Jehovap ilumoortumik nuannaalersis­sinnaavaatigut

1-2. (a) Nalitsinni inuppassuit qanoq misigisarpat? (b) Allaaserisami suna sammissavarput?

INUPPASSUIT pilluarusullutik sapinngisaminnik iliuuseqar­tuartarput iluatsinnerli ajulertarlutik. Aliasuttartut imaqanngitsutullu misigisartut amerlaqaat. Jehovamut kiffartortut aamma taama misigisin­naapput. “Ulluni kingullerni” inuugatta ‘pissutsit anigoruminaal­lutillu erloqinartarput’. – Tim 2. 3:1.

² Allaaserisami matumani sammissavagut suut nuannaarun­naassutigisin­naagigut qanorlu nuannaaq­qilersin­naasugut. Sammeqqaas­savarpulli pillualivin­nissatsinnut kimit ikiorneqarsin­naasugut.

JEHOVAP PILLUALIVIN­NISSATSINNUT IKIORSIN­NAAVAATIGUT

3. Pinngor­titarsuaq Jehova pillugu qanoq ilinniarfigaarput? (Aamma assit takukkit).

³ Jehova pilluar­tuaannartuuvoq, kissaatigaalu uaguttaaq pilluarlutalu nuannaas­sasugut. Tamanna pinngor­titarsuarmit ersersin­neqarpoq. Nunarsuarput kusanartoq, qalipaaterpassuit nerisas­sarpassuillu mamartut eqqarsaatigeriakkit. Aap, Jehovap asangaarpaatigut! Kissaatigaalu inuuneq nuannaarutigis­sagipput.

Nagguaatsup piaraa: Image © Romi Gamit/Shutterstock; isarukitsut piaraat: Vladimir Seliverstov/500px via Getty Images; savaasaaqqat: Rita Kochmarjova/stock.adobe.com; aarluarsuit marluk: georgeclerk/E+ via Getty Images

4. (a) Sooq inuit naalliut­taraluartut Jehova nuannaar­tuarsinnaava? (b) Jehovap qanoq ikiortarpaatigut? (Tussiaat 16:11)

⁴ Jehova ‘Guutiuvoq pilluartoq’, taamaak­kaluartorli nunarsuarmi aliasuutit anniaatillu arajutsisanngilai. (Tim 1. 1:11) Nalunngilaa ajornar­torsiutit atuukkallartut, aalajangereerpaami qaqugorpiaq atuukkun­naarsin­niarlugit. Taamaattumik nuannaar­neranut akornutaan­ngillat. Tamanik aaqqeeq­qinnissaminut naammagit­tarluni utaqqivoq. Aqqusaakkagut Jehovap paasisinnaavai ikiorusullutalu. Taamaaliorporlu tunissummik tupinnangaartumik, tassa nuannaarnermik, tunigamisigut. (Tussiaat 16:11 atuaruk). Maanna sammeriartigu sooq Jiisusi nuannaar­tuunersoq.

5-6. Sooq Jiisusi pilluarpa?

⁵ Jiisusi Jehovap pinngor­titaani tamani pilluar­nerpaajuvoq. Sooq taama oqartoqarsinnaava? Pissutaasut uku marluk eqqarsaatigeriakkit: (1) ‘Guutimut takussaan­ngitsumut assingugami’ angusisarluinnarpoq. (Kol 1:15; Tim 1. 6:15) (2) Jehova, nuannaarnermut aallaaviusoq, sivisunerpaamik najornikuuaa.

⁶ Aamma Jiisusi Jehovap piumasaatut iliortuaannarami nuannaar­tuarpoq. (Uss 8:30, 31; Joh 8:29) Tamatumalu kingunerisaanik Ataataminit tulluusimaarutigineqarpoq. – Mat 3:17.

7. Qanoq pillualersin­naavugut?

⁷ Jiisusitulli Jehovamut pillualivitsitsisartumut attaveqarluarnikkut pillualersin­naavugut. Jehova ilisarisimanerujar­tortillugu ilaarnerujar­tortillugulu nuannaar­nerulissaagut. Nuannaarutigisarpaguttaaq Jehovap piumasaatut iliuuseqarneq uagutsinnillu iluarin­ninneranik paasinninneq.a (Tuss 33:12) Taavami ilaannikkut tamatigul­luunniit misigigutta nuannaarnata? Isumaqarpa Jehovap iluarin­ngikkaatigut? Naamerluinnaq! Naammal­luinnan­ngitsuunerput pissutsillu atukkagut pissutigalugit tamatta nikallungasin­naavugut, aliasus­sinnaavugut isumatsaq­qasinnaallutalu. Jehovallu paasisarpaatigut. (Tuss 103:14) Suut nuannaar­nitsinnut akornutaasin­naanersut aamma qanoq nuannaaq­qilersin­naanersugut maanna sammeriartigit.

QANOQ NUANNAAQ­QILERSIN­NAASUTIT

8. Inuunermi ajornar­torsiutit qanoq sunnerneqaatigisin­naavagut?

⁸ Inuunermi ajornar­torsiutit. Nuannaarun­naassutaasinnaasut ilagaat malersugaaneq, aningaasatigut ajornar­torsiorneq, nappaateqarneq, utoqqalineq pinngor­titamilu ajunaar­nersuarnik eqqugaaneq. Taamaat­toqartillugu nikallungalersin­naavugut, ingammik pisoq allanngor­tissinnaan­ngikkaangatsigu. Biibilimi allassimavoq nikallunganitsinni misigisin­naasugut nuannaaleq­qissinnaanata. (Uss 15:13) Utoqqaanertaq ukiut sisamat ingerlanerini angajuminik angajoq­qaaminillu toqukkut annaasaqartoq ima oqarpoq: “Kiserliorlungalu kimilluunniit ikiorneqarsin­naanngitsutut misigisimaqaanga. Angajoqqaakka angajoralu toqunngin­neranni piffissaqarfiginerorusuk­kaluarpakka. Isumagisas­sarpassuaqaramali taamaaliorsin­naannginnama aliasuutigeqaara.” Aap, inuunermi ajornar­torsioraangatta timikkut misigis­sutsikkullu nukissaaruttutut misigisarsin­naavugut.

9. Qanoq nuannaaq­qilersin­naavugut? (Jeremia 29:4-7, 10)

⁹ Qanoq nuannaaq­qilersin­naavugut? Allanngor­tissinnaan­ngisatta isumakuluutigiun­naarnerisigut inuunermilu nuannersut qujamasuutiginerisigut nuannaaleq­qissinnaavugut. Inuppassuit isumaqarput aatsaat suna tamarmi ingerlal­lualeraangat nuannaalivit­toqarsinnaasoq. Taamaan­ngilarli. Assersuutigalugu itsaq juutit Babylonnimut aallarussaasut eqqarsaatigeriakkit. Jehovap kissaatigaa nunami allami pissutsit atulikkatik imaannaan­ngikkaluartut isumalluarfigalugit atussagaat. (Jeremia 29:4-7, 10 atuakkit). Ilinniutissartaa sunaava? Qanorluunniit atugaqaleraluaruit inuunermi nuannersut maluginiartakkit. Eqqaamajullu Jehovap ikiorusut­tuaannaraatit. (Tuss 63:8; 146:5) Effie, ajutoornermi kingorna pisussin­naajunnaarsimasoq, ima oqarpoq: “Jehovamit, ilaquttannit ilagiinnillu ikiorneqar­torujus­suuvunga. Taamaat­tumillu tunniutiin­nassaguma qujasuitsutut misigisimas­sagaluarpunga. Qujamasunnera Jehovamut ikinngutinnullu takutik­kusukkakku nuannaar­niartarpunga.”

10. Sooq ajornar­torsioraluarluta nuannaarsin­naavugut?

¹⁰ Uagut ilaquttagul­luunniit artornartunik aqqusaagaqaraluarutta nuannaar­tuarsin­naavugut.b (Tuss 126:5) Sooq? Pissutsit atukkagut nuannaar­nitsinnut aalajangiisuun­ngimmata. Maria pioneriusoq ima oqarpoq: “Ajornar­torsioraangatta Jehovap uagutsinnut neriorsuutaasa eqqaamanerisigut nuannaarsin­naavugut. Imaanngilaq qianeq ajortugut misigis­sutsigul­luunniit takutinneq ajorigut. Ataatattali qilammiusup qanorluunniit nalaataqaraluarutta nuannaar­nissatsinnut ikiussavaatigut.” Maannakkut ajornar­torsiorutta eqqaamas­savarput atuukkal­laannartut. Soorlu sissami tumit malinnit ulinneqar­tarlutik tammartin­neqartartut, ajornar­torsiutigut qanittukkut atuukkun­naassapput.

11. Paulusip misigisai qanoq qiimmas­saatigisin­naavigit?

¹¹ Eqqarsaler­toorsin­naavugut ajornar­torsioratta Jehovamit akuerineqarun­naarluta. Taama misigigutta eqqarsaatigisin­naavarput Jehovap kiffai aalajaatsut allat, soorlu Paulusi, aamma ajornar­torsior­tarsimammata. Taanna Jiisusimit nutaarsiassanik nuannersunik “allamiunut, kunnginut Israalillu qitornaanut oqaluus­sisussatut” toqqarneqarpoq. (ApS 9:15) Suliassaavoq pingaarutilerujussuaq! Nalunngilarpulli Paulusi ajornar­torsiuterpas­suaqartoq. (Kor 2. 11:23-27) Ajornar­torsiutai tulleriiaagin­narmata imaappa Jehovamit iluarineqarun­naartoq? Soorunami naamik. Tassami Jehovap ikiuineratiguinnaq Paulusi ajornar­torsioraluarluni pinertusaarsinnaavoq. (Rom 5:3-5) Illit atukkatit eqqarsaatigeriakkit. Naak unamminiagas­sarpassuaqaraluarlutit pinertusaarputit. Taamaattumik qularis­sanngilat Jehovap akuerigaatit.

12. Iliuusererusutagut iliuuserisin­naanngik­kutsigit qanoq pisoqarsinnaava?

¹² Jehovamut kiffartornermi iliuusererusutagut iliuuserisin­naanngik­kutsigit. (Uss 13:12) Jehova asavarput uagutsinnullu iliuuserisimasarpassui qujamasuutigingaarlutigit. Taamaattumik kiffartornermi sapinngisatsinnik iliuuseqarusuppugut. Anguniak­kagulli angujuminaatsik­kutsigit nikallungalersin­naavugut. (Uss 17:22) Holly pioneriusoq oqarpoq: “Kristumiunut Oqaluus­sisartunut Ilinniarfimmi ilinniarusuk­kaluarpunga, nunami allami kiffartorusullunga Ramapomiluunniit sanaartornermi peqataarusullunga. Pissutsilli atukkakka allanngormata anguniakkakka angusin­naajunnaarpakka. Pakatseqaanga. Anguniagarerusutat angusin­naanngikkaanni erloqinartaqaaq.” Ajoraluartumik taama misigisartut amerlaqaat.

13. Qanorluunniit atugaqaraluarutta qanoq piviusorsiortunik anguniagaqarsin­naavugut?

¹³ Qanoq nuannaaq­qilersin­naavugut? Eqqaamajuk Jehovap artukkatsinnik piumaffigineq ajormatigut. Kiffartor­nermilu iliuuserisin­naasagut apeqqutaatinnagit naleqar­tippaatigut. Jehovap kissaatigaa aalajaas­sasugut pisinnaasattalu killeqarnerat eqqaamas­sagipput. (Mika 6:8; Kor 1. 4:2) Jehovamut pingaar­neruvoq qamuuna qanoq ittuunerput. Taamaattumik pisinnaasagut qaangerlugit imminut piumaffigival­laassan­ngilagut.c Pisinnaan­ngisatit pinnagit suulli iliuuserisin­naanerlugit eqqarsaatiginerusaruk. Assersuutigalugu inuusuttumut maligas­saalluarlutillu siunnersuisarsinnaavit, utoqqar­nulluunniit qiimmas­saataallutit? Imaluunniit anguniagarisin­naaviuk ilagiin­niittut arlaannut qiimmas­saataanissat – soorlu pulaarlutit, sianerlutit SMS-erlutil­luunniit? Iliuuserisin­naasatit iliuuserigaangakkit Jehovap nuannarisarpaa. Qularis­sanngilallu nuannaar­nissannut ikiussagaatit. Aamma eqqaamajuk paratiisissami Jehovamut kiffartornermi periarfis­sarpassuaqas­sasutit nuannersunik. Hollyp tamanna qiimmaal­laatigisarpaa, ima oqarpoq: “Nikallungaleraangama eqqarsaatiginiar­tarpara naassaan­ngitsumik inuuneqaler­nissara. Taamanik­kussamullu Jehovap ikiuineratigut taassumunnga iliuusererusutakka tamaasa iliuuserisin­naalissavakka.”

14. Suna aamma nuannaarun­naassutigisin­naavarput?

¹⁴ Imminuinnaq pivallaarneq. Internetikkut inuit nuannaar­niutinik sammisaqar­tuaannarlutik nuannaarpasittut takusarpagut. Taamaattumik isumaqalersin­naavugut soqutigisanik sammisaqarneq, pisiniarfilerineq nunanullu allanut angalanerit pillualivis­sutigisin­naallugit. Taakku immini ajunngik­kaluarput. Jehovammi nuannersorpassuit pinngortippai inuunerput nuannaarutigilersin­naaqqullugu. Inuppassuilli paasisimavaat nuannaarutigisin­naasorisatik nuannaarun­naassutigisarlugit. Eva pioneriusoq ima oqarpoq: “Imminuinnaq salliutikkaanni iluarusutsin­niarluni naammatsinneq ajornartarpoq.” Aap, imminuinnaq pivallaarutta namminerlu kissaatigisagut kisiisa perusullugit imaqanngitsutut misigilersin­naavugut pakatsillutalu.

15. Kunngi Saalumuut qanoq ilinniarfigisin­naavarput?

¹⁵ Kunngip Saalumuup misigisaanit paasivarput imminuinnaq pivallaarneq kingunipiloqartartoq. Nuannaar­niutini assigiin­ngitsuni pilluarneq ujarpaa. Assersuutigalugu mamartorpas­suarnik nerisaqartarpoq, nipilersuutinik tusarnersunik tusarnaartarpoq pigisarpas­suaqalerlunilu. Tamakkuli tamaasa pillualivis­sutiginngilai. Ima allappoq: “Isit isigisaminnik naammatsinneq ajorput, siutillu tusaasaminnik naammatsinneq ajorput.” (Oqal 1:8; 2:1-11) Inuppassuit pillualivis­sutigisorisaat aningaasaasatut ipput. Naleqartutut isikkoqaraluarlutik ilumut naleqan­ngillat.

16. Sooq allanut ajunngitsuliorneq nuannaalis­sutigis­savarput? (Aamma assit takukkit).

¹⁶ Qanoq nuannaaq­qilersin­naavugut? Jiisusi oqarpoq ‘tunisineq tigusinermit pilluar­narnerusoq’. (ApS 20:35) Utoqqaanertaq Alekosimik atilik oqarpoq: “Allat ikiorniarlugit iliuuseqalaar­tarniarpunga. Ikioraangakkit imminut eqqarsaatigineq ajorama nuannaar­tarpunga.” Illit allanut qanoq ajunngitsuliorsinnaavit? Nikallungasumik takusaqaruit qiimmas­sarniarsinnaavat. Ajornar­torsiutai aaqqissin­naanngik­kaluarlugit tusarnaarluarukku, misigin­neqatigigukku kajumis­saarlugulu nanertuutigisani Jehovamut tunniuteq­qullugit tuppallersarsinnaavat. (Tuss 55:23; 68:20) Aamma eqqaasis­sinnaavat Jehovap imminiigin­nanngikkaa. (Tuss 37:28; Es 59:1) Arlaatigullu ikiorumasinnaavat, soorlu iggallugu pisuttuaqatigaluguluunniit. Oqaluus­seqatigiumasinnaavat, nutaarsias­sanimmi nuannersunik oqaluussineq nuannaar­nartuaannarmat. Taamaalillutit ajunngitsuliortaruit illit aqqutigalutit Jehova tuppallersaasinnaavoq. Imminut pinnani allat eqqarsaatiginerunissaat pillualivis­sutaasarpoq. Taamaattumik ajunngitsulior­nissamut periarfis­sarsiortarit! – Uss 11:25.

17. Nuannaarneq ilumoortoq misigis­sagutsigu sussaagut? (Tussiaat 43:4)

¹⁷ Jehovamut qanimut attaveqar­tuarnitsigut nuannaarneq ilumoortoq misigisarparput. Biibilimi Jehova tipaatsuutigisatsitut qiimasuutigisatsitullu allaatigineqarpoq. (Tussiaat 43:4 atuaruk). Tamanna qanorluunniit ajornar­torsioraluarutta toqqissisimas­sutigisin­naavarput. Taamaattumik Jehova ikinngutigiuaruk, taava naassaan­ngitsumik pilluarsin­naassaatit! – Tuss 144:15.