nakussatsis­sutigisaannik Jiisusi tupinnar­tuliorsimasoq. – Lukkarsi 5:5-11 atuakkit.

11. Ilinniartitap upperlualis­sutigisaanik misigisagut qanoq atorsin­naavagut?

¹¹ Jiisusip pisarsimaneratut tupinnar­tuliorsin­naanngilagut, Jehovalli imminik inuunerminni salliutitsisunik tapersersuisar­neranik misigisat oqaluttuarisin­naavagut. Assersuutigalugu eqqaamaviuk ataatsimeeqataasaleravit Jehovamit qanoq ikiorneqarlutit? Immaqa sulisitsisut oqaloqatigisariaqarsimavat nassuiaallugulu ataatsimiit­tarninnut akornutaassappat piffissannik qaangiillutit sulisarsinnaanak. Ilinniar­titannut nassuiaruk guutisiorninnik salliutitsiniarlutit aalajangiininni Jehovamit tapersersor­neqarnerit uppernerulis­sutigisimallugu.

12. (a) Sooq Biibilimik misissueqateqar­nitsinni oqaluus­sisartut assigiin­ngitsut qaaqqusas­savagut? (b) Sunniuteqarluartumik ilinniar­titsiniarlutit videut qanoq atorsin­naavigit? Assersuuteqarit.

¹² Kristumiut allat pingaar­nersiuinerminni qanoq allannguisimanerat tusaruniuk ilinniar­titavit aamma iluaqutigissavaa. Taamaammat Biibilimik misissueqateqarninni uppeqatitit assigiin­ngitsunik tunuliaqutallit qaaqqusakkit. Qanoq sallusuis­summiilersimanerannik Jehovamillu kiffartornermik inuunerminni salliutitsiniarlutik iliuuserisimasaannik nassuiaaq­qusakkit. Aamma ilinniar­titallu atuakkami Naassaan­ngitsumik pilluarsin­naavutit!-mi videut isiginnaar­tarsigit. Assersuutigalugu ilinniagassami 37-mi video Jehovap pisariaqar­titagut isumagissavai takoreerussiuk qanoq ilinniarfigisin­naallugu eqqartorsin­naavarsi.

ILINNIARTITAT UNAMMINARTUNIK QAANGIINISSAANUT IKIORUK

13. Jiisusip ilinniartitani akerlilersor­neqarnis­saannut qanoq piareersarpai?

¹³ Jiisusip malinnitsini oqarfigisarpai akerlilersor­neqartarumaartut, allaat ilaquttaminnit. (Mat 5:11; 10:22, 36) Jiisusip kiffartornermi naammas­siartornerani ilinniartitani allaat toqutaaratarsin­naanerannik oqarfigai. (Mat 24:9; Joh 15:20; 16:2) Kiffartor­nerminni mianersor­taqqullugit peqquai. Akerlilersuisunik akiuisan­nginnis­saannik mianersor­tarnissaannillu oqaluus­siuarsin­naanias­sammata siunnersorpai.

14. Ilinniartitaq akerlilersor­neqarnissamut qanoq piareersarsin­naavarput? (Timuutiusimut 2. 3:12)

¹⁴ Naatsorsuutigisin­naasaanik nassuiaan­neratigut suleqatinit, kammalaatinit ilaquttanillu akerlilersor­neqarnissamut ilinniar­titarput piareersarsin­naavarput. (Timuutiusimut 2. 3:12 atuaruk). Suleqataasa ilaat inooriaaseriligaat pillugu quiasaarisin­naapput. Allat, aamma qanigisaasa, Biibili tunngavigalugu upperisaa isornar­torsiorsin­naavaat. Ilinniar­titagut akerlilersor­neqarnissamut piareersajaarutsigit taama pisoqarpat iliuusis­saarutis­sanngillat.

15. Ilaquttanit akerlilersor­neqarnermi pinertusaar­nissamut Biibilimik ilinniartitap suna iluaqutigisinnaavaa?

¹⁵ Ilaquttanit akerlilersor­neqarnermut tunngatillugu ilinniartitat ilaquttami suna kamalis­sutigisin­naaneraat eqqarsaatigeqquguk. Immaqa eqqarsarput uukapaatin­neqarsimasoq, immaqaluunniit Jehovap Nalunaajaasui pillugit isummius­sereersimapput. (Mak 3:21; Joh 7:5) Ilinniartiguk kikkunnut tamanut, aamma ilaquttaminut, naammagit­tartooq­qullugu inussiar­nersooq­qullugulu.

16. Ilinniartitaq upperisani pillugu inussiar­nersumik oqaluus­sisarnissaanik qanoq ikiorsin­naavarput?

¹⁶ Ilaqutaasoq soqutigin­nilerpat suut tamaasa ataatsikkut nassuiaatin­ngikkunigit ilinniartitaq silatusaassaaq. Taamaan­ngippat ilaqutai puullaaqilersin­naapput tusarnaarusuk­kunnaarlutillu. Taamammat ilinniartiguk paasiuminartumik oqaluus­sisarnissaanik, ilaqutaami ullu alla tusarnaaq­qikkusulersin­naassapput. (Kol 4:6) Immaqa ilaquttani jw.org pillugu oqaluttuus­sinnaavai. Taamaasillutik Jehovap Nalunaajaasui pillugit namminneq atuallat­taarujoorsin­naapput.

17. Jehovap Nalunaajaasui pillugit paatsuungas­sutigineqar­tartunik akissuteqar­nissamut ilinniartitat qanoq sungiusarsin­naaviuk? (Aamma asseq takuuk).

¹⁷ Ilaquttat suleqatil­luunniit apeqqutigisin­naasaannut paasiuminartumik akisarsin­naaniassammat piareersaq­qullugu jw.org-imi allaaserisat quppernermi “Apeqqutigineqartartut”-miittut atorsin­naavatit. (Tim 2. 2:24, 25) Ilinniagassaq naammas­sigaangassiuk “Oqartoqartarpoq” atuakkami Naassaan­ngitsumik pilluarsin­naavutit!-mi atortarsiuk. Nammineq oqaatsini atorlugit akisarnissamut ilinniartitat sungiusaq­qusaruk. Akillaq­qinneruler­niassammat siunnersor­nissaanut tunuarsimaaqinak. Taamatut sungiusarneq upperisaminik illersuileruni imminut tatiginis­saminut iluaqutigissavaa.

18. Ilinniartitat oqaluus­sisartun­ngornissaanut qanoq kajumis­saarsin­naaviuk? (Matiusi 10:27)

¹⁸ Jiisusip ilinniartitani nutaarsiassanik nuannersunik tamanut oqaluus­sisaqquai. (Matiusi 10:27 atuaruk). Ilinniartitap piaartumik oqaluus­sisaleruni Jehovamik tatigin­ninnissani ilinnialissavaa. Qanoq anguniagaanik ikiorsin­naaviuk? Immikkut suliniar­nissamik ilagiinnut nalunaaruteqar­toqaraangat ilinniartitat kajumis­saartaruk eqqarsaatigeq­qullugu oqaluus­sisartun­ngornis­saminut qanoq piukkun­narsarsin­naanersoq. Nassuiaruk ilaasa taamatut immikkut suliniarnermi oqaluus­sisalernertik ajornan­nginnerutis­simagaat. Aamma sapaatip akunnerata ingerlanerani ataatsimiinnermi tamanut oqalugiarnermi sungiusaqataasaruni iluaqutigissavaa. Tamatuma anguniarnerani qularnani upperisani pillugu oqaluttuarsin­naalissaaq.

ILINNIARTITAT TATIGISARUK

19. Jiisusip ilinniartitani tatigalugit qanoq ersersippaa, aamma uagut qanoq ilaarsin­naavarput?

¹⁹ Jiisusip qilalian­nginnermini malinnitsini ilinniartippai ataatsimooq­qilerumaarlutik. Paasinngilaalli Jiisusip qilammiiler­nissartik pigaa. Taakkuali ilumoorfigin­ninnerat, qularnerat pinnagu, Jiisusip isiginiarneruaa. (Joh 14:1-5, 8) Nalunngilaa assigiin­ngitsut pillugit, soorlu qilaliar­nissartik pillugu, paasinnin­nissamut piffissaqar­tariaqartut. (Joh 16:12) Aamma uagut ilinniar­titarput Jehovamit iluarisaarusunnera pillugu tatigisin­naavarput.

20. Malawimi qatanngutitta ilinniartitani qanoq tatigivaa?

²⁰ Ilinniar­titatta eqqortuliorusunnissaa neriuutigiuar­tarparput. Assersuutigeriartigu Chifundo, qatanngut arnaq Malawimioq. Arnaq inuusuttoq katuuliusoq Alinafe atuagaq Naassaan­ngitsumik pilluarsin­naavutit! atorlugu misissueqatigisalerpaa. Ilinniagassaq 14 naammas­sigamikku Chifundop aperaa assiliat atorlugit guutisiorneq qanoq isumaqarfigineraa. Alinafe aliasuummerpoq akillunilu: “Inuup nammineq tamanna aalajangigassaraa!” Chifundo isumaqaleraluarpoq tassa naggammik atuarlutik. Alinafeli naammagit­tarluni misissueqatigiuarpaa, neriuutigalugu piffissap ingerlanerani tamanna paasiumaaraa. Qaammatialuit qaangiuttut Chifundop ilinniagassaq 34-miittoq una apeqqutigaa: “Biibilimik misissuininni Guuti ilumoortoq, Jehova, pillugu ilikkakkatit qanoq iluaqutiginikuuigit?” Alinafep akissutaa Chifundop ima eqqaamavaa: “Nuannersorpassuit eqqartorpai, ilaat tassaavoq Nalunaajaasut Biibilimut akerliusunik ileqqoqan­ngitsut.” Erininarsin­ngitsoq Alinafep assiliat atortarun­naarpai imermullu morsutsin­neqarsin­naanngorluni.

21. Jehovamut kiffartuler­niarluni aalajanger­nissaanut ilinniar­titarput qanoq ikiorsin­naavarput?

²¹ Jehova ‘naajartor­titsisuugaluartoq’ Biibilimik ilinniar­titatta siumukarnerani suliassaqarpugut. (Kor 1. 3:7) Guutip piumasaanik ilinniar­tiinnarneq ajorparput. Jehovamut asanningaaler­nissaanut ikiortarparput. Aamma asanninnini ersersin­niarlugu pingaar­nersiuinermini aaqqiisar­nissaanut kajumis­saartarparput. Unamminiagaqar­tillunilu Jehovamik tatigin­ninnissaanut ikiortarparparput. Tatigineratigut aamma nammineq Jehovap najoqqutassiai malillugit inuusin­naanini upperinerulersinnaavaa. Tatigigutsigu aamma nammineq Jehovap najoqqutassiai malillugit inuusin­naanini upperinerulersinnaavaa. Tatigalugu ersersik­kutsigu Jehovamut kiffartuler­nissamut aalajangius­sinerani nakussatsis­sinnaavarput.