Kiffartorninni pisut pingaarutillit

PIKITSITSISUT saassussinerat ukiut marluk sioqqullugu Evelyn Trabertilu Napasuliap Alapernaarsuiffiup Biibilimik Ilinniarfiani Gileadimi klassit sisamaanni ilinniartinneqarnerput naammassivarput. Taamani Ilinniarfik Gileadi Ithacap, New Yorkimiittup, eqqaani ingerlanneqartarpoq. El Salvadorimut ajoqersuiartortitatut aallartinneqarpugut, ukiullu 29-ngajaat El Salvadorimi kiffartorpunga. Ajoqersuiartortitatut kiffartornera pillugu misigisalikkersaannginninni sooq kajumissutsimik taamatut suliniarlunga aalajangersimanera oqaluttuareqqaalaassavara.

ILAQUTTAMA SALLUSUISSUMMIK PAASINNINNERAT

1923-mi Spokanemi, USA-mi Washingtonimiittumi, inunngorpunga. Angajoqqaama, John aamma Eva Olsonip, lutherikkunnut ilaagaluarlutik oqaluffimmi anniarfik ikualasoq pillugu ajoqersuutigineqartartoq akuerinngilaat. Guutip asannittup inunnik naalliutsitsisinnaanera upperisinnaanngilaat. (1 Joh 4:8) Unnuat ilaanni ataataga iffiorfimmi suleqatiminit Guutip inunnik anniarfimmi naalliutsitsisannginneranik Biibili tunngavigalugu nassuiaanneqarpoq. Tamatuma kinguninngua angajoqqaakka Jehovap Nalunaajaasuinit atuaqqissaaqatigineqartalerput. Toqup kingorna qanoq pisoqartarnera pillugu sallusuissut paasivaat.

Taamani qulingiluaannarnik ukioqaraluarlunga angajoqqaama ilikkakkaminnik nuannaarutiginningaarnerat eqqaamalluarpara. Guutip Jehovamik ateqarneranik ataasiullunilu pingasuunnginneranik paasinninnertik qujamasuutigingaarpaat. (Joh 8:32) Angajoqqaama ilikkakkatik uannut ingerlateqqitaat svampitut milluartarpakkalusooq. Taamanili Biibilimik atuarneq nuannarilerpara. Ittuutuugaluarlunga angajoqqaakka oqaluusseqatigisarpakka. Angajoqqaakka 1934-mi kuisipput, uangalu 1939-mi 16-inik ukioqarlunga kuisippunga.

1940-mi aasakkut angajoqqaama illortik tunereermassuk Coeur d’Alenemut, Idahomiittumut, nuuppugut. Nooreerluta pionerinngorpugut. Biilileriffiup qulaani ini attartugarput aamma ilagiit ataatsimiittarfiattut atorneqartarpoq. Taamani ilagiit amerlanngitsut naalagaaffilersaarfeqarput. Amerlanerit inini attartukkani qatanngutilluunniit angerlarsimaffianni ataatsimiittarput.

1941-mi Saint Louisimi, Missourimiittumi, ataatsimeersuarneq angajoqqaakkalu najuuffigaarput. Ataatsimeersuarnermi tassani ulloq kingulleq ‘meeqqat ulluattut’ taaneqarpoq. Ulloq taanna meeqqat tallimaniit 18-it tungaanut ukiullit saarlernut issaaqquneqarput. Oqalugiaatit ilaasa naggataatungaani qatanngutip Joseph F. Rutherfordip meeraasugut oqalugiarfigaatigut. Oqarfigaatigut “Guuti taassumalu kunngia naalakkusukkutsigit” nikuissasugut. Tamatta nikuippugut. Taava qatanngut Rutherford ima nalunaarpoq: “15.000-nit amerlanerusut Naalagaaffimmik nalunaajaajumasut takusigit!” Tassanerpiaq inuunerma sinnera pioneriuniarlunga aalajangerpunga.

ILAQUTARIITTUT SULIASSINNEQARTARNIVUT

Ataatsimeersuareerluta qaammatit arlaqanngitsut qaangiummata angajoqqaakkalu Californiap kujasissuanut illoqarfimmut Oxnardimut nuukkusunnersugut aperineqarpugut. Tassani ilagiinnik pilersitseqquneqarpugut. Campingvognimi ataasiinnarmik siniffilimmi najugaqarpugut. Unnuit tamaasa “siniffiga” nerriviup qulaanut inissittarparput. Tamannalu allanngornerujussuuvoq, namminermi sinittarfeqarnikuugama!

Californiamut tikinngitsiartugut 1941-mi decembarip 7-ianni Hawaiimi Pearl Harbor Japanimiunit qaartartumeerneqarpoq, aqaguanilu USA sorsunnersuarmi kingullermi sorsoqataalerpoq. Taamani Japanimiut aqqartartui Californiap sineriaaniimmata oqartussaasut peqqusipput sinerissap eqqaani najugallit tamarmik unnukkut qullitik qaminngatittassagaat nunami saassunneqarsinnaasut takujuminaanneruniassammata.

Qaammatit arlallit qaangiummata, 1942-mi septembarimi, Clevelandimi Ohiomiiittumi, “Silarsuup nutaassap teokratiimik ataatsimeersuarnera” najuuffigaarput. Ingammik qatanngutip Nathan H. Knorrip oqalugiaataa “Eqqissineq — ataannarsinnaassava?” eqqaamalluarpara. Saqqummersitat kapitali 17-imi ‘nersut siornatigut ikkaluartoq maannakkulli inngitsoq, itinersuarmit qaqiumaartoq’ pillugu siulittuut oqalugiaatigaa. (Saqq 17:8, 11) Qatanngutip Knorrip “nersut” tassaanerarpaa Folkeforbundi sorsunnersuup nalaani piujunnaartoq. Biibilimi siulittuutigineqarpoq Folkeforbundi taarserneqarumaartoq tamatumalu kingorna eqqissineqarnerulerumaartoq. 1945-mi sorsunnersuaqarunnaarmat Folkeforbundilu Naalagaaffiit Peqatigiinnik taarserneqarmat taamatorpiaq pisoqarpoq. Taamanimiilli Jehovap Nalunaajaasuisa nutaarsiassaq nuannersoq nunani amerlanerusuni siuariartortumik oqaluussissutigisalerpaat!

Siulittuut tamanna tunngavigalugu suliassarpassuaqarnera paasivara. Ukiumi tulliuttumi Ilinniarfiup Gileadip aallartittussaanera nalunaarutigineqarmat ajoqersuiartortitanngorusukkama tassani ilinnialernissara kissaatigaara. 1943-mi Portlandimi Oregonimiittumi pioneritut kiffartoqquneqarpunga. Taamani pulaakkavut oqaluttartumik matup alloriusaani tusarnaarteriarlugit Guutip naalagaaffia pillugu Biibililersaarutinik neqeroorfigisarpavut. Ukiumi tamatumani ajoqersuiartortitatut kiffartornissaq eqqarsaatigiuarpara.

1944-mi ikinngutigilluagaralu Evelyn Trabert Ilinniarfimmi Gileadimi ilinnialernissamut qaaqquneqarpugut. Akuerisaasimanerput nuannaarutigingaarpara! Qaammatini tallimani Biibilip pissarsiaqarnartumik atuaqqissaartarnissaanik ilinniartinneqarpugut. Ilinniartitsisutta maniguuttuunerat ajasoorutigingaarparput. Assersuutigalugu ilinniartitsisuvut ilaannikkut nerinitsinni saqisorisarpavut. 1945-mi januaarip 22-anni Ilinniarfimmi Gileadimi atuarnerput naammassivarput.

AJOQERSUIARTORTITATUT AALLARTINNEQARNERA

1946-mi juunimi Evelyn, Leo aamma Esther Mahan ilagalugit Santa Anamut El Salvadorimiittumut tikippugut. Oqaluussiffipput ‘qaqortissimavoq katersuiffigeriaannanngorluni’. (Joh 4:35) Qaammatit arlallit qaangiummata Santa Anami siullermeerluta ataatsimeersuarpugut. Qaaqqusissutinik agguaareerluta inuit 500-t missaat najuunnerat nuannaarutigingaarparput. Oqaluussisarnerput palasit kamaatigingaarpaat, sapaatillu-akunnera ataaseq qaangiummat allaaserisap aallaqqaataani eqqaaneqartutut saassussinermik siulersuipput. Aallartikkusukkamisigut qunusaarpaatigut. Tamannali aallarnata inunnik ikiuinissatsinnik aalajangiusimanninnerulissutigaarput. Palasit Biibilimik atuaqqusinngikkaluartut ikittuinnaallu Biibilimik pisinissamut akissaqaraluartut inuppassuit sallusuissummik paasinnikkusupput. Jehova taassumalu nunarsuarmik paratiisinngortitsinissamik neriorsuutaa pillugit ilinniartissinnaajumallugit Spaniamiutut ilinniarnerput inuit qujamasuutigaat.

Rosa Ascencio Biibilimik atuaqqissaaqatigisartakkama siulliit ilagaat. Biibilimik atuaqqissaartalerami angut inooqatigisani qimappaa. Angulli aamma atuaqqissaartalermat katipput, kingornalu kuisikkamik nalunaajaasunngorput aallussilluartut. Rosa Santa Anamiunit siullersaalluni pionerinngorpoq.

Rosa niuertarfeeraateqarpoq. Pisariaqartitaminik Jehovap isumaginnikkumaarnera upperigamiuk oqaluussiartornerit tamaasa niuertarfiutini matusarpaa. Inuppassuit Rosap pisiniarfiutaanut pisiniartarput. Matthæusip allagaa 6:33-mi allassimasutut Jehovamit isumagineqarneq misigaa. Rosa toqussi tikillugu Jehovamut aalajaattuarpoq.

Ajoqersuiartortitat allat tallimat peqatigalugit atorfikkaap ilisarisimaneqarluartup illuutaa attartorparput. Taamaalluni taanna palasimit pulaarneqarpoq oqarfigineqarlunilu illu uagutsinnut attartortiinnaruniuk nulianilu ilagiinnut ilaajunnaarsitaassasut. Palasip iliuuserisarsimasaasa ilaat angutip iluarinnginnamigit siooraginnginnamiullu oqarfigaa ilagiinnut ilaajunnaarsitaassagaluaruni soqutiginaviarnagu. Taassuma illumi najugaqaannarsinnaanissatsinnik neriorsorpaatigut.

INNUTTAASUNI ATAQQISAASOQ NALUNAAJAASUNNGORTOQ

Illoqarfiit pingaarnersaanni, San Salvadorimi, ajoqersuiartortitap allap arnaq taassumalu uia ingeniøriusoq Baltasar Perlamik atilik Biibilimik atuaqqissaaqatigisalerpai. Angutip inussiarnersuusup upperisarsiornikkut siuttut amerlasuut ilumoortuusaarnerat Guutimut upperunnaassutigisimavaa. Nalunaajaasuunngikkaluarluni akissarsiaqarani El Salvadorimi immikkoortortaqarfissamik titartaajumallunilu sanaartoqataarusuppoq.

Baltasar immikkoortortaqarfimmik sanaartornermi nalunaajaasorpassuarnik suleqateqarnini upperisarsiornermik ilumoortumik paasinnissimanerminik qularunnaarutigaa. Baltasar 1955-imi juulip 22-anni kuisippoq nulialu, Paulina, kingornatigut kuisilluni. Qitornaat marluk aalajaallutik Jehovamut kiffartorput. Ernerat Baltasar junior Betelimi New Yorkimiittumi ukiuni 49-ni kingullerni kiffartorpoq. Tassani nunarsuaq tamakkerlugu oqaluussinermik tapersersuillunilu USA-mi immikkoortortaqarfiup ataatsimiititaliaani kiffartorpoq.

San Salvadorimi ataatsimeersuartaleratta qatanngutip Perlap eqaarsaartarfik angisooq attartorniassagatsigu ikiorpaatigut. Ataatsimeersuaqqaaratta issiavippassuit atorneqanngillat. Ukiulli ingerlaneranni najuuttut amerliartorput, sivitsunngitsorlu eqaarsaartarfimmi issiaviit amigaatigisalerpavut. Iliuutsivut pillugit Jehovamit pilluaqquneqarpugut. Ataatsimeersuarnerni taakkunani Biibilimik atuaqqissaaqatigisarsimasakka naapittarpakka. Taakkualu atuaqqissaaqatigisartagaat kuisimmata nuannaaqaanga! Allaanngilaq kuiserlaat taakku ernutartaaralugit.

Ataatsimeersuarnerit ilaanni qatanngutip angutip utoqqatserfiginiarlunga ornippaanga. Ilisarinnginnakku paatsuungavunga. Ima oqarfigaanga: “Taamani Santa Anami ujaqqanik millooqataavunga.” Taassuma Jehovamut kiffartulersimanera paasillugu qamuuna tipaatsuutigaara. Tamanna piffissaq tamaat kiffartornerup inuunermi nalerisimaarnarnerpaaneranik eqqaasitsissutigaara.

AALAJANGIINIKKA NALERISIMAARUTIGAAKKA

Ukiuni 29-ngajanni El Salvadorimi ajoqersuiartortitatut kiffartorpunga. Santa Anami, Sonsonatemi, Santa Teclami kiisalu San Salvadorimi kiffartorsimavunga. Ukiuni taakkunani angajoqqaakka utoqqaliartorput naggataatigullu uannit ikiorneqartariaqalerlutik. Taamaattumik qinoqattaareerlunga aalajangerpunga ajoqersuiartortitatut kiffartorunnaarniarlunga 1975-imilu Spokanemut uterniarlunga.

Ataataga 1979-imi toquvoq, tamatumalu kingorna anaanaga ukiuni arfineq-pingasuni isumagaara. Sanngiillisimanermik uannit ikiorneqarani susinnaaneq ajorpoq. 94-inik ukioqarluni toquvoq. Taamani artorsaqaanga. Misigissutsikkut tatineqarnera qasulissutigingaarpara. Timikkut annernartorujussuarmik anillanneqalerpunga. Jehovamilli asannittumik pakkutaarneqartutut misigivunga. Taassuma qinnutikka akisarlugillu artornartorsiorninni pinertusaarniassagama ikiorpaanga. Ima oqarfigaangalusooq: ‘Qeersuunngorserlutit kissumiassavakkit isumannanngitsumullu pisillutit.’ — Es 46:4.

1990-imi Omakimut, Washingtonimiittumut, nuuppunga. Tassani Spaniamiutut oqaasilinnut oqaluussisalerama iluaqutaasutut misigeqqilerpunga. Biibilimik atuaqqissaaqatigisartakkakka arlallit kuisipput. 2007-imi novembarimi Omakimi illora isumagisinnaajunnaarakku illoqarfiup Chelanip, Washingtonimiittup, ungasinngisaani inissiamut nuuppunga. Maani ilagiit Spaniamiutut oqaasillit qujamasuutigeqisannik isumagilluartarpaannga. Maani nalunaajaasuni utoqqartatuaagama ilagiinniittut aanatut asavaannga.

Jehova pitsaanerpaamik kiffartorfiginiassagakku katinniarnanga meerartaarniarnangalu aalajangernikuuvunga. (1 Kor 7:34, 35) Isumaliorpunga inuunermi matumani piumasakka salliunniarnagit. Taamaattumik uummatikkut iluunngarlunga Jehovamut kiffartorniarlunga aalajangerpunga. Inuppassuit sallusuissummik paasinneqqullugit ikiorsimasakka qitornatut isigaakka. Silarsuassamilu nutaami assigiinngitsorpassuarnik sammisassaqarnissannut piffissaqarluarumaarpunga. Tussiaat 145:16 allassimaffinnit nuannarinerpaasaraara, tassanimi Jehova neriorsuimmat ‘pinngortitani tamaasa kissaatigisaannik qaarsillartikkumaarlugit’.

Maannakkut 91-inik ukioqaraluarlunga peqqikkama suli pioneriuvunga. Pioneritut kiffartorama uninngaannarnanga siuneqarluartumik inuuneqarpunga. El Salvadorimut tikeqqaarama oqaluussineq aallartisarneqaleruttorpoq. Saatani akerlilersuiuaraluartoq maanna El Salvadorimi oqaluussisartut 39.000-nit amerlanerupput. Tamanna uppernikkut nakussatsissutigingaartarpara. Jehovap innuttaasa taassuma anersaavanit illernartumit tapersersorneqarnerat upperilluinnarpara.