‘Guutitta oqaasia naassaanngitsumik atassaaq’

1, 2. (a) Biibileqar­nani inuuneq qanoq is­simas­sagaluar­pa? (b) Guutip oqaasianik qanoq pitsaaner­paamik iluaqutigin­nis­sin­naavugut?

BIIBILEQAN­NGIK­KALUARUIT inuunerit qanoq is­sagaluar­pa? Siun­nersuutinik pitsaasunik ul­lut tamaasa malis­sin­naasan­nik malitas­saqas­san­ngik­kaluar­putit. Guuti, inuuneq siunis­sarlu pil­lugit ilumoor­tut ilisimasimas­san­ngik­kaluar­patit. Aam­ma Jehovap itsaq inuit pil­lugit sunik iliuuseqarsimaneranik paasisimasaqas­san­ngik­kaluar­putit.

² Qujanar­tumik pis­sutsit atuk­kavut taamaan­ngil­lat. Jehovap Oqaatsiminik, Biibilimik, tunivaatigut. Taan­na neriorsuivoq tusarlius­saq tamatumaniit­toq atajuarumaar­toq. Apustili Petrusi Esaja 40:8-mi al­las­simasunik is­suaavoq. Versi taan­na Biibilimor­piaq tun­ngan­ngik­kaluar­toq Biibilimi tusarlius­samut tun­ngavoq. (1 Petrusi 1:24, 25 atuakkit). Nam­mineq oqaatsivut atorlugit Biibilimik atuar­tar­ner­put iluaqutiginer­paas­savar­put. Guutip oqaasianik nuan­narin­nit­tut tamatumin­nga ilisiman­nit­tuaan­narsimap­put. Ukiut hundredil­lit ingerlaneran­ni inuit akerlilersor­neqangaaraluarlutik imaan­naan­ngitsorsioraluaqalutil­lu Biibilimik nutseriniarlutik siaruar­teriniarlutil­lu ilungersorlutik sulisimap­put. Jehovap kis­saatigaa inuit sapin­ngisamik amerlaner­paat “an­naan­neqas­sasut sal­lusuis­sum­mil­lu eq­qorluar­tumik ilisimasaqalis­sasut”. – 1 Tim 2:3, 4, NW.

3. Al­laaserisami matumani suna misis­sus­savar­put? (Al­laaserisap aal­laq­qaataani as­siliaq takuuk).

³ Al­laaserisami matumani misis­sus­savar­put Guutip oqaasia qanoq atajuarsimanersoq (1) oqaatsit atugaasut al­lan­ngoraraluar­tut, (2) politik­kik­kut al­lan­ngorar­toqar­neratigut oqaatsit atugaasut al­lan­ngoraluar­tut, (3) Biibilimil­lu nutserinermik akerlilersuisoqaraluar­toq. Misis­suiner­put qanoq iluaqutigis­savar­put? Biibilimik qujamasuutigin­nin­nerulerlutalu taas­sumin­nga Atuak­kior­tumut qujamasun­nerulis­saagut. – Mika 4:2; Rom 15:4.

OQAATSIT ATUGAASUT ALLANNGORARTUT

4. (a) Oqaatsit atugaasut qanoq al­lan­ngoriar­tor­tar­pat? (b) Qanoq ilil­luta nalun­ngilar­put Guuti oqaatsinik aalajangersimasunik pitsaanerutitaqan­ngitsoq, taman­nalu il­lit qanoq isumaqarfigaajuk?

⁴ Pif­fis­saq ingerlatil­lugu oqaatsit atugaasut al­lan­ngorar­tar­put. Oqaatsit oqariar­taatsil­lu aal­laq­qaam­mut isumaat pif­fis­sap ingerlanerani al­latorluin­naq isumaqalersin­naap­put. Im­maqa il­lit oqaatsinit atuk­kan­nit as­sersuutis­saqar­putit. Oqaatsinut itsaq ator­neqar­tunut tun­ngatil­lugu aam­ma taamaap­poq. Oqaatsit ul­lumik­kut hebræerisut grækerisul­lu ator­neqar­tut oqaatsinit Biibilip al­las­simaq­qaarfiini ator­neqar­tunit al­laanerup­put. Biibili itsaq al­lan­neqarmat oqaatsit ator­neqar­tut ul­lumik­kut inuit amerlanersaasa paasisin­naan­ngilaat, nutsik­kanil­lu Biibileqar­tariaqar­put. Inuit ilaat isumaqarsimap­put itsaq hebræerit grækeril­lu oqaaserisimasaan­nik ilin­niarunik Biibilimik paasin­nil­luar­nerusin­naas­sal­lutik. Imaas­sin­naavorli ilin­niar­ner­tik ilimagisamit­tul­li iluaqutigitigin­ngik­kaat. Qujanar­tumik Biibili tamarmi ilaaluun­niit oqaatsinut 3.000-ngajan­nut nutser­neqarsimavoq. Erseq­qip­poq Jehovap kis­saatigigaa inuit ‘inuiaqatigiin­nit naggueqatigiin­nil­lu, im­mik­kut oqaasilin­nit inuian­nil­lu tamaneersut’ Oqaatsini iluaqutigis­sagaat. (Saqqummersitat 14:6 atuaruk). Taman­na ilumut Guutimut, asan­nit­tuul­lunilu kinaas­susersior­tuun­ngitsumut, qanin­nerulersutut misiginar­poq, ilaa? – ApS 10:34.

5. Sooq nutsigaq King James pingaaruteqar­pa?

⁵ Oqaatsit atugaasut al­lan­ngorar­nerat Biibilimik nutserinermut­taaq sun­niuteqar­tar­poq. Nutsigaq saq­qum­mersin­neqaq­qam­merluni atuaruminar­toq kingusin­nerusuk­kut paasiuminaal­lisin­naavoq. As­sersuutigineqarsin­naavoq nutsigaq King James 1611-mi saq­qum­mersin­neqaq­qaar­toq. Taamanik­kut Biibilit tulut­tuut atuarumaneqar­ner­paar­taat ilagiler­paat. Al­laat oqaatsit nutsik­kami King James-imi ator­neqar­tut tulut­tut oqaloriaatsimut sun­niuteqar­put.a Nutsik­kamili tamatumani Jehovap aq­qa ator­neqar­piarsiman­ngilaq. Al­lak­kat Hebræerisuut al­las­simaq­qaarfiini Guutip aq­qa al­las­simagaluar­toq aq­qanut taarsiul­lugu “NAALAGAQ” naqin­nerit angisuut atorlugit al­lan­neqar­tarsimavoq. Naqitik­kani nutaaner­ni Kristumiut Al­lagaataan­ni Grækerisuuni aam­ma oqaaseq “NAALAGAQ” versit ilaan­ni naqin­nerit angisuut atorlugit al­lan­neqar­tarsimavoq. Taamaalil­luni nutsik­kami King James-imi ersersin­neqar­poq Guutip aq­qa Testamentitaami ator­neqarsimasoq.

6. Sooq nutsigaq New World Translation qujamasuutigaar­put?

⁶ Nutsigaq King James saq­qum­mersin­neqaq­qaarmat oqaatsit tulut­tuut ator­neqar­tut ukiut hundredil­lit ingerlaneran­ni paasiuminaal­liar­tor­put. Biibilimik nutsik­kanut pisoq­qanut tulut­tuujun­ngitsunut­taaq tun­ngatil­lugu aam­ma taamaap­poq. Taamaat­tumik qujamasungaar­pugut Biibilimik nutsigaq New World Translation of the Holy Scriptures oqaatsitigut ul­lutsin­nut naleq­qus­sagaq pigigatsigu. Nutsigaq taan­na tamarmi ilaan­naaluun­niit oqaatsinut 150-init amerlanerusunut nutser­neqarsimavoq, taamaalil­lutil­lu nunarsuarmi inuit amerlaner­paar­taasa nam­min­neq oqaatsitik atorlugit atuarsin­naavaat. Oqaatsit ul­lutsin­nut naleq­qut­tut paasiuminar­tul­lu tamatumani ator­neqarmata Guutip tusarlius­saa uum­matitsigut kil­lin­neqaatigisin­naaneruar­put. (Tuss 119:97) New World Translation-il­li im­mik­koorutigisaa tas­saavoq Guutip aq­qata al­las­simaq­qaarfiinut tamanut inis­sin­neqarsimanera.

OQAATSIT ATUGAANERUSUT

7, 8. (a) Sooq 200-k­kun­ni Kr.in.si. juuter­pas­suit Al­lak­kanik Hebræerisuunik paasin­nis­sin­naan­ngil­lat? (b) Septuaginta grækerisooq suua?

⁷ Silarsuarmi politik­kik­kut al­lan­ngorar­nerit pif­fis­sami aalajangersimasumi oqaatsit suut ator­neqar­tar­neran­nut ilaan­nik­kut sun­niuteqar­tarsimavoq. Jehovap qulak­keersimavaa inuit oqaatsit nam­min­neq paasisin­naasatik atorlugit Biibilimik atuarsin­naanis­saat. As­sersuutigalugu al­lak­kat Biibilimiit­tut 39-t siul­liit juutinit, imaluun­niit Israelik­kuusunit, al­lan­neqarsimap­put. Taak­ku ‘Guutip oqaasiinik paarsisuutitaasut’ siul­lersaraat. (Rom 3:1, 2) Taak­kua al­lak­kat taak­ku hebræerisut aramæerisul­lu al­laq­qaar­paat. 200-k­kun­nili Kr.in.si. juuter­pas­suit hebræerisut oqalut­tarun­naarsimap­put. Sooq? Alexanderersuup silarsuup ilarujus­suanik tiguaanerani grækerit naalagaaf­fis­suat siaruarmat. Tamatuma kinguneranik nunani grækerit naalagaaf­figisaan­ni grækerit oqaasii atugaaneruler­put, inup­pas­suil­lu nam­min­neq oqaatsitik atorun­naarlugit grækerisut oqalut­taler­put. (Dan 8:5-7, 20, 21) Aam­ma juuter­pas­suit grækerisut oqalun­nerusaler­put, Biibililu hebræerisooq paasiuminaatsit­taler­paat. Taman­na qanoq iliuuseqarfigineqar­pa?

⁸ Jiisusip inun­ngor­nera sioq­qul­lugu ukiut 250-it mis­siliorlugit al­lak­kat Biibilimiit­tut siul­liit tal­limat grækerisuun­ngor­tin­neqar­put. Kingusin­nerusuk­kut Al­lak­kat Hebræerisuut sin­neri aam­ma nutser­neqar­put. Nutsik­kat taak­ku Septuaginta-tut grækerisuutut ilisimaneqaler­put. Taak­kulu Al­lak­kanik Hebræerisuunik ataatsimoor­tunik nutsik­katut ilisimaneqalersut siul­lersaraat.

9. (a) Septuaginta nutsik­kal­lu itsar­nitsat al­lat Guutip oqaasianik atuar­tar­tunut qanoq sun­niuteqar­pat? (b) Il­lit Al­lak­kani Hebræerisuuni al­las­simaf­fiit sorliit nuan­narineruigit?

⁹ Septuaginta-qarmat juutit grækerisut oqalut­tut Al­lak­kat Hebræerisuut grækerisut atuarsin­naan­ngor­paat. Takorloorsin­naaviuk Guutip oqaasia nam­min­neq oqaatsitik atorlugit atuar­neqar­toq tusar­naarsin­naagamik imaluun­niit atuarsin­naagamik qanoq nuan­naar­tigisimas­sasut? Kingusin­nerusuk­kut Biibilip ilaa oqaatsinut taamanik­kut ator­neqar­tunut, soorlu Syriamiusuumut, goterisuumut latiinerisuumul­lu, nutser­neqar­poq. Inuit amerliar­tuin­nar­tut Guutip oqaasia atuarsin­naal­lugulu paasisin­naaleramik­ku aam­ma nam­min­neq nuan­nariler­paat. Uagul­lu ul­lumik­kut pisin­naanitsitut versinik aalajangersimasunik nuan­narisaqarsin­naaler­put. (Tussiaat 119:162-165 atuakkit). Aap, Guutip oqaasia atajuarsimavoq politik­kik­kut al­lan­ngorar­toqaraluar­toq oqaatsil­lu ator­neqar­tut al­lan­ngoraraluar­tut.

BIIBILIMIK NUTSERINERMIK AKERLILERSUINEQ

10. John Wycliffep nalaani sooq inuit amerlanersaasa Biibili atuarsin­naan­ngilaat?

¹⁰ Ukiut ingerlaneran­ni nunani siut­tuusut pis­saanil­lit inuit Biibilimik atuaq­qunagit akor­nusiiniar­tar­put. Angutil­li Guutimik mianerin­nit­tut Biibilip kik­kun­nit tamanit atuar­neqarsin­naaler­nis­saanik suliniuteqar­ner­tik unitsin­ngilaat. Angutit taak­kua ilagaat John Wycliffe, 1300-k­kun­ni Tuluit Nunaan­niit­toq. Taan­na isumaqar­poq kik­kut tamarmik Biibilimik atuarsin­naasariaqar­tut. Taan­na inuutil­lugu Tuluit Nunaan­ni inuit amerlanersaat tusarlius­saq Biibilimiit­toq pil­lugu tulut­tut tusagaqarsiman­ngisaan­nar­put. Taamanik­kut Biibilit akisoorujus­suup­put tamarmil­lu im­mik­kut as­sam­mik al­lan­neqar­tariaqarlutik. Taamaat­tumik inuit ikit­tuin­naat Biibileqar­put. Aam­ma taamanik­kut inuit amerlaner­paar­taat atuarsin­naan­ngil­lal­luun­niit. Naalagiar­tar­tut Biibili latiinerisut atuar­neqar­toq tusar­naarsimasin­naavaat, latiineril­li oqaasii oqaasitoqaap­put inuin­naat paasisin­naan­ngisaat. Inuit nam­min­neq oqaatsimin­nut nutsik­kamik Biibileqarsin­naanis­saat Jehovap qanoq ilil­luni qulak­keer­paa? – Uss 2:1-5.

11. Biibili Wycliffemit nutsigaq qanoq sun­niuteqar­pa?

¹¹ 1382-imi John Wycliffep al­lal­lu Biibili tulut­tuun­ngorlugu nutser­paat. Biibili Wycliffemit nutsigaq inun­nit eqimat­tanit Lol­lardinik taaneqar­tar­tunit nuan­narineqar­torujus­suan­ngor­poq. Tuluit Nunaan­ni tamarmi nunaqarfin­niit nunaqarfin­nut pisuin­narlutik angalasar­put. Lol­lardit inuit Biibilimik atuf­fat­tar­paat tamatumalu ilaanik ilaarsil­luni as­sam­mik al­laq­qitanik tunisarlugit. Taak­ku tamatumin­nga suliniuteqarmata Biibili nuan­narineqarlualeq­qip­poq.

12. Wycliffe taas­sumalu suliaa palasinit qanoq isumaqarfigineqar­pat?

¹² Palasit Wycliffemik, taas­suma malin­nit­taanik Biibilimil­lu nutsigaanik uumis­suip­put. Lol­lardinik malersuip­put Biibilinil­lu Wyclif­fep nutsigaanik nas­saarisin­naasamin­nik tamanik suujun­naarsitsil­lutik. Wycliffe toqoreeraluar­toq al­laat palasinit ajoqersuinerlut­tutut, imaluun­niit oqaluf­fim­mut akeraasutut, suaarutigineqar­poq. Taas­suma saar­ngi as­sal­lugit qaqeriarlugit ikual­lap­paat arsakuilu kuum­mut Swiftimut igil­lugit. Inup­pas­suil­li Guutip oqaasianik atuarusul­lutil­lu paasin­nik­kusup­put, oqaluf­fil­lu tamatumin­nga unitsitsisin­naan­ngilaq. Ukiuni hundredilin­ni tul­liut­tuni inuit Europamiit­tut nunarsuul­lu ilaani al­lamiit­tut oqaatsinut inup­pas­suit paasisin­naasaan­nut Biibilimik nutserisalerlutil­lu naqiterisaler­put.

“ILUAQUTAASUNIK ILINNIK AJOQERSUISOQ”

13. Suna qularutigin­ngil­luin­nar­par­put, taman­nalu up­per­nitsin­nut qanoq nakus­satsis­sutaava?

¹³ Biibili Guutimit isumas­sarsiarititaavoq. Imaan­ngilarli nutsigaq Septuaginta, Biibili Wycliffep nutsigaa, nutsigaq King James nutsik­kal­luun­niit al­lat Guutimit toq­qaan­nar­tumik isumas­sarsiarititaasut. Taak­kuali qanoq nutser­niar­neqarsimaneran­nik misis­suigaangat­ta erseq­qis­sisar­poq Jehovap neriorsuisimaneratut Oqaasia atajuarsimasoq. Taman­na Jehovap sunut al­lanut­taaq tamanut tun­ngatil­lugu neriorsuutaasa eq­quuk­kumaar­neran­nik up­perin­nin­nitsin­nut nakus­satsis­sutaasar­poq. – Jos 23:14.

14. Biibili pil­lugu paasisavut qanoq ilil­luta Guutimik asan­nin­nerulis­sutigaavut?

¹⁴ Jehova oqaatsiminik qanoq il­lersuisimanersoq paasigaangatsigu taas­sumun­nga up­persuseqar­neruler­tarlutalu asan­nin­neruler­tar­pugut.b Sooq Jehovap Biibili uagutsin­nut tun­niup­paa kingor­nalu neriorsorluta il­lersorumaarlugu? Asagamisigut uagutsin­nul­lu iluaqutaasunik ilin­niar­tik­kusuk­kamisigut. (Esaja 48:17, 18 atuakkit). Taman­na taas­sumun­nga asan­nin­nis­samut naalan­nis­samul­lu kajumis­sis­sutigaar­put. – 1 Joh 4:19; 5:3.

15. Al­laaserisami tul­liut­tumi suut sam­mis­savavut?

¹⁵ Guutip oqaasianik nuan­narin­ningaar­pugut, taamaat­tumik nam­mineq Biibilimik atuar­ner­put qanoq ilil­luta pis­sarsif­figil­luarsin­naavar­put? Oqaluus­sif­figisavut Biibilimik qujamasuutigin­nileq­qul­lugit qanoq ikiorsin­naavavut? Ilagiin­ni ilin­niar­titsisar­tut ilin­niar­titsis­sutigisamik Guutip oqaasianut naaper­tuun­nis­saat qanoq ilil­lutik qulak­keer­tarsin­naavaat? Apeq­qutit taak­ku al­laaserisami tul­liut­tumi sam­mis­savavut.