Diaavulu kinaassusiliviua?
Akissut Biibilimeersoq
Aap, Diaavulu kinaassusiliviuvoq. Tassaavoq ‘silarsuup naalagaanera’, anersaaq ajortunngorluni Guutimut pikitsitsisimasoq. (Johannesi 14:30; Efesosimiut 6:11, 12) Diaavulup kinaassusia Biibilimi ersersinneqarpoq taaguutaatigut ukunatigut:
Saatani, isumaqartoq “akerlilersuisoq”. – Jobi 1:6.
Diaavulu, isumaqartoq “mamarliisoq”. – Saqqummersitat 12:9.
Pulateriaarsuk, ilaannikkut Biibilimi “nakutitsisartumut” tunngatinneqartartoq. – 2 Korinthimiut 11:3.
Ussiisoq. – Matthæusi 4:3.
Sallutooq. – Johannesi 8:44.
Tassaanngilaq ajussuseq inummiittoq
Inuit ilaat isumaqarput Saatani Diaavulu tassaasoq ajussuseq ilutsinniittoq. Biibilimili Guutip Saatanillu oqaloqatigiinnerat oqaluttuarineqarpoq. Guuti naammalluinnartuugami iluminiittumut ajortumut oqalussimanavianngilaq. (5 Mosesi 32:4; Jobi 2:1-6) Aamma Jiisusi ajorteqanngitsoq Saatanimit usserneqarpoq. (Matthæusi 4:8-10; 1 Johannesi 3:5) Tassa Biibilimi ersersinneqarpoq Diaavulu kinaassusiliviusoq tassaanani ajussuseq kinaassusillip iluaniittoq.
Inuppassuit Diaavulup piunera upperinngimmassuk tupaallannarpa? Naamik, Biibilimi allassimavoq Saatani anguniakkani angujumallugit peqquserluttartoq. (2 Thessalonikamiut 2:9, 10) Inuppassuit tappiillisinnerisigut piunnginnerminik isumaqalersitsinera nakutitsinerisa annerpaartaasa ilagaat. – 2 Korinthimiut 4:4.
Diaavulu pillugu kukkusumik isummernerit allat
Kukkusoq: Lucifer Diaavulup atiisa ilagaat.
Eqqortoq: Hebræerit oqaasiat Biibilimik nutsikkat ilaanni ‘Luciferimik’ nutserneqartoq isumaqarpoq “qaammarissoq”. (Esaja 14:12) Versit ataqatigiinnerannit erserpoq Babylonimi kunngit kinguaariit, makitasuujunerat pillugu Guutimit nikanarsarneqartussat, pineqartut. (Esaja 14:4, 13-20) Babylonimiut kunngii suujunnaarsinneqarsimasut mitaatiginiarlugit oqaaseq “qaammarissoq” atorneqarpoq.
Kukkusoq: Guutip Saatani ‘unnerluussisutut’ sulisippaa.
Eqqortoq: Diaavulu Guutimut akeraavoq taassumunnga kiffaanani. Saatanip Diaavulup inuit Guutimik pallorfiginnittut akerlilersorlugillu eqqunngitsumik unnerluutigisarpai. – 1 Petrusi 5:8; Saqqummersitat 12:10.