Siunnersuutinik pitsaasunik qanoq nassaarsin­naavunga?

1. Aalajangiil­luarlutalu anguniakkagut angorusuk­kutsigit sussaagut? (Ussatit 13:10; 15:22)

TAMATTA aalajangiil­luarusuppugut anguniak­kagullu angorusullugit. Tamanna angussagutsigu allanut siunnersor­tissarsior­nissarput pingaaruteqartoq Biibilimi allassimavoq. – Ussatit 13:10; 15:22 atuakkit.

2. Jehovap qanoq neriorsorpaatigut?

² Uagutsinnik siunnersuil­laqqinnerpaasoq tassaavoq Ataatarput asannittoq Jehova. Tussiaat 32:8-mi ima neriorsuivoq: “Siunnersus­savakkit, isigiuas­savakkillu.” Tassani ersersin­neqarpoq Jehovap inuunitsinni malinnaaf­figeqqis­saaraatigut atukkatsinnullu tulluartumik siunnersorusuin­narnata maleruar­nissaannut ikiorusuk­kaatigut.

3. Allaaserisami suut akissutis­sarsissavagut?

³ Allaaserisami apeqqutit uku sisamat Biibili atorlugu akissutis­sarsissavagut: (1) Siunnersuutit iluaqutigis­sagukkit qanoq ittuusariaqarpunga? (2) Kiap siunnersorluarsin­naavaanga? (3) Qanoq takutis­sinnaavara ilumut siunnersor­tikkusullunga? (4) Sooq nammineq aalajangigas­saraluannik allanut aalajangeeq­qusisas­sanngilanga?

QANOQ ITTUUSARIAQARPUNGA?

4. Siunnersuutit iluaqutigis­sagutsigit qanoq ittuusariaqarpugut?

⁴ Siunnersuutit iluaqutigis­sagutsigit maniguullutalu anneruniajuitsuussaagut. Paasisariaqarparput ilaannikkut aalajangiil­luarnis­satsinnut naammattumik misilit­tagaqarnatalu ilisimas­suseqarata. Maniguutin­ngikkutta anneruniajuitsuunatalu Jehovap ikiorsin­naassan­ngilaatigut. Siunnersuutaami Biibilimi atuakkagut pisariaqar­tissorin­nginnatsigit maangaan­nartissavagut iluaqutigin­ngitsoorlugillu. (Mika 6:8; Pet 1. 5:5) Kisianni maniguullutalu anneruniajuitsuugutta siunnersuutit Biibilimeersut akueris­savagut inuunitsinnilu maleruarlugit.

5. Daavip suut makitalis­sutigisin­naagaluarpai?

⁵ Kunngi Daavi ilinniarfigil­luarsin­naavarput. Taassuma piginnaanini angusanilu makitalis­sutigisin­naagaluarpai. Kunngin­ngunngik­kallarami nipilersul­laqqissuunini tusaamaneqaatigaa. Allaat kunngimut nipilersoriaq­quneqarluni qaaqqusaavoq. (Sam 1. 16:18, 19) Daavi Israalimi kunngissatut toqqarneqarami Jehovap anersaavanit illernartumit pissatsin­neqangaarpoq. (Sam 1. 16:11-13) Israalik­kunnillu nuannarineqangaarpoq sorsunnermi ajugaarujus­suartarami – allaat filisterit ilaat, inorujussuaq Goliati, ajugaaf­figisimavaa. (Sam 1. 17:37, 50; 18:7) Daavi makitasimasuuguni arlaannaan­nilluunniit siunnersor­neqarnissani pisariaqar­tissoris­sanngik­kaluarpaa. Taamaan­ngilarli.

6. Qanoq nalunngilarput Daavi siunnersor­neqarumasartoq? (Aamma asseq takuuk).

⁶ Kunngin­ngoreerluni Daavip angutit ilisimatuut siunnersor­tigisarpai. (Nal 1. 27:32-34) Tamanna tupinnanngilaq, sulimi kunngin­ngunngik­kallarami siunnersor­neqarumasarpoq. Angutaan­naanngitsunulli tusarnaartarpoq, assersuutigalugu arnamut Abigajilimik atilimmut tusarnaarpoq. Taassuma uia Nabali ataqqin­ninngitsoq, qujasuitsoq namminis­sarsiortorlu Daavip assiginngilaa. Maniguulluni Abigajilip siunnersuutaa maleruaramiuk kukkorujus­suarnis­saraluani pinngitsoortippaa. – Sam 1. 25:2, 3, 21-25, 32-34.

7. Daavi qanoq ilinniarfigisin­naavarput? (Oqaluus­sisartup oqaasii 4:13) (Aamma assit takukkit).

⁷ Daavi qanoq ilinniarfigisin­naavarput? Piginnaaneqaraluarluta allanul­luunniit oqartus­saassuseqaraluarutta imaanngilaq suut tamaasa nalunngikkigut siunnersor­neqarnis­sarpullu pisariaqar­tinngikkipput. Daavi ilaarlugu kimilluunniit siunnersor­neqarluaraluarutta tusarnaas­savarput. (Oqaluus­sisartup oqaasii 4:13 atuaruk). Taamaalilluta uagutsinnut allanul­luunniit ajornar­torsior­titsinaveersaarsin­naavugut.

KIAP SIUNNERSORLUARSIN­NAAVAANGA?

8. Sooq Jonatanip Daavi siunnersorluarsinnaavaa?

⁸ Daavi aamma allatigut ilinniarfigisin­naavarput. Taassuma eqqarsaatigeq­qissaartarpaa kikkut pitsaasumik siunnersorsin­naaneraanni. Daavip siunnersor­tigisartagai Jehovamut attaveqarluar­tuupput Daavillu ajornar­torsiutaanik paasisimasaqarluar­tuullutik. Assersuutigalugu Daavip paaserusukkamiuk kunngimut Saulimut qanoq attaveqarlualeq­qissinnaanerluni Saulip ernera Jonatani oqaloqatigaa. Sooq Jonatani saaffigis­sallugu pitsaava? Jonatani Jehovamut attaveqarluarmat Saulilu ilisimal­luarlugu. (Sam 1. 20:9-13) Tamanna qanoq ilinniarfigisin­naavarput?

9. Siunnersor­neqarnis­satsinnik pisariaqar­titsigutta kikkut saaffigis­savagut? Nassuiaruk. (Ussatit 13:20)

⁹ Siunnersor­neqarnissarput pisariaqar­tikkaangatsigu pitsaassaaq Jehovamut attaveqarluarlutillu paaserusutatsinnut tunngatillugu misilit­tagaqarluartut aperisarutsigit.a (Ussatit 13:20 atuaruk). Assersuutigalugu takorlooriartigu qatanngut angut inuusuttoq aappassarsiortoq. Kiap siunnersorluarsinnaavaa? Imaassinnaavoq ikinngutaasa ilaat aappaqan­ngitsoq Biibilimeersumik siunnersuil­luarsinnaasoq. Ilimanarporli aappariit anersaakkut inersimal­luartut ikinngutigil­luakkani piffissangaatsiami pilluarlutik aappariis­simasut siunnersuutis­sarsiorfigigunigit iluaqutiginerussagaa. Taakkumi siunnersuutit Biibilimeersut namminneq iluaqutigisimasatik qanoq maleruar­neqarsin­naanersut paasititsisin­naapput.

10. Maanna suut sammissavagut?

¹⁰ Pissuserineqartussat pingaarutillit marluk kikkullu siunnersuil­luarsin­naanersut sammereerpagut. Maanna ilumut siunnersor­tikkusun­nerluta qanoq takutis­sinnaaneripput aamma sooq nammineq aalajangigas­saraluatsinnik allanut aalajangeeq­qusisas­sanngitsugut sammissavagut.

QANOQ TAKUTIS­SINNAAVARA ILUMUT SIUNNERSOR­TIKKUSULLUNGA?

11-12. (a) Suna mianersuutigis­savarput? (b) Kunngi Rehabeammi pingaarutilimmik aalajangiisus­sanngorami sua?

¹¹ Ilaannikkut aalajangius­sereersimalluni siunnersuutis­sarsior­toqartarpoq. Isumaqatigineqarusuin­narluni taamaalior­toqartarpoq. Taamaaliorutta siunnersor­tikkusun­nginnerput ersersis­savarput. Kunngimut Rehabeammimut pisimasoq ilinniutigisin­naavarput.

¹² Rehabeammip ataatani Saalumuut Israalimi kunngitut kingoraarpaa. Saalumuup naalakkersuinerani inuiaat ingerlal­luarsimapput sakkortuumilli piumaffigineqartutut misigisimallutik. Taamaattumik inuit kunngitaaminnut Rehabeammimut saaffiginnipput oqilisaateq­qullutik aggeqqeqquai. Rehabeammi eqqarsaq­qaarusukkami kingusin­nerusukkut uteqquai. Utoqqarnut Saalumuumut siunnersuisarsimasunut siunnersor­tissarsioq­qaarpoq. (Kng 1. 12:2-7) Siunnersuutaalli malinngil­luinnarpaa. Sooq? Imaassinnaavoq aalajangius­sereersimasoq allanillu isumaqatigineqar­niaannarluni aperisoq. Taamaattumik peqatiminit isumaqatigineqarami taakkua siunnersuutaat nuannarivaa. (Kng 1. 12:8-14) Peqatimi siunnersuutaat malillugu inuiaat akivai. Taamanimiilli Rehabeammi ajornar­torsiuterpas­suaqalerpoq. Inuit pikitsitsipput, naggataatigullu inuiaat marlunngorlutik avipput. – Kng 1. 12:16-19.

13. Ilumut siunnersor­tikkusun­nerluta qanoq paasisin­naavarput?

¹³ Rehabeammi qanoq ilinniarfigisin­naavarput? Allanut siunnersor­tissarsioraangatta aalajangius­sereersimasas­sanngilagut. Siunnersuutaat kajumilluta tusarnaaq­qissaar­tassavagut. Taamaattumik apeqqut una eqqarsaatigisin­naavarput: ‘Siunnersor­tiginiakkakka tusarusutannik siunnersuin­ngikkaangata siunnersuutaat maleruarusunneq ajorpara?’ Assersuuteqariarta.

14. Siunnersor­tikkaangatta suna eqqaamasas­savarput? Assersuuteqarit. (Aamma asseq takuuk).

¹⁴ Takorlooruk qatanngut angut suliffimmik aningaasarsiaris­saarfiusumik neqeroorfigitittoq. Akuersin­nginnermini utoqqaanertamut siunnersoqquvoq. Utoqqaanertamut nassuiaavoq sivisuumik ilaquttani qimassimasariaqar­talissallugit. Utoqqaanertap eqqaasippaa Biibili naapertorlugu ilaquttami anersaakkut isumassor­nissaat pingaar­nerpaatut akisussaaf­figigaa. (Ef 6:4; Tim 1. 5:8) Taavami qatanngutip angutip siunnersuutitsialak tamanna ingerlaannaq itigartippagu? Immaqa allanut apersoqat­taalissaaq tusarusutami tusarnissaata tungaanut. Qatanngut angut taanna ilumut siunnersor­tikkusuppa? Imaluunniit aalajangius­sereersimalluni isumaqatis­sarsiuinnarpa? Eqqaamas­savarput uummaterput tatigisas­saanngitsuummat. (Jer 17:9) Ilaannikkut siunnersuutit tusarusun­ngisagut tassaasarput pisariaqar­tinnerpaasagut.

SOOQ ALLANUT AALAJANGEEQ­QUSISAS­SANNGILANGA?

15. Sunaveersaassaagut, aamma sooq?

¹⁵ Tamatta nammineq aalajangiinis­satsinnut akisussaaf­feqarpugut. (Gal 6:4, 5) Soorlu paasereeripput, suli aalajangiitinnata silatusaar­nerussaaq Biibilimi uppeqatitsin­nulluunniit anersaakkut inersimal­luartumut siunnersuutis­sarsiorutta. Aalajangigas­satsinnilli allanut aalajangeeq­qusisas­sanngilagut. Ilaat taamaaliortarput toqqaan­nartumik ima aperisarnikkut: “Illit uangaasuuguit qanoq iliussagaluarpit?” Ilaat namminneq eqqarsaatigival­laanngik­kaluarlugu allat iliuusiinik ilaarsiin­nartarput.

16. Korintimi nerisassat guutilianut pilliutigineqarsimasut pillugit suna ajornar­torsiutaalerpa, kristumiullu Korintimiittut qanoq namminneq akisussaaf­feqarpat? (Korintimiunut 1. 8:7; 10:25, 26)

¹⁶ Kristumiut siulliit nalaanni nerisassat guutilianut pilliutigineqartut pillugit Korintimi ilagiinni ajornar­torsiuteqalerpoq. Paulusi Korintimiunut ima allappoq: “Nalunngilarput guutiliaq suunngil­luinnartoq ataasiin­narmillu Guuteqartoq.” (Kor 1. 8:4) Tamanna tunngavigalugu ilagiin­niittut ilaat aalajangerput nerisassat guutilianut pilliutigineqarsimasut neqaarniarfimmi tuniniar­neqartut nerisin­naallugit. Allallu nalunngeqatigin­nissutertik malillugu nerisin­naanagit aalajangerput. (Korintimiunut 1. 8:7; 10:25, 26 atuakkit). Biibilimi tamatumunnga tunngatillugu inatsiseqan­ngimmat nalunngeqatigin­nissutertik naapertorlugu taama aalajangersin­naapput. Korintimiut allat aalajangiis­sutissagaat allalluunniit iliuusiinik ilaarsissasut Paulusip allaffigin­ngisaannarpai. Tamarmimmi immikkut ‘iliuutsitik naapertorlugit Guutimit eqqartuun­neqassapput’. – Rom 14:10-12.

17. Allanut maleruutiin­narutta qanoq pisoqarsinnaava? Assersuuteqarit. (Aamma assit takukkit).

¹⁷ Ullumikkut assingusumik pisoqarsinnaava? Derivatit aammeersut assersuutigeriartigit. Tamatta derivatit assigiin­ngitsut atornissaat akueris­sanerlugu itigartis­sanerluguluunniit nammineq aalajanger­tariaqarpugut.b Imaassinnaavoq tamakkununnga tunngasut paasiuminaatsikkigut, aalajangiinissalli taamaattut nammineq akisussaaf­figaagut. (Rom 14:4) Allanut maleruutiin­narutta eqqarsarsin­naassuserput sanngiil­lisoorsinnaavoq. Nalunngeqatigin­nissuterput atortarutsigu aatsaat sungiusarsin­naavarput. (Hebr 5:14) Taavami qaqugukkut uppeqatitsinnut anersaakkut inersimal­luartunut ikiortis­sarsior­tassaagut? Misissueq­qissaareer­nitsinni Biibilimi najoqqutassiat qanoq maleruar­nissaannik paasinnin­nissamut ikiorneqar­tariaqarutta allanut siunnersuutis­sarsiorsin­naavugut.

SIUNNERSOR­TITTUARIT

18. Jehovap qanoq ikiorsimavaatigut?

¹⁸ Jehovap nammineq aalajangiisin­naatikkamisigut tatigil­luinnarluta takutippaa. Biibililu uagutsinnut tunniun­nikuuaa pitsaasunillu ikinnguteqar­tilluta najoqqutassianik Biibilimeersunik ujaasinitsinni eqqarsaatigin­neqqissaar­nitsinnilu ikiuisin­naasunik. Ersarippoq Ataatatta asannittup ingerlal­luarnissarput kissaatigingaaraa. (Uss 3:21-23) Qujamasunnerput qanoq takutis­sinnaavarput Jehovalu nuannaar­tillugu?

19. Jehova qanoq nuannaar­tissinnaavarput?

¹⁹ Eqqarsaatigeriaruk angajoqqaat qanoq nuannaar­tartiginersut takugaangamikkit meeqqatik alliartor­nerminni Jehovamut kiffartulersut inersimal­luartut nammineersin­naalersimasut ikiuukkumatuul­lutillu. Jehovamut aamma taamaappoq. Nuannaartarpoq takugaangamiuk anersaakkut ineriar­tortuartugut, allanut siunnersor­tikkusut­tartugut aalajangiisarlutalu taassumunnga ataqqinaataasunik.