Qularis­sanngilat Jehovap isumakkeerfigigaatit

1-2. Jehovamit isumakkeerfigineqarsimalluta paasigaangatsigu qanoq misigisarpugut? (Aamma asseq takuuk).

KUNNGIP Daavip ajortuliarisimasat pissutigalugit ilerasunneq qanoq misiginarnersoq nalunngilaa. (Tuss 40:13; 51:1, 2, 5) Ataasiaannarani ingasattumik ajortuliorsimavoq. Qamanngali pisumik peqqissimisarami Jehovamit isumakkeerfigineqartarpoq. (Sam 2. 12:13) Paasigaangamiuk Jehovamit isumakkeerfigineqarsimalluni oqilial­lattarpoq. – Tuss 32:1.

² Jehovamit nallittor­neqarlutalu isumakkeerfigineqarluta paasigaangatsigu Daavitulli oqilial­lassinnaasarpugut. Ilumoorluta peqqissimigutta, ajortuliagut nassuerutigigutsigit sapinngisatsinnillu taamatut ajortulioq­qinnaveersaarutta Jehovap allaat ajortuliatsinnik ingasattunik isumakkeerfigerusup­paatigut. Tamanna tuppaller­nangaarami, ilaa? (Uss 28:13; ApS 26:20; Joh 1. 1:9) Aamma Jehovap isumakkeerfigigaangamisigut ajortuliorsiman­ngisaan­nartutut isigisarpaatigut, tamannalu toqqissial­lannarpoq! – Ez 33:16.

3-4. Qatanngut arnaq imermut morsutsitaareerluni qanoq misigisimava, aamma allaaserisami matumani suut sammissavagut?

³ Ilaannikkulli Jehovamit isumakkeerfigineqarsimanerput upperiuminaatsis­sinnaavarput. Jenniferip misigisaa assersuutigeriartigu. Taanna meeraallunili angajoq­qaaminit Jehova pillugu ilinniar­tinneqar­tarsimavoq. Kisianni inuusut­tuaraalluni ajortulior­talersimavoq marloqiusamillu inooriaaseqalerluni. Ukiorpaaluit tamatuma kingorna allannguivoq, Jehovamut tunniul­luinnarpoq imermullu morsutsin­neqarluni. Ima oqarpoq: “Siornatigut pigisanik pingaar­titsisuuvunga, atoqatigiinnikkut eqqunngitsulior­tarpunga, aalakoor­tarpunga kamarujus­suartarlungalu. Nalunngik­kaluarpara isumakkeerfigineqaq­qullunga kimigiiserama peqqissimigamalu Kristusip utertitsissutaa tunngavigalugu isumakkeerfigineqarlunga. Tamannali qamuuna ilorlikkut upperiuminaatsippara.”

⁴ Illit ilaannikkut upperiuminaatsit­tarpiuk Jehovap kukkussutinnik isumakkeerfigisimagaatit? Jehovap kissaatigaa taassuma nallittuisuunera Daavitulli qularis­sanngikkipput. Allaaserisami matumani sammissavagut sooq qularis­sanngikkipput Jehovap isumakkeerfigisaraatigut aamma qularun­naarnis­satsinnut suna iluaqutigisin­naagipput.

SOOQ JEHOVAMIT ISUMAKKEERFIGINEQARSIMANERPUT QULARIS­SANNGILARPUT?

5. Saatanip qanoq isumaqar­tikkusup­paatigut? Assersuuteqarit.

⁵ Jehovamit isumakkeerfigineqarsimanerput qularin­ngikkutsigu Saatanip salluliuutai upperis­sanngilagut. Eqqaamajuk Jehovamut kiffartorun­naartin­niarluta Saatani sapinngisaminik iliuuseqartartoq. Assersuutigalugu isumaqar­tinniarsarivaatigut Jehovap ajortuliatsinnik isumakkeerfigisin­naanngik­kaatigut. Korintimi kristumiut siulliit ilaat atoqatigiinnikkut eqqunngitsuliornini pissutigalugu ilagiinnit peerneqartoq sammeriartigu. (Kor 1. 5:1, 5, 13) Ilagiinnit peerneqarnermi kingorna peqqissimivoq. Saatanilli kissaatigaa ilagiin­niittunit isumakkeerfigineqas­sanngitsoq tikilluaq­quneqas­sanngitsorlu. Tassami isumakkeerfigineqan­ngitsutut misigiguni ‘aliasorujus­suarnermik sapilersutut misigilersinnaavoq’ Jehovamullu kiffartorun­naarluni. Saatanillu anguniagaa periaasialu allanngorsiman­ngillat. ‘Pilersaarutai ilisimagatsigit’ akiorsin­naavarput. – Kor 2. 2:5-11.

6. Ilerasut­tuarutta suna iluaqutigisin­naavarput?

⁶ Qularin­ngikkutsigu Jehovamit isumakkeerfigineqarsimalluta ilerasuk­kunnaarsin­naavugut. Ajortulioraangatta ilerasut­tarpugut. (Tuss 51:19) Tamanna iluaqutaavoq. Tassami ilerasunneq allannguilluta eqqortumik iliuler­nissamut kajumis­sissutigisin­naavarput. (Kor 2. 7:10, 11) Peqqissimereeraluarlutali ilerasut­tuarutta ima nikallungatigilersin­naavugut Jehova kiffartorfigiun­naarlugu. Qularin­ngikkutsiguli Jehovamit isumakkeerfigineqarsimalluta ilerasuk­kunnaarluta siumut isigilersin­naavugut. Taava Jehovap kissaatigisaatut – minguitsumik nalunngeqatigin­nissuteqarluta nuannaangaarlutalu – kiffartorfigisin­naassavarput. (Kol 1:10, 11; Tim 2. 1:3) Kisianni qanoq upperil­luinnalersin­naavarput Jehovamit isumakkeerfigineqarsimalluta?

JEHOVAP ISUMAKKEERFIGIN­NINNERA UPPERIL­LUINNARUMALLUGU QANOQ ILIORSIN­NAASUGUT

7-8. Jehova Moorsisimut imminut qanoq ilisaritippa, aamma tamanna sumik qularun­naassutigaarput? (Mosesimik 2. 34:6, 7)

⁷ Jehova imminut qanoq ilisaritittoq eqqarsaatigiuk. Assersuutigalugu maluginiaruk qaqqami Siinaajimi Moorsisimut imminut pilluni qanoq oqarnersoq.a (Mosesimik 2. 34:6, 7 atuakkit). Jehova nuannersorpas­suarnik pissuseqarpoq. Immikkulli eqqaavaa tassaalluni “Guuti nallittuisoq saammaasorlu”. Guutip taamaattup kiffani ilumoorluni peqqissimisoq isumakkeerfigiumas­sannginnerpaa? Soorunami isumakkeerfigissavaa! Taamaaliun­ngikkunimi naakkit­taatsuus­sagaluarpoq, taamaat­tuunngil­luinnarporli.

⁸ Jehova oqaraangami nallittuisuulluni tamanna upperil­luinnarsin­naavarput, ilumoor­tumimmi oqaluttuaannarpoq. (Tuss 31:6) Ilerasunnerput qaangeruminaatsik­kutsigu una eqqarsaatigisin­naavarput: ‘Jehova ilumut nallittuisuullunilu saammaasuusoq inullu peqqissimisoq kinaluunniit isumakkeerfigissagaa upperaakka?’ Tamakku upperigukkit taava qularutigis­sanngilat aamma illit isumakkeerfigigaatit.

9. Jehovap ajortuliatsinnik isumakkeerfigin­nittarnera pillugu Tussiaat 32:5 qanoq ilinniarfigaarput?

⁹ Jehovap isumakkeerfigin­nittarnini pillugu Biibilimi allatsitai eqqarsaatigikkit. Jehova pillugu Daavi ima allappoq: ‘Ajortuliannik isumakkeerfigaarma.’ (Tussiaat 32:5 atuaruk). Hebræerisut oqaaseq ‘isumakkeerfigin­ninnermik’ nutserneqartoq aamma ima isumaqarsinnaavoq: “Kivillugu” imaluunniit “peerlugu”. Jehovap Daavi isumakkeerfigigamiuk soorlulusooq ajortuliai kiveriarlugit peerai. Taamaaliormat Daavi ilerasuk­kunnaarluni oqiliallappoq. (Tuss 32:2-4) Uagut aamma tamanna misigisin­naavarput. Ajortuliagut ilumoorluta peqqissimis­sutigigutsigit Jehovap tamakku uagutsinnit peermagit ilerasunneq nanertuutigisariaqas­sanngilarput.

10-11. Jehova ‘isumakkeerfigin­nikkumasartutut’ allaatigineqarmat suna ilikkarparput? (Tussiaat 86:5)

¹⁰ Tussiaat 86:5 atuaruk. Daavi tassani allappoq Jehova ‘isumakkeerfigin­nikkumasartoq’. Tamanna isumaqarpoq kukkugaangatta Jehovap kamaatipallanneq ajoraatigut aamma peqqissimisut isumakkeerfigerusuttarai. Sooq taamaattuua? Versip nanginnerani tamanna nassuiar­neqarpoq. Ima allassimavoq: “[Ilumoorfigin­nillutit asanninnerit, New World Translation] angeqaaq ilinnik torlorfigin­nittunut tamanut.” Soorlu allaaserisap siuliani paasigipput Jehovap ilumoorfigin­nilluni asanninnini pissutigalugu kiffani aalajaatsut qanimut attaveqarfigiuarpai. Aamma ilumoorfigin­nilluni asanninnini kajumis­sissutigalugu ajortuliaminnik peqqissimis­sutiginnittut tamaasa ‘isumakkeerfigiuassavai’. (Es 55:7) Siornatigut ajortuliarisimasatit pillugit Jehovamit isumakkeerfigineqarsimanerit upperiuminaatsikkukku una eqqarsaatigisinnaavat: ‘Peqqissimisoq isumakkeerfigeq­qullunilu qinusoq kinaluunniit Jehovap isumakkeerfigerusukkaa upperaara?’ Tamanna upperigukku taava qularutigis­sanngilat aamma illit isumakkeerfigeq­qullutit qinugavit isumakkeerfigigaatit.

¹¹ Jehovap naammal­luinnan­ngitsuusugut nalunngilluaraa ilisimallugu aamma tuppallersaatigisin­naavarput. (Tuss 139:1, 2) Tamanna erseqqippoq Daavip tussiaasiaanit allamit, taannalu Jehovamit isumakkeerfigineqar­tarnitsinnik upperin­ninnissatsinnut iluaqutigisin­naavarput.

JEHOVAP EQQAAMASAA PUIOQINAGU

12-13. Jehovap suna eqqaamavaa, qanorlu pisarpaatigut? (Tussiaat 103:14)

¹² Tussiaat 103:14 atuaruk. Jehovap peqqissimisunik isumakkeerfigin­nikkusut­tarneranut pissutaasut ilaat Daavip eqqaavaa. Allappoq ‘eqqaamagaa pujualaasugut’. Tamanna isumaqarpoq nalunngikkaa ajortulioq­qajaasartugut. Oqaatsit taakku itisiler­neroriartigit.

¹³ Daavi allappoq Jehovap nalunngikkaa qanoq “pinngor­titaasugut”. Adami issumit pinngortippaa, nalunngilaalu allaat inuit naammal­luinnartut pisinnaasaat killeqartut. Assersuutigalugu inuujuarumallutik nerisariaqarput, sinittariaqarput anersaar­tortariaqarlutillu. (Mos 1. 2:7) Adamili Evalu ajortuliormata ‘pujualaanerput’ aamma allamik isumaqalerpoq. Naammal­luinnan­ngissuseq taakkunannga kingornuk­katsigu ajortulioq­qajaasarpugut. Daavi allappoq Jehovap ajortiliunerput ilisimaan­narnagu ‘eqqaamagaa’. Oqaaseq hebræerisooq matumani atorneqartoq ajunngitsumik iliuuseqarnermut tunngatin­neqarsinnaavoq. Taamaattumik Daavip allataasa isumaat allatut ima oqaatigineqarsin­naapput: Jehovap nalunngilaa ilaannikkut ajortulior­tartugut, ajortuliorsimatillutalu ilumoorluta peqqissimigaangatta iliuuseqarusuttarpoq, tassa nallittuilluni isumakkeerfigisarpaatigut. – Tuss 78:38, 39.

14. (a) Jehovap isumakkeerfigin­ninnerata qanoq annertutiginera Daavip qanoq nassuiarpaa? (Tussiaat 103:12) (b) Jehovap Daavimik isumakkeerfigin­ninnera qanoq ilinniarfigisin­naavarput? (Takuuk ungalusaq “Jehovap isumakkeerfigigaangamisigut ajortuliagut puiortarpai”).

¹⁴ Jehovap isumakkeerfigin­ninnera qanoq annertutigisarpa? (Tussiaat 103:12 atuaruk). Daavi allappoq Jehova isumakkeerfigin­nikkaangami unioqqutitsinigut ungasil­lisittarai ‘soorlu kangia kitaanit ungasitsigisoq’. Taakkunannga imminnut ungasin­nerusoqanngilaq, qanillin­ngisaan­narpullu. Jehovap isumakkeerfigin­nittarneranut tunngatillugu tamanna qanoq paasisaqarfigaarput? Qinerlerfissiami ajorti naamasamut assersuusiarineqarpoq.b Naamasat misigisimasatsinnik eqqaasin­neqaatigisin­naavagut. Guutip ajortuliagut ungasil­lisingaaramigit allaat naamaqqis­sinnaanngilai. Tassa Jehovap isumakkeerfigigaangamisigut ajortuliatsinnik eqqaanar­toqanngimmat eqqaaqqis­sanngilai kingusin­nerusuk­kulluunniit tamakku pillugit pillassanata. – Ez 18:21, 22; ApS 3:19.

15. Ajortuliarisimasagut pillugit ilerasut­tuarutta susinnaavugut?

¹⁵ Tussiaat 103-mi Daavip allatai iluaqutigalugit Jehovamit isumakkeerfigineqarnerput qanoq upperinerulersin­naavarput? Ajortuliarisimasagut pillugit ilerasut­tuarutta uku eqqarsaatigisin­naavagut: ‘Jehovap eqqaamasai puiorpakka – tassa ajortiliunera nalunngikkaa peqqissimigumalu isumakkeerfigis­sagaanga puiorpakka? Aamma Jehovap eqqaaqqin­nianngisai eqqaamasarpakka – tassa ajortuliarisimasakka isumakkeerfigeriigai eqqarsaatigisarpakka?’ Jehovap ajortuliarisimasagut eqqarsaatigineq ajorpai. Uagullu taanna ilaartus­saagaluarparput. (Tuss 130:3) Jehovamit isumakkeerfigineqarnerput qularutigiun­naarutsigu ilerasuk­kunnaarlutalu nuannaarluta Jehovamut kiffartor­tuarsin­naassaagut.

16. Ajortuliarisimasatta ilerasuutigiuarnerisa navianartua assersuusiorlutit nassuiaruk. (Aamma asseq takuuk).

¹⁶ Assersuuteqariarta. Ajortuliarisimasagut pillugit ilerasut­tuarutta assigiin­nassagaluarparput biilertoq siumut ingerlagaluarluni tarrarsuutikkut kingumut isigiin­naavissoq. Kingumut tarrarsuutikkut qiviartarneq iluaqutaasarpoq navianarsinnaasut eqqumaf­figineqarsin­naammata. Isumannaatsumilli biilerniaraanni siumut isigineruniar­tariaqarpoq. Ajortuliarisimasatsinnut tunngatillugu aamma taamaappoq. Ilaannikkut kingumut qiviartarneq silatusaar­neruvoq ajortuliarisimasagummi ilinniarfigalugillu taamatut ajortulioq­qinngin­nissamut iluaqutigisin­naagatsigu. Ajortuliagulli eqqarsaatigival­laarutsigit ilerasut­tuassaagut, tamannalu Guutimut kiffartor­nitsinnut ajoqutigis­savarput. Uagulli siumut isigiuassaagut. Tassami paratiisissami eqqaamasat nuanniitsut ‘eqqaaqqin­neqassan­ngillat’. – Es 65:17; Uss 4:25.

IMMINUT QULARUN­NAARSIN­NIARTUARIT

17. Jehovap uagutsinnik asannin­neranik isumakkeerfigin­nittarneranillu sooq imminut qularun­naarsin­niartuar­tariaqarpugut?

¹⁷ Jehovap uagutsinnik asannin­neranik isumakkeerfigin­nittarneranillu imminut qularun­naarsin­niartuar­tariaqarpugut. (Joh 1. 3:19) Sooq? Saatanip isumaqalersin­niarmatigut Jehovamit asaneqarsin­naanatalu isumakkeerfigineqarsin­naanngitsugut. Anguniagaraa Jehovamut kiffartorun­naarnissarput. Piffissakinnini nalunngimmagu ilimagisin­naavarput ilungersor­nerugalut­tuinnassasoq. (Saqq 12:12) Ajugaateqinagu!

18. Jehovamik asaneqarninnik isumakkeerfigineqar­ninnillu qanoq imminut qularun­naarsis­sinnaavit?

¹⁸ Jehovamit asaneqarnerit upperil­luinnalerumallugu siunnersuutit allaaserisap siulianiittut maleruakkit. Jehovamit isumakkeerfigineqarnerit qulariun­naarnias­sagakku taassuma imminut ilisaritinnera eqqarsaatigiuk. Isumakkeerfigin­ninnera pillugu Biibilimi allassimasut eqqarsaatigeq­qissaakkit. Puioqinagu ajortiliunerit nalunngikkaa nallittorusuk­kaatillu. Eqqaamajullu isumakkeerfigin­nikkaangami ajortuliagut eqqaaqqinneq ajorai. Taava Daavitut Jehovap nallittuinera upperil­luinnarlugu ima oqarsin­naassaatit: “Jehova qujanaq ‘ajortuliannik isumakkeerfigigamma!’” – Tuss 32:5.