Siulersuisoqatigiinnut ilaasortat nutaat marluk

OKTOBARIP tallimaanni 2024-mi ukiumoortumik ataatsimiinnermi immikkut ittumik nalunaarutigineqarpoq: Qatanngutit Jody Jedele aamma Jacob Rumph Jehovap Nalunaajaasuisa Siulersuisoqatigiivinut ilaasor­tanngor­tinneqarput. Qatanngutit taakku marluk Jehovamut aalajaallutik ukiorpassuarni kiffartor­tuupput.

Qatanngut Jedele Missourimi USA-miittumi inunngorpoq sallusuis­summilu peroriar­torluni. Ikittuinnarnik Nalunaajaasoqarfiusumi najugaqarput. Taamaattumik qatanngutit assigiin­ngitsorpassuit oqaluus­sinermi ikiuukkiar­torlutik tikittarput. Asanninnerat ataasius­suseqar­nerallu killitsis­sutigai. Inuusut­tuaraalluni 1983-imi oktobarip 15-ianni imermut morsutsitaavoq. Oqaluussineq nuannareqaa, atuarninilu naammas­sigamiuk 1989-imi septembarimi pionerin­ngorpoq.

Angajoq­qaavisa qatanngut Jedele meeraasoq najaalu Betelimut tikeraaqatigisarpaat. Tikeraar­tarnerit tamakku kajumis­sissutigalugit marluullutik Betelimi kiffartor­nissartik anguniagarilerpaat angullugulu. Qatanngut Jedele Betelimi Wallkil­limiittumi 1990-imi septembarimi kiffartulerpoq. Siullermik eqqiaanermik immikkoor­tortaqarfimmi sulilerpoq kingornalu Betelimi kiffartortut peqqissutsikkut pisariaqar­titsisut immikkoor­tortaqarfianni sulilerluni.

Tamatuma nalaani ilagiit eqqaamiutik spanskisut oqaluttut amerliar­tuinnartut qatanngutinik angutinik pisariaqar­titsilermata qatanngut Jedele taakkua ilaannut najuuttalerpoq spanskisullu ilinnialerluni. Tamatuma kinguninngua Damaris, ilageeqatigiinni pioneriusoq, naapippaa. Kingorna katipput Betelimilu kiffartoqatigiilerlutik.

2005-imi angajoqqaatik ikiorniarlugit Beteli qimappaat. Tamatuma nalaani pioneritut kiffartorput. Qatanngut Jedele Pionerinut Ilinniarfimmi ilinniar­titsisuullunilu Napparsim­mavinnut Attaveqar­titatut aamma Sanaartornermut Ataatsimiititaliami kiffartorpoq.

2013-imi aappariit Jedelekkut Betelimut Warwickimi sanaartornermi kiffartor­tussatut qaaqquneqaqqipput. Kingorna aamma Pattersonimi Wallkillimilu kiffartulerput. Qatanngut Jedele Immikkoor­tortaqarfimmi Pilersaarusiornermut Sanaartor­nermullu Allaffeqarfimmi aamma Napparsim­mavinnut Paasissutis­siisarfimmi suliaqarsimavoq. 2023-mi marsimi Kiffartornermut Ataatsimiititaliami ikiortitut kiffartulerpoq. Suliassin­neqarnerminik kingumut qiviarluni ima oqarpoq: “Nutaamik suliassin­neqarnermi imminut piukkutsin­ngitsutut isiginarsin­naasarpoq. Jehovamulli tatigin­ninnissaq eqqaamaneqar­tariaqarpoq taassumami piukkun­narsisit­tarmatigut.”

Qatanngut Rumph Californiami USA-miittumi inunngorpoq. Meeraanerata nalaani anaanaa unittooq­qasimavoq, taamaattorli Biibilimi ilumoortut pillugit oqaluttuut­tarsimavaa. Ukiut tamaasa aanani, Nalunaajaasoq aalajaatsoq, tikeraartarpaa. Biibilimik soqutigin­ninneruler­nissaanik aanaata ikiorpaa, 13-inillu ukioqarluni atuaqqis­saaqatigineqarusut­talerpoq. 1992-imi septembarip 27-anni, suli inuusut­tuaraatilluni, imermut morsutsitaavoq. Nuannaarutigeqisaanik anaanaa oqaluus­seqqittalerlunilu ataatsimiigiaq­qittalerpoq, aamma ataataa qatanngutaalu Nalunaajaasun­ngorput.

Inuusut­tuaraalluni maluginiartarpaa pionerit qanoq pilluar­tigisut. Atuarnini naammas­sigamiuk 1995-imi septembarimi pionerin­ngorpoq. 2000-mi oqaluus­sisartunik pisariaqar­titsiffiunerusumut Ecuadorimut nuuppoq. Tassani Inga, pioneri Canadameersoq, naapippaa kingornalu katillugu. Katereerlutik Ecuadorimi illoqarfimmi ikittun­nguanik oqaluus­sisartoqarfiusumi kiffartulerpoq. Ullumikkut tassani anersaakkut nukittuunik ilageeqarpoq.

Piffissap ingerlanerani aappariit Rumphikkut specialpionerin­ngortin­neqarput kingornalu ilageeqatigiinni angalasartutut kiffartulerlutik. 2011-mi Gileadimut klassit 132-ssaannut qaaqqusaapput. Naammas­sinerata kingorna nunani assigiin­ngitsuni tallimani kiffartorput, kiffartoriaatsillu assigiin­ngitsut, soorlu Betelimi, oqaluus­sisartutut aallartitatut ilageeqatigiinnilu angalasartutut kiffartorneq, misilit­tagaqarfigalugit. Qatanngut Rumph aamma Kristumiunut Oqaluus­sisartunut Ilinniarfimmi ilinniar­titsisuusimavoq.

COVID-19-imik nappaalanersuaq pissutigalugu aappariit Rumphikkut USA-mut uterput. Betelimut Wallkil­limiittumut qaaqquneqarput, tassanilu qatanngut Rumph Kiffartornermik Nakkutil­liisoqarfimmi sungiusar­neqarpoq. Kingorna Ecuadorimut uteqqikkamik Immikkoor­tortaqarfiup Ataatsimiititaliaani kiffartulerpoq. 2023-mi Warwickimut nooqquneqarput. 2024-mi januaarimi qatanngut Rumph Kiffartornermut Ataatsimiititaliami ikiortitut kiffartulerpoq. Sumi kiffartorsimanini eqqaallugu ima oqarpoq: “Sumi suliasin­neqarsimanerput apeqqutaanngilaq, inuilli kiffartoqatigisagut pingaar­nerpaapput.”

Qatanngutit taakkua suliaqangaarnerat qujamasuutigeqaarput, ‘angutillu taakkunatut ittut pingaar­tittuarpagut’. – Flp 2:29.