Qaartartut atomitallit atorlugit sorsunneq – Biibilimi qanoq allassimasoqarpa?

Naalagaaffiit pissaaneqar­nerpaat qaartartunik atomitalinnik sanaartor­tuarmata qaartartut atomitallit atorlugit sorsunnissaq sioorasaarutigineqar­tuarpoq. Tupinnanngilaq qaartartut atomitallit amerliar­tuinnarnerat taakkulu atorlugit sorsunnersuaqaratarsin­naanera inuit ernumas­sutigimmassuk. Allaat annikitsun­nguamil­luunniit atomip nukinganik atuinerup nunarsuup suujunnaar­neranik kinguneqarnissaa annilaan­ngatigineqarpoq. Bulletin of the Atomic Scientists naapertorlugu “qaartartut atomitallit atorlugit sorsunneqaler­nissaanik aarlerinar­torsiorfiusumi inuuvugut”.

Qaartartut atomitallit atorlugit sorsunneqaleriaannaava? Taamaat­toqassappallu nunarsuaq suujunnaarsin­neqassava? Qaartartut atomitallit atorlugit sorsunneqaleratarsin­naaneranik annilaangas­suteqarutta sussaagut? Biibilimi qanoq allassimasoqarpa?

Allaaserisami matumani

• Qaartartut atomitallit atorlugit sorsuttoqarnissaa Biibilimi siulittuutigineqarpa?

• Qaartartut atomitallit atorlugit sorsuttoqarnissaa Guutip akuerissavaa?

• Nunarsuaq atajuaan­nassava?

• Atomip nukinganik ernumas­suteqar­tuaruit susinnaavit?

• Qaartartut atomitallit atorlugit “Hamagedon­neqarnissaa” Biibilimi siulittuutigineqarpa?

• Biibili naapertorlugu sorsunnerit qanoq unitsin­neqassappat?

• Biibilip atuagartaani Saqqummersitani atomip nukinga atorlugu sorsunneq eqqaaneqarpa?

Qaartartut atomitallit atorlugit sorsuttoqarnissaa Biibilimi siulittuutigineqarpa?

Qaartartut atomitallit atorlugit sorsuttoqarnissaa Biibilimi toqqaan­nartumik eqqaaneqanngilaq. Taamaattorli isiginnit­taatsit pisartullu Biibilimi siulittuutigineqartut kinguneraat atomip nukinga atorlugu sorsunnermik siooranar­toqarnera.

Nalitsinni pisartut Biibilimi qanoq siulittuutigineqarsimanerat eqqarsaatigeriaruk:

Biibilimi allassimasoq: Jiisusip ilinniartitai aperipput: “Illit najuunnissannut naggatissallu nalaanut suna ilisarnaataassava?” Jiisusip akivai: “Inuiaqatigiit inuiaqatigiinnik allanik saassus­sisassapput naalagaaffillu naalagaaffimmik allamik saassus­sisassalluni.” – Matiusi 24:3, 7.

Nunarsuarmi pisartut: Nunat atomitalinnik sakkussiaatillit taamaat­tunilluunniit sanaartorsinnaasut sorsukkajun­nerusarput.

“Ukiuni kingullerni nunarsuarmi peqqarniisaarnerit sakkortusipiloorsimapput. Akersuunnerit amerliar­tuinnavipput.” – The Armed Conflict Location & Event Data Project.

Biibilimi allassimasoq: ‘Naggatissap nalliuf­fissaagut Kujalliup kunngia Avannarliullu kunngia aporaak­kumaarput.’ – Danieli 11:40.

Nunarsuarmi pisartut: Biibilimi siulittuutigineqartutut naalagaaffiit akerleriit taakkualu ilii pissaaneqar­niutissapput. Nalitsinni atomitalinnik sakkussiaatilissuit toqqaan­nartumik imminnut saassutin­ngikkaluarlutik qaartartunik atomitalinnik sakkortusiar­tuinnartunik sanaartor­tuarput.

“Ukiuni qulini kingullerni naalagaaffiit akornanni akersuunnernut amerliar­tuinnartunut, aamma pissaanilissuit illersuk­kaminnik tapersersuinerinut takunnit­tuusimavugut.” – The Uppsala Conflict Data Program.

Biibilimi allassimasoq: ‘Nalussanngilat ulluni kingullerni pissutsit anigoruminaal­lutillu erloqinassasut. Inuimmi tassaalerumaarput saammar­titassaan­ngitsut, nikassaallutik salluliuutigin­nittartut, imminut aqussin­naanngitsut, saassus­siumatuut.’ – Timuutiusimut 2. 3:1-3.

Nunarsuarmi pisartut: Nunarsuarmi siuttut – inuit amerlanerit assigalugit – isumaqatigiin­ngikkulasarput. Isumaqataan­nginnertik eqqissisimasumik aaqqinniarnagu pissaaneqarnertik sakkugalugu sioorasaarinikkut ersersin­niartarpaat. Taamatut pissusilersor­tarnermikkut atomip nukinganik atueriaannaaneq ernumanarsisarpoq.

“Suleqatigiinnikkut aaqqiis­suteqar­toqanngippat akersuunnerit toqumik kinguneqartartut amerliar­tuinnassapput.” – S. Saran aamma J. Harman, World Economic Forum.

Qaartartut atomitallit atorlugit sorsuttoqarnissaa Guutip akuerissavaa?

Tamanna pillugu Biibilimi allassimanngilaq. Allassimavoq ullutsinni “annilaar­nartunik” pisoqar­tarumaartoq. (Lukkarsi 21:11) Taama pisoqartartut ilagaat sorsunnersuarmi kingullermi qaartartut atomitallit atorneqarsimanerat. Sooq Guutip sorsunnerit akuerigal­larnerai Biibilimi nassuiar­neqarpoq. Tamanna pillugu paasisaqar­nerujumallutit takuuk video Sooq Guutip naalliunnerit akuerai?

Nunarsuaq atajuaan­nassava?

Aap. Atomip nukinga atorlugu sorsuttoqaq­qilissagaluarpat nunarsuup suujunnarnissaa Guutip akuerinavianngilaa. Biibilimi allassimavoq nunarsuup ataannar­nissaanut aarlerinar­torsior­titsisut suujunnaarsiin­narnagit aammali inunnut naassaan­ngitsumik inuuffigiuminar­tunngussasoq.

Inuit ilaasa takorloor­tarpaat siunissami inuit ikittuinnaat nunamit atomip qinngor­nerinit mingutsin­neqarsimasumit inuit aniguissasut. Biibilimili allassimavoq sorsunnerit pissutigalugit nunarsuarmik aseruisinnaasut suulluunniit iluatsin­ngilluin­nassasut.

Pinngor­titsisitta nunarsuaq tupinnarluin­nartumik nammineq iluarsarsin­naatillugu pinngor­tissimavaa. Aamma nalunngilarput Guutip nukini atorlugu nunarsuaq iluarsar­tuutissagaa: Nunarsuaq naassaan­ngitsumik inunnut angerlarsimaf­finngussaaq alutornangaartoq. – Tussiaat 37:11, 29; Saqqummersitat 21:5.

Atomip nukinganik ernumas­suteqar­tuaruit susinnaavit?

Inuit ilaat qaartartut atomitallit atorlugit sorsuttoqaler­nissaanik tamatumalu kingunipilussaanik ernumas­suteqar­tuarput. Taamatut annilaangas­suteqartut Biibilimi neriorsuutit siunnersuutillu ernumas­suteqarun­naarnis­saminnut iluaqutigisin­naavaat. Qanoq?

Nunarsuup tassanilu najugaqartut siunissaat nuanningaartoq Biibilimi allaatigineqarpoq. Neriuut tamanna pillugu ilikkagaqarnerup assigissavaa neriuut ‘inuunitsinnut kitsatut isumannatsutut ittoq’. (Hebræerit 6:19, q.a.i.) Aamma siunissami ajortunik pisoqarsin­naanera eqqarsaatigival­laarnagu ullunik ataasiak­kaarinitsinni ernumas­suteqarnerput annikil­lisarsin­naavarput. Jiisusip oqarneratut ‘aqagussaq isumakuluutigis­sanngilarput, aqagumi allanik isumakuluutis­saqassaaq’. – Matiusi 6:34.

Eqqarsaatikkut misigis­sutsikkullu peqqissutsip illersornissaa pingaaruteqarpoq. Taamaaliorsin­naavugut nutaarsiassanik ernumanartunik atuartarnerup, isiginnaar­tarnerup tusarnaar­tarnerullu killilersimaar­tarnerisigut. Tamanna piviusunik isiginnin­ngitsuusaarinerunngilaq. Taamaalioruttami nammineq iliuuseqarfigisin­naanngisatsinnik immaqalu piviusun­ngunngisaan­nartussanik isumakuluuteqar­tuarnaveersaarsin­naavugut.

Inuuninni isumalluar­nartunik eqqarsaateqar­tuarnikkut nutaarsiassat nuannin­ngitsut eqqarsaatigival­laarnis­saannut imminut illersorit.

Guutip neriorsuutaanik ilisimasaqar­neruleruit neriuuteqalissaatit, nuannaar­nerulissaatit qamuunalu eqqissisimalis­sallutit.

Qaartartut atomitallit atorlugit “Hamagedon­neqarnissaa” Biibilimi siulittuutigineqarpa?

Inuit ilaat isumaqarput Harmagedonni qaartartut atomitallit atorlugit sorsunnermut atassuteqartoq. Qularnan­ngitsumik taama pisoqas­sagaluarpat ajorluin­nartumik kinguneqarnissaa takorloor­taramikku.

Kisianni oqaaseq “Harmagedonni” Biibilimi eqqaaneqartoq “nunarsuarmi tamarmi kunngit”, tassa naalakkersuisut, Guutillu akornanni sorsunneruvoq.a (Saqqummersitat 16:14, 16) Qaartartut atomitallit aseruil­luinnarsin­naanerattut innani Harmagedonni nalaatsornikkut inunnik eqquinaviarnanilu nunarsuarmik aseruinavianngilaq. Harmagedonnimi Guutip ajortut kisiisa suujunnaarsissavai atuutilersis­sallugillu eqqissineq isumannaatsuunerlu. – Tussiaat 37:9, 10; Esaja 32:17, 18; Matiusi 6:10.

Biibili naapertorlugu sorsunnerit qanoq unitsin­neqassappat?

Jehovapb Guutip pissaanini atorlugu inuiaqatigiit akersuunnerat unitsissavaa sorsunnermullu sakkut aserorterlugit. Taamaaliussaarlu Kunngeqarfini, nunarsuarmi tamarmi qilammiit naalakkersuilerumaartussaq, aqqutigalugu. – Danieli 2:44.

Guutip Kunngeqarfini aqqutigalugu inuit eqqisseqatigiillutik akaareqatigiil­lutillu inooqatigiin­nissaannik ilinniar­tissavai. Kunngeqarfik ataasiinnaq nunarsuaq tamakkerlugu naalakkersuisus­saagami nunat assigiin­ngitsut akornanni assortuut­tuerutissaaq, allaallu inuit sorsunneq ilinniarun­naassavaat! (Mika 4:1-3) Suna kingunerissavaa? “Tamarmik eqqissillutik inuussapput viinnequtaatimik figenequtaatimillu ataanni kimilluunniit peersin­neqarnatik.” – Mika 4:4.