Guutip asanninnera naassaan­ngitsumik atavoq

1-2. Kristumiut amerlasuut suna ajornar­torsiutigisarpaat?

TAKORLOORIARUK anorersuartumi umiatsiaq malissuarnit sumut tamaanga ingerlaar­tinneqartoq. Mallit malillugit ingerlaarsinnaavoq kitsamik kigaaquser­neqanngikkuni. Umiatsiaq kisaq iluaqutigalugu malissuarnit nassataritinnani orfaaval­laartin­neqarnavianngilaq.

² Illit ajornar­torsiutinik anorersuar­tullusooq ittunik nalaataqaruit umiatsiatut anorersuarsiortutut misigisin­naavutit. Misigis­sutsikkut aqussin­naanngisannik aalater­neqangaarsin­naavutit. Jehovap asanninnera annertoq­qusersuineralu qularutigin­ngeqqaariarlugit qularileriataarsinnaavat nalaatatit maluginiarnerai. (Tuss 10:1; 13:2) Immaqa ikinngutivit tuppallersarpaatit iluaallaatigisannik. (Uss 17:17; 25:11) Kingornatigulli qulareq­qilerpat Jehovap ikiorneraatit. Immaqa eqqarsaatigaat Jehovap sussakkeeraatit. Ajornar­torsior­tillutit qanoq kitsamik ‘orfaaval­laarunnaar­tinneqarsinnaavit’? Allatut oqaatigalugu Jehovap asanninnera annertoq­qusersuineralu qanoq tamatigut qularutigin­ngilluin­narsinnaavarput?

3. Tussiaat 31:8 aamma 136:1 naapertorlugit Jehovap asanninnera qanoq allaatigineqarpa, asannit­tuliornermullu tunngatillugu Jehova qanoq maligas­saalluar­nerpaava? (Aamma asseq takuuk).

³ Ajornar­torsiorninni Jehovap ilumoorfigin­nilluni asanninnera eqqaamagukku ‘kisarneqar­tutullusooq’ issaatit. (Tussiaat 31:8; 136:1 atuakkit). Hebræerisut oqaatsimi ‘unneqqaris­sutsimik’ aamma ‘ilumoorsutsimik’ nutserneqartumi pineqarpoq allamut ilumoorfigin­nilluni asannit­tuarneq. Jehova tamatumunnga tunngatillugu maligas­saalluar­nerpaavoq. Biiblimi allassimavoq ilumoorfigin­nilluni asanninnermik “peqangaartoq”. (Mos 2. 34:6, 7) Aamma Jehovap ilumoorfigin­nilluni asanninnera pillugu ima allassimavoq: “Angeqaaq ilinnit torlorfigin­nittunut tamanut.” (Tuss 86:5) Eqqarsaatigeriaruk tamanna qanoq isumaqartoq: Jehovap kiffani upperluartut qimanngisaan­nassavai! Jehovap ilumoorfigin­ninnera eqqaamagukku ajornar­torsiorninni ‘kisarneqar­tutullusooq’ issinnaavutit. – Tuss 23:4.

JEHOVAP UAGUTSINNIK ASANNINNERA – BIIBILIMI ILINNIAR­TITSISSUTIGINEQARTOQ TUNNGAVIUSOQ

4. Biibilimi ilumoortut tunngaviusut ilaannik eqqaasaqarit, aamma nassuaruk sooq taakku upperil­luinnarsin­naallugit.

⁴ Jehovap uagutsinnik asanninnera Biibilimi ilinniar­titsissutigineqartut tunngaviusut ilagigaat eqqarsaatigigutsigu Jehovap asanninnera upperinerulis­savarput. Ilumoortut Biibilimeersut tunngaviusut eqqaaneqaraangata suut eqqarsaatigisarpigit? Ilimanarpoq ilikkakkatit Guutip oqaasianeersut upperisatit pingaarutillit eqqarsaatigisaritit. Assersuutigalugu ilikkarsimavat Guuti Jehovamik ateqartoq, Jiisusi tassaasoq Guutip ernera, toqusimasut tarneqan­ngitsut allamukar­tartumik, nunarsuarlu paratiisin­ngorumaartoq inuit naassaan­ngitsumik inuuffigisassaat. (Tuss 83:19; Oqal 9:5; Joh 3:16; Saqq 21:3, 4) Tamakku upperilerakkit allanit qulalersin­neqarnavian­ngilatit. Sooq? Paasigakku upperisat ilumoortunik tunngaveqartoq. Taamaattumik Jehovap asanninnera ilumoortut Biibilimeersut tunngaviusut ilaattut isigigukku Jehovap ilinnik asannin­neranik qularun­naarnissannut iluaqutigissavat. Sammeriartigu qanoq taamaaliorsin­naasutit.

5. Ilinniar­titsissutigineqartartoq ilumuun­nginnersoq qanoq paasineqarsinnaava?

⁵ Biibilimik misissuisaleravit ilinniar­titsissutigineqartartut ilumuun­ngitsut itigartin­nissaannut suut iluaqutigaagit? Ilimanarpoq upperisimasatit Biibilimi allassimasunut naleqqiukkitit. Assersuuteqariarta: Immaqa upperinikuuat Jiisusi Guutiusoq. Biibilimilli misissuisaleravit immaqa eqqarsarputit: ‘Tamanna ilumut Biibilimi ilinniar­titsissutigineqarpa?’ Allassimaffiit tamatumunnga tunngasut misissoreerlugit paasivat tamanna Biibilimut naapertuutin­ngitsoq. Taava Biibilimi ilinniar­titsissutigineqartoq ilumoortoq una upperilerpat: Jiisusi tassaavoq ‘pinngortitat tamarmik siullersaat’ – tassa ‘Guutip Ernitua’. (Kol 1:15; Joh 3:18) Taamaattorli ilinniar­titsissutigineqartartoq ilumuun­ngitsoq ‘pallittaalisaliatut qajannaatsutut’ issinnaavoq itigartin­nissaalu sapernarsin­naalluni. (Kor 2. 10:4, 5) Ilumoortorli upperilerakku ilumuun­ngitsoq upperileq­qinngisaan­nassavat. – Flp 3:13.

6. Sooq upperil­luinnarsin­naaviuk Jehovap ilumoorfigin­nilluni asanninnera ‘naassaan­ngitsumik atasoq’?

⁶ Jehovap asanninnera pillugu Biibilimi ilinniar­titsissutigineqartumut tunngatillugu assingusumik periaaseqarsin­naavutit. Misilin­neqarninni qularilerukku Jehovap asaneraatit imminut ima aperisin­naavutit: ‘Ilumoorpa Jehovap asanngikkaanga?’ Tussiaat 136:1-imi allassimasoq – allaaserisami matumani qulequtarisarput – eqqarsaatigeq­qissaaruk. Allassimaq­qaarfiit naapertorlugit Jehovap ‘unneqqarissusia’ ilumoorfigin­nilluni asannin­neranik isumaqarpoq. Sooq Jehovap asanninnini ilumoorfigin­nittutut allaatigaa? Sooq Tussiaammi matumani 26-riarluni allassimasoqarpa asanninnera ‘naassaan­ngitsumik atasoq’? Sammeriik­katsitut Jehovap innuttaminik ilumoorfigin­nilluni asanninnera Biibilimi ilinniar­titsissutaavoq ilumoortoq tunngaviusoq, ilumoortut Biibilimeersut tunngaviusut upperisatit allat assigalugit. Taamaattumik eqqarsaleruit Jehovap asasinnaan­ngikkaatit naleqan­ngitsutullu isigigaatit eqqaamassavat tamanna ilumuun­ngilluinnartoq. Salluliuutit akuerisin­naanngisatit allat assigalugit eqqarsaat taanna itigartiguk!

7. Allassimaffiit Jehovap asannin­neranut uppernarsaataasut ilaannik eqqaasaqarit.

⁷ Biibilimi allassimaffiit Jehovap uagutsinnik asannin­neranut uppernarsaataasut amerlaqaat. Assersuutigalugu Jiisusip malinnitsini ima oqarfigai: “Timmiaararpas­suarnit naleqar­neruvusi.” (Mat 10:31) Aamma Jehova innuttaminut ima oqarpoq: “Nakussatsippakkit ikiorlutillu, assannik ajugaasartumik najummivakkit.” (Es 41:10) Aalajangersimal­luinnartumik oqaaseqaataasut maluginiaruk. Jiisusi oqanngilaq: “Imaassinnaavoq timmiaaqqanit naleqar­nerususi.” Jehovalu oqanngilaq: “Immaqa najummis­savakkit.” Ersarissumik oqarput: “naleqar­neruvusi” aamma “najummivakkit”. Misilin­neqarninni Jehovamit asaneqar­nerlutit qularigukku allassimaffiit taamaattut iluaqutigalugit misigis­sutsikkut oqilial­laannarnak asaneqar­ninnulli qularun­naarutigis­savatit. Ilumoortoq uppernarsar­neqarluartoq tamanna eqqarsaatigeq­qissaarukku Jehovamullu tamanna pillugu qinuguit ima allassimasutut oqarsin­naavutit: “Guutip asagaatigut paasillugulu upperaarput.” – Joh 1. 4:16.a

8. Jehovamit asaneqar­nerlutit qularisarukku susinnaavit?

⁸ Taavami Jehovamit asaneqar­nerlutit ilaannikkut suli qularisarukku? Jehova pillugu ilisimasatit asaneqan­ngitsutut misigininnut naleqqiukkit. Misigis­sutsigut allanngorartarput, Biibilimili Jehovap asanninnera pillugu ilinniar­titsissutigineqartoq ilumoorluinnarpoq. Taamaattumik Jehovap uagutsinnik asanninnera qularilerutsigu Biibilimi allassimasoq – soorlu Jehovap pissusiisa pingaar­nersaat tassaasoq asanninneq – ilumuun­nginneras­savarput. – Joh 1. 4:8.

JEHOVAP ASANNINNERA PILLUGU JIISUSIP OQAASII EQQARSAATIGIKKIT

9-10. Jiisusi oqarami Ataatap asagaatigut suna eqqartorpaa? (Johannesi 16:26, 27) (Aamma asseq takuuk).

⁹ Jehovap asanninnera pillugu ilikkagaqar­nerujumalluta Jiisusip ilinniar­titaminut oqaasii uku misissorsin­naavagut: “Ataatammi asavaasi.” (Johannesi 16:26, 27 atuakkit). Versit ataqatigiinnerini erserpoq ilinniartitat tuppallersar­niarlugit taama oqaaseqan­ngitsoq. Sammisaq alla eqqartorpaa – tassa qinuneq.

¹⁰ Ilinniartitat paasitin­neqaqqammerput Jiisusimut qinunatik Jiisusili aqqutigalugu qinusassasut. (Joh 16:23, 24) Tamatuma paasinissaa pingaaruteqarpoq. Jiisusip qilaliarnerata kingorna ilinniartitai immaqa Jiisusimut qinorusus­sinnaapput. Jiisusi ikinngutigigamikku taassumalu asangaarmatik isumaqarsin­naagaluarput Jiisusip qinnutitik tusassagai sinnerlutillu Jehovamut ikioqqussasoq. Jiisusili oqanngilaq taamaaliussasut. Sooq? Ima nassuiaavoq: “Ataatammi asavaasi.” Tassa Jehovap asangaaramisigut qinnutigut tusarnaarusuppai. Ilumoortoq tamanna tassaavoq qinuneq pillugu Biibilimi ilinniar­titsissutigineqartoq tunngaviusoq. Eqqarsaatigiuk tamanna ilinnut qanoq isumaqartoq: Biibilimik misissuinikkut illittaaq Jiisusi ilisarisimalerlugulu asalersimavat. (Joh 14:21) Jehovamulli qinugaangavit ersersittarpat Jiisusip ilinniar­titaminut oqaasii upperalugit. Aap, qularin­nginnakku Jehovap asagaatit taanna tatigalugu qinnuigisinnaavat. – Joh 1. 5:14.

QULALER­NISSAMUT PISSUTAASUT EQQUMAF­FIGIKKIT

11. Jehovap asanninnera qularilerutsigu sooq Saatani nuannaassava?

¹¹ Jehovap asannin­neranut qulalernermut suut pissutaasin­naappat? Immaqa eqqarsassaatit Saatanip taamatut isumaqalersin­niarsarigaatigut. Aap, tamanna tassaavoq pissutaasut ilaat. Diaavulu “iisassarsiorlunilu angalasarpoq”, kissaatigaalu Jehovap asanninnera qularilis­sagipput. (Pet 1. 5:8) Jehovap asangaaramisigut utertitsis­sutitut akiliut tunniuppaa, Saatanilli misigitik­kusuppaatigut tunniussaa tamanna pisinnaan­ngikkipput. (Hebr 2:9) Kisianni Jehovap asanninnera qularilerutsigu kiap iluarissavaa? Saatanip. Kiallu nuannaarutigissavaa misilin­neqarnerit pissutigalugit Jehovamut kiffartorun­naarutta? Aamma Saatanip. Qulalersin­niartarpaatigut Jehovap asagaatigut. Unali eqqarsaatigeriaruk: Kinaana Jehovamit asaneqan­ngitsoq? Saatani! Aap, Saatanip ‘tammartitsiniaasarnerisa’ ilaat tassaavoq uagut Jehovamit asaneqan­nginnitsinnik isumaqalersitsiniaasarnera. (Ef 6:11, q.a.i.) Tamanna eqqaamagutsigu ‘Diaavulup akiornissaa’ aalajangiusimas­savarput. – Jaak 4:7.

12-13. Sooq ajortiliunerput Jehovap asannin­neranik qulaler­nissamut pissutaasinnaava?

¹² Jehovap uagutsinnik asannin­neranik qulalerneq aamma allamik pissuteqarsinnaavoq. Suua? Ajorti kingornussarput. (Tuss 51:7; Rom 5:12) Ajorti pissutigalugu inuit Pinngor­titsisiminnit avissaarsimapput. Aamma isumakkut, misigis­sutsikkut timikkullu ajoquser­neqarsimapput.

¹³ Ajortiliunerput pissutigalugu ilerasut­tarpugut, annilaangasarpugut, isumakulut­tarpugut kanngusut­tarlutalu. Ajortulioraangatta taamatut misigisarpugut. Aammali taamatut misigisarsin­naavugut ajortiliunerput – naammal­luinnan­ngissuserput Guutip siunertarin­ngilluinnagaa – eqqarsaatigigaangatsigu. (Rom 8:20, 21) Soorlu biilip assakaasua qaarnikoq pissusis­samisut ingerlasin­naanngitsoq uaguttaaq naammal­luinnan­ngitsutut, piukkun­naaterput pissusis­samisut ‘ingerlal­luarsin­naanngilaq’. Taamaattumik Jehovap ilumut asaneraatigut ilaannikkut qulaler­tarnerput tupaallan­nanngilaq. Taamatut qulalerutta eqqaamas­savarput Jehova Guutiusoq angingaartoq ‘asasaminut inatsisiminillu maleruaasunut’ ilumoorfigin­nilluni asanninnermik aalajangiusimannittoq. – Neh 1:5.

14. Sooq utertitsissummik eqqarsaatiginninneq Jehovap asannin­neranut qularun­naassutigisin­naavarput? (Romamiut 5:8) (Aamma takuuk ungalusaq “‘Ajorti tammartitsinissamut pissaaneqartoq’ eqqaamajuk”).

¹⁴ Ilaannikkut misigisarsin­naavugut Jehovamit asaneqar­nissarput pisassarin­ngikkipput. Tamannalumi ilumoorpoq. Taamaat­tuminguna Jehovap asanninnera immikkuul­larissuusoq. Qanorluunniit ilioraluarutta Jehovap asanninnera pisassarilersin­naanngilarput. Taamaattorli utertitsissut ajortuliatsinnik matoorisuuvoq, Jehovallu isumakkeerfiginias­sagamitigut asagamisigullu utertitsissut pilersippaa. (Joh 1. 4:10) Aamma eqqaamajuk Jiisusi inuit ajortuliortut – naammal­luinnartut pinnagit – annaanniarlugit nunarsuarmukarmat. (Romamiut 5:8 atuaruk). Tamatta kukkusarpugut, Jehovallu kukkujuitsuunissarput naatsorsuutiginngilaa. Ajortulioq­qajaasarnerput pissutigalugu Jehovap asanninnera qularilersin­naagatsigu asaneqan­ngitsutut eqqarsaq­qajaaneq akiorniarsuataas­savarput. – Rom 7:24, 25.

JEHOVA ILUMOORFIGIUARUK

15-16. Jehova ilumoorfigiuarutsigu suna qularutigin­ngissin­naavarput, aamma sooq? (Samuelimik 2. 22:26)

¹⁵ Biibilimi kajumis­saarneqarpugut Jehova ‘attavigit­tuinnaq­qullugu’. (Mos 5. 30:19, 20) Taamaaliorutta qularutigin­ngissin­naavarput aamma Jehovap ilumoorfigiuas­sagaatigut. (Samuelimik 2. 22:26 atuaruk). Inuunermi qanorluunniit pisoqas­sagaluarpat Jehova ilumoorfigiuarutsigu ikiussavaatigut.

¹⁶ Soorlu sammereeripput ajornar­torsior­nitsinni ‘kisaqqasin­naasugullusooq’. Ilisimavarput Jehovamit asaneqarluta annertoq­qusersus­sagaatigullu. Tamannami Biibilimi ilinniar­titsissutigineqarpoq. Jehovap asanninnera qularilerutsigu ilisimasagut eqqarsaatigisin­naavagut maannak­korpiaq misigis­sutsitsinnut taarsiullugit. Biibilimi allassimaneratut Jehovap ilumoorfigin­nilluni asanninnera naassaan­ngitsumik ataavarumaartoq qularutigin­ngisaan­nartigu.