Ilumoortut Biibilimeersut tunngaviusut suli ilinniarfigisin­naavigit?

1. Ilumoortut Biibilimeersut ilinniaq­qaarakkit ilinnut qanoq sunniuteqarpat?

ILUMOORTUT Biibilimeersut tunngaviusut inuunitsinnik allannguil­luinnarsimapput. Assersuutigalugu Guutip Jehovamik ateqarnera paasigatsigu taassumunnga ikinngutaalerpugut. (Es 42:8) Toqu pillugu ilumoortoq paasigatsigu asasagut toqukkut annaasimasagut qanoq innersut isumakuluutigiun­naarparput. (Oqal 9:10) Nunarsuarmilu paratiisissaq pillugu Guutip neriorsuutaa paasigatsigu siunissarput pillugu ernumas­saarpugut. Upperilerparput naassaan­ngitsumik inuusin­naalluta, imaanngitsoq 70-iinnarnik 80-iinnarnil­luunniit ukioqarluta toqussasugut. – Tuss 37:29; 90:10.

2. Petrusimit allakkat aappaat 1:12, 13-imilu qanoq ersersin­neqarpa anersaakkut inersimal­luartut ilumoortunik Biibilimeersunik tunngaviusunik suli iluaqutigin­nissinnaasut?

² Ilumoortut Biibilimeersut tunngaviusut pingaaruteqarnerat eqqaamajuas­savarput. Apustilip Petrusip allakkami aappaanni kristumiut ‘ilumoortumik aalajaaf­figinnil­luinnarsimasut’ allaffigai. (Petrusimit 2. 1:12, 13 atuakkit). Ilagiinnili ilumuun­ngitsunik ilinniar­titsisoqalermat anersaakkut navianar­torsiorput. (Pet 2. 2:1-3) Petrusip uppeqatini navianartunut illersorsin­naanias­sammata nakussatsik­kusuppai. Taamaattumik ilumoortut ilikkariigaasa ilaannik eqqaasippai. Taakkumi iluaqutigalugit naggatissap tungaanut Jehovamut aalajaat­tuarsin­naapput.

3. Sooq tamatta ilumoortut Biibilimeersut eqqarsaatigeq­qissaar­tuassavagut? Assersuuteqarit.

³ Ukiorpassuarni Jehovamut kiffartorsimagaluarluta Biibilimi ilumoortut tunngaviusut suli nutaanik ilikkagaqarfigisin­naavagut. Ima assersuusiarineqarsinnaavoq: Igasup pikkorissup iganermillu misilit­tagakitsup immaqa akussat assigiit nerisas­siornerminni atorpaat. Igasulli pikkorissup akussat taakkua pitsaanerpaamik atornissaat piffissap ingerlanerani ilikkarsimavaa nutaartugas­sanillu mamartorpas­suarnik igasinnaalerluni. Taamatuttaaq ilimanarpoq ukiorpassuarni Jehovamut kiffartor­tuusimasup Biibilimik ilinniar­tunngorlaamit allassimaffiit ilikkagaqarfiginerusarai. Sivisuumik Jehovamut kiffartorsimagutta ilimanarpoq pissutsit atukkagut aamma kiffartor­nitsinni akisussaaffigut piffissap ingerlanerani allanngorsimasut. Qanga Biibilimit ilinniarsimasagut eqqarsaatigeq­qissaar­tarutsigit paasissavarput maanna pissutsit atukkagut allanngoraluartut qanoq allatut atorsin­naanerigut. Sivisuumik Jehovamut kiffartorsimasup ilumoortut tunngaviusut pingasut qanoq ilinniarfigisin­naanerai paasiniariartigu.

JEHOVAP PINNGOR­TITSISUUNERA

4. Jehovap Pinngor­titsisuuneranik paasinninnerput uagutsinnut qanoq sunniuteqarsimava?

⁴ ‘Tamanik sanasoq tassaavoq Guuti.’ (Hebr 3:4) Nalunngilarput nunarsuarput tassaniittullu tamarmik Guutimit ilisimas­suseqangaartumit killeqan­ngitsumillu pissaanilimmit pinngor­tinneqartut. Ilumoortorli tamanna suli ilikkagaqarfiginerusin­naavarput. Jehovap pinngor­tikkamisigut uagut pilluta suut tamaasa ilisimavai. Aamma asavaatigut uagutsinnullu suna pitsaanerpaanersoq ilisimallugu. Tassa Jehovap pinngor­titsisuunera nalunngin­natsigu nuannersumik sunnerneqaatigisimavarput inuunitsinnilu siunertaqarlualerluta.

5. Jehovap Pinngor­titsisuunera paasigatsigu qanoq iluaqutigaarput? (Esaja 45:9-12)

⁵ Jehovap Pinngor­titsisuuneranik ilisimasaqarnerput maniguun­nissamut iluaqutigisin­naavarput. Juubi Jehova pillugu eqqunngitsumik isumaqaler­toorpoq. Suna pingaar­nerpaajunersoq puiortooraluarpaa imminullu illersor­nissani pingaar­tippallaarlugu. Jehovalli eqqaasippaa Pinngor­titsisuulluni killeqan­ngitsumik pissaanilik. (Job 38:1-4) Taamaalilluni Juubip paasilerpaa Jehova eqqortulior­tuaannartuusoq. Tamatumunnga naapertuuttumik pruffiiti Iisaaja allappoq: “Marraq marriortumut oqarsin­naanerpa: Suliorpit?” – Esaja 45:9-12 atuakkit.

6. Ingammik susoqar­tillugu Pinngor­titsisup ilisimas­suseqangaarnera pissaaneralu eqqarsaatigis­sallugit pingaaruteqarpa? (Aamma assit takukkit).

⁶ Kristumiu misilit­tagaqar­nerujar­tortilluni imminut tatigival­laalersoorlunilu Jehovamut Biibilimullu siulersor­tinnissani eqqumaf­figiunnaarsinnaavaa. (Job 37:23, 24) Pinngor­titsisimili ilisimas­suseqangaar­neranik pissaaneranillu eqqarsaatigin­neqqissaarnera isiginnit­taasianut qanoq sunniuteqassava? (Es 40:22; 55:8, 9) Paasilissavaa Jehovap isumaa pingaar­nerusoq, tamannalu maniguun­nissaminut iluaqutigissavaa.

7. Allannguut akueriuminaatsikkamiuk Rahela qanoq iliorpa?

⁷ Qatanngutip arnap Rahelamik atillip Sloveniami najugaqartup Jehovap Pinngor­titsisuunera eqqarsaatigigamiuk ilagiinnut ilitsersuutit nutaat akueriuminar­tinnerulerpai. Ima oqaluttuarpoq: “Ilaannikkut utoqqaanertat aalajangigaat sungiuk­kuminaatsit­tarpakka. Assersuutigalugu Siulersuisoqatigiinnit nalunaarusiaq nr. 8, 2023-moortoq isiginnaareeraluarlugu qatanngut angut umilik oqalugiartoq takoqqaarakku umeqarnera suli tulluan­ngissoraara. Taamaattumik Jehovamut qinuvunga allannguutip sungiun­niarnissaanut ikioqqullunga.” Jehova sunik tamanik Pinngor­titsisuusoq Rahelap eqqarsaatigeq­qissaaramiuk eqqaasin­neqarpoq soorunami aamma peqatigiis­sortani qanoq pitsaanerpaamik siulersus­sallugit sapinngikkaa. Illit paasinit­taatsitsinnik allannguineq ilitsersuutil­luunniit nutaat sungiuk­kuminaatsikkukkit Pinngor­titsisitta ilisimas­suseqangaarnera pissaaneqangaarneralu eqqarsaatigigukkit iluaqutigisinnaavat. – Rom 11:33-36.

JEHOVAP NAALLIUT­TOQARNERA SOOQ AKUERIGAA

8. Jehovap naalliut­toqarnera sooq akuerineraa paasillugu qanoq iluaqutigisimaviuk?

⁸ Sooq naalliut­toqarnera Guutip akueraa? Tamatuma akissutaanik ilisimasaqan­ngitsut ilaasa Guuti kamaattarpaat isumaqarlutil­luunniit Guuteqan­ngitsoq. (Uss 19:3) Illilli paasisimavat Jehova pisuunngitsoq ajortili naammal­luinnan­ngissuserlu naalliut­toqarneranut pissutaasut. Aamma paasisimavat Jehova naammagittarmat inuit millionillit taassuma ilisarisimaler­nissaanut periarfis­sinneqartut naalliuutillu qanoq atuukkun­naarsin­neqassasut. (Pet 2. 3:9, 15) Ilumoortut taakku tuppallersaatigisimavatit Jehovamullu qanillis­sutigalugit.

9. Ingammik susoqar­tillugu Jehovap naalliut­toqarneranik akuerin­ninneranut pissutaasut eqqarsaatigisas­savagut?

⁹ Nalunngilarput Jehovap naalliut­toqarneranik atuukkun­naarsitsinissaa naammagit­tarluta utaqqisariaqarlugu. Kisianni toqusoornermi, artornar­torsior­nitsinni, ajortumik pineqar­nitsinni asasattaluunniit taama misigisaqar­neranni Jehovap suli akulius­simannginnera paasiuminaatsis­sinnaavarput. (Hab 1:2, 3) Taamaat­toqartillugu Jehovap naalliuutinik akuerin­ninneranut pissutaasut eqqarsaatigigutsigit pitsaassaaq.a (Tuss 34:20) Aamma Jehovap sunik tamanik nutaanngor­titsinis­saminik neriorsuutaa eqqarsaatigigutsigu iluaqutigis­savarput.

10. Annep anaanaminik annaasaqar­nermini suna tuppallersaatigisarpaa?

¹⁰ Jehovap naalliut­toqarnera sooq akuerineraa paasigatsigu pinertusaar­nissatsinnut iluaqutigisin­naavarput. Anne Indiap Imarpiani qeqertami Mayottemi najugalik ima oqaluttuarpoq: “Ukiualuit matuma siorna anaanaga toqukkut annaagakku aliasungaarpunga. Imminulli eqqaaseqat­taarpunga Jehova anniaatinut pisuunngitsoq. Naalliuutit aliasun­nerillu tamaasa atuukkun­naarsik­kusungaarpai asasatsinnillu toqusimasunik makititsinissani qilanaaringaarlugu. Ilumoortut taakku eqqarsaatigigaangakkit qamuuna eqqissineq misigisara tupigusuutigisarpara.”

11. Jehovap naalliut­toqarneranik akuerin­ninnerminut ilaatigut sunik pissutis­saqarpa, tamannalu oqaluus­siuarnissamut qanoq kajumis­sissutigisin­naavarput?

¹¹ Guutip naalliut­toqarnera sooq akuerineraa nalunngin­natsigu oqaluus­siuarnis­satsinnut kajumis­sissutigisin­naavarput. Inuit peqqissiminis­saannut annaanneqar­nissaannullu periarfis­sikkusuk­kamigit Jehova naammagit­tartuusoq nassuiareerlugu Petrusi ima allappoq: ‘Inuttut qanoq ittuunissarsi eqqarsaatigisariaqarparsi, illernartumik pissuseqarnersi Guutimullu tunniusimanersi takutit­tariaqarlugu.’ (Pet 2. 3:11) ‘Guutimut tunniusimanerput’ ilaatigut oqaluus­sinitsigut takutis­sinnaavarput. Ataatatsitut Jehovatut inuit asavagut. Kissaatigaarput paratiisimiissasut. Inuit illit najugaqarfigisan­niittut Jehovamut kiffartuler­nissamut periarfis­sinneqar­niassammata Jehova naammagittarpoq. Naggatissap nalliutin­nginnerani Guuti suleqatigalugu inuit sapinngisamik amerlanerpaat Jehovap ilisarisimaler­nissaanut ikiorsin­naagatsigit qanoq tupinnar­tigisoq eqqarsaatigeriaruk! – Kor 1. 3:9.

NAGGATISSAP NALLIUTINGAJALERNERA

12. “Ulluni kingullerni” inuulluta paasillugu uppernikkut qanoq nakussatsis­sutigaarput?

¹² “Ulluni kingullerni” inuit qanoq ittuunissaat Biibilimi eqqorluartumik allaatigineqarpoq. (Tim 2. 3:1-5) Qularutis­saanngilaq siulittuut taanna nalitsinni eqquuttoq. Inuit pissusilersornerat iliuusaallu ajorsigalut­tuinnartut takullugu upperinerulerparput Jehovap oqaasia tatiginartuusoq. – Tim 2. 3:13-15.

13. Jiisusip assersuusiaa qanoq ilinniarfigisin­naavarput? (Lukkarsi 12:15-21)

¹³ Naggatissaq nalliutingajalersoq nalunngin­natsigu piffissatta pitsaanerpaamik atornissaanut iluaqutigaarput. Tamatuma pingaaruteqarnera Lukkarsi 12:15-21 Jiisusip assersuusiaanit paasisin­naavarput. (Atuakkit). Sooq angut pisooq sianiitsumik taaneqarpa? Imaanngitsoq pisuujugami, kisianni kukkusumik pingaar­titaqarami. ‘Pigisarpas­suarnik katersisimavoq Guutimili pisuujunani.’ Pingaar­nersiuinera sooq taama ajortigiva? Guutip ima oqarfigaa: “Unnuaru toqussaatit.” Uagut tamanna qanoq ilinniarfigisin­naavarput? Naggatissaq nalliutingajalermat pitsaassaaq apeqqutit uku eqqarsaatigigutsigit: ‘Pingaar­titakka pillugit anguniakkakka qanoq ersersitsippat? Meeqqakka qanoq ittunik anguniagaqar­nissaannut ikiortarpakka? Nukikka, piffissara, aningaasat pigisakkalu inuulluataar­nissamut atornerusarpakka imaluunniit qilammi pisuussutinik katersinissamut atortarpakka?’

14. Mikip misigisaanit qanoq erserpa naggatissap nalliutingajaler­neranut uppernarsaatit eqqarsaatigis­sallugit pingaaruteqartoq?

¹⁴ Naggatissap nalliutingajaler­neranut uppernarsaatit eqqarsaatigigutsigit anguniakkagut allanngorluin­narsinnaapput. Qatanngutip arnap Mikimik atillip tamanna misigaa. Ima oqaluttuarpoq: “Atuarfimmiit soraarum­meereerama uumasunik ilisimatuun­ngorusuppunga. Aamma pionerin­ngorusuppunga oqaluus­sisartunillu pisariaqar­titsiffiunerusumut nuunnissara anguniagaralugu. Ikinngutigil­luakkama kajumis­saarpaannga eqqarsaatigeq­qissaaq­qullugu uumasunik ilisimatuun­ngorniarneq aallukkukku Jehovamut kiffartornermi anguniakkama angunissaat piviusorsior­nerussanersoq. Eqqaasip­paannga naggatissap nalliutingajaler­neranik paratiisissamilu uumasut pillugit ilikkagaqar­nissannut naassaan­ngitsumik periarfis­sarpassuaqas­sasunga. Taamaattumik pioneritut imminut pilersorsin­naaniassagama tunngaviusumik ilinniagaqaan­narniarlunga aalajangerpunga. Kingusin­nerusukkut Ecuadorimut, oqaluus­sisartunik pisariaqar­titsiffiunerusumut, nuuppunga.” Maanna Miki, uini ilagiinnik nakkutilliisoq ilagalugu, Ecuadorimi kiffartorpoq.

15. Sooq inuit soqutigin­ninngin­nerartut isumalluarfigiuas­savagut? Nassuiaruk. (Aamma assit takukkit).

¹⁵ Inuit nutaarsiassat nuannersut soqutigin­ngippatigit nikallus­sanngilagut. Inuimmi allanngorsin­naapput. Jiisusip affarmik qatanngutaa Jaaku eqqarsaatigiuk. Jaakup angajuni Jiisusi peroriar­toqatigaa, Missiarsitut kiffartornera takuaa tupinnaan­nartumillu ilinniar­titsinera tusartarlugu. Aatsaalli Jiisusi toqoreerlunilu makititaareermat Jaaku uppertun­ngorpoq. Kristumiutullu aallussil­luartun­ngorpoq!b (Joh 7:5; Gal 2:9) Taamaattumik illit ilaquttatit suli soqutigin­nilersiman­ngitsut oqaluus­sinermilu naapitatit tusarusun­ngitsut isumalluarfigiuakkit. Eqqaamajuk “ulluni kingullerni” inuugatta oqaluus­sinerput nukingin­nartuusoq. Imaassinnaavoq maanna oqaatigisatit kingusin­nerusukkut, immaqa allaat annikil­liornar­tussarsuaq aallartereersoq, inuit eqqaalerlugit sunnerneqaatigissagaat.c

ILUMOORTUT TUNNGAVIUSUT QUJAMASUUTIGIUAKKIT

16. Ilumoortunik Biibilimeersunik eqqaasin­neqartarnerit qanoq iluaqutigisimaviuk? (Ungalusaq “Allanik ikiuinissamut atortakkit” takuuk).

¹⁶ Anersaakkut inuussutissat pigisatta ilaat Biibilimi ilumoortunik tusagaqarsiman­ngitsunut piareersar­neqartarput. Assersuutigalugu tamanut oqalugiar­toqartarpoq, aamma allaaserisat videullu jw.org-imiittut ilaat atuagas­siaatigullu tamanoortut Nalunaajaasuun­ngitsut eqqarsaatiginerullugit saqqummersin­neqartarput. Taamaak­kaluartoq ilumoortunik nalunngeriik­katsinnik eqqaasin­neqarnerput iluaqutigisarparput. Taakkumi iluaqutigalugit Jehovamut asannin­neruler­tarpugut, oqaasianik upperin­ninneruler­tarpugut ilinniar­titsillaq­qinneruler­tarlutalu. – Tuss 19:8.

17. Susoqar­tillugu ilumoortunik Biibilimeersunik tunngaviusunik eqqarsaatigin­neqqissaarneq iluaqutigisin­naaviuk?

¹⁷ Biibilimi ilumoortut pillugit paasinnit­taatsitsinnik erseqqis­saanerit soqutigalugit nuannaarutigingaar­tarpagut. Ilumoortulli tunngaviusut Jehovamut qanillis­sutigisimasagut aamma qujamasuutigingaarpagut. Paaseriik­katsitummi taakku iluaqutigiuarsin­naavagut. Assersuutigalugu eqqarsaq­qajaagutta nammineq isumarput ilioriaaserpul­luunniit ilagiinnut ilitsersuus­sutinit pitsaanerusoq maniguulluta eqqaamasariaqarparput Jehova Pinngor­titsiserput ilisimas­suseqangaartoq peqatigiis­sortaminik siulersuisuusoq. Ajornar­torsior­tilluta asasarpul­luunniit erloqinar­torsior­tillugu pitsaassaaq Jehovap naalliut­toqarneranik akuerin­ninneranut pissutaasut eqqarsaatigigutsigit, naammagit­tarlutami pinertusaar­nissatsinnut iluaqutigis­sagatsigu. Kiisalu piffissarput nukigullu qanoq atussanerlugit aalajangiiniaraangatta naggatissap nalliutingajaler­neranik imminut eqqaasit­tarsinnaavugut. Qanortoq Biibilimi ilumoortut tunngaviusut silatusaartumik aalajangiinis­satsinnut iluaqutigalugillu Jehovap kiffartorfigiuar­nissaanut nakussatsis­sutigiuartigit!