Pileris­susipiluit akiorsin­naavatit!

1. Tamatta sumik akiugaqarpugut?

JEHOVAP iluarin­ngisaanik iliornissamut sakkortuumik pileris­susipiloqar­nikuuit? Taamaappat kisimiin­ngilatit, Biibilimimi allassimavoq: “Inuit tamarmik usserneqar­tarnerattut usserneqar­tarpusi.” (Kor 1. 10:13) Tassa imaappoq pileris­susipilummik qanorluunniit ittumik akiugaqaraluaruit aamma allat taamatut akiugaqartartut. Nikalloqinak, Jehovami ikiortigalugu akiukkat ajugaaf­figisinnaavat.

2. Kristumiut Biibilimillu ilinniar­tinneqartartut suut ussernar­torsiorfigisin­naavaat? (Aamma assit takukkit).

² Biibilimi aamma allassimavoq: “[Kinaluunniit] pileris­sutsiminit kajungilersin­neqarnikkut usserneqar­nikkullu misilin­neqartarpoq.” (Jaak 1:14) Ussernartut inummiit inummut assigiinneq ajorput. Assersuutigalugu kristumiut ilaat suiaassuseqatigin­ngisaminnik, allallu suiaassuseqatigisaminnik, atoqatigiinnikkut eqqunngitsulior­nissamut ussernar­torsiortarput. Pornografiimik isiginnaar­tarunnaarsimagaluartut sakkortuumik pileris­susipiloqarlutik isiginnaaq­qikkusulersin­naapput. Aamma ikiaroor­nartunik imigassamillu atornerluiun­naarsimasut ilarpassui assingusumik unamminiagaqartarput. Tassa kissaatipalaat kristumiut Biibilimillu ilinniar­tinneqartartut akiugassaasa ilaat. Tamatta Paulusitut misigisimagunarpugut, imami allappoq: “Eqqortuliorusuk­kaluarlunga ajortulioq­qajaasarpunga.” – Rom 7:21.

3. Iperaruminaatsumik pileris­susipiloqarneq inummut qanoq sunniuteqarsinnaava?

³ Iperaruminaatsumik pileris­susipiloqaruit immaqa ussernartup akiornissaanut nukissaqarsorin­nginnavit sapilersutut misigisin­naavutit. Aamma imaassinnaavoq eqqarsaravit pileris­susipiloqarnerit pissutigalugu Jehovap iluarinavian­ngikkaatit neriuutaaruttutut misigilersoorsin­naasutit. Sapinngilatilli neriuutis­saqarlutillu! Tamanna qanoq qulariun­naarsin­naaviuk? Allaaserisami uku sammineqassapput: (1) Misigissutsit nuanniitsut taakku suminngaan­neerpat? (2) Pileris­susipilunnut qanoq ajugaasinnaavit?

SAATANIP QANOQ MISIGITIK­KUSUKKAATIGUT

4. (a) Sooq Saatanip kissaatigaa sapilersutut misigis­sasugut? (b) Qanoq nalunngilarput pileris­susipilutsinnut akiuussin­naalluta?

⁴ Saatanip kissaatigaa ussernar­torsior­nitsinni nukissaqan­ngitsutut misigis­sasugut. Jiisusip tamanna nalunnginnamiuk ilinniartitani ima qinusar­nissaannik ilinniartippai: “Ussernartumut nakkaan­naqqunata ikiortigut, Diaavulumillu annaatsigut.” (Mat 6:13) Saatani oqarpoq inuit eqqunngitsulior­nissamut ussernar­torsior­nerminni Jehovamut naalannavian­ngitsut. (Job 2:4, 5) Sooq taama eqqarsarpa? Saatani nammineerluni pileris­susipiluminut nakkaannarpoq Jehovamullu naalakkusunnani. Tassa isumaqarpoq immisut ittugut ussernar­torsioraangattalu ingerlaannaq Jehova aalajaaf­figiunnaas­sagipput. Allaat isumaqarpoq Guutip ernera naammal­luinnartoq usserneqarsinnaasoq. (Mat 4:8, 9) Ilumulli pileris­susipilutsinnut akiuunnis­satsinnut saperpugut? Naamerluinnaq! Apustili Paulusi ima allattoq isumaqatigaarput: “Guutip pissatsit­tarmanga suulluunniit nukissaqarfigaakka.” – Flp 4:13.

5. Qanoq nalunngilarput Jehovap qularin­ngikkaa pileris­susipiluit akiorsin­naagigut?

⁵ Saatani assiginagu Jehovap ussernar­torsior­nitsinni sapilersutut isiginngilaatigut. Tamanna qanoq nalunngilarput? Jehovap oqaatigereermagu “inupparpassuit” aalajaatsut annikil­liornar­tussarsuarmit aniguissasut. Tamanna qanoq isumaqarnersoq eqqarsaatigeriaruk. Jehova sallusin­naanngitsoq oqarpoq “inupparpassuit”, inuppaaluin­naanngitsut, ‘atisatik takisuut errorsimallugit Savaaqqallu aavanik qaqortitis­simallugit’ paratiisissamut isissasut. (Saqq 7:9, 13, 14) Qaqortunik atisaqarnerat isumaqarpoq Jehovap minguitsutut isigigai. Ersarippoq Jehovap nalunngikkaa pileris­susipilunnut akiuussin­naasugut.

6-7. Sooq Saatanip kissaatigaa neriuutaaruttutut misigis­sasugut?

⁶ Saatanip kissaatigiin­nanngilaa sapilersutut misigis­sasugut, aamma neriuutaaruttutut misigitik­kusuppaatigut. Tassa isumaqalersin­niarpaatigut eqqunngitsuliun­ngikkaluarluta pileris­susipiloqarnerput pissutigalugu Jehovap iluarinavian­ngikkaatigut. Sooq Saatanip taama misigitik­kusuppaatigut? Eqqarsaatigeriaruk, taannaavormi neriuuteqan­ngitsoq Jehovamit iluarineqarani suujunnaarsin­neqarluin­nartussaasoq. (Mos 1. 3:15; Saqq 20:10) Naassaan­ngitsumik inuunissaq pillugu neriuuteqaratta Saatani sinngasorujussuuvoq. Taamaattumik tamaviaarluni isumaqalersik­kusuppaatigut immisut ittugut siunissamullu neriuutis­saqanngitsugut. Taamaan­ngilarli! Biibilimi paasitin­neqarpugut naassaan­ngitsumik inuusin­naaqqulluta Jehovap ikiorusuk­kaatigut. ‘Inuit tamaasa suujunnaarsitaanatik peqqissiminissamut periarfis­sikkusuppai.’ – Pet 2. 3:9.

⁷ Tassa pileris­susipilunnut akiuussin­naasorin­ngikkutta neriuutaaruk­kuttaluunniit Saatanip kissaatigisaatut eqqarsas­sagaluarpugut. Tamanna paasilluarutsigu aalajaalluta Saatanip akiornissaanut iluaqutigis­savarput. – Pet 1. 5:8, 9.

NAAMMAL­LUINNAN­NGITSUUNITTA QANOQ MISIGITIS­SINNAAGAATIGUT

8. Suup allap sapilersutut neriuutaarut­tutullu misigilersis­sinnaavaatigut? (Tussiaat 51:7) (Aamma “Nassuiaat” takuuk).

⁸ Saataniin­naanngitsup sapilersutut neriuutaarut­tutullu misigilersis­sinnaavaatigut. Aamma ajortip, tassa ajortulioq­qajaasarnitta Adamimit Evamillu kingornussatta, taama misigilersis­sinnaavaatigut.a – Job 14:4; Tussiaat 51:7 atuaruk.

9-10. (a) Adamip Evallu ajortulioreerlutik naammal­luinnan­ngitsun­ngornertik qanoq sunnerneqaatigaat? (Aamma asseq takuuk). (b) Uagut naammal­luinnan­ngitsuunerput qanoq sunnerneqaatigaarput?

⁹ Eqqarsaatigeriaruk ajorti Adamimut Evamullu qanoq sunniuteqarnersoq. Jehovamut naalannginnermik kingorna toqqorput, atisaqan­nginnertillu paasilerlugu timitik assiaqutilersorpaat. Ajorti pissutigalugu ilerasulerput, annilaangalerput, qulalerput kanngusulerlutillu. Taamatut misigiun­naarsin­naanngillat. Soorlu tassa illup iluani sisamaannarnik initalimmi parnaarus­saaqqasut. Ineeqqamit ineeqqamut nikissin­naapput illumiilli anisinnaanatik. Ajortiliunerminnit aniguisin­naanngillat.

¹⁰ Uagut taama ajortigisumik atugaqan­ngilagut. Utertitsis­sutitut akiliut Adamimut Evamullu atunngilaq, uagulli taanna tunngavigalugu minguiar­neqarsin­naavugut minguitsumillu nalunngeqatigin­nissuteqalerluta. (Kor 1. 6:11) Sulili naammal­luinnan­ngitsuugal­larpugut. Taamaattumik tupinnanngilaq misigis­sutsinik nuanniitsunik – soorlu ilerasunnermik, annilaanganermik, qularnermik kanngusun­nermillu – eqqugaasaratta. Ajorti inunnut kunngisut naalakkersuisutut Biibilimi allaatigineqarpoq. “Allaat Adamitut ajortuliun­ngitsunut” taamaappoq. (Rom 5:14) Tamanna nikallor­narsinnaagaluartoq misigisariaqan­ngilagut sapilerluta imaluunniit neriuutaarulluta. Aap, misigissutsit taamaattut ajattorsin­naavagut. Qanoq?

11. Sapilersutut misigigutta Romamiut 6:12 naapertorlugu susinnaavugut?

¹¹ Naammal­luinnan­ngitsuugatta misigisarsin­naavugut pileris­susipiluit akiorsin­naanagit. Soorlulusooq niaqqutsinni oqarfigineqar­tartugut: ‘Saperpat!’ Nipili taanna tusarnaas­sanngilarput. Ilumut taamaaliorsin­naavugut? Aap, Biibilimi allassimavoq ‘ajorti kunngisut naalakkersuitik­kunnaarsin­naagipput’. (Romamiut 6:12 atuaruk). Tassa aalajangersin­naavugut pileris­susipiluit malinniarnagit. (Gal 5:16) Jehovap tatigaluta qularin­ngilluinnarpaa ussernartunut akiuussin­naasugut, tatigin­ngikkunisigummi taamaalioq­qunavian­ngikkaluarpaatigut. (Mos 5. 30:11-14; Rom 6:6; Tes 1. 4:3) Sapinngilagut, pileris­susipilunnut akiuussin­naavugut!

12. Neriuutaaruttutut misigigaangatta suna eqqarsaatigisas­savarput?

¹² Naammal­luinnan­ngitsuugatta eqqarsarsin­naavugut pileris­susipiloqarutta Jehovap assuaris­sagaatigut. Soorlulusooq niaqqutsinni oqarfigineqaqat­taartugut: ‘Neriuutaarupputit!’ Naammal­luinnan­ngissuserpulli taama oqartoq tusarnaas­sanngilarput. Sooq? Ilumuun­ngimmat! Jehovap nalunngilaa ajortiliulluta inunngortugut. (Tuss 103:13, 14) Uagutsinnut tunngasunik ‘sunik tamanik ilisimasaqarami’ nalunngilaa naammal­luinnan­ngissuserput inuttut qanoq sunnerneqaatigisar­neripput. (Joh 1. 3:19, 20) Pileris­susipilunnut nakkaan­nanngikkutta Jehovap isaani minguitsuussaagut. Sooq tamanna qularis­sanngilarput?

13-14. Pileris­susipiloqaraanni imaappa Jehovamit iluarineqarsin­naanani? Nassuiaruk.

¹³ Biibilimi ersersin­neqarpoq pileris­susipiloqarneq eqqunngitsuliornerlu assigiin­ngitsuusut. Tassa pileris­susipiluk aqussin­naanngisatsinnik takkuteriataarsin­naagaluartoq aalajaas­sanerluta eqqunngitsulius­sanerlutaluunniit nammineq aqussin­naavarput. Assersuutigalugu Korintimi kristumiut siulliit ilaat suiaqatimin­noortar­tuusimapput. Paulusi allappoq: “Ilasi taamaas­simagaluarput.” (Kor 1. 6:9-11) Isumaqarpa taamatut pileris­susipiloqarun­naavissut? Ilimananngilaq, taamaaq­qajaanermi misigis­sutsillu taamaattut sakkortugamik. Imminulli aqussin­naallutik pileris­susipiluminnut nakkaan­nanngitsut Jehovamit akuerisaapput minguitsutullu isigineqarlutik. Illit aamma taamatut isigineqarsin­naavutit.

¹⁴ Pileris­susipilummik qanorluunniit ittumik akiugaqaraluaruit ajugaasin­naavutit. Pileris­susipiluit peeruminaas­sinnaagaluartut imminut aqussin­naanissaq ilikkarsinnaavat ‘timivit eqqarsaativillu piumasaattut’ iliornaveersaarlutit. (Ef 2:3) Pileris­susipilunnut akiuunniarninni suut iluaqutigisin­naavigit?

USSERNARTUMUT QANOQ NAKKAAN­NARNAVEERSAARSIN­NAASUTIT

15. Sooq sanngiis­sutitsinnut tunngatillugu imminut salloqit­tannginnissaq pingaaruteqarpa?

¹⁵ Ussernartunut nakkaan­nassanngikkaanni sunik sanngiis­suteqarnermut tunngatillugu ‘eqqunngitsumik tunngavilersuilluni’ imminut salloqit­tannginnissaq pingaaruteqarpoq. (Jaak 1:22) Utoqqatsis­sutissarsioruit imminut artorsar­tinnerussaatit, assersuutigalugu ajornar­torsiutit suunngin­nerarlugu eqqarsaruit: ‘Allat uanniit imigissar­tortarnerusarput.’ Imaluunniit allanik pisuutitsiniaruit ima eqqarsarlutit: ‘Nuliama soqutiginerullunga asanerusimasuuppanga pornografiimik isiginnaar­nissamut ussernar­torsiorsimanavian­ngikkaluarpunga.’ Eqqunngitsulior­nissamut utoqqatsis­sutissarsioqinak, eqqarsaatin­niluunniit naamik. Illit iliuutsitit akisussaaf­figivatit. – Gal 6:7.

16. Eqqortulior­nissannut qanoq aalajangiusiman­ninnerulersinnaavit?

¹⁶ Sanngiis­sutitit nassuerutigiin­narnagit pileris­susipilunnut akiuunninni aalajangiusiman­ninneruler­tariaqarputit. (Kor 1. 9:26, 27; Tes 1. 4:4; Pet 1. 1:15, 16) Eqqarsaatigiuk suna ussernar­nerpaatit­tarnerit. Imaassinnaavoq aalajangersimasumik ussernar­torsior­nerusartutit imaluunniit ullup ingerlanerani piffissami aalajangersimasumi ussernar­torsioriaan­naanerusartutit. Assersuutigalugu qasugaangavit unnunnerusuk­kulluunniit nakkaan­narnissat ilimanar­nerusarpa? Piareersarit ussernar­torsior­nermilu qanoq iliornissannik pilersaarusiorlutit. Ussernar­torsiulin­nginnermi taamaaliornissaq pitsaanerusarpoq. – Uss 22:3.

17. Juuserfi qanoq ilinniarfigisin­naavarput? (Mosesimik 1. 39:7-9) (Aamma assit takukkit).

¹⁷ Eqqarsaatigeriaruk Juuserfi qanoq qisuariarnersoq Potifarip nuliata atoqatigeriaraluarmani. Ingerlaannaq aalajangersimal­luinnarluni itigartippaa. (Mosesimik 1. 39:7-9 atuakkit). Tamatumannga suna paasisin­naavarput? Suliluunniit Potifarip nulianit qaninniarujoorfigineqarnani Juuserfip nalunngereerpaa allasiorneq qanoq isumaqarfiginerlugu. Aamma illit ussernartup takkutin­nginnerani eqqortuliornissat aalajangiusimanerulersinnaavat. Taamaalillutit eqqortuliornissat eqqarsaatikkut sungiusareerakku aalajangiusiman­nilluin­narnissat sapernan­nginnerutissavat.

‘IMMINUT MISILITTUARIT’

18. Pileris­susipilunnut akiuunnermi aamma qanoq iliorsinnaavit? (Korintimiunut 2. 13:5)

¹⁸ Pileris­susipiluit malillugit iliussan­ngikkuit ‘imminut misilit­tuassaatit’, tassa qanorpiaq ingerlanerlutit paasiumallugu imminut misissor­tuartariaqarputit. (Korintimiunut 2. 13:5 atuaruk). Akuttun­ngitsumik eqqarsaatitit iliuutsitillu misissortakkit pisariaqar­tumillu allannguisarlutit. Ussernartumut nakkaan­nanngik­kaluaruil­luunniit naameer­niarusaar­tarnerlutit eqqarsaatigisaruk. Paasigukku nangaalaarsimallutit nikallus­sanngilatit. Eqqarsaatigiin­nassavat tullissaani qanoq pitsaanerusumik iliorsin­naanerlutit. Uku eqqarsaatigikkit: ‘Eqqarsaatipalaat piipallan­nissaannut pikkorin­nerulersin­naavunga? Aliikkutassat toqqakkakka pissutigalugit ussernartut itigartin­nissaat sapernar­tinnerusarpara? Kanngunartunik nuisoqaraangat alapallat­tarpunga? Upperaara Jehovap najoqqutassiai uannut iluaqutaajuaannartut, maleruar­niarlugit imminut aqunnissaq pisariaqarluin­naraangal­luunniit?’ – Tuss 101:3.

19. Annikitsutigut aalajangiinerlunnerit qanoq kinguneqarsin­naappat?

¹⁹ Imminut misissorninni pingaaruteqarpoq eqqaamas­sallugu ‘uummatip tamanit annerusumik tatigisas­saanngitsuunera’. (Jer 17:9) Jiisusimi oqarpoq “eqqarsaatit ajortut uummammit [pisartut]”. (Mat 15:19) Uummatitta salloqit­tarsinnaavaatigut. Assersuutigalugu pornografiimik isiginnaar­tarunnaarsimasoq piffissap ingerlanerani eqqarsalersinnaavoq tiingasulersaarutit atisaqan­ngitsunik ersittoqan­ngitsut isiginnaarunigit ajornavian­ngitsoq. Aamma imaassinnaavoq eqqarsartoq: ‘Piviusun­ngortin­ngikkaluarukku eqqunngitsulior­nissara takorluuin­nartarukku ajornavianngilaq.’ Taamaalior­nermigulli ‘pileris­susipiluit malillugit iliuuseqar­nissani’ uummammigut pilersaarusiorpaa. (Rom 13:14) Illit qanoq taamaalior­naveersaarsinnaavit? Eqqunngitsulior­nissamut utoqqatsis­sutissarsioqinak. Annikitsutigullu aalajangiinerlun­naveersaarit, tamannami annertunerusutigut aalajangiinerlunnermik kinguneqarsin­naammat.b

20. Suna qilanaarisin­naavarput, maannakkullu qanoq ikiorneqar­tarpugut?

²⁰ Sammeriik­katsitut Jehova ikiortigalugu ussernartut itigartis­sinnaavagut. Utertitsis­sutitullu akiliut pissutigalugu paratiisissami naassaan­ngitsumik inuunissamik neriuuteqarpugut. Taamanik­kussamut minguil­luinnartunik eqqarsaateqarlutalu uummateqarluta Jehova kiffartorfigis­sallugu qanoq nuanner­tigissanersoq takorlooriaruk! Taamaat­toqannginnerani eqqaamasariaqarparput pileris­susipilunnut akiuunnitsinni neriuutaaruttutut sapilersutullu misigisariaqarnata. Jehovami ikiortigalugu ajugaasin­naavugut!