INUUSUTTUT APERIPPUT
Peerariinneq – Immikkoortoq 1: Peeraqalernissamut piareersimavunga?
Allaaserisami matumaniipput
Peerariinneq suua?
Inuit ilaasa peerariinneq ikinngutigiittut nuannisaqatigiinnerinnartut isigisarpaat. Allaaserisamili matumani peerariinneq eqqartorneqaraangat angutip arnallu katissanerlutik paasiniarumallugu imminnut samminerat pineqartarpoq. Tassa peerariinneq siunertaqarpoq. Ajuutigineqarneq aliikkutaannartut isigineqassanngilaq.
Peerariittut naggataatigut aalajangertussaapput – tassa aalajangertariaqarput katinniarnerlutik peerariikkunnaarniarnerlutilluunniit. Taamaattumik peeraqarusukkuit aalajangiinerpit kingunerinut piareersimanissat qulakkeertariaqarpat.
Inerniliineq: Isumaqaruit peeraqalernissamut piareersimallutit aamma katinnissamut piareersimassaatit.
Katinnissaq siunertarinagu peeraqarnerup assigiinnarpaa suliumanani suliffissarsiorneq
Peeraqalernissamut piareersimavit?
Peerariinneq katinnermik kinguneqarsinnaammat eqqarsaatigisariaqarpat pissuserisartakkatit aappariittut inuulerussi iluaqutaassanerlutilluunniit ajoqutaassanersut. Assersuutigalugu uku eqqarsaatigikkit:
Ilaquttannut attaveqarnerit. Aappartaaruit aappannik qanoq pinnittarnissat angajoqqaannik qatanngutinnillu qanoq pinnittarnernit – ingammik stresserninni – takutinneqarsinnaavoq.
Najoqqutassiaq Biibilimeersoq: “Piissavasi narrutsassimanerit, kamannerit, kamarujussuarnerit, nillianerit, ajuallannartumik oqalunnerit ajoqutaasullu suulluunniit.” – Efesossimiut 4:31.
Imminut qiviarit: ‘Angajoqqaakka qatanngutikkalu isumaqarpat uannit ataqqinnittumik pineqartarlutik? Isumaqatiginngikkaangakkit eqqissillunga oqaloqatigisinnaasarpakka, imaluunniit kamalertarpunga uteriillungalu?’
Angajoqqaatillu isumaqatigiinngikkaangassi qisuariapiloortaruit taava ilimanassava aappaqaleruit taamaassanngitsutit?
Allanik salliussineq. Aappaqaruit aapparpit kissaatai eqqarsaatigisariaqarpatit, aamma kissaataasa salliunnissaat piareersimaffigisariaqarpat.
Najoqqutassiaq Biibilimeersoq: “Tamassi immikkut iluaqutissarsi pinnagu allap iluaqutissaa salliussiuk.” – Korintimiunut 1. 10:24.
Imminut qiviarit: ‘Uanga isumaga pingaarnerpaatittuaannarpara? Allat isumaqarpat tusarnaartarikka naleqqussarsinnaasungalu? Qanoq takutinnikuuara allat pisariaqartitaat uanga pisariaqartitannit salliullugit?’
Maniguunneq. Aappaalluartoq kukkussutiminik nassuerutiginnilluni ilumoorluni utoqqatsersinnaavoq.
Najoqqutassiaq Biibilimeersoq: ‘Tamatta kukkoqattaartarpugut.’ – Jaaku 3:2.
Imminut qiviarit: ‘Kukkusimagaangama nassuerutigisarpara, imaluunniit utoqqatsissutissarsiortarpunga? Aaqqitassaqartunga oqarfigineqaraangama arrallungalu kamattarpunga?’
Aningaasaqarniarneq. Aappariippassuit aningaasat pillugit oqqattarput. Taamaattumik aningaasanik atuinerit aqulluarsinnaagukku aappariinnissinnut iluaqutaassaaq.
Najoqqutassiaq Biibilimeersoq: “Kina arlarsi napasulialiorniartoq ingeqqaassannginnerpa naatsorsorniarlugu naammassinissaanut akissaqarnerluni?” – Lukkarsi 14:28.
Imminut qiviarit: ‘Aningaasanik atuinera aqulluarsinnaavara, imaluunniit akiitsoqartarpunga? Qanoq takutinnikuuara aningaasanik atuinera aqulluarsinnaallugu?’
Upperisamik pingaartitsisineq. Jehovamik Nalunaajaasuuguit ilimanarpoq Biibilimik misissuisarlutillu ataatsimiigiartartutit.
Najoqqutassiaq Biibilimeersoq: “Pilluarput Guutimit siulersorneqartariaqarnerminnik eqqumaffiginnittut.” – Matiusi 5:3, quppernerup ataani ilanngussaq.
Imminut qiviarit: ‘Peqquneqanngikkaluarlunga uppernera nakussatsikkumallugu iliuuseqartarpunga? Upperisara pingaarnerpaatippara, imaluunniit upperisara pillugu iliuuseqaraangama allamut saaqqajaasarpunga?’
Inerniliineq: Katitassat pitsaanerpaamik tunerusuppat. Aamma aappaalluarnissat sulissutigigukku aappartaarluarnissat ilimanarnerussaaq.