Jehova Marriortorsuaraarput

1. Sooq Jehova marrior­tutut pik­korin­ner­paava?

TULUIT NUNAAN­NI 2010-mi novembarimi naasulivik marrarmik sanaaq Kinamin­ngaan­neersoq 400 mil­lioninit amerlanerusunut taggin­neqar­poq. Tupin­naqaaq marraq nalingin­naasoq naleqan­ngitsorlu marrior­tup taama kusanar­tigisumik naleqar­tigisumil­lu naasuliviliarisin­naam­magu. Marrior­tor­put, Jehova, marrior­tunit al­lanit tamanit pik­korin­nerungaar­poq. Biibilimi al­las­simavoq Jehovap inuk naam­mal­luin­nar­toq “is­sumit”, tas­sa marrarmit, sanagaa. (1 Mos 2:7) Inuk taan­na, Adami, “Guutip er­neraa”, Guutil­lu pis­susiinik pis­suseqarluni pin­ngor­titaavoq. – Luk 3:38.

2, 3. Israelik­kut peq­qis­simisut isigin­nit­taasiat qanoq ilaarsin­naavar­put?

² Adami Pin­ngor­titsisiminut pikitsitsigami Guutimut er­niujun­naar­poq. Adamil­li kinguaar­pas­suisa Jehova Naalak­kamis­sut toq­qar­paat. (Hebr 12:1) Pin­ngor­titsisimin­nut maniguul­lutik naalan­nermik­kut ersersip­paat taan­na, Saatani pin­nagu, Ataatamis­sut Marrior­tus­samis­sul­lu toq­qarsimal­lugu. (Joh 8:44) Guutimut ilumoorfigin­nit­tut taak­ku Israelik­kut peq­qis­simisut ima oqar­nerat­tut isigin­nit­taaseqar­put: “Il­lit Naalagaq, tas­saagaluar­putit ataatar­put. Marraavugut, il­lil­lu sanaaraatsigut, tamat­ta as­savit piliaraatigut.” – Es 64:7.

³ Ul­lumik­kut Jehovamik pal­lorfigin­nit­tut ilumoor­tut sapin­ngisar­tik tamaat taamator­piaq maniguul­lutil­lu naalan­niar­tuup­put. Jehova Ataatamis­sut taas­sal­lugu ataq­qinaataatip­paat Marrior­tus­samis­sul­lu kis­saatigalugu. Im­mersak­katut akimasutul­lusooq ilersin­naajumal­luta marrar­tut aqitsutut Guutimit ilusilersor­tik­kusup­pugut? Qatan­ngutivut im­mik­kut tamarmik suliatul­lusooq ineriar­tor­tutut, tas­sa Guutimit suli ilusilersor­neqar­tutut, isigaavut? Eq­qor­tumik isigin­nit­taaseqar­niarluta sam­mis­savar­put Jehovap ilusilersorusutani qanoq toq­qar­tarai, sooq taak­ku ilusilersor­tarai qanorlu taamaalior­tar­toq.

JEHOVAP ILUSILERSORUSUTANI TOQQARTARAI

4. Jehovap im­minut kajungilersitani qanoq toq­qar­tar­pai? As­sersuuteqarit.

⁴ Jehova inun­nut isigin­nit­taatsitsitut isigin­nit­taaseqan­ngilaq. Uum­mater­put misis­sor­tar­paa im­mik­kul­lu tamat­ta qanoq it­tor­piaanersugut maluginiar­tarlugu. (1 Samueli 16:7b atuaruk). Taman­na Jehovap ilagiit kristumiut ilusilersoramigit ersersip­paa. Inup­pas­suit inuit ilaan­nit naleqan­ngitsutut isigineqar­tar­tut Jehovap im­minut er­nerminul­lu kajungilersip­pai. (Joh 6:44) As­sersuutigalugu farisiiari Saulusimik atilik ‘mitaatigin­nit­tuul­lunilu qinugin­nit­tuul­lunilu angutaasersor­tuusoq’ taak­kua ilagaat. (1 Tim 1:13) Taamaak­kaluar­toq Jehovap Saulusip uum­mataa misis­soramiuk marrar­tut atorsin­naan­ngitsutut nalilin­ngilaa. (Us­s 17:3) Jehovam­mi takusin­naavaa Saulusi “Guutimik nalusunut, kun­nginut Israelil­lu kinguaavinut” oqaluus­siar­tor­titas­samisut ilusilersor­neqarsin­naasoq. (ApS 9:15) Jehovap ‘im­mersak­katut akimasutut’ ilusilersor­neqarsin­naasut al­lat, ilaatigut imerajut­tut, inuunerlut­tut til­lit­tar­tul­lu, aam­ma toq­qarsimavai. (Rom 9:21; 1 Kor 6:9-11) Biibilimik atuaq­qis­saar­nermik­kut Jehovamut up­persuseqar­neruler­put taas­sumin­ngalu ilusilersor­tik­kumal­lutik.

5, 6. Jehovamik Marrior­tutsin­nik tatigin­nin­nit­ta qanoq isigin­nit­taaseqalersis­savaatigut (a) inun­nut angalaarfigisar­tak­katsin­niit­tunut? (b) up­peqatitsin­nut?

⁵ Qularutigin­ngilar­put Jehova inun­nik eq­qor­tunik toq­qaasin­naal­lunilu im­minut kajungilersitsisin­naasoq. Taamaat­tuminguna inuit al­lat oqaluus­sif­figisar­tak­katsin­niit­tut ilagiitsin­niit­tul­luun­niit isum­miutereer­tas­san­ngik­kivut. Michaelimik atilik as­sersuutigeriar­tigu. Taan­na ima oqar­poq: “Jehovap Nalunaajaasuinit pulaar­neqarama tunuin­nar­pak­ka soqutigin­ngitsuusaarlugil­lu soorlu maanin­ngitsut. Sorraan­niavis­sorlunga! Kingusin­nerusuk­kut sumiif­fim­mi al­lami ilaqutariit al­lat pis­suseris­saar­nerat pis­sutigalugu nuan­naar­torisak­ka naapip­pak­ka. Taava ul­loq al­la tupaal­laqaanga – sunaaf­fa Jehovamik Nalunaajaasuusut! Pis­susilersor­nerat isum­mius­sereer­tar­nin­nut pis­sutaasut misis­sor­nis­saan­nut kil­litsis­sutigaara. Taava paasiler­para ilisimasaqan­ngin­nera tusatsiar­tak­kal­lu, piviusumik tun­ngaveqan­ngitsut, taama pis­susilersor­tar­nin­nut pis­sutaasut.” Michael ilik­kagaqar­nerorusup­poq Biibilimil­lu atuaq­qis­saaqatigineqar­nis­saminut akuersil­luni. Kingor­natigut kuisip­poq pif­fis­sarlu tamaat kif­far­tor­tun­ngorluni.

⁶ Jehova Marrior­tutsitut akuerigutsigu up­peqatitsin­nut pis­susilersor­tar­ner­put aam­ma al­lan­ngus­saaq. Up­peqativut tamaasa im­mik­kut suliatut suli ineriar­tor­tutut isigilis­savavut. Jehovap taamatut isigisar­pai. Takusin­naavaa qamuuna qanor­piaq it­tuunersut nalunagulu naam­mal­luin­nan­ngitsuunerat ataavar­tuun­ngitsoq. Aam­ma nalun­ngilaa taak­ku tamarmik im­mik­kut inut­tut qanoq it­tun­ngorsin­naasut. (Tus­s 130:3) Qatan­ngutivut isumal­luar­tumik isigin­nit­taaseqarfigigutsigit Jehova ilaas­savar­put. Al­laat qatan­ngutit­ta siuariar­tor­nis­saan­nik ikiuinitsigut Marrior­tor­put suleqatigisin­naavar­put. (1 Th 5:14, 15) Ilagiin­ni utoq­qaaner­tat taamaalior­nis­samut maligas­siuil­luar­tariaqar­put. – Ef 4:8, 11-13.

SOOQ JEHOVAP ILUSILERSORTARAATIGUT

7. Sooq Jehovap perorsaatis­siisar­nera qujamasuutigaajuk?

⁷ Inuit ilaat ima oqarumas­sap­put: ‘Aatsaat nam­mineq meeraqalerama angajoq­qaama uan­nut perorsaataat paasisin­naal­lualer­pak­ka.’ Inersimaneruleriar­tor­til­luta perorsaatit pingaar­tin­neruler­tar­pavut nalun­ngin­natsigu asan­nin­nermut ersiutaasut. (Hebræerit 12:5, 6, 11 atuakkit). Aap, Jehovap meeq­qamisut asagamisigut kamagit­tarluni perorsar­tar­paatigut, imaluun­niit ilusilersor­tar­paatigut. Kis­saatigaa silatusaarluta pil­luarlutalu inuus­sasugut Ataatatsitul­lu asas­sagitsin­ni. (Us­s 23:15) Naal­liuuteqar­tar­ner­put nuan­naarutigin­ngilaa, kis­saatigin­ngilaalu ‘kaman­nermut qitor­naasutut’, tas­sa Adamimit kingor­nus­sar­put pis­sutaal­luni, toqus­sasugut. – Ef 2:2, 3.

8, 9. Jehovap ul­lumik­kut qanoq ilin­niar­tip­paatigut, siunis­samilu qanoq ilin­niar­tin­neqar­tuas­saagut?

⁸ Jehova ilisarisimalin­ngik­kal­laratsigu pis­susipalaar­pas­suaqarunar­pugut. Jehoval­li ilusilersorsimavaatigut al­lan­nguinis­satsin­nil­lu ikiorluta, tamatumalu kingunerisaanik pis­suseris­saar­neruler­pugut. (Es 11:6-8; Kol 3:9, 10) Ul­lumik­kut Jehovap ilusilersor­neqar­nitsin­nut iluaqutis­satsin­nik im­mik­kuul­laris­sumik avatangiiseqar­titsineratigut anersaak­kut paratiisimiip­pugut. Tas­sani toq­qis­sisimavugut naak silarsuaq ajoraluaqisoq. Ilaqutariit iluan­ni asan­nin­nermik amigaateqarsimasut maan­nak­kut paratiisimi anersaak­kut it­tumi up­peqatimin­nit asaneqar­neq ilumoor­toq misigisaler­paat. (Joh 13:35) Aam­ma al­lanut asan­nin­nermik ersersitsinis­sar­put ilik­kar­par­put. Pingaar­nerusumil­li Jehova ilisarisimalersimavar­put maan­nak­kul­lu ataatatut asan­nin­nera nuan­naarutigalugu. – Jaak 4:8.

⁹ Anersaak­kut paratiisimiin­ner­put silarsuas­sami nutaami tamak­kiisumik iluaqutigis­savar­put. Aam­ma nunarsuarmi Paratiisimi Guutip naalagaaf­fianit aqun­neqar­tumi inuuneq nuan­naarutigiumaar­par­put. Taamanik­kus­samut Jehovap takorloorsin­naan­ngisatsin­nik ilusilersor­tuarumaarlutalu ilin­niar­tit­tuas­savaatigut. (Es 11:9) Aam­ma isumar­put timer­pul­lu naam­mal­luin­nar­tun­ngor­tis­savai. Taamaalil­luta Jehovap peq­qus­sutai paasil­luarsin­naanerulerlugil­lu maleruarluarsin­naanerulis­savavut. Taamaat­tumik qanor­toq Jehovamit ilusilersor­tit­tuarisa takutil­lugulu uagutsin­nut asan­nin­nerminik up­per­narsaanera pingaar­tingaarlutigu. – Us­s 3:11, 12.

JEHOVAP QANOQ ILUSILERSORAATIGUT

10. Marrior­torsuaq kamagit­tar­toq pik­koris­sorlu Jiisusip qanoq ilaar­paa?

¹⁰ Marrior­toq marrarmik ilisiman­nil­luar­toq as­sigalugu Jehovap nalun­ngil­luar­paatigut. San­ngiif­fivut, pisin­naasat­ta kil­leqar­nerat siuariar­torsimaner­pul­lu ilisimal­luar­pai, tamak­kulu tamaasa tun­ngavigalugit tamat­ta im­mik­kut ilusilersor­tar­paatigut. (Tussiaat 103:10-14 atuakkit). Jehovap qanoq isigin­nit­taaseqarfigigaatigut paasisin­naavar­put Jiisusip apustiliminut naam­mal­luin­nan­ngitsunut pis­susilersor­nerata misis­sor­neratigut. Ilaan­neeriarlutik apustilit as­sor­tuus­sutigisar­paat kina arlar­tik an­nerunersoq. Il­lit najuus­simagaluaruit apustilit pis­susilersor­nerat pil­lugu qanoq eq­qarsas­sagaluar­pit? Im­maqa eq­qarsas­sagaluar­putit marrar­tut aqitsutut in­ngitsut. Jiisusil­li nalun­ngilaa inus­siar­nerluni kamagit­tarlunilu siun­nersuineranut ajoqersuk­kat tusar­naar­nermik­kut maniguun­neranil­lu ilaarsinermik­kut ilusilersor­neqarsin­naasut. (Mark 9:33-37; 10:37, 41-45; Luk 22:24-27) Jiisusip makititaareer­nerata kingor­na apustilit Guutip anersaavanik tunineqar­put arlar­til­lu kina an­nerunersoq eq­qarsaatigiun­naarsimal­lugu. Jiisusim­mi im­min­nut sulias­siis­sutaa aal­lun­nerulersimavaat. – ApS 5:42.

11. Daavip marrar­tut aqitsutut ilusilersoruminar­tuunera qanoq erser­pa, qanorlu taan­na ilaarsin­naavar­put?

¹¹ Nalitsin­ni Jehovap Biibili, anersaani il­ler­nar­toq ilagiil­lu aq­qutigalugit ilusilersor­tar­paatigut. Biibilimit qanoq ilusilersor­tis­sin­naavugut? Atuar­tariaqar­par­put atuak­kavul­lu eq­qarsaatigeq­qis­saarlugit, aam­ma ilik­kak­kat­ta qanoq maleruar­nis­saan­nut ikioq­qul­luta Jehova qin­nuigisariaqar­par­put. Kun­ngi Daavi ima al­lap­poq: “In­nan­ngavin­ni eq­qaaniaraangak­kit eq­qarsaatigalutil­lu un­nuaanerani.” (Tus­s 63:7) Aam­ma ima al­lap­poq: “Naalagaq un­nersiutigis­savara siun­nersormanga, un­nuami al­laat iluk­kut ajoqersuun­neqar­tar­punga.” (Tus­s 16:7) Aap, Jehovap perorsaatis­siinera Daavip eq­qarsaatigeq­qis­saar­paa, aam­ma eq­qarsaatimigut misigis­sutsimigul­lu ilusilersor­tip­poq naak atugas­sarititaasut an­ner­naraluar­tut. (2 Sam 12:1-13) Daavi maniguun­nermut naalan­nermul­lu tun­ngatil­lugu uagutsin­nut maligas­siuil­luar­poq. Taava im­minut ima aperigit: ‘Biibilimi atuak­kak­ka eq­qarsaatigeq­qis­saar­tar­pak­ka Guutil­lu perorsaatis­siinera eq­qarsaatik­kut misigis­sutsik­kul­lu kil­litsis­sutigisarlugu? Pimoorus­sinerusin­naavunga?’ – Tus­s 1:2, 3.

12, 13. Jehovap anersaani il­ler­nar­toq ilagiil­lu aq­qutigalugit qanoq ilusilersor­tar­paatigut?

¹² As­sigiin­ngitsutigut anersaamit il­ler­nar­tumit ilusilersor­neqarsin­naavugut. As­sersuutigalugu Jiisusip pis­susiisa pis­suseriler­nis­saan­nut aam­ma anersaap inerititaanik ersersitsinis­satsin­nut anersaaq il­ler­nar­toq iluaqutigisin­naavar­put. (Gal 5:22, 23) Asan­nin­neq anersaap inerititaanut ilaavoq. Guuti asavar­put, aam­ma naalan­nis­sar­put ilusilersor­tin­nis­sar­pul­lu kissaatigaarput nalun­ngin­natsigu peq­qus­sutai uatsin­nut iluaqutaasut. Aam­ma silarsuarmit matuman­nga ajor­tumit ilusilersor­tin­ngin­nis­satsin­nut anersaaq il­ler­nar­toq nakus­satsis­sutigisin­naavar­put. (Ef 2:2) Apustili Paulusi inuusut­tuul­luni juutit up­perisarsior­tut siut­tuinit makitasuunit sun­ner­neqarsimavoq. Anersaarli il­ler­nar­toq al­lan­nguinis­saminut iluaqutigaa. Kingusin­nerusuk­kut ima al­lap­poq: “Tamaasa pis­satsitsisik­kut atus­sal­lugit sapin­ngilak­ka.” (Fil 4:13) Uagut­taaq anersaaq il­ler­nar­toq qin­nutigisariaqar­par­put ilisimagatsigu ilumoorluni qinusoq Jehovap akisaraa. – Tus­s 10:17.

¹³ Aam­ma ilagiit utoq­qaaner­tal­lu aq­qutigalugit Jehovap tamat­ta im­mik­kut ilusilersor­tar­paatigut. As­sersuutigalugu utoq­qaaner­tat san­ngiis­suter­put takusin­naagunik­ku ikior­nias­savaatigut. Nam­minerli isum­matik naaper­torlugit siun­nersuineq ajor­put. (Gal 6:1) Maniguul­lutik paasin­nin­nis­samik ilisimas­susermil­lu Jehova qin­nuigisar­paat. Taava Biibili Biibililersaarutaativul­lu atorlugit paasis­sutis­sanik iluaqutis­satsin­nik misis­suisar­put. Utoq­qaaner­tat inus­siar­nersumik asan­nit­tumil­lu, im­maqa atisalersoriaatsit pil­lugu, siun­nersor­niarlutit saaf­figip­patsit eq­qaamas­savat taak­kua siun­nersuutaat Guutip ilin­nut asan­nin­neranut up­per­narsaataasoq. Siun­nersuutaat malik­kuk­kit marrar­tut aqitsutut is­saatit ilin­nul­lu iluaqutaasumik Jehovamit ilusilersor­til­lutit.

14. Jehovap inuit oqar­tus­saaf­figigaluarlugit nam­mineq aalajangiisin­naatitaaneran­nik ataq­qin­nin­nini qanoq ersersit­tar­paa?

¹⁴ Jehovap qanoq ilusilersor­taraatigut paasisimagutsigu up­peqatitsin­nut at­taveqarluar­nis­satsin­nut iluaqutaas­saaq. Aam­ma inuit angalaarfigisar­tak­katsin­niit­tut atuaq­qis­saaqativul­lu isumal­luar­tumik isigin­nit­taaseqarfigis­savavut. Biibilip nalaani marrior­tup marraq ilusilersun­ngin­nerani ujaraajarlugulu sukuiaq­qaar­tar­paa. Marrior­torsuup, Jehovap, inuit ilusilersor­neqarumasut ikior­tar­pai. Al­lan­ngor­nis­saan­nik pin­ngitsaalineq ajor­pai, najoq­qutas­siaminil­li minguitsunik ilin­niar­tit­tar­pai. Taava ilik­kak­katik naaper­torlugit al­lan­nguiumanerlutik nam­mineq aalajangis­savaat.

15, 16. Biibilimik atuaq­qis­saaqatigineqar­tar­tut qanoq takutit­tar­paat Jehovamit ilusilersor­tik­kumal­lutik? As­sersuuteqarit.

¹⁵ Ar­naq Australiamiu, Tes­sie, as­sersuutigisin­naavar­put. Biibilimi al­las­simasut paasinis­saat ajor­nakusoor­tin­ngilaa. Anersaak­kul­li siumukan­ngilaq ataatsimiigiar­tar­nanilu. Tes­siemik atuaq­qis­saaqatigin­nit­toq Jehovamut qinoreerluni aalajanger­poq atuaq­qis­saaqatigiit­tar­ner­tik unitsin­niarlugu. Tupaal­laatigisaanil­li pisoqar­poq. Atuaq­qis­saareeramik Tes­siep sooq siumukan­ngin­nini ilin­niar­titsisuminut oqalut­tuaraa. Oqar­poq pisuusaar­tutut misigisimal­luni nam­minermi aningaasanoor­neq nuan­narisuugamiuk. Aningaasanoor­tarun­naar­niarlunili aalajangersimavoq.

¹⁶ Tes­sie ikin­ngutimi ilaan­nit il­laruaatigineqaraluarluni ataatsimiigiar­taler­poq kristumiutul­lu pis­suseqalerluni. Pif­fis­sap ingerlanerani Tes­sie kuisip­poq nukangasunil­lu meeraqaraluarluni pionerin­ngorluni. Ersarip­poq Biibilimik atuaq­qis­saaqatigineqar­tar­tut Guutimik nuan­naar­titsiumal­lutik al­lan­nguiniaraangata Jehovap im­minut kajungilersit­tarai naleqangaar­tutul­lu ilusilersor­tarlugit.

17. (a) Jehovap ilin­nik ilusilersuisuunera sooq nuan­naarutigaajuk? (b) Al­laaserisami tul­liut­tumi suut sam­mis­savavut?

¹⁷ Ul­lumik­kut aam­ma marrior­tut ilaasa marraq kusanar­tumik isik­koqaler­nis­saa tikil­lugu ilusilersoq­qis­saar­tar­paat. Tamatumun­ngalu as­singusumik Jehovap siun­nersuinermigut kamagit­tarluni ilusilersor­tar­paatigut siumukar­nersugul­lu malin­naaf­figeq­qis­saarlugu. (Tus­siaat 32:8 atuaruk). Paasisin­naaviuk Jehovap soqutigalutit ilusilersoq­qis­saar­taraatit? Taamaap­pat pis­suserineqar­tus­sat suut marrar­tut aqitsutut Jehovamit ilusilersor­tin­nis­san­nut iluaqutaas­sap­pat? Marrar­tut man­nger­tutut ilusilersoruminaatsuus­san­ngik­kuit suut pis­suserinaveersaar­tariaqar­pigit? Aam­ma angajoq­qaat meeq­qamik ilusilersor­nis­saan­nut Jehova qanoq suleqatigisin­naavaat? Apeq­qutit taak­ku al­laaserisami tul­liut­tumi akineqas­sap­put.