Soqutiginnittut piaarnerpaamik ikiukkit

1. Inuit oqaluus­siffigigaangatsigit ilaat qanoq qisuariartarpat? (Apustilit Suliaat 13:47, 48; 16:14, 15)

KRISTUMIUT siulliit tusarliussaat tusaraangamikku taamani inuit amerlasuut akuerisarpaat. (Apustilit Suliaat 13:47, 48; 16:14, 15 atuakkit). Nalitsinni aamma oqaluus­siffigisar­takkatta ilaasa nutaarsiassat nuannersut ingerlaannaq killitsis­sutigisarpaat. Allat aallaqqaammut soqutigin­ninngik­kaluarlutik kingusin­nerusukkut paasisaqar­nerorusulertarput. ‘Eqqortumik pissutiginiagaqartut’ oqaluus­sinitsinni naapikkaangatsigit susassaagut?

2. Oqaluus­sinerput naatsiivilerinermut qanoq assingua?

² Assersuuteqariarta. Oqaluus­sinerput naatsiivilerinermut assersuun­neqarsinnaavoq. Naatitat ilaat inerissimappat piaarnerpaamik nusullugu tiguneqassaaq. Aammali tamatuma saniatigut naatsiiviup ilaani allami naatitassaq ikkussor­neqarsinnaavoq issorlu manngerpat assallatser­neqarsin­naalluni. Tamatumunnga assingusumik tusarlius­satsinnik tusarnaarusuttumik naapitaqarutta piaarnerpaamik Jehovamik ilisarisiman­nilernissaanut ikiorusupparput. Tamatumalu saniatigut tusarlius­satsinnik ingerlaannaq akuersin­ngitsut soqutigin­ninnerulersin­niarlugit ikiorniar­tuarpagut. (Joh 4:35, 36) Naliliisin­naassuseqarutta aalajangersin­naassavarput oqaluus­satsinnut pitsaanerpaamik qanoq periaaseqas­sanerluta. Sammeriartigu inuit Guuti Biibililu pillugit ilinniar­nissamut piareersimasut oqaloqatigeq­qaarneranni susassanerluta. Aamma sammissavarput taakku anersaakkut siumukar­tuarnissamut qanoq ikiorsin­naanerigut.

PAASISAQAR­NERORUSUTTOQ NAAPIKKUTSIGU

3. Oqaluus­sinitsinni soqutigin­nittumik naapitaqarutta susinnaavugut? (Korintimiunut 1. 9:26)

³ Oqaluus­sinitsinni soqutigin­nittumik naapitaqarutta Jehovamut ikinngutaaler­niassammat taanna pillugu ilinniar­nissamut piaarnerpaamik ikiorusupparput. Taamaattumik aatsaat naapikkaluarlugu Biibilimik pikkoris­sarnermik neqeroorfiginissaanut ataatsimiin­nitsinnullu qaaqqunissaanut tunuarsimaas­sanngilagut. – Korintimiunut 1. 9:26 atuaruk.

4. Ingerlaannaq Biibilimik misissueqateqar­nissamut piareersimasumik naapitaqartoq oqaluttuariuk.

⁴ Biibilimik pikkorissarneq neqeroorutigiuk. Oqaluus­sinitsinni naapitatta ilaat immaqa Biibilimik pikkoris­sarnissamut ingerlaannaq piareersimasarput. Assersuuteqariarta. Canadami sisaman­ngornermi arnap inuusuttup atuagaasivik angallattagaq ornikkamiuk quppersagaq Naassaan­ngitsumik pilluarsin­naavutit! tiguaa. Nalunaajaasup oqarfigaa quppersakkamik tamatuminnga pisut akeqanngitsumik Biibilimik pikkoris­sarnermik neqeroorfigineqartartut. Arnap taassuma pissangaginerarpaa, attaveqatigiik­kumappullu. Ulloq taanna Nalunaajaasumut allappoq pikkorissarneq apersuutigalugu. Nalunaajaasullu allaffigaa weekendimi ornissin­naallugu. Arnaq akivoq: “Aqagumi? Freerpunga.” Aqaguani Biibilimik misissueqatigiipput arnarlu weekendimi tamatumani ataatsimiinnermut ilaaqqaarpoq. Paasisani nuannarai anersaakkullu siumukapal­lalluni.

5. Biibilimik pikkoris­sarnermik neqerooruteqarnermi qanoq naliliisin­naassuseqarsin­naavugut? (Aamma assit takukkit).

⁵ Soorunami inuit ilaannaat arnatut taassumatut Biibilimik pikkoris­sarnissamik ingerlaannaq akuersisarput. Ilaat tusarliussatta sunniuteqarluarsin­naanera paasiumallugu piffissaqar­nerusariaqarput. Immaqa aallaqqaammut taakkua soqutiginartitaat eqqartorsin­naavarput. Isumalluarfigiuarutsigit inuttullu soqutigin­ninnermik ersersitsivigiuarutsigit immaqa piffissap sivikitsup ingerlanerani Biibilimik misissueqatigisalersin­naassavagut. Biibilimik pikkorissarneq qanoq neqeroorutigisin­naavarput? Qatanngutit arlallit Biibilimik misissueqateqar­talernermik pikkorif­feqartut taama aperineqarput. Qanoq oqarnersut paasiniariartigu.

6. Biibilimik pikkorissarneq qanoq soqutiginarsarsin­naavarput?

⁶ Oqaluus­sisartut pionerillu aperineqartut nassuiaapput nunat ilaanni pitsaanerusartoq Biibilimik pikkoris­sarnermik neqerooruteqarnermi oqaatsit uku atunngikkaanni: “Misissueq­qissaarneq”, “atuaqqis­saaqatigiinneq”, “Biibilimik pikkorissarneq” imaluunniit “ilinniar­tissinnaavakkit”. Paasisimavaat ima oqaraanni pitsaanerusartoq: “Eqqartueqatigiis­sinnaavugut”, “oqaloqatigiis­sinnaavugut” imaluunniit “Biibili pillugu paasisaqar­nerusin­naavutit”. Oqaloqatigeeq­qissinnaanias­sagassi ima oqarsin­naavutit: “Inuppassuit tupigusuutigisarpaat paasillugu inuunermi apeqqutit pingaarutillit Biibilimi akissutis­sarsineqarsinnaasut.” Imaluunniit: “Biibili upperisarsiornermut tunngaan­nanngilaq, aammali ulluinnarni atorsin­naasatsinnik siunnersuuteqarpoq.” Taava ima oqarsin­naavutit: “Minutsialuit ingerlanerinnaanni illit iluaqutigisin­naasannik paasisaqarsin­naavutit.” Biibilimik pikkoris­sarnissamik neqerooruteqarsin­naavutit oqaatsit “isumaqatigiis­suteqassaagut” imaluunniit “sapaatip-akunneri tamaasa” atornagit, taakkumi atorukkit imaassinnaavoq inuit pisussaasutut misigilersut.

7. Ataatsimiigiaq­qaartut ilaat tamanna qanoq sunnerneqaatigaat? (Korintimiunut 1. 14:23-25)

⁷ Ataatsimiinnernut qaaqqusigit. Apustilip Paulusip nalaani ataatsimiigiaq­qaartut ilaasa paasivaat kristumiut upperisaat ilumoortuusoq. (Korintimiunut 1. 14:23-25 atuakkit). Aamma nalitsinni taamaat­toqarsinnaavoq. Soqutigin­nilerlaat ataatsimiinnernut najuuttaleraangamik siumukapal­lannerusarput. Taava qaqugu ataatsimiinnernut qaaqqusissaagut? Atuakkami Naassaan­ngitsumik pilluarsin­naavutit!-mi ilinniagassaq 10-mi ilinniartoq ataatsimiinnernut qaaqquneqarpoq. Ilinniagassalli tamatuma samminissaanut utaqqisariaqan­ngilatit. Oqaloqatigin­neqqaarnermi weekendimi ataatsimiinnermut qaaqqusisin­naavutit. Immaqa tamanut oqalugiaat qanoq qulequtaqarnersoq eqqaasinnaavat, imaluunniit allaaserisami atuaqqis­saarutissami eqqartor­neqartussat eqqaasin­naavatit.

8. Ataatsimiinnermut qaaqqusigutta qanoq oqarsin­naavugut? (Esaja 54:13)

⁸ Soqutiginnittoq qaaqqugukku nassuiaas­sinnaavat ataatsimiinnigut naalagiarnermit allaanerusut. Arnaq Biibilimik misissueqatigineqartartoq Napasuliaq Alapernaarsuiffimmik atuaqqis­saaqatigiinnermut najuuteq­qaarami ilinniar­titsisuminut ima aperivoq: “Aqutsisup najuuttut atii tamaasa nalunngilai?” Biibilimik ilinniar­titsisuata nassuiaappaa ilagiin­niittut ilaquttatsitut isigisaratsigit atii eqqaamaniarsarisarigut. Arnaq akivoq tamanna oqaluffimmi misigisar­takkaminit allaanerul­luinnartoq. Aamma nassuiarsinnaavat ataatsimiinnitta suna siunertarineraat. (Esaja 54:13 atuaruk). Jehova guutisiorfigiumallugu, taassumannga ilinniar­tinneqarumalluta qiimmas­saqatigiik­kumallutalu ataatsimiit­tarpugut. (Hebr 2:12; 10:24, 25) Taamaattumik ataatsimiinnigut aaqqissuus­saalluartumik ileqqulersuutitaqan­ngitsumillu ingerlan­neqartarput. (Kor 1. 14:40) Aamma Biibili ulluinnarni qanoq atorsin­naagipput ilinniar­titsissutigineqartarpoq. Ataatsimiit­tarfigut ilinniar­titsineq siunertaralugu sanaajupput. Politikkikkut akuliunneq ajoratta partiit arlaannaal­luunniit siuarsarneq ajorparput. Aamma nammineq isummagut oqallisigineq ajorpagut. Pitsaassaaq soqutiginnittup ataatsimiigiaqatigin­nginnerani video Naalagaaf­filersaarfimmi susoqartarpa? takugussiuk, taamaasilluni qanoq pisoqassasoq nalussanngilaa.

9-10. Qaaqqusarput ataatsimiigiar­nissaminut nangaappat qanoq oqarfigisin­naavarput? (Aamma asseq takuuk).

⁹ Inuit ilaat ataatsimiigiarusun­ngillat isumaqaramik taamaaliorunik Jehovamik Nalunaajaasun­ngussallutik. Taama isumalik oqarfigisinnaavat soqutiginnittut Nalunaajaasuun­ngitsut peqataanatik tusarnaagin­narsinnaasut. Ilaqutariit, aamma mikisunik meerallit, tikilluaq­qusaangaarput. Ataatsimiin­nitsinni meeqqat immikkoor­tillugit ilinniar­tinneqarneq ajorput. Angajoq­qaatilli issiaqatigalugit tusarnaartarput. Taamaattumik angajoqqaat nalunngilaat meeqqat kikkut ilagineraat aamma qanoq ilinniar­tinneqarnersut. (Mos 5. 31:12) Aningaasanik katersuisitsineq ajorpugut. Jiisusimmi peqqussutaa una maleruar­tarparput: “Akeqanngitsumik tunineqarassi akeqanngitsumik tunisissaasi.” (Mat 10:8) Aamma eqqaasinnaavat ataatsimiigiartut akisuunik atisaqar­tariaqan­ngitsut, Guutimmi inuup isikkua pinnagu uummammiugisai pingaar­tinneruai. – Sam 1. 16:7.

¹⁰ Qaaqqusat ataatsimiigiarpat sapinngisannik tikilluaq­qusaasutut misigitiguk. Utoqqaanertat ilaannut oqaluus­sisartunullu allanut ilisaritiguk. Inussiar­nisaarfigineqaruni tikilluaq­qusaasutullu misigiguni ataatsimiigiaq­qinnissaa ilimanar­nerussaaq. Nammineq Biibileqan­ngippat ataatsimiinnerup nalaani illit Biibilinni malinnaatittaruk. Taamaalillutit oqalugiaammik ilagiittullu atuaqqis­saaqatigiinnermik paasinnin­nissaanut ikiorsin­naassavat.

BIIBILIMIK ILINNIAR­TITAQALERUIT

11. Ilinniartitat ataqqillugu qanoq ersersis­sinnaaviuk?

¹¹ Biibilimik ilinniar­titaqaleruit suut eqqumaf­figisas­savigit? Ilinniar­titavit ulapissin­naanera paasillugu ersersittaruk. Assersuutigalugu isumaqatigiis­simagussi piffissaq eqqorlugu takkuttarit, najugaqarfigisanni piffissamik eqqorluaaneq pingaar­tinneqan­ngikkaluarpal­luunniit. Pitsaassaaq misissueqatigiinnersi siulleq sivikitsuutikkukku. Oqaluus­sisartut misilit­tagaqarluartut oqarsimapput taamaaliorneq pitsaanerusartoq allaat ilinniartitat ingerlaannaq paasisaqar­nerorusuk­kaluartoq. Eqqaamajullu oqaluppal­laassan­ngitsutit. Ilinniartitat oqaaseqar­nissaanut periarfis­sittaruk. – Uss 10:19.

12. Ilinniar­titaqaler­ninniilli suna anguniagarissaviuk?

¹² Biibilimik ilinniar­titaqaleruit aallaqqaammulli anguniagarissavat Jehovap Jiisusillu ilisarisimaler­nissaannut asalernis­saannullu ikiornissaa. Taamaaliorsin­naavutit Guutip oqaasia atortarukku nammineq isummat Biibililuunniit pillugu qanoq ilisimasaqar­tiginerit oqaluttuarinagu. (ApS 10:25, 26) Apustilip Paulusip ilinniar­titsinermini Jiisusi Kristusi pingaar­nerpaatittarpaa. Taannami aqqutigalugu Jehova pillugu ilinniagaqangaarsin­naavugut. (Kor 1. 2:1, 2) Paulusip aamma nassuiarpaa Biibilimik ilinniar­tinneqartut kristumiutut pissuserineqar­tussanik ineriar­tortitsinis­saannut ikiornissaat qanoq pingaaruteqar­tigisoq. (Kor 1. 3:11-15) Pissuserineqartussat taakku ilaatigut tassaapput upperneq, ilisimassuseq, naliliisin­naassuseq Jehovamillu mianerinninneq. (Tuss 19:10, 11; Uss 3:13-15; Pet 1. 1:7) Taakkulu kuultimut, sølvimut ujaqqanullu erlinnartunut assersuun­neqarsin­naapput. Paulusi ilaarsinnaavat ilinniartitat upperluar­tunngor­nissaanut Ataataminullu qilammiusumut asannittumut Jehovamut ikinngutaaler­nissaanut ikiorukku. – Kor 2. 1:24.

13. Ilinniar­titatta ikiornerani qanoq naammagit­tarlutalu paasinnit­tuusinnaavugut? (Korintimiunut 2. 10:4, 5) (Aamma asseq takuuk).

¹³ Jiisusi ilaarsinnaavat ilinniar­titsininni naammagit­tartuunikkut paasinnit­tuunikkullu. Ilinniar­titavit kanngusuutigisin­naasaanik apereqinagu. Sammisassi ilaat paasiuminaatsippagu akueriuminaatsip­paguluunniit unitsik­kallarlugu sammisaq taanna kingusin­nerusukkut uterfigisin­naavarsi. Ilinniar­titsissutinik Biibilimeersunik upperin­ninnissaanut pinngitsaaliniarsaris­sanngilarput. Eqqarsaatigil­luarnis­saanulli uummammiugiler­nissaanullu piffissaqar­tittassavarput. (Joh 16:12; Kol 2:6, 7) Biibilimi upperisat eqqunngitsut ‘pallittaalisalianut qajannaatsunut’ aserortigas­satsinnut assersuun­neqarput. (Korintimiunut 2. 10:4, 5 atuakkit). Ilinniar­titavit sivisuumik upperisimasani imaalial­laannaq upperiun­naarnavianngilai. Taamaattumik allamik pallittaalisalior­nissaanut, tassa Jehovamik tatigin­ninnissaanut, ikioqqaar­tariaqarparput. Taava nutaamik upperisaqaler­nissani ajornan­nginnerutissavaa. – Tuss 91:9.

SOQUTIGINNITTOQ ATAATSIMIIGIARPAT

14. Soqutiginnittut ataatsimiigiartut qanoq pisassavagut?

¹⁴ Jehovap naatsorsuutigaa kinaassusersiornata inuit tamaasa ajunngitsumik pisassagigut – apeqqutaatinnagu sumiuunerat, kulturiat, piitsuunersut pisuujunersul­luunniit. (Jaak 2:1-4, 9) Soqutiginnittut ataatsimiigiartut qanoq asanninnermik ersersitsivigisin­naavagut?

15-16. Ataatsimiigiartut qanoq tikilluaq­qusaasutut misigitis­sinnaavagut?

¹⁵ Ataatsimiigiartut ilaat immaqa alapernaallutik allamiluunniit najugalimmit ataatsimiigiaq­quneqaramik aggertarput. Taamaattumik ataatsimiigiartoq ilisarin­ngikkukku ornillugu tikilluaqqujuk. Inussiar­nersuugit ingattarserlutilli tikilluaq­qusinikkut peqqusiileqitin­naveersaaruk. Issiaqatigiumajuk, aamma Biibilinni Biibililersaarutin­niluunniit malinnaatiguk imaluunniit nammineq pissaanik tunillugu. Imaassinnaavoq ataatsimiigiartut ilaat pissangalaartut. Qanoq toqqissial­latsissin­naavagut? Angut ataatsimiigiartoq qatanngummut tikilluaq­qusisumut oqarpoq atisaris­saannginnini peqqusiileqis­sutigalugu. Qatanngutip angutip oqarfigaa atisani peqqusiileqis­sutigisariaqan­ngikkai Jehovallu Nalunaajaasui inuttulli allatut ittuusut. Qatanngutip taassuma oqaasii angutip, kingusin­nerusukkut imermut morsutsin­neqartup, puiunngisaannarpai. Qatanngutitut taassumatut soqutigin­ninnermik ersersitsinissaq pingaaruteqarpoq. Unali eqqaamas­savarput: Susassarin­ngisatsinnik oqaloqatigisat­taluunniit peqqusiileqis­sutigisin­naasaanik aperissan­ngilagut. – Pet 1. 4:15.

¹⁶ Oqaloqatigiin­nitsinni, akissuteqar­nitsinni qaqisarfim­miilluunniit eqqartuinitsinni Nalunaajaasuun­ngitsunik taakkualuunniit upperisaannik ataqqin­nittumik eqqartuinitsigut ataatsimiigiartut tikilluaq­qusaasutut misigitis­sinnaavagut. Ajuallan­nartumik oqaaseqar­naveersaarit, kissaatigin­ngilarpummi oqaatsigut pissutigalugit ataatsimiigiaq­qikkusus­sanngitsut. (Tit 2:8; 3:2) Assersuutigalugu upperisaat pillugit nikassaataasumik oqaaseqarusun­ngilagut. (Kor 2. 6:3) Ingammik qatanngutit angutit tamanut oqalugiartartut tamanna eqqumaf­figissavaat. Aamma oqaatsinik oqariar­taatsinil­luunniit Nalunaajaasuun­ngitsut tusarnaartut paasiuminaatsis­sinnaasaannik nassuiaasarnikkut innimigisin­naavaat.

17. ‘Eqqortumik pissutiginiagaqartut’ oqaluus­sinitsinni naapikkaangatsigit suna anguniagarisarparput?

¹⁷ Oqaluus­sinerput ullut tamaasa nukingin­narnerujar­tuinnarpoq. Inuillu “[eqqortumik] pissutiginiagaqarlutik naassaan­ngitsumik inuuneqalerusuttut” suli amerlanerusut naapittarpagut. (ApS 13:48) Biibilimik pikkoris­sarnissamik neqeroorfiginis­saannut ataatsimiin­nitsinnul­luunniit qaaqqunis­saannut tunuarsimaas­sanngilagut. Taamaalior­nikkummi inuunermut aqqutik­kuulernis­saannut ikiussavagut. – Mat 7:14.