Qanoq Jehova ammaffigalugu qinnuigisinnaagit

1-2. (a) Sooq qinunikkut Jehovap ammaffiginissaa ajornakusoor­tissinnaavarput? (b) Qanoq nalunngilarput Jehovap qinnutigut tusarnaartarai?

QINUGAANGAVIT ilaannikkut misigisarpit Jehova ammaffiginagu assigiiaagin­nartunik oqaaseqarlutit? Tamatta ilaannikkut taamatut misigisin­naasarpugut. Ulluinnarni ulapputeqar­taratta qinupallanneq ileqquliut­toorsin­naavarput. Imaluunniit ajukkukkutta misigis­sutsitta Jehovamut aniatin­nissaat sapernar­tissinnaavarput.

² Biibili naapertorlugu Jehovap kissaatigaa unneqqarilluta maniguullutalu qinusas­sasugut, oqalloris­suunersugut pingaaar­tinnagu. “Ikiortariallit kissaatigisaat” tusartarpai. (Tuss 10:17) Soqutigil­luinnaramisigut qinunitsinni oqaatigisagut tamaasa tusarnaaq­qissaartarpai. – Tuss 139:1-3.

3. Apeqqutit suut sammissavagut?

³ Allaaserisami matumani apeqqutit uku sammissavagut: Sooq nangaanata misigis­sutsigut Jehovamut aniatis­sinnaavagut? Qinnutigut qanoq pitsanngorsarsin­naavagut? Jehovap kiffaasa qinnutaat Biibilimi allassimasut qanoq ilinniarfigalugillu iluaqutigisin­naavagut? Isumatsaq­qangaarnerput pissutigalugu misigis­sutsigut Jehovamut aniatis­sinnaan­ngikkutsigit susinnaavugut?

JEHOVA TATIGALUGU AMMASUMIK QINNUIGISARUK

4. Nangaanata misigis­sutsigut Jehovamut aniatik­kumallugit suna eqqaamas­savarput? (Tussiaat 119:145)

⁴ Jehova uagutsinnut ikinngutaasoq ingerlal­luarnis­satsinnik kissaassisoq eqqaamagutsigu nangaanata misigis­sutsigut taassumunnga aniatis­sinnaavagut. Tussiaat 119-imik allattup qinunermini Jehova ikinngutimisut tatiginartutut isigaa. Inuunera oqitsuin­naanngilaq. Inupilunnit ajortumik pineqartarpoq. (Tuss 119:23, 69, 78) Aamma kukkusarnini pissutigalugu nikallungasarpoq. (Tuss 119:5) Taamaattorli kanngusunnani Jehova ammaffigaa. – Tussiaat 119:145 atuaruk.

5. Sooq ajukkunneq kanngusunnerlu qinunissamut tunuarsimaarutigis­sanngilagut? Assersuuteqarit.

⁵ Jehovap allaat ingasattumik ajortuliorsimasut imminut qinusar­nissaannik kajumis­saarpai. (Es 55:6, 7) Taamaattumik ajukkunneq kanngusunnerlu qinunissamut tunuarsimaarutigis­sanngilagut. Assersuuteqariarta. Timmisar­tortartup ikiorneqarumalluni mittarfimmi timmisartunik nakkutiginnittut saaffigisinnaavai. Tammartajaarnini arlaatigul­luunniit kukkusimanini kanngusuutigalugu ikioqqun­ngitsuussava? Soorunami ikioqqussaaq! Taamatullu nalornisutut misigigutta ajortuliorsimagut­taluunniit Jehova tatigalugu ammasumik qinnuigisin­naavarput. – Tuss 119:25, 176.

QINNUTIGUT QANOQ PITSANNGORSAR­NEQARSINNAASUT

6-7. Jehovap pissusiinik eqqarsaatiginninneq qinunitsinni qanoq iluaqutigaarput? Assersuuteqarit. (Takuuk quppernerup ataani ilanngussaq).

⁶ Qanorpiaq misiginerluta eqqarsar­nerlutalu qinunitsinni ammasumik oqaluttuar­tarutta Jehovamut qaninnerulissaagut. Taava taamaalior­nissamut suut iluaqutigisin­naavagut?

⁷ Jehovap kinaassusia eqqarsaatigiuk.a Jehovap pissusii nuannersut eqqarsaatigisarutsigit ammaffigil­luarnerulersin­naavarput. (Tuss 145:8, 9, 18) Kristine nakuuser­tartumik ataatalik qanoq misigisoq maluginiaruk. Ima oqarpoq: “Jehova Ataatatut isigalugu qinusarnera sapernar­tittarpara. Ajortiliunera pissutigalugu Jehovamit asaneqarsin­naanngitsutut misigivunga.” Suna iluaqutigaa? Ima oqarpoq: “Jehovap ilumoorfigin­nilluni asanninnera eqqarsaatigil­luarakku asaneqartutut misigilerpunga. Nalunngilara imminiin­ngisaan­nassagaanga. Orlugaluarumaluunniit nikuiteq­qissavaanga. Jehovap asanningaarnera eqqarsaatigisarakku nuannaarutigisakka aliasuutigisakkalu ammasumik Jehovamut oqaluttuarisin­naavakka.”

8-9. Qinunngin­nitsinni oqaasis­satsinnik eqqarsaatigin­neqqaarneq qanoq iluaqutigaarput? Assersuuteqarit.

⁸ Qinnutigerusutatit eqqarsaatigikkit. Qinunnginninni eqqarsaatigisaruk massakkut qanoq pisariaqar­tsisinerlutit. Imminut ima aperisin­naavutit: ‘Massakkorpiaq qanoq ajornar­torsiorpunga? Isumakkeerfigisas­saqarpunga? Inuuninnut tunngas­suteqartumik allanngor­toqarsimava?’ (Kng 2. 19:15-19) Aamma Jiisusip qinunermik qanoq ilinniar­tikkaatigut eqqarsaatigisinnaavat. Jehovap aqqanut, Kunngeqarfianut piumasaanullu tunngasut qinnutigisin­naavatit. – Mat 6:9, 10.

⁹ Qatanngut arnaq Aliskamik atilik assersuutigisin­naavarput. Uini katsorsar­neqarsin­naanngitsumik qaratsamigut kræftermat qinunissani ajornakusoor­tittarpaa. Ima oqarpoq: “Eqqarsaatikka paatsiveqarneq ajormata oqaasissakka nalusarpakka.” Suna iluaqutigaa? Ima nassuiaavoq: “Uannut tunngasut kisiisa qinnutigin­nginnias­sagakkit qinunnginninni minutsialunni eqqarsaatigisarpakka suut qinnutigisin­naanerlugit. Taamaalioraangama assigiin­ngitsut pillugit eqqissillunga Jehovamut qinusin­naasarpunga.”

10. Sooq qinunermut piffissaqarluar­tassaagut? (Aamma assit takukkit).

¹⁰ Qinunermut piffissaqarluarit. Qinnutit naatsut iluaqutaagaluartut qinunermut piffissaqarluarutta qanorpiaq misiginerluta ammasumik Jehovamut oqalunnissarput ilimanar­nerussaaq.b Aliskap uia, Elijah, ima oqarpoq: “Ullut tamaasa qinusarpunga, sivisunerusumilli qinugaangama Jehovamut qaninnerusutut misigisarpunga. Jehovap qinnutima naanissaa utaqqikatan­navianngimmagu piffissaqarluartutut misigisarpunga.” Ima misiliigit: Eqqarsaatigiuk qaqugu sumilu akornuser­neqarnak qinusin­naanerlutit. Taava sivisunerusumik, immaqa nipilimmik, qinusarneq ileqquliuguk.

QINNUTIT BIIBILIMI ALLASSIMASUT EQQARSAATIGISAKKIT

11. Qinnutit Biibilimi allassimasut eqqarsaatiginissaat qanoq iluaqutigaarput? (Aamma takuuk ungalusaq “Taakkua inuunermi atugaat ilisarnarpat?”)

¹¹ Erinarsuutit illernartut, tassa Tussiaatit, qinnutillu Biibilimi allassimasut eqqarsaatiginissaat iluaqutigisinnaavat. Guutip kiffaasa eqqarsaatitik qanoq oqaatigigaat misissorukku Jehovamut ammasumik qinunissannut kajumis­sissaatit. Jehovamik unnersiutigin­neriaatsit illit qinnutinni ilanngus­sinnaasatit ilikkarsin­naavatit. Immaqalu taakkua qinnutaasa ilaat illit atukkannut assingupput.

12. Qinnut Biibilimi allassimasoq atuarutsigu suut eqqarsaatigisin­naavagut?

¹² Qinnut Biibilimi allassimasoq atuartillugu apeqqutit uku eqqarsaatigikkit: ‘Kina qinua qanorlu atugaqarluni? Qinnutigisai ilisarnarpat? Qinnutaa qanoq ilinniarfigisin­naavara?’ Imaassinnaavoq taakku akissutis­sarsiumallugit misissuinerusariaqartutit, pissarsiaqarfigil­luarsin­naavatilli. Qinnutit ilaat misissulaariartigit.

13. Hannap qinnutaa qanoq ilinniarfigisin­naavarput? (Samuelimik 1. 1:10, 11) (Aamma asseq takuuk).

¹³ Samuelimik 1. 1:10, 11 atuakkit. Hanna qinugami marlunnik ajornar­torsiuteqarpoq. Naartusin­naanngilaq, uimilu nuliata aappaanit nikanarsar­neqarpoq. (Sam 1. 1:4-7) Aaqqikkuminaatsumik ajornar­torsiuteqaruit Hannap qinnutaa qanoq ilinniarfigisin­naaviuk? Isumakuluutini sivisuumik qinunermini ammasumik oqaluttuarigamigit oqiliallappoq. (Sam 1. 1:12, 18) Ajornar­torsiutigut pillugit misigis­sutsitta Jehovamut aniatin­nerisigut ‘nanertuutigisagut Jehovamut tunniuk­kutsigit’ uaguttaaq tuppallersar­neqartutut misigissaagut. – Tuss 55:23.

14. (a) Hannap qinnutaa alla qanoq ilinniarfigisin­naavarput? (b) Allassimaffiit eqqarsaatigeq­qissaar­nerisigut qinnutigut qanoq pitsanngorsarsin­naavagut? (Quppernerup ataani ilanngussaq takuuk).

¹⁴ Samuelimik ernertaarnermi ukiorpaaluit kingorna Hannap ernini palasiunermut Elimukaappaa. (Sam 1. 1:24-28) Qamannga pisumik qinunermini Jehovap ilumoorfigin­nitsiminik illersuinera isumassuineralu qujassutigai.c (Sam 1. 2:1, 8, 9) Ilaqutariinni ajornar­torsiutaa suli aaqqinneqarsimagunan­ngikkaluartoq Hannap Jehovamit qanoq pilluaq­quneqarsimanini eqqarsaatigineruaa. Tamanna qanoq ilinniarfigisin­naavarput? Ulloq manna tikillugu Jehovamit qanoq ikiorneqarsimanerput eqqarsaatiginerusarutsigu ajornar­torsiutitta naammagalugit atornis­saannut nukissaqar­nerussaagut.

15. Eqqunngitsuliorfigineqarutta Jeremiap qinnutaa qanoq ilinniarfigisin­naavarput? (Jeremia 12:1)

¹⁵ Jeremia 12:1 atuaruk. Pruffiitip Jeremiap inuit ajortut ingerlal­luarpasinnerat pakatsis­sutigaa. Aamma Israalik­koqatiminit ajortumik pineqartarami nikallungasarpoq. (Jer 20:7, 8) Illaruaatigineqaraangatta inuillu peqquserluttut ingerlal­luarpasittut takugaangatsigit Jeremiap misigissusii paasilluarsin­naasarpagut. Jeremiap pakatsinini ammasumik oqaluttuarigaluarlugu Guutip naapertuil­luarnera apeqqusinngilaa. Kingusin­nerusukkut Jehova innuttaminik pillaasoq takugamiuk Guutip naapertuil­luarnera upperinerulersimassavaa. (Jer 32:19) Uaguttaaq Jehovap naapertuil­luannginnerit suulluunniit nalaatagut piffissaq eqqorlugu aaqqikkumaarai upperalugu misigis­sutsikkut anniaatigut ammasumik Jehovamut oqaluttuarisin­naavagut.

16. Levikkuusoq aallarus­saaqqasoq qanoq ilinniarfigisin­naavarput? (Tussiaat 42:2-5) (Aamma assit takukkit).

¹⁶ Tussiaat 42:2-5 atuakkit. Tussiaat tamanna Levikkuusumit aallarus­saaqqasumit uppeqatiminik guutisioqateqarsin­naanngitsumit allanneqarpoq. Tussiaammi misigissusii erserput. Napparsimaneq pissutigalugu angerlarsimaan­nartuugutta imaluunniit uppernerput pissutigalugu parnaarus­saaqqagutta taassuma misigissusii paasilluarsin­naavagut. Misigis­sutsigut allanngorar­tuaraluartut ammasumik Jehovamut oqaluttuarigutsigit iluaqutaassaaq. Taamaalioruttami eqqarsaatigut paasilluar­nerusin­naavagut sunalu pingaar­nerunersoq naliler­nerusin­naallugu. Assersuutigalugu Levikkuusup taassuma paasivaa Jehovamik guutisiorfigin­ninnissamini allamik periarfis­saqarluni. (Tuss 42:6) Aamma eqqarsaatigaa Jehovamit qanoq isumassor­neqarluni. (Tuss 42:9) Qamannga pisumik Guutimut qinusar­nitsigut misigis­sutsigut paasilluar­nerusin­naavagut, qamuuna eqqissisimanerusin­naavugut pinertusaar­nissamullu nukissaqar­nerusin­naalluta.

17. (a) Juunap qinnutaa qanoq ilinniarfigisin­naavarput? (Jona 2:2, 3) (b) Ajornar­torsioraangatta Tussiaatit qanoq iluaqutigisin­naavagut? (Quppernerup ataani ilanngussaq takuuk).

¹⁷ Jona 2:2, 3 atuakkit. Pruffiiti Juuna aalisagarsuup iluaniilluni qinuvoq. Jehovamut naalanngis­simagaluarluni qularutigin­ngilluinnarpaa qinnutini tusarneqarumaartoq. Qinunermini oqaatsit Tussiaatini allassimasut atorpai.d Tussiaatini allassimasut ilisimal­luarsimassavai. Taakkua eqqarsaatiginerisigut Jehovamit ikiorneqarumaarnini qulariun­naarpaa. Tamatumunnga assingusumik uagut Biibilimi allassimaffiit ilaat alanngaarsin­naagutsigit ajornar­torsior­nitsinni Jehovamut qinugaangatta taakku eqqaallugillu tuppallersaatigisarsin­naavagut.

QINUSARNIKKUT JEHOVAMUT QANILLIAR­TORTUARIT

18-19. Qinunitsinni misigis­sutsigut oqaasin­ngortik­kuminaatsik­kutsigit Romamiut 8:26, 27-lu naapertorlugit suna tuppallersaatigisin­naavarput? Assersuuteqarit.

¹⁸ Romamiut 8:26, 27 atuakkit. Ilaannikkut isumakulungaarneq pissutigalugu nalusarparput ammasumik Jehovamut qanoq qinussanerluta. Ikiortis­saqarpugulli. Taamaat­toqartillugu Guutip anersaavata illernartup “qinnuttarpaatigut”. Qanoq ililluni? Jehovap anersaani atorlugu qinnuterpassuit Biibilimi allanneqarnerat isumagaa. Taamaattumik misigis­sutsigut qinunikkut oqaasin­ngortik­kuminaatsik­kutsigit Jehovap qinnutini taakkunani allassimasut uagut qinnutitsitut isigalugit akisinnaavaatigut.

¹⁹ Tamanna qatanngutip arnap russip Jelenamik atillip iluaqutigaa. Qinusarnini Biibilimillu atuartarnini pissutigalugit parnaarussaavoq. Artorsangaarami qinunissani sapernartippaa. Ima oqarpoq: “Eqqaamavara isumatsaq­qangaarninni qanoq qinussanerlunga nalugaangakku Jehovap itsaq kiffami qinnutaat uanga qinnutittut akuerisarumaarai. Pissutsini artornangaartuni tamanna tuppallersaatigeqaara.”

20. Misigis­sutsikkut artorsaraangatta qinunissamut qanoq piareersarsin­naavugut?

²⁰ Misigis­sutsikkut artorsaraangatta qinunissaq sapernarsin­naasarpoq. Qinunissamut piareersar­nitsinni Tussiaatit nipilimik atuarsin­naavagut. Imaluunniit kunngi Daavi ilaarlugu misigis­sutsigut allattor­niarsarisin­naavagut. (Tuss 18:1; 34:1; 142:1) Soorunami qinunissamut qanoq piareersar­nissamut malittarisas­saqanngilaq. (Tuss 141:2) Illit iluarisattut piareersarsinaavutit.

21. Sooq uummatikkut iluunngarluta qinusin­naavugut?

²¹ Misigis­sutsigut suliluunniit oqaatigin­ngikkaluarigut Jehovap ilisimareerai nalunagu tuppallernaqaaq. (Tuss 139:4) Taamaattorli misigis­sutsigut ammasumik qinunikkut oqaatigigaangatsigit Jehovap nuannaarutigisarpaa. Taamaattumik tunuarsimaarnak Ataatat qilammiusoq tatigalugu qinnuigisaruk. Qinnutit Biibilimi allassimasut ilinniarfigikkit. Qamannga pisumik qinusarit. Nuannarisatit aliasuutigisatillu ammasumik Jehovamut oqaluttuarisakkit. Jehova ilinnut ikinngutaagami ilumoortoq ikiortuas­savaatit!